说六随念品

Cha-anussatiniddeso

Buddhānussatikathā

CST123

1

Asubhânantaraṃ uddiṭṭhāsu pana dasasu anussatīsu, punappunaṃ uppajjanato sati yeva anussati, pavattitabbaṭṭhānamhi yeva vā pavattattā saddhāpabbajitassa kulaputtassa anurūpā satī ti pi anussati.

1. Buddhaṃ ārabbha uppannā anussati Buddhânussati, Buddhaguṇârammaṇāya satiyā etam adhivacanaṃ.
2. Dhammaṃ ārabbha uppannā anussati dhammânussati, svākkhātatâdi-dhammaguṇârammaṇāya satiyā etam adhivacanaṃ.
3. Saṅghaṃ ārabbha uppannā anussati saṅghânussati, suppaṭipannatâdi-saṅghaguṇârammaṇāya satiyā etam adhivacanaṃ.
4. Sīlaṃ ārabbha uppannā anussati sīlânussati, akhaṇḍatâdi-sīlaguṇârammaṇāya satiyā etam adhivacanaṃ.
5. Cāgaṃ ārabbha uppannā anussati cāgânussati, muttacāgatâdi-cāgaguṇârammaṇāya satiyā etam adhivacanaṃ.
6. Devatā ārabbha uppannā anussati devatânussati, devatā sakkhiṭṭhāne ṭhapetvā attano saddhâdi-guṇârammaṇāya satiyā etam adhivacanaṃ.
7. Maraṇaṃ ārabbha uppannā anussati maraṇânussati, jīvitindriyupacchedârammaṇāya satiyā etam adhivacanaṃ.
8. Kesâdi-bhedaṃ rūpakāyaṃ gatā, kāye vā gatā ti kāyagatā, kāyagatā ca sā sati cā ti kāyagatasatī ti vattabbe rassaṃ akatvā kāyagatāsatī ti vuttā, kesâdi-kāyakoṭṭhāsa-nimittârammaṇāya satiyā etam adhivacanaṃ.
9. Ānāpāne ārabbha uppannā sati ānāpānassati, assāsa-passāsa-nimittârammaṇāya satiyā etam adhivacanaṃ.
10. Upasamaṃ ārabbha uppannā anussati upasamânussati, sabbadukkhûpasamârammaṇāya satiyā etam adhivacanaṃ.

CST124

2

Iti imāsu dasasu anussatīsu Buddhânussatiṃ tāva bhāvetukāmena avecca-ppasāda-samannāgatena yoginā patirūpa-senāsane rahogatena paṭisallīnena

“Iti pi so Bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ Buddho Bhagavā” ti (a. ni. 6.10)

evaṃ Buddhassa Bhagavato guṇā anussaritabbā.

3

Tatrâyaṃ anussaraṇanayo. “So Bhagavā iti pi arahaṃ, iti pi sammāsambuddho…pe… iti pi Bhagavā” ti anussarati, iminā ca iminā ca kāraṇenā ti vuttaṃ hoti.

CST125

4

Tattha ārakattā, arīnaṃ arānañ ca hatattā, paccayâdīnaṃ arahattā, pāpakaraṇe rahâbhāvā ti imehi tāva kāraṇehi so Bhagavā arahan ti anussarati.

5

Ārakā hi so sabbakilesehi suvidūravidūre ṭhito, maggena savāsanānaṃ kilesānaṃ viddhaṃsitattā ti ārakattā arahaṃ.

So tato ārakā nāma yassa yenâsamaṅgitā,
asamaṅgī ca dosehi Nātho tenârahaṃ mato ti.

CST126

6

Te cânena kilesârayo maggena hatā ti arīnaṃ hatattā pi arahaṃ.

Yasmā rāgâdi-saṅkhātā sabbe pi arayo hatā
paññāsatthena Nāthena, tasmā pi arahaṃ mato ti.

CST127

7

Yañ c’etaṃ avijjā-bhava-taṇhā-maya-nābhi puññâdi-abhisaṅkhārâraṃ jarāmaraṇa-nemi āsavasamudayamayena akkhena vijjhitvā tibhava-rathe samāyojitaṃ anādikālappavattaṃ saṃsāra-cakkaṃ, tassânena Bodhimaṇḍe vīriya-pādehi sīla-pathaviyaṃ patiṭṭhāya saddhā-hatthena kammakkhayakaraṃ ñāṇa-pharasuṃ gahetvā sabbe arā hatā ti arānaṃ hatattā pi arahaṃ.

CST128

8

Atha vā saṃsāracakkan ti anamataggaṃ saṃsāravaṭṭaṃ vuccati, tassa ca avijjā nābhi mūlattā, jarāmaraṇaṃ nemi pariyosānattā, sesā dasa dhammā arā avijjāmūlakattā jarāmaraṇapariyantattā ca.

9

Tattha dukkhâdīsu aññāṇaṃ avijjā, kāmabhave ca avijjā kāmabhave saṅkhārānaṃ paccayo hoti. Rūpabhave avijjā rūpabhave saṅkhārānaṃ paccayo hoti. Arūpabhave avijjā arūpabhave saṅkhārānaṃ paccayo hoti.

10

Kāmabhave saṅkhārā kāmabhave paṭisandhiviññāṇassa paccayā honti. Esa nayo itaresu.

11

Kāmabhave paṭisandhiviññāṇaṃ kāmabhave nāmarūpassa paccayo hoti. Tathā rūpabhave. Arūpabhave nāmass’eva paccayo hoti.

12

Kāmabhave nāmarūpaṃ kāmabhave saḷāyatanassa paccayo hoti. Rūpabhave nāmarūpaṃ rūpabhave tiṇṇaṃ āyatanānaṃ paccayo hoti. Arūpabhave nāmaṃ arūpabhave ekassa āyatanassa paccayo hoti.

13

Kāmabhave saḷāyatanaṃ kāmabhave chabbidhassa phassassa paccayo hoti. Rūpabhave tīṇi āyatanāni rūpabhave tiṇṇaṃ phassānaṃ paccayā honti. Arūpabhave ekaṃ āyatanaṃ arūpabhave ekassa phassassa paccayo hoti.

14

Kāmabhave cha phassā kāmabhave channaṃ vedanānaṃ paccayā honti. Rūpabhave tayo phassā tatth’eva tissannaṃ. Arūpabhave eko tatth’eva ekissā vedanāya paccayo hoti.

15

Kāmabhave cha vedanā kāmabhave channaṃ taṇhākāyānaṃ paccayā honti. Rūpabhave tisso tatth’eva tiṇṇaṃ. Arūpabhave ekā vedanā arūpabhave ekassa taṇhākāyassa paccayo hoti. Tattha tattha sā sā taṇhā tassa tassa upādānassa, upādānâdayo bhavâdīnaṃ.

16

Kathaṃ? Idh’ekacco “kāme paribhuñjissāmī” ti kāmupādānapaccayā kāyena duccaritaṃ carati, vācāya duccaritaṃ carati, manasā duccaritaṃ carati, duccaritapāripūriyā apāye upapajjati. Tatth’assa upapattihetubhūtaṃ kammaṃ kammabhavo, kammanibbattā khandhā upapattibhavo, khandhānaṃ nibbatti jāti, paripāko jarā, bhedo maraṇaṃ.

17

Aparo “saggasampattiṃ anubhavissāmī” ti tath’eva sucaritaṃ carati, sucaritapāripūriyā sagge upapajjati. Tatth’assa upapattihetubhūtaṃ kammaṃ kammabhavo ti so eva nayo.

18

Aparo pana “Brahmalokasampattiṃ anubhavissāmī” ti kāmupādānapaccayā eva mettaṃ bhāveti, karuṇaṃ, muditaṃ, upekkhaṃ bhāveti, bhāvanāpāripūriyā Brahmaloke nibbattati. Tatth’assa nibbattihetubhūtaṃ kammaṃ kammabhavo ti so eva nayo.

19

Aparo “arūpabhave sampattiṃ anubhavissāmī” ti tath’eva ākāsānañcâyatanâdi-samāpattiyo bhāveti, bhāvanāpāripūriyā tattha tattha nibbattati. Tatth’assa nibbattihetubhūtaṃ kammaṃ kammabhavo, kammanibbattā khandhā upapattibhavo, khandhānaṃ nibbatti jāti, paripāko jarā, bhedo maraṇan ti. Esa nayo sesupādānamūlikāsu pi yojanāsu.

20

Evaṃ ayaṃ,

“Avijjā hetu, saṅkhārā hetusamuppannā, ubho p’ete hetusamuppannā ti paccayapariggahe paññā dhammaṭṭhitiñāṇaṃ. Atītam pi addhānaṃ anāgatam pi addhānaṃ avijjā hetu, saṅkhārā hetusamuppannā, ubho p’ete hetusamuppannā ti paccayapariggahe paññā dhammaṭṭhitiñāṇan” ti (paṭi. ma.)

eten’eva nayena sabbapadāni vitthāretabbāni.

21

Tattha avijjā-saṅkhārā eko saṅkhepo, viññāṇa-nāmarūpa-saḷāyatana-phassa-vedanā eko, taṇhupādāna-bhavā eko, jāti-jarāmaraṇaṃ eko.

Purimasaṅkhepo c’ettha atīto addhā, dve majjhimā paccuppanno, jāti-jarāmaraṇaṃ anāgato.

Avijjāsaṅkhāra-ggahaṇena c’ettha taṇhupādāna-bhavā gahitā va hontī ti ime pañca dhammā atīte kammavaṭṭaṃ, viññāṇâdayo pañca etarahi vipākavaṭṭaṃ, taṇhupādāna-bhava-ggahaṇena avijjā-saṅkhārā gahitā va hontī ti ime pañca dhammā etarahi kammavaṭṭaṃ, jāti-jarāmaraṇâpadesena viññāṇâdīnaṃ niddiṭṭhattā ime pañca dhammā āyatiṃ vipākavaṭṭaṃ. Te ākārato vīsatividhā honti.

Saṅkhāra-viññāṇānañ c’ettha antarā eko sandhi, vedanā-taṇhānam antarā eko, bhava-jātīnam antarā eko ti.

22

Iti Bhagavā etaṃ catusaṅkhepaṃ tiyaddhaṃ vīsatâkāraṃ tisandhiṃ paṭiccasamuppādaṃ sabbâkārato jānāti passati aññāti paṭivijjhati.

“Taṃ ñātaṭṭhena ñāṇaṃ, pajānanaṭṭhena paññā, tena vuccati paccayapariggahe paññā dhammaṭṭhitiñāṇan” ti. (paṭi. ma.)

Iminā dhammaṭṭhitiñāṇena Bhagavā te dhamme yathābhūtaṃ ñatvā tesu nibbindanto virajjanto vimuccanto vuttappakārassa imassa saṃsāracakkassa are hani vihani viddhaṃsesi. Evam pi arānaṃ hatattā arahaṃ.

Arā saṃsāracakkassa hatā ñāṇâsinā yato,
Lokanāthena ten’esa arahan ti pavuccati.

CST129

23

Aggadakkhiṇeyyattā ca cīvarâdi-paccaye arahati pūjāvisesañ ca. Ten’eva ca uppanne Tathāgate ye keci mahesakkhā devamanussā, na te aññattha pūjaṃ karonti. Tathā hi Brahmā Sahampati Sinerumattena ratanadāmena Tathāgataṃ pūjesi, yathābalañ ca aññe devā manussā ca Bimbisāra-Kosalarājâdayo, parinibbutam pi ca Bhagavantaṃ uddissa channavuti-koṭi-dhanaṃ vissajjetvā Asokamahārājā sakala-Jambudīpe caturāsīti vihārasahassāni patiṭṭhāpesi, ko pana vādo aññesaṃ pūjāvisesānan ti paccayâdīnaṃ arahattā pi arahaṃ.

Pūjāvisesaṃ saha paccayehi
yasmā ayaṃ arahati Lokanātho,
atthânurūpaṃ arahan ti loke
tasmā Jino arahati nāmam etaṃ.

CST130

24

Yathā ca loke ye keci paṇḍitamānino bālā asilokabhayena raho pāpaṃ karonti, evam esa na kadāci karotī ti pāpakaraṇe rahâbhāvato pi arahaṃ.

Yasmā natthi raho nāma pāpakammesu tādino,
rahâbhāvena ten’esa arahaṃ iti vissuto.

25

Evaṃ sabbathā pi,

Ārakattā hatattā ca kilesârīna so muni,
hatasaṃsāracakkâro paccayâdīna câraho,
na raho karoti pāpāni, arahaṃ tena vuccatī ti.

CST131

26

Sammā sāmañ ca sabbadhammānaṃ buddhattā pana sammāsambuddho. Tathā hi esa sabbadhamme sammā sāmañ ca buddho, abhiññeyye dhamme abhiññeyyato buddho, pariññeyye dhamme pariññeyyato, pahātabbe dhamme pahātabbato, sacchikātabbe dhamme sacchikātabbato, bhāvetabbe dhamme bhāvetabbato. Ten’eva c’āha:

“Abhiññeyyaṃ abhiññātaṃ, bhāvetabbañ ca bhāvitaṃ,
pahātabbaṃ pahīnaṃ me, tasmā Buddho’smi brāhmaṇā” ti. (ma. ni. 2.399; su. ni. 564)

CST132

27

Api ca cakkhuṃ dukkhasaccaṃ, tassa mūlakāraṇabhāvena samuṭṭhāpikā purimataṇhā samudayasaccaṃ, ubhinnaṃ appavatti nirodhasaccaṃ, nirodhapajānanā paṭipadā maggasaccan ti evaṃ ekekapaduddhārenâpi sabbadhamme sammā sāmañ ca buddho. Esa nayo sota-ghāna-jivhā-kāya-manesu.

28

Eten’eva nayena,

1. rūpâdīni cha āyatanāni,
2. cakkhuviññāṇâdayo cha viññāṇakāyā,
3. cakkhusamphassâdayo cha phassā,
4. cakkhusamphassajâdayo cha vedanā,
5. rūpasaññâdayo cha saññā,
6. rūpasañcetanâdayo cha cetanā,
7. rūpataṇhâdayo cha taṇhākāyā,
8. rūpavitakkâdayo cha vitakkā,
9. rūpavicārâdayo cha vicārā,
10. rūpakkhandhâdayo pañcakkhandhā,
11. dasa kasiṇāni,
12. dasa anussatiyo,
13. uddhumātakasaññâdivasena dasa saññā,
14. kesâdayo dvattiṃsâkārā,
15. dvādasâyatanāni,
16. aṭṭhārasa dhātuyo,
17. kāmabhavâdayo nava bhavā,
18. paṭhamâdīni cattāri jhānāni,
19. mettābhāvanâdayo catasso appamaññā,
20. catasso arūpasamāpattiyo,
21. paṭilomato jarāmaraṇâdīni,
22. anulomato avijjâdīni paṭiccasamuppādaṅgāni ca

yojetabbāni.

29

Tatrâyaṃ ekapadayojanā: jarāmaraṇaṃ dukkhasaccaṃ, jāti samudayasaccaṃ, ubhinnam pi nissaraṇaṃ nirodhasaccaṃ, nirodhapajānanā paṭipadā maggasaccan ti. Evam ekekapaduddhārena sabbadhamme sammā sāmañ ca buddho anubuddho paṭibuddho. Tena vuttaṃ “Sammā sāmañ ca sabbadhammānaṃ buddhattā pana sammāsambuddho” ti.

CST133

30

Vijjāhi pana caraṇena ca sampannattā vijjācaraṇasampanno. Tattha vijjā ti tisso pi vijjā aṭṭha pi vijjā. Tisso vijjā Bhayabheravasutte vuttanayen’eva veditabbā, aṭṭha Ambaṭṭhasutte. Tatra hi vipassanāñāṇena manomayiddhiyā ca saha cha abhiññā pariggahetvā aṭṭha vijjā vuttā.

31

Caraṇan ti sīlasaṃvaro, indriyesu guttadvāratā, bhojane mattaññutā, jāgariyânuyogo, satta saddhammā¹, cattāri rūpāvacara-jjhānānī ti ime pannarasa dhammā veditabbā. Ime yeva hi pannarasa dhammā, yasmā etehi carati ariyasāvako gacchati amataṃ disaṃ, tasmā caraṇan ti vuttā. Yath’āha:

“Idha, Mahānāma, ariyasāvako sīlavā hotī” ti (ma. ni. 2.24)

sabbaṃ Majjhimapaṇṇāsake vuttanayen’eva veditabbaṃ. Bhagavā imāhi vijjāhi iminā ca caraṇena samannāgato. tena vuccati vijjācaraṇasampanno ti.

32

Tattha vijjāsampadā Bhagavato sabbaññutaṃ pūretvā ṭhitā, caraṇasampadā mahākāruṇikataṃ. So sabbaññutāya sabbasattānaṃ atthânatthaṃ ñatvā mahākāruṇikatāya anatthaṃ parivajjetvā atthe niyojeti. Yathā taṃ vijjācaraṇasampanno, ten’assa sāvakā suppaṭipannā honti, no duppaṭipannā, vijjācaraṇavipannānaṃ sāvakā attantapâdayo viya.

CST134

33

Sobhanagamanattā, sundaraṃ ṭhānaṃ gatattā, sammā gatattā, sammā ca gadattā sugato. Gamanam pi hi gatan ti vuccati, tañ ca Bhagavato sobhanaṃ parisuddham anavajjaṃ. Kiṃ pana tan ti? Ariyamaggo. Tena h’esa gamanena khemaṃ disaṃ asajjamāno gato ti sobhanagamanattā sugato. Sundarañ c’esa ṭhānaṃ gato amataṃ nibbānan ti sundaraṃ ṭhānaṃ gatattā pi sugato.

34

Sammā ca gato tena tena maggena pahīne kilese puna apaccāgacchanto. Vuttañ h’etaṃ:

“Sotāpattimaggena ye kilesā pahīnā, te kilese na pun’eti na pacceti na paccāgacchatī ti sugato…pe… Arahattamaggena ye kilesā pahīnā, te kilese na pun’eti na pacceti na paccāgacchatī ti sugato” ti.

Sammā vā gato Dīpaṅkarapādamūlato pabhuti yāva Bodhimaṇḍā tāva samatiṃsa-pāramī-pūrikāya sammāpaṭipattiyā sabbalokassa hitasukham eva karonto, sassataṃ ucchedaṃ kāmasukhaṃ attakilamathan ti ime ca ante anupagacchanto gato ti sammā gatattā pi sugato.

35

Sammā c’esa gadati yuttaṭṭhāne yuttam eva vācaṃ bhāsatī ti sammā gadattā pi sugato. Tatr’idaṃ sādhakasuttaṃ:

“Yaṃ Tathāgato vācaṃ jānāti abhūtaṃ atacchaṃ anatthasañhitaṃ, sā ca paresaṃ appiyā amanāpā, na taṃ Tathāgato vācaṃ bhāsati.

Yam pi Tathāgato vācaṃ jānāti bhūtaṃ tacchaṃ anatthasañhitaṃ, sā ca paresaṃ appiyā amanāpā, tam pi Tathāgato vācaṃ na bhāsati.

Yañ ca kho Tathāgato vācaṃ jānāti bhūtaṃ tacchaṃ atthasañhitaṃ, sā ca paresaṃ appiyā amanāpā, tatra kālaññū Tathāgato hoti tassā vācāya veyyākaraṇāya.

Yaṃ Tathāgato vācaṃ jānāti abhūtaṃ atacchaṃ anatthasañhitaṃ, sā ca paresaṃ piyā manāpā, na taṃ Tathāgato vācaṃ bhāsati.

Yam pi Tathāgato vācaṃ jānāti bhūtaṃ tacchaṃ anatthasañhitaṃ, sā ca paresaṃ piyā manāpā, tam pi Tathāgato vācaṃ na bhāsati.

Yañ ca kho Tathāgato vācaṃ jānāti bhūtaṃ tacchaṃ atthasañhitaṃ, sā ca paresaṃ piyā manāpā, tatra kālaññū Tathāgato hoti tassā vācāya veyyākaraṇāyā” ti. (ma. ni. 2.86)

Evaṃ sammā gadattā pi sugato ti veditabbo.

CST135

36

Sabbathā pi viditalokattā pana lokavidū. So hi Bhagavā sabhāvato samudayato nirodhato nirodhûpāyato ti sabbathā lokaṃ avedi aññāsi paṭivijjhi. Yath’āha:

“Yattha kho, āvuso, na jāyati na jīyati na mīyati na cavati na upapajjati, nâhaṃ taṃ gamanena lokassa antaṃ ñāteyyaṃ daṭṭheyyaṃ patteyyan ti vadāmi. Na câhaṃ, āvuso, apatvā va lokassa antaṃ dukkhassa antakiriyaṃ vadāmi. Api câhaṃ, āvuso, imasmiñ ñeva byāmamatte kaḷevare sasaññimhi samanake lokañ ca paññapemi, lokasamudayañ ca lokanirodhañ ca lokanirodhagāminiñ ca paṭipadaṃ.

Gamanena na pattabbo lokass’anto kudācanaṃ,
na ca apatvā lokantaṃ dukkhā atthi pamocanaṃ.

Tasmā have lokavidū sumedho
lokantagū vūsitabrahmacariyo,
lokassa antaṃ samitāvi ñatvā
nâsīsati lokam imaṃ parañ cā” ti. (saṃ. ni. 1.107; a. ni. 4.45)

CST136

37

Api ca tayo lokā: saṅkhāraloko sattaloko okāsaloko ti. Tattha,

“Eko loko, sabbe sattā āhāraṭṭhitikā” ti (paṭi. ma. 1.112)

āgataṭṭhāne saṅkhāraloko veditabbo.

“Sassato loko ti vā asassato loko ti vā” ti (dī. ni. 1.421)

āgataṭṭhāne sattaloko.

“Yāvatā candimasūriyā pariharanti disā bhanti virocamānā,
tāva sahassadhā loko ettha te vattatī vaso” ti (ma. ni. 1.503)

āgataṭṭhāne okāsaloko. Tam pi Bhagavā sabbathā avedi.

38

Tathā hi’ssa,

“Eko loko, sabbe sattā āhāraṭṭhitikā. Dve lokā, nāmañ ca rūpañ ca. Tayo lokā, tisso vedanā. Cattāro lokā, cattāro āhārā. Pañca lokā, pañcupādānakkhandhā. Cha lokā, cha ajjhattikāni āyatanāni. Satta lokā, satta viññāṇaṭṭhitiyo². Aṭṭha lokā, aṭṭha lokadhammā³. Nava lokā, nava sattâvāsā⁴. Dasa lokā, das’āyatanāni⁵. Dvādasa lokā, dvādas’āyatanāni. Aṭṭhārasa lokā, aṭṭhārasa dhātuyo” ti (paṭi. ma. 1.112)

ayaṃ saṅkhāraloko pi sabbathā vidito.

39

Yasmā pan’esa sabbesam pi sattānaṃ āsayaṃ jānāti, anusayaṃ jānāti, caritaṃ jānāti, adhimuttiṃ jānāti, apparajakkhe mahārajakkhe, tikkhindriye mudindriye, svākāre dvākāre, suviññāpaye duviññāpaye, bhabbe abhabbe satte jānāti, tasmā’ssa sattaloko pi sabbathā vidito.

CST137

40

Yathā ca sattaloko, evaṃ okāsaloko pi. Tathā h’esa — Ekaṃ cakkavāḷaṃ āyāmato ca vitthārato ca yojanānaṃ dvādasa satasahassāni catutiṃsa satāni ca paññāsañ ca yojanāni, parikkhepato pana,

Sabbaṃ satasahassāni chattiṃsa parimaṇḍalaṃ,
dasa c’eva sahassāni aḍḍhuḍḍhāni satāni ca.

41

Tattha,

Duve satasahassāni cattāri nahutāni ca,
ettakaṃ bahalattena saṅkhātā’yaṃ vasundharā.

Tassā yeva sandhārakaṃ

Cattāri satasahassāni aṭṭh’eva nahutāni ca,
ettakaṃ bahalattena jalaṃ vāte patiṭṭhitaṃ.

Tassâpi sandhārako

Nava satasahassāni māluto nabham uggato
saṭṭhiñ c’eva sahassāni, esā lokassa saṇṭhiti.

42

Evaṃ saṇṭhite c’ettha yojanānaṃ

Caturāsīti sahassāni ajjhogāḷho mahaṇṇave,
accuggato tāvad eva Sineru pabbatuttamo.

Tato upaḍḍhupaḍḍhena pamāṇena yathākkamaṃ
ajjhogāḷhuggatā dibbā nānāratanacittitā,

Yugandharo Īsadharo Karavīko Sudassano,
Nemindharo Vinatako Assakaṇṇo giri brahā,

Ete satta mahāselā Sinerussa samantato,
Mahārājānam āvāsā deva-yakkha-nisevitā.

Yojanānaṃ satān’ucco Himavā pañca pabbato
yojanānaṃ sahassāni tīṇi āyatavitthato,
caturāsītisahassehi kūṭehi paṭimaṇḍito.

Tipañcayojana-kkhandha-parikkhepā nagavhayā
paññāsayojana-kkhandha-sākhâyāmā samantato

Satayojana-vitthiṇṇā tāvad eva ca uggatā
jambū, yass’ānubhāvena Jambudīpo pakāsito.

43

Yañ c’etaṃ jambuyā pamāṇaṃ, etad eva Asurānaṃ citra-pāṭaliyā, Garuḷānaṃ simbalirukkhassa, Aparagoyāne kadambassa, Uttarakurūsu kapparukkhassa, Pubbavidehe sirīsassa, Tāvatiṃsesu pāricchattakassā ti. Ten’āhu porāṇā:

“Pāṭalī, simbalī, jambū, devānaṃ pāricchattako,
kadambo, kapparukkho ca sirīsena bhavati sattaman” ti.

“Dve-asīti sahassāni ajjhogāḷho mahaṇṇave,
accuggato tāvad eva cakkavāḷa-siluccayo,
parikkhipitvā taṃ sabbaṃ lokadhātum ayaṃ ṭhito” ti.

44

Tattha candamaṇḍalaṃ ekūnapaññāsa-yojanaṃ, sūriyamaṇḍalaṃ paññāsa-yojanaṃ. Tāvatiṃsabhavanaṃ dasasahassa-yojanaṃ, tathā Asurabhavanaṃ, Avīci mahānirayo, Jambudīpo ca. Aparagoyānaṃ sattasahassa-yojanaṃ, tathā Pubbavidehaṃ. Uttarakuru aṭṭhasahassa-yojanaṃ. Ekameko c’ettha mahādīpo pañcasata-pañcasata-parittadīpa-parivāro, taṃ sabbam pi ekaṃ cakkavāḷaṃ, ekā lokadhātu. Tadantaresu lokantarikanirayā.⁶ — Evaṃ anantāni cakkavāḷāni, anantā lokadhātuyo Bhagavā anantena Buddhañāṇena avedi aññāsi paṭivijjhi.

45

Evam assa okāsaloko pi sabbathā vidito. Evam pi sabbathā viditalokattā lokavidū.

CST138

46

Attanā pana guṇehi visiṭṭhatarassa kassaci abhāvato natthi etassa uttaro ti anuttaro. Tathā h’esa sīlaguṇenâpi sabbaṃ lokam abhibhavati, samādhi-paññā-vimutti-vimuttiñāṇadassana-guṇenâpi, sīlaguṇenâpi asamo asamasamo appaṭimo appaṭibhāgo appaṭipuggalo…pe… vimuttiñāṇadassanaguṇenâpi. Yath’āha:

“Na kho panâhaṃ samanupassāmi sadevake loke samārake…pe… sadevamanussāya pajāya attanā sīlasampannataran” ti (saṃ. ni.)

vitthāro, evaṃ Aggapasādasuttâdīni (a. ni. 4.34; itivu. 90)

“Na me ācariyo atthī” ti (ma. ni. 1.285; mahāva. 11)

ādikā gāthāyo ca vitthāretabbā.

CST139

47

Purisadamme sāretī ti purisadammasārathi, dameti vinetī ti vuttaṃ hoti. Tattha purisadammā ti adantā dametuṃ yuttā tiracchānapurisā pi manussapurisā pi amanussapurisā pi. Tathā hi Bhagavatā tiracchānapurisā pi, Apalālo nāgarājā, Cūḷodaro, Mahodaro, Aggisikho, Dhūmasikho, Aravāḷo nāgarājā, Dhanapālako hatthī ti evam ādayo damitā nibbisā katā saraṇesu ca sīlesu ca patiṭṭhāpitā, manussapurisā pi Saccaka-Nigaṇṭhaputta-Ambaṭṭhamāṇava-Pokkharasāti-Soṇadanta-Kūṭadantâdayo, amanussapurisā pi Āḷavaka-Sūciloma-Kharalomayakkha-Sakkadevarājâdayo damitā vinītā vicitrehi, vinayanûpāyehi.

“Ahaṃ kho, Kesi, purisadamme saṇhena pi vinemi, pharusena pi vinemi, saṇhapharusena pi vinemī” ti (a. ni. 4.11)

idañ c’ettha suttaṃ vitthāretabbaṃ.

48

Api ca Bhagavā visuddhasīlâdīnaṃ paṭhamajjhānâdīni sotāpannâdīnañ ca uttarimaggapaṭipadaṃ ācikkhanto dante pi dameti yeva.

Atha vā anuttaro purisadammasārathī ti ekam ev’idaṃ atthapadaṃ. Bhagavā hi tathā purisadamme sāreti, yathā ekapallaṅken’eva nisinnā aṭṭha disā asajjamānā dhāvanti, tasmā anuttaro purisadammasārathī ti vuccati.

“Hatthidamakena, bhikkhave, hatthidammo sārito ekaṃ yeva disaṃ dhāvatī” ti (ma. ni. 3.312)

idañ c’ettha suttaṃ vitthāretabbaṃ.

CST140

49

Diṭṭhadhammika-samparāyika-paramatthehi yathârahaṃ anusāsatī ti satthā. Api ca,

“Satthā viyā ti satthā, Bhagavā satthavāho. Yathā satthavāho satthe kantāraṃ tāreti, corakantāraṃ tāreti, vāḷakantāraṃ tāreti, dubbhikkhakantāraṃ tāreti, nirudakakantāraṃ tāreti uttāreti nittāreti patāreti, khemantabhūmiṃ sampāpeti, evam eva Bhagavā satthā satthavāho satte kantāraṃ tāreti, jātikantāraṃ tāretī” ti

ādinā Niddesa-nayena p’ettha attho veditabbo.

50

Devamanussānan ti devānañ ca manussānañ ca. Ukkaṭṭha-paricchedavasena, bhabbapuggala-paricchedavasena c’etaṃ vuttaṃ. Bhagavā pana tiracchānagatānam pi anusāsani-ppadānena satthā yeva. Te pi hi Bhagavato dhammassavanena upanissaya-sampattiṃ patvā, tāya eva upanissaya-sampattiyā dutiye vā tatiye vā attabhāve maggaphalabhāgino honti.

51

Maṇḍūkadevaputtâdayo c’ettha nidassanaṃ. Bhagavati kira Gaggarāya pokkharaṇiyā tīre Campā-nagara-vāsīnaṃ dhammaṃ desiyamāne, eko maṇḍūko Bhagavato sare nimittaṃ aggahesi. Taṃ eko vacchapālako daṇḍaṃ olubbha tiṭṭhanto sīse sannirumbhitvā⁷ aṭṭhāsi. So tāvad eva kālaṅkatvā Tāvatiṃsabhavane dvādasayojanike kanakavimāne nibbatti, suttappabuddho viya ca tattha accharā-saṅgha-parivutaṃ attānaṃ disvā “are aham pi nāma idha nibbatto, kiṃ nu kho kammam akāsin” ti āvajjento, na aññaṃ kiñci addasa, aññatra Bhagavato sare nimittaggāhā. So tāvad eva saha vimānena āgantvā Bhagavato pāde sirasā⁸ vandi. Bhagavā jānanto va pucchi:

“Ko me vandati pādāni, iddhiyā yasasā jalaṃ
abhikkantena vaṇṇena sabbā obhāsayaṃ disā” ti?

“Maṇḍūko’haṃ pure āsiṃ udake vārigocaro,
tava dhammaṃ suṇantassa avadhi vacchapālako” ti.

Bhagavā tassa dhammaṃ desesi. Caturâsītiyā pāṇasahassānaṃ dhammâbhisamayo ahosi, devaputto pi sotāpattiphale patiṭṭhāya sitaṃ katvā pakkamī ti.

CST141

52

Yaṃ pana kiñci atthi ñeyyaṃ nāma, sabbass’eva buddhattā vimokkhantikaññāṇavasena Buddho. Yasmā vā cattāri saccāni attanā pi bujjhi, aññe pi satte bodhesi, tasmā evamādīhi pi kāraṇehi Buddho. Imassa ca pan’atthassa viññāpanatthaṃ,

“Bujjhitā saccānī ti Buddho, bodhetā pajāyā ti Buddho” ti (mahāni. 192)

evaṃ pavatto sabbo pi Niddesa-nayo, Paṭisambhidā-nayo (paṭi. ma. 1.162) vā vitthāretabbo.

CST142

53

Bhagavā ti idaṃ pan’assa guṇavisiṭṭha-sabbasattuttama-garugāravâdhivacanaṃ. Ten’āhu porāṇā

“Bhagavā ti vacanaṃ seṭṭhaṃ, Bhagavā ti vacanam uttamaṃ,
garugāravayutto so Bhagavā tena vuccatī” ti.

54

Catubbidhaṃ vā nāmaṃ: āvatthikaṃ, liṅgikaṃ, nemittikaṃ, adhiccasamuppannan ti. Adhiccasamuppannaṃ nāma lokiyavohārena yadicchakan ti vuttaṃ hoti. Tattha vaccho dammo balībaddo ti evamādi āvatthikaṃ. Daṇḍī chattī sikhī karī ti evamādi liṅgikaṃ. Tevijjo chaḷabhiñño ti evamādi nemittikaṃ. Sirivaḍḍhako Dhanavaḍḍhako ti evamādi vacanatthaṃ anapekkhitvā pavattaṃ adhiccasamuppannaṃ.

55

Idaṃ pana Bhagavā ti nāmaṃ nemittikaṃ, na Mahāmāyāya, na Suddhodana-mahārājena, na asītiyā ñātisahassehi kataṃ, na Sakka-Santusitâdīhi devatāvisesehi. Vuttam pi c’etaṃ Dhammasenāpatinā:

“Bhagavā ti n’etaṃ nāmaṃ mātarā kataṃ…pe… vimokkhantikam etaṃ Buddhānaṃ Bhagavantānaṃ Bodhiyā mūle saha sabbaññutaññāṇassa paṭilābhā sacchikā paññatti yad idaṃ Bhagavā” ti. (mahāni. 84)

CST143

56

Yaṃguṇanemittikañ c’etaṃ nāmaṃ, tesaṃ guṇānaṃ pakāsanatthaṃ imaṃ gāthaṃ vadanti:

“Bhagī bhajī bhāgi vibhattavā iti
akāsi bhaggan ti garū ti bhāgyavā,
bahūhi ñāyehi subhāvitattano
bhavantago so Bhagavā ti vuccatī” ti.

Niddese (mahāni. 84) vuttanayen’eva c’ettha tesaṃ tesaṃ padānaṃ attho daṭṭhabbo.

CST144

57

Ayaṃ pana aparo nayo.

Bhāgyavā bhaggavā yutto bhagehi ca vibhattavā
bhattavā vantagamano bhavesu Bhagavā tato ti.

58

Tattha,

“Vaṇṇâgamo vaṇṇavipariyayo” ti ⁹

ādikaṃ nirutti-lakkhaṇaṃ gahetvā, saddanayena vā pisodarâdi¹⁰-pakkhepa-lakkhaṇaṃ gahetvā, yasmā lokiya-lokuttara-sukhâbhinibbattakaṃ dāna-sīlâdi-pārappattaṃ bhāgyam assa atthi, tasmā bhāgyavā ti vattabbe Bhagavā ti vuccatī ti ñātabbaṃ.

59

Yasmā pana ¹¹ahirikânottappa-kodhûpanāha-makkha-paḷāsa-issā-macchariya-māyā-sāṭheyya-thambha-sārambha-mānâtimāna-mada-pamāda-taṇhā-avijjā-tividhâkusalamūla-duccarita-saṃkilesa-mala-visamasaññā-vitakka-papañca-catubbidhavipariyesa-āsava-gantha-ogha-yoga-agati-taṇhuppādupādāna¹²-pañcacetokhīla-vinibandha-nīvaraṇâbhinandanā-chavivādamūla-taṇhākāya-sattânusaya-aṭṭhamicchatta-navataṇhāmūlaka-dasâkusalakammapatha-dvāsaṭṭhidiṭṭhigata-aṭṭhasatataṇhāvicaritappabheda-sabbadaratha-pariḷāha-kilesasatasahassāni, saṅkhepato vā pañca kilesa-khandha-abhisaṅkhāra-devaputta-maccu-Māre abhañji, tasmā bhaggattā etesaṃ parissayānaṃ bhaggavā ti vattabbe Bhagavā ti vuccati. Āha c’ettha:

“Bhaggarāgo bhaggadoso bhaggamoho anāsavo,
bhaggā’ssa pāpakā dhammā, Bhagavā tena vuccatī” ti.

60

Bhāgyavatāya c’assa satapuñña-lakkhaṇa-dharassa rūpakāya-sampatti dīpitā hoti, bhaggadosatāya dhammakāya-sampatti, tathā lokiya-sarikkhakānaṃ bahumatabhāvo, gahaṭṭha-pabbajitehi abhigamanīyatā, abhigatānañ ca nesaṃ kāya-citta-dukkhâpanayane paṭibalabhāvo, āmisadāna-dhammadānehi upakāritā, lokiya-lokuttara-sukhehi ca saṃyojana-samatthatā dīpitā hoti.

61

Yasmā ca loke issariya-dhamma-yasa-siri-kāma-payattesu chasu dhammesu bhagasaddo pavattati, — paramañ c’assa sakacitte issariyaṃ, aṇimā-laṅghimâdikaṃ vā lokiyasammataṃ sabbâkāra-paripūraṃ atthi, tathā lokuttaro dhammo, lokattaya-byāpako yathābhucca-guṇâdhigato ativiya parisuddho yaso, rūpakāyadassana-byāvaṭajana-nayana-ppasāda-janana-samatthā sabbâkāra-paripūrā sabbaṅgapaccaṅga-sirī, yaṃ yaṃ etena icchitaṃ patthitaṃ attahitaṃ parahitaṃ vā tassa tassa tath’eva abhinipphannattā icchitattha-nibbatti-saññito¹³ kāmo, sabbalokagarubhāva-ppatti-hetu-bhūto sammāvāyāma-saṅkhāto payatto ca atthi, — tasmā imehi bhagehi yuttattā pi, bhagā assa santī ti iminā atthena Bhagavā ti vuccati.

62

Yasmā pana kusalâdīhi bhedehi sabbadhamme, khandhâyatana-dhātu-sacca-indriya-paṭiccasamuppādâdīhi vā kusalâdi-dhamme, pīḷana-saṅkhata-santāpa-vipariṇāmaṭṭhena vā dukkhaṃ ariyasaccaṃ, āyūhana-nidāna-saṃyoga-palibodhaṭṭhena samudayaṃ, nissaraṇa-vivekâsaṅkhata-amataṭṭhena nirodhaṃ, niyyānika-hetu-dassanâdhipateyyaṭṭhena maggaṃ vibhattavā, vibhajitvā vivaritvā desitavā ti vuttaṃ hoti, tasmā vibhattavā ti vattabbe Bhagavā ti vuccati.

63

Yasmā ca esa dibba-brahma-ariya-vihāre kāya-citta-upadhi-viveke suññatappaṇihitânimitta-vimokkhe aññe ca lokiya-lokuttare uttarimanussadhamme bhaji sevi bahulaṃ akāsi, tasmā bhattavā ti vattabbe Bhagavā ti vuccati.

64

Yasmā pana tīsu bhavesu taṇhā-saṅkhātaṃ gamanaṃ anena vantaṃ, tasmā bhavesu vantagamano ti vattabbe bhavasaddato bhakāraṃ, gamanasaddato gakāraṃ, vantasaddato vakārañ ca dīghaṃ katvā ādāya Bhagavā ti vuccati, yathā loke mehanassa khassa mālā ti vattabbe mekhalā ti.

CST145

65

Tass’evaṃ iminā ca iminā ca kāraṇena so Bhagavā arahaṃ…pe… iminā ca iminā ca kāraṇena Bhagavā ti Buddhaguṇe anussarato,

“N’eva tasmiṃ samaye rāgapariyuṭṭhitaṃ cittaṃ hoti, na dosapariyuṭṭhitaṃ, na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti Tathāgatam ārabbha”. (a. ni. 6.10)

66

Icc assa evaṃ rāgādi-pariyuṭṭhānâbhāvena vikkhambhita-nīvaraṇassa kammaṭṭhānâbhimukhatāya ujugatacittassa Buddhaguṇapoṇā vitakka-vicārā pavattanti, Buddhaguṇe anuvitakkayato anuvicārayato pīti uppajjati, pītimanassa pītipadaṭṭhānāya passaddhiyā kāyacittadarathā paṭippassambhanti, passaddhadarathassa kāyikam pi cetasikam pi sukhaṃ uppajjati, sukhino Buddhaguṇârammaṇaṃ hutvā cittaṃ samādhiyatī ti anukkamena ekakkhaṇe jhānaṅgāni uppajjanti. Buddhaguṇānaṃ pana gambhīratāya nānappakāra-guṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etaṃ Buddhaguṇânussaraṇavasena uppannattā Buddhânussat’icc eva saṅkhaṃ gacchati.

67

Imañ ca pana Buddhânussatiṃ anuyutto bhikkhu Satthari sagāravo hoti sappatisso, saddhāvepullaṃ sativepullaṃ paññāvepullaṃ puññavepullañ ca adhigacchati, pītipāmojjabahulo hoti, bhayabherava-saho, dukkhâdhivāsana-samattho, Satthārā saṃvāsasaññaṃ paṭilabhati, Buddhaguṇânussatiyā ajjhāvutthañ c’assa sarīram pi cetiyagharam iva pūjârahaṃ hoti, Buddhabhūmiyaṃ cittaṃ namati, vītikkamitabba-vatthu-samāyoge c’assa sammukhā Satthāraṃ passato viya hirottappaṃ paccupaṭṭhāti, uttari appaṭivijjhanto pana sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya Buddhânussatiyā sadā ti.

Idaṃ tāva Buddhânussatiyaṃ vitthārakathāmukhaṃ.

Dhammānussatikathā

CST146

68

Dhammânussatiṃ bhāvetukāmenâpi rahogatena paṭisallīnena,

“Svākkhāto Bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī” ti (a. ni. 6.10)

evaṃ pariyattidhammassa c’eva navavidhassa ca lokuttaradhammassa guṇā anussaritabbā.

CST147

69

Svākkhāto ti imasmiṃ hi pade pariyattidhammo pi saṅgahaṃ gacchati, itaresu lokuttaradhammo va. Tattha pariyattidhammo tāva, svākkhāto ādi-majjha-pariyosāna-kalyāṇattā sâttha-sabyañjana-kevalaparipuṇṇa-parisuddha-brahmacariya-ppakāsanattā ca. Yañ hi Bhagavā ekagātham pi deseti, sā samantabhaddakattā dhammassa paṭhamapādena ādikalyāṇā, dutiya-tatiyapādehi majjhekalyāṇā, pacchimapādena pariyosānakalyāṇā. Ekânusandhikaṃ suttaṃ nidānena ādikalyāṇaṃ, nigamanena pariyosānakalyāṇaṃ, sesena majjhekalyāṇaṃ. Nānânusandhikaṃ suttaṃ paṭhamânusandhinā ādikalyāṇaṃ, pacchimena pariyosānakalyāṇaṃ, sesehi majjhekalyāṇaṃ. Api ca sanidāna-sauppattikattā ādikalyāṇaṃ, veneyyānaṃ anurūpato atthassa aviparītatāya ca hetudāharaṇa-yuttato ca majjhekalyāṇaṃ, sotūnaṃ saddhā-paṭilābha-jananena nigamanena ca pariyosānakalyāṇaṃ.

70

Sakalo pi sāsanadhammo attano atthabhūtena sīlena ādikalyāṇo, samatha-vipassanā-magga-phalehi majjhekalyāṇo, nibbānena pariyosānakalyāṇo. Sīla-samādhīhi vā ādikalyāṇo, vipassanā-maggehi majjhekalyāṇo, phala-nibbānehi pariyosānakalyāṇo. Buddhasubodhitāya vā ādikalyāṇo, dhammasudhammatāya majjhekalyāṇo, saṅghasuppaṭippattiyā pariyosānakalyāṇo. Taṃ sutvā tathatthāya paṭipannena adhigantabbāya abhisambodhiyā vā ādikalyāṇo, paccekabodhiyā majjhekalyāṇo, sāvakabodhiyā pariyosānakalyāṇo.

71

Suyyamāno c’esa nīvaraṇa-vikkhambhanato savanena pi kalyāṇam eva āvahatī ti ādikalyāṇo, paṭipajjiyamāno samatha-vipassanā-sukhâvahanato paṭipattiyā pi kalyāṇaṃ āvahatī ti majjhekalyāṇo, tathāpaṭipanno ca paṭipattiphale niṭṭhite tādibhāvâvahanato paṭipattiphalena pi kalyāṇaṃ āvahatī ti pariyosānakalyāṇo ti evaṃ ādi-majjha-pariyosāna-kalyāṇattā svākkhāto.

72

Yaṃ pan’esa Bhagavā dhammaṃ desento sāsana-brahmacariyaṃ magga-brahmacariyañ ca pakāseti nānānayehi dīpeti, taṃ yathânurūpaṃ atthasampattiyā sâtthaṃ, byañjanasampattiyā sabyañjanaṃ. Saṅkāsana-pakāsana-vivaraṇa-vibhajana-uttānīkaraṇa-paññatti-atthapadasamāyogato sâtthaṃ, akkhara-pada-byañjanâkāra-nirutti-niddesa-sampattiyā sabyañjanaṃ. Atthagambhīratā-paṭivedhagambhīratāhi sâtthaṃ, dhammagambhīratā-desanāgambhīratāhi sabyañjanaṃ. Attha-paṭibhāna-paṭisambhidā-visayato sâtthaṃ, dhamma-nirutti-paṭisambhidā-visayato sabyañjanaṃ. Paṇḍita-vedanīyato parikkhakajana-ppasādakan ti sâtthaṃ, saddheyyato lokiyajana-ppasādakan ti sabyañjanaṃ. Gambhīrâdhippāyato sâtthaṃ, uttānapadato sabyañjanaṃ.

Upanetabbassa abhāvato sakala-paripuṇṇa-bhāvena kevalaparipuṇṇaṃ, apanetabbassa abhāvato niddosa-bhāvena parisuddhaṃ.

Api ca paṭipattiyā adhigamabyattito sâtthaṃ, pariyattiyā āgamabyattito sabyañjanaṃ, sīlâdi-pañcadhammakkhandha-yuttato kevalaparipuṇṇaṃ, nirupakkilesato nittaraṇatthāya pavattito lokâmisa-nirapekkhato ca parisuddhan ti evaṃ sâttha-sabyañjana-kevalaparipuṇṇa-parisuddha-brahmacariya-ppakāsanato¹⁴ svākkhāto.

73

Atthavipallāsâbhāvato vā suṭṭhu akkhāto ti svākkhāto. Yathā hi aññatitthiyānaṃ dhammassa attho vipallāsam āpajjati, antarāyikā ti vuttadhammānaṃ antarāyikattâbhāvato, niyyānikā ti ¹⁵ vuttadhammānaṃ niyyānikattâbhāvato, tena te durakkhātadhammā yeva honti, na tathā Bhagavato dhammassa attho vipallāsam āpajjati “ime dhammā antarāyikā, ime dhammā niyyānikā” ti evaṃ vuttadhammānaṃ tathābhāvânatikkamanato ti. Evaṃ tāva pariyattidhammo svākkhāto.

74

Lokuttaradhammo pana nibbānânurūpāya paṭipattiyā, paṭipadânurūpassa ca nibbānassa akkhātattā svākkhāto. Yath’āha:

“Supaññattā kho pana tena Bhagavatā sāvakānaṃ nibbānagāminī paṭipadā, saṃsandati nibbānañ ca paṭipadā ca. Seyyathā pi nāma Gaṅgodakaṃ Yamunodakena saṃsandati sameti, evam eva supaññattā ¹⁶ tena Bhagavatā sāvakānaṃ nibbānagāminī paṭipadā, saṃsandati nibbānañ ca paṭipadā cā” ti. (dī. ni. 2.296)

75

Ariyamaggo c’ettha antadvayaṃ anupagamma majjhimā-paṭipadābhūto va “majjhimā paṭipadā” ti akkhātattā svākkhāto. Sāmaññaphalāni paṭipassaddha-kilesān’eva “paṭipassaddha-kilesānī” ti akkhātattā svākkhātāni. Nibbānaṃ sassatâmata-tāṇa-leṇâdi-sabhāvam eva, sassatâdi-sabhāvavasena akkhātattā svākkhātan ti. Evaṃ lokuttaradhammo pi svākkhāto.

CST148

76

Sandiṭṭhiko ti ettha pana ariyamaggo tāva attano santāne rāgâdīnaṃ abhāvaṃ karontena ariyapuggalena sāmaṃ daṭṭhabbo ti sandiṭṭhiko. Yath’āha:

“Ratto kho, brāhmaṇa, rāgena abhibhūto pariyādiṇṇacitto attabyābādhāya pi ceteti, parabyābādhāya pi ceteti, ubhayabyābādhāya pi ceteti, cetasikaṃ dukkhaṃ domanassaṃ paṭisaṃvedeti. Rāge pahīne n’eva attabyābādhāya ceteti, na parabyābādhāya ceteti, na ubhayabyābādhāya ceteti, na cetasikaṃ dukkhaṃ domanassaṃ paṭisaṃvedeti. Evam pi kho, brāhmaṇa, sandiṭṭhiko dhammo hotī” ti. (a. ni. 3.54)

77

Api ca navavidho pi lokuttaradhammo, yena yena adhigato hoti, tena tena parasaddhāya gantabbataṃ hitvā paccavekkhaṇañāṇena sayaṃ daṭṭhabbo ti sandiṭṭhiko.

78

Atha vā pasatthā diṭṭhi sandiṭṭhi, sandiṭṭhiyā jayatī ti sandiṭṭhiko. Tathā h’ettha ariyamaggo sampayuttāya, ariyaphalaṃ kāraṇabhūtāya, nibbānaṃ visayibhūtāya sandiṭṭhiyā kilese jayati. Tasmā yathā rathena jayatī ti rathiko, evaṃ navavidho pi lokuttaradhammo sandiṭṭhiyā jayatī ti sandiṭṭhiko.

79

Atha vā diṭṭhan ti dassanaṃ vuccati, diṭṭham eva sandiṭṭhaṃ, dassanan ti attho. Sandiṭṭhaṃ arahatī ti sandiṭṭhiko. Lokuttaradhammo hi bhāvanâbhisamayavasena sacchikiriyâbhisamayavasena ca dissamāno yeva vaṭṭabhayaṃ nivatteti. Tasmā yathā vatthaṃ arahatī ti vatthiko, evaṃ sandiṭṭhaṃ arahatī ti sandiṭṭhiko.

CST149

80

Attano phaladānaṃ sandhāya nâssa kālo ti akālo, akālo yeva akāliko. Na pañcâha-sattâhâdi-bhedaṃ kālaṃ khepetvā phalaṃ deti, attano pana pavatti-samanantaram eva phalado ti vuttaṃ hoti.

81

Atha vā attano phaladāne pakaṭṭho kālo patto assā ti kāliko. Ko so? Lokiyo kusaladhammo. Ayaṃ pana samanantaraphalattā na kāliko ti akāliko. Idaṃ maggam eva sandhāya vuttaṃ.

CST150

82

“Ehi passa imaṃ dhamman” ti evaṃ pavattaṃ ehipassavidhiṃ arahatī ti ehipassiko. Kasmā pan’esa taṃ vidhiṃ arahatī ti? Vijjamānattā parisuddhattā ca. Rittamuṭṭhiyaṃ hi “hiraññaṃ vā suvaṇṇaṃ vā atthī” ti vatvā pi “ehi passa iman” ti na sakkā vattuṃ. Kasmā? Avijjamānattā. Vijjamānam pi ca gūthaṃ vā muttaṃ vā manuññabhāva-ppakāsanena cittasampahaṃsanatthaṃ “ehi passa iman” ti na sakkā vattuṃ, api ca kho pana tiṇehi vā paṇṇehi vā paṭicchādetabbam eva hoti. Kasmā? Aparisuddhattā. Ayaṃ pana navavidho pi lokuttaradhammo sabhāvato va vijjamāno, vigata-valāhake ākāse sampuṇṇa-candamaṇḍalaṃ viya, paṇḍu-kambale nikkhitta-jātimaṇi viya ca parisuddho, tasmā vijjamānattā parisuddhattā ca ehipassavidhiṃ arahatī ti ehipassiko.

CST151

83

Upanetabbo ti opaneyyiko. Ayaṃ pan’ettha vinicchayo. Upanayanaṃ upanayo, ādittaṃ celaṃ vā sīsaṃ vā ajjhupekkhitvā pi bhāvanāvasena attano citte upanayanaṃ arahatī ti opanayiko, opanayiko va opaneyyiko. Idaṃ saṅkhate lokuttaradhamme yujjati. Asaṅkhate¹⁷ pana attano cittena upanayanaṃ arahatī ti opaneyyiko, sacchikiriyāvasena allīyanaṃ arahatī ti attho.

84

Atha vā nibbānaṃ upanetī ti ariyamaggo upaneyyo, sacchikātabbataṃ upanetabbo ti phala-nibbāna-dhammo upaneyyo, upaneyyo eva opaneyyiko.

CST152

85

Paccattaṃ veditabbo viññūhī ti sabbehi pi ugghaṭitaññū-ādīhi viññūhi attani attani veditabbo “bhāvito me maggo, adhigataṃ phalaṃ, sacchikato nirodho” ti. Na hi upajjhāyena bhāvitena maggena¹⁸ saddhivihārikassa kilesā pahīyanti, na so tassa phalasamāpattiyā phāsuviharati, na tena sacchikataṃ nibbānaṃ sacchikaroti. Tasmā na esa parassa sīse ābharaṇaṃ viya daṭṭhabbo, attano pana citte yeva daṭṭhabbo, anubhavitabbo viññūhī ti vuttaṃ hoti, bālānaṃ pana avisayo c’esa.

86

Api ca svākkhāto ayaṃ dhammo. Kasmā? Sandiṭṭhikattā, sandiṭṭhiko akālikattā, akāliko ehipassikattā, yo ca ehipassiko, so nāma opaneyyiko hotī ti.

CST153

87

Tass’evaṃ svākkhātatâdi-bhede dhammaguṇe anussarato,

“N’eva tasmiṃ samaye rāgapariyuṭṭhitaṃ cittaṃ hoti, na dosa…pe… na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti dhammaṃ ārabbhā” ti (a. ni. 6.10)

purimanayen’eva (VII.66) vikkhambhita-nīvaraṇassa ekakkhaṇe jhānaṅgāni uppajjanti. Dhammaguṇānaṃ pana gambhīratāya nānappakāra-guṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etaṃ dhammaguṇânussaraṇavasena uppannattā dhammânussat’icc eva saṅkhaṃ gacchati.

88

Imañca pana dhammânussatiṃ anuyutto bhikkhu “evaṃ opaneyyikassa dhammassa desetāraṃ iminā p’aṅgena samannāgataṃ satthāraṃ n’eva atītaṃse samanupassāmi, na pan’etarahi aññatra tena Bhagavatā” ti evaṃ dhammaguṇa-dassanen’eva Satthari sagāravo hoti sappatisso, dhamme garucittīkāro saddhâdi-vepullaṃ adhigacchati, pītipāmojjabahulo hoti, bhayabherava-saho, dukkhâdhivāsana-samattho, dhammena saṃvāsasaññaṃ paṭilabhati, dhammaguṇânussatiyā ajjhāvutthañ c’assa sarīram pi cetiyagharam iva pūjârahaṃ hoti, anuttaradhammâdhigamāya cittaṃ namati, vītikkamitabba-vatthu-samāyoge c’assa dhamma-sudhammataṃ samanussarato hirottappaṃ paccupaṭṭhāti, uttari appaṭivijjhanto pana sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya dhammânussatiyā sadā ti.

Idaṃ dhammânussatiyaṃ vitthārakathāmukhaṃ.

Saṅghānussatikathā

CST154

89

Saṅghânussatiṃ bhāvetukāmenāpi rahogatena paṭisallīnena,

“Suppaṭipanno Bhagavato sāvakasaṅgho, ujuppaṭipanno Bhagavato sāvakasaṅgho, ñāyappaṭipanno Bhagavato sāvakasaṅgho, sāmīcippaṭipanno Bhagavato sāvakasaṅgho, yad idaṃ cattāri purisayugāni aṭṭha purisapuggalā, esa Bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo, anuttaraṃ puññakkhettaṃ lokassā” ti (a. ni. 6.10)

evaṃ ariyasaṅghaguṇā anussaritabbā.

CST155

90

Tattha suppaṭipanno ti suṭṭhu paṭipanno, sammāpaṭipadaṃ anivatti-paṭipadaṃ anuloma-paṭipadaṃ apaccanīka-paṭipadaṃ dhammânudhamma-paṭipadaṃ paṭipanno ti vuttaṃ hoti. Bhagavato ovādânusāsaniṃ sakkaccaṃ suṇantī ti sāvakā, sāvakānaṃ saṅgho sāvakasaṅgho, sīla-diṭṭhi-sāmaññatāya saṅghāta-bhāvam āpanno sāvakasamūho ti attho. Yasmā pana sā sammāpaṭipadā uju avaṅkā akuṭilā ajimhā, ariyo ca ñāyo ti pi vuccati, anucchavikattā ca sāmīcī ti pi saṅkhaṃ gatā, tasmā tampaṭipanno ariyasaṅgho ujuppaṭipanno ñāyappaṭipanno sāmīcippaṭipanno ti pi vutto.

91

Ettha ca ye maggaṭṭhā, te sammāpaṭipatti-samaṅgitāya suppaṭipannā, ye phalaṭṭhā, te sammāpaṭipadāya adhigantabbassa adhigatattā atītaṃ paṭipadaṃ sandhāya¹⁹ suppaṭipannā ti veditabbā.

92

Api ca svākkhāte dhammavinaye yathânusiṭṭhaṃ paṭipannattā pi apaṇṇaka-paṭipadaṃ paṭipannattā pi suppaṭipanno. Majjhimāya paṭipadāya antadvayam anupagamma paṭipannattā kāya-vacī-mano-vaṅka-kuṭila-jimha-dosa-ppahānāya paṭipannattā ca ujuppaṭipannattā ca²⁰ ujuppaṭipanno. Ñāyo vuccati nibbānaṃ, tadatthāya paṭipannattā ñāyappaṭipanno. Yathāpaṭipannā sāmīcippaṭipannârahā honti, tathāpaṭipannattā sāmīcippaṭipanno.

CST156

93

Yad idan ti yāni imāni. Cattāri purisayugānī ti yugaḷavasena paṭhamamaggaṭṭho phalaṭṭho ti idam ekaṃ yugaḷan ti evaṃ cattāri purisayugaḷāni honti. Aṭṭha purisapuggalā ti purisapuggalavasena eko paṭhamamaggaṭṭho eko phalaṭṭho ti iminā nayena aṭṭh’eva purisapuggalā honti. Ettha ca puriso ti vā puggalo ti vā ekatthāni etāni padāni, veneyyavasena pan’etaṃ vuttaṃ. Esa Bhagavato sāvakasaṅgho ti yān’imāni yugavasena²¹ cattāri purisayugāni, pāṭi-ekkato²² aṭṭha purisapuggalā, esa Bhagavato sāvakasaṅgho.

94

Āhuneyyo ti ādīsu ānetvā hunitabban ti āhunaṃ, dūrato pi ānetvā sīlavantesu dātabban ti attho, catunnaṃ paccayānam etam adhivacanaṃ. Taṃ āhunaṃ paṭiggahetuṃ yutto tassa mahapphala-karaṇato ti āhuneyyo.

95

Atha vā dūrato pi āgantvā sabba-sāpateyyam pi ettha hunitabban ti āhavanīyo, Sakkâdīnam pi vā āhavanaṃ arahatī ti āhavanīyo. Yo câyaṃ brāhmaṇānaṃ āhavanīyo nāma aggi, yattha hutaṃ mahapphalan ti tesaṃ laddhi. Sace hutassa mahapphalatāya āhavanīyo, saṅgho va āhavanīyo. Saṅghe hutañ hi mahapphalaṃ hoti. Yath’āha:

“Yo ca vassasataṃ jantu aggiṃ paricare vane,
ekañ ca bhāvitattānaṃ muhuttam api pūjaye,
sā yeva pūjanā seyyo, yañ ce vassasataṃ hutan” ti. (dha. pa. 107)

Tad etaṃ nikāyantare āhavanīyo ti padaṃ idha āhuneyyo ti iminā padena atthato ekaṃ, byañjanato pan’ettha kiñcimattam eva nānaṃ. Iti āhuneyyo.

96

Pāhuneyyo ti ettha pana pāhunaṃ vuccati disā-vidisato āgatānaṃ piyamanāpānaṃ ñāti-mittānam atthāya sakkārena paṭiyattaṃ āgantuka-dānaṃ. Tam pi ṭhapetvā te tathārūpe pāhunake saṅghass’eva dātuṃ yuttaṃ, saṅgho va taṃ²³ paṭiggahetuṃ yutto. Saṅghasadiso hi pāhunako natthi, tathā h’esa ekabuddhantare ca dissati, abbokiṇṇañ ca piyamanāpatta-karehi dhammehi samannāgato ti. Evaṃ pāhunam assa dātuṃ yuttaṃ, pāhunañ ca paṭiggahetuṃ yutto ti pāhuneyyo.

Yesaṃ pana pāhavanīyo ti pāḷi, tesaṃ yasmā saṅgho pubbakāram arahati, tasmā sabbapaṭhamaṃ ānetvā ettha hunitabban ti pāhavanīyo. Sabbappakārena vā āhavanam arahatī ti pāhavanīyo. Svâyam idha ten’eva atthena pāhuneyyo ti vuccati.

97

Dakkhiṇā ti pana paralokaṃ saddahitvā dātabba-dānaṃ vuccati. Taṃ dakkhiṇaṃ arahati, dakkhiṇāya vā hito yasmā naṃ mahapphala-karaṇatāya visodhetī ti dakkhiṇeyyo. Ubho hatthe sirasmiṃ patiṭṭhapetvā sabbalokena kayiramānaṃ añjalikammaṃ arahatī ti añjalikaraṇīyo.

98

Anuttaraṃ puññakkhettaṃ lokassā ti sabbalokassa asadisaṃ puñña-virūhana-ṭṭhānaṃ. Yathā hi rañño vā amaccassa vā sālīnaṃ vā yavānaṃ vā virūhana-ṭṭhānaṃ, rañño sālikkhettaṃ rañño yavakkhettan ti vuccati, evaṃ saṅgho sabbalokassa puññānaṃ virūhana-ṭṭhānaṃ. Saṅghaṃ nissāya hi lokassa nānappakāra-hitasukha-saṃvattanikāni puññāni virūhanti, tasmā saṅgho anuttaraṃ puññakkhettaṃ lokassā ti.

CST157

99

Evaṃ suppaṭipannatâdi-bhede saṅghaguṇe anussarato,

“N’eva tasmiṃ samaye rāgapariyuṭṭhitaṃ cittaṃ hoti, na dosa…pe… na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti saṅghaṃ ārabbhā” ti (a. ni. 6.10)

purimanayen’eva vikkhambhita-nīvaraṇassa ekakkhaṇe jhānaṅgāni uppajjanti. Saṅghaguṇānaṃ pana gambhīratāya nānappakāra-guṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etaṃ saṅghaguṇânussaraṇavasena uppannattā saṅghânussat’icc eva saṅkhaṃ gacchati.

100

Imañ ca pana saṅghânussatiṃ anuyutto bhikkhu saṅghe sagāravo hoti sappatisso, saddhâdi-vepullaṃ adhigacchati, pītipāmojjabahulo hoti, bhayabherava-saho, dukkhâdhivāsana-samattho, saṅghena saṃvāsasaññaṃ paṭilabhati, saṅghaguṇânussatiyā ajjhāvutthañ c’assa sarīraṃ sannipatita-saṅgham iva uposathâgāraṃ pūjârahaṃ hoti, saṅghaguṇâdhigamāya cittaṃ namati, vītikkamitabba-vatthu-samāyoge c’assa sammukhā saṅghaṃ passato viya hirottappaṃ paccupaṭṭhāti, uttari appaṭivijjhanto pana sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya saṅghânussatiyā sadā ti.

Idaṃ saṅghânussatiyaṃ vitthārakathāmukhaṃ.

Sīlānussatikathā

CST158

101

Sīlânussatiṃ bhāvetukāmena pana rahogatena paṭisallīnena,

“Aho vata me sīlāni akhaṇḍāni acchiddāni asabalāni akammāsāni bhujissāni viññu-ppasatthāni aparāmaṭṭhāni samādhi-saṃvattanikānī” ti (a. ni. 6.10)

evaṃ akhaṇḍatâdi-guṇavasena attano sīlāni anussaritabbāni, tāni ca gahaṭṭhena gahaṭṭhasīlāni, pabbajitena pabbajitasīlāni.

102

Gahaṭṭhasīlāni vā hontu pabbajitasīlāni vā, yesaṃ ādimhi vā ante vā ekam pi na bhinnaṃ, tāni pariyante chinna-sāṭako viya na khaṇḍānī ti akhaṇḍāni. Yesaṃ vemajjhe ekam pi na bhinnaṃ, tāni majjhe vinividdha-sāṭako viya na chiddānī ti acchiddāni. Yesaṃ paṭipāṭiyā dve vā tīṇi vā na bhinnāni, tāni piṭṭhiyā vā kucchiyā vā uṭṭhitena dīghavaṭṭâdi-saṇṭhānena visabhāga-vaṇṇena kāḷarattâdīnaṃ aññatara-sarīravaṇṇā gāvī viya na sabalānī ti asabalāni. Yāni antarantarā na bhinnāni, tāni visabhāga-binduvicitrā gāvī viya na kammāsānī ti akammāsāni.

103

Avisesena vā sabbāni pi sattavidhena methuna-saṃyogena kodhupanāhâdīhi ca pāpadhammehi anupahatattā akhaṇḍāni acchiddāni asabalāni akammāsāni (I.143-152).

104

Tāni yeva taṇhā-dāsabyato mocetvā bhujissa-bhāva-karaṇena bhujissāni. Buddhâdīhi viññūhi pasatthattā viññu-ppasatthāni. Taṇhā-diṭṭhīhi aparāmaṭṭhatāya, kenaci vā “ayaṃ te sīlesu doso” ti evaṃ parāmaṭṭhuṃ asakkuṇeyyatāya aparāmaṭṭhāni. Upacārasamādhiṃ appanāsamādhiṃ vā, atha vā pana maggasamādhiṃ phalasamādhiñ câpi saṃvattentī ti samādhi-saṃvattanikāni.

CST159

105

Evaṃ akhaṇḍatâdi-guṇavasena attano sīlāni anussarato,

“N’ev’assa tasmiṃ samaye rāgapariyuṭṭhitaṃ cittaṃ hoti, na dosa…pe… na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti, sīlaṃ ārabbhā” ti

purimanayen’eva vikkhambhita-nīvaraṇassa ekakkhaṇe jhānaṅgāni uppajjanti. Sīlaguṇānaṃ pana gambhīratāya nānappakāra-guṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etaṃ sīlaguṇânussaraṇavasena uppannattā sīlânussat’icc eva saṅkhaṃ gacchati.

106

Imañ ca pana sīlânussatiṃ anuyutto bhikkhu sikkhāya sagāravo hoti sabhāgavutti, paṭisanthāre appamatto, attânuvādâdi-bhaya-virahito, aṇumattesu vajjesu bhayadassāvī, saddhâdi-vepullaṃ adhigacchati, pītipāmojjabahulo hoti, uttari appaṭivijjhanto pana sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya sīlânussatiyā sadā ti.

Idaṃ sīlânussatiyaṃ vitthārakathāmukhaṃ.

Cāgānussatikathā

CST160

107

Cāgânussatiṃ bhāvetukāmena pana pakatiyā cāgâdhimuttena nicca-ppavatta-dāna-saṃvibhāgena bhavitabbaṃ. Atha vā pana bhāvanaṃ ārabhantena “ito dāni pabhuti sati paṭiggāhake antamaso ekâlopamattam pi dānaṃ adatvā na bhuñjissāmī” ti samādānaṃ katvā taṃ divasaṃ guṇavisiṭṭhesu paṭiggāhakesu yathāsatti yathābalaṃ dānaṃ datvā tattha nimittaṃ gaṇhitvā rahogatena paṭisallīnena,

“Lābhā vata me suladdhaṃ vata me, yo’haṃ maccheramala-pariyuṭṭhitāya pajāya vigata-malamaccherena cetasā viharāmi, muttacāgo payatapāṇi vossaggarato yācayogo dāna-saṃvibhāga-rato” ti (a. ni.)

evaṃ vigata-malamaccheratâdi-guṇavasena attano cāgo anussaritabbo.

108

Tattha lābhā vata me ti mayhaṃ vata lābhā ²⁴, ye ime,

“Āyuṃ kho pana datvā āyussa bhāgī hoti dibbassa vā mānusassa vā” iti (a. ni. 5.37)

ca,

“Dadaṃ piyo hoti bhajanti naṃ bahū” iti (a. ni. 5.34)

ca,

“Dadamāno piyo hoti, sataṃ dhammaṃ anukkamaṃ” iti (a. ni. 5.35)

ca evamādīhi nayehi Bhagavatā dāyakassa lābhā saṃvaṇṇitā, te mayhaṃ avassaṃ bhāgino ti adhippāyo.

109

Suladdhaṃ vata me ti yaṃ mayā idaṃ sāsanaṃ manussattaṃ vā laddhaṃ, taṃ suladdhaṃ vata me. Kasmā? Yo’haṃ maccheramala-pariyuṭṭhitāya pajāya…pe… dāna-saṃvibhāga-rato ti.

110

Tattha maccheramala-pariyuṭṭhitāyā ti maccheramalena abhibhūtāya. Pajāyā ti pajāyanavasena sattā vuccanti. Tasmā attano sampattīnaṃ parasādhāraṇa-bhāvam asahana-lakkhaṇena cittassa pabhassara-bhāva-dūsakānaṃ kaṇha-dhammānaṃ aññatarena maccheramalena abhibhūtesu sattesū ti ayam ettha attho.

111

Vigata-malamaccherenā ti aññesam pi rāgadosâdi-malānañ c’eva maccherassa ca vigatattā vigata-malamaccherena. Cetasā viharāmī ti yathāvutta-ppakāra-citto hutvā vasāmī ti attho. Suttesu pana Mahānāmasakkassa sotāpannassa sato nissaya-vihāraṃ pucchato nissaya-vihāravasena desitattā “agāraṃ ajjhāvasāmī” ti vuttaṃ, tattha abhibhavitvā vasāmī ti attho.

112

Muttacāgo ti vissaṭṭhacāgo. Payatapāṇī ti parisuddhahattho, sakkaccaṃ sahatthā deyyadhammaṃ dātuṃ sadā dhotahattho yevā ti vuttaṃ hoti. Vossaggarato ti vossajjanaṃ vossaggo, pariccāgo ti attho, tasmiṃ vossagge satatâbhiyogavasena rato ti vossaggarato. Yācayogo ti yaṃ yaṃ pare yācanti, tassa tassa dānato yācanayogo ti attho. Yājayogo ti pi pāṭho, yajana-saṅkhātena yājena yutto ti attho. Dāna-saṃvibhāga-rato ti dāne ca saṃvibhāge ca rato, “ahañ hi dānañ ca demi, attanā paribhuñjitabbato pi ca saṃvibhāgaṃ karomi, etth’eva c’asmi ubhaye rato” ti evaṃ anussaratī ti attho.

CST161

113

Tass’evaṃ vigata-malamaccheratâdi-guṇavasena attano cāgaṃ anussarato,

“N’eva tasmiṃ samaye rāgapariyuṭṭhitaṃ cittaṃ hoti, na dosa…pe… na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti cāgaṃ ārabbhā” ti (a. ni. 5.10)

purimanayen’eva vikkhambhita-nīvaraṇassa ekakkhaṇe jhānaṅgāni uppajjanti. Cāgaguṇānaṃ pana gambhīratāya nānappakāra-cāgaguṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etaṃ cāgaguṇânussaraṇavasena uppannattā cāgânussat’icc eva saṅkhaṃ gacchati.

114

Imañ ca pana cāgânussatiṃ anuyutto bhikkhu bhiyyoso mattāya cāgâdhimutto hoti, alobhajjhāsayo, mettāya anulomakārī, visārado, pītipāmojjabahulo, uttari appaṭivijjhanto pana sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya cāgânussatiyā sadā ti.

Idaṃ cāgânussatiyaṃ vitthārakathāmukhaṃ.

Devatānussatikathā

CST162

115

Devatânussatiṃ bhāvetukāmena pana ariyamaggavasena samudāgatehi saddhâdīhi guṇehi samannāgatena bhavitabbaṃ. Tato rahogatena paṭisallīnena,

“Santi devā Cātumahārājikā, santi devā Tāvatiṃsā, Yāmā, Tusitā, Nimmānaratino, Paranimmitavasavattino, santi devā Brahmakāyikā, santi devā tat’uttari, yathārūpāya saddhāya samannāgatā tā devatā ito cutā tattha upapannā, mayham pi tathārūpā saddhā saṃvijjati, yathārūpena sīlena… yathārūpena sutena… yathārūpena cāgena… yathārūpāya paññāya samannāgatā tā devatā ito cutā tattha upapannā, mayham pi tathārūpā paññā saṃvijjatī” ti (a. ni. 6.10)

evaṃ devatā sakkhiṭṭhāne ṭhapetvā attano saddhâdi-guṇā anussaritabbā.

116

Sutte pana,

“Yasmiṃ, Mahānāma, samaye ariyasāvako attano ca tāsañ ca devatānaṃ saddhañ ca sīlañ ca sutañ ca cāgañ ca paññañ ca anussarati, n’ev’assa tasmiṃ samaye rāgapariyuṭṭhitaṃ cittaṃ hotī” ti (a. ni.)

vuttaṃ. Kiñcâpi vuttaṃ, atha kho taṃ sakkhiṭṭhāne ṭhapetabbadevatānaṃ attano saddhâdīhi samānaguṇa-dīpanatthaṃ vuttan ti veditabbaṃ. Aṭṭhakathāyañ hi,

“Devatā sakkhiṭṭhāne ṭhapetvā attano guṇe anussaratī” ti

daḷhaṃ katvā vuttaṃ.

CST163

117

Tasmā pubbabhāge devatānaṃ guṇe anussaritvā aparabhāge attano saṃvijjamāne saddhâdi-guṇe anussarato c’assa,

“N’eva tasmiṃ samaye rāgapariyuṭṭhitaṃ cittaṃ hoti, na dosa…pe… na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti devatā ārabbhā” ti (a. ni. 6.10)

purimanayen’eva vikkhambhita-nīvaraṇassa ekakkhaṇe jhānaṅgāni uppajjanti. Saddhâdi-guṇānaṃ pana gambhīratāya nānappakāra-guṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etaṃ devatānaṃ guṇasadisa-saddhâdi-guṇânussaraṇavasena devatânussat’icc eva saṅkhaṃ gacchati.

118

Imañ ca pana devatânussatiṃ anuyutto bhikkhu devatānaṃ piyo hoti manāpo, bhiyyoso mattāya saddhâdi-vepullaṃ adhigacchati, pītipāmojjabahulo viharati, uttari appaṭivijjhanto pana sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya devatânussatiyā sadā ti.

Idaṃ devatânussatiyaṃ vitthārakathāmukhaṃ.

Pakiṇṇakakathā

CST164

119

Yaṃ pana etāsaṃ vitthāradesanāyaṃ,

“Ujugatam ev’assa tasmiṃ samaye cittaṃ hoti Tathāgataṃ ārabbhā” ti

ādīni vatvā,

“Ujugatacitto kho pana, Mahānāma, ariyasāvako labhati atthavedaṃ, labhati dhammavedaṃ, labhati dhammûpasaṃhitaṃ pāmojjaṃ, pamuditassa pīti jāyatī” ti (a. ni. 6.10)

vuttaṃ, tattha “iti pi so Bhagavā” ti ādīnaṃ atthaṃ nissāya uppannaṃ tuṭṭhiṃ sandhāya labhati atthavedan ti vuttaṃ, pāḷiṃ nissāya uppannaṃ tuṭṭhiṃ sandhāya labhati dhammavedaṃ, ubhayavasena labhati dhammûpasaṃhitaṃ pāmojjan ti vuttan ti veditabbaṃ.

120

Yañ ca devatânussatiyaṃ devatā ārabbhā ti vuttaṃ, taṃ pubbabhāge devatā ārabbha pavattacittavasena, devatāguṇasadise vā devatābhāva-nipphādake guṇe ārabbha pavattacittavasena vuttan ti veditabbaṃ.

CST165

121

Imā pana cha anussatiyo ariyasāvakānañ ñeva ijjhanti. Tesaṃ hi Buddha-dhamma-saṅgha-guṇā pākaṭā honti, te ca akhaṇḍatâdi-guṇehi sīlehi, vigata-malamaccherena cāgena, mahânubhāvānaṃ devatānaṃ guṇasadisehi saddhâdi-guṇehi samannāgatā.

122

Mahānāmasutte (a. ni. 6.10) ca sotāpannassa nissayavihāraṃ puṭṭhena Bhagavatā sotāpannassa nissayavihāra-dassanattham eva ²⁵ etā vitthārato kathitā.

123

Gedhasutte pi,

“Idha, bhikkhave, ariyasāvako Tathāgataṃ anussarati, iti pi so Bhagavā…pe… ujugatam ev’assa tasmiṃ samaye cittaṃ hoti nikkhantaṃ muttaṃ vuṭṭhitaṃ gedhamhā. Gedho ti kho, bhikkhave, pañcann’etaṃ²⁶ kāmaguṇānam adhivacanaṃ. Idam pi kho, bhikkhave, ārammaṇaṃ karitvā evam idh’ekacce sattā visujjhantī” ti (a. ni. 6.25)

evaṃ ariyasāvakassa anussativasena cittaṃ visodhetvā uttari paramattha-visuddhi-adhigamatthāya kathitā.

124

Āyasmatā Mahākaccānena desite Sambādhokāsasutte pi,

“Acchariyaṃ, āvuso, abbhutaṃ, āvuso, yāvañ c’idaṃ tena Bhagavatā jānatā passatā arahatā sammāsambuddhena sambādhe okāsâdhigamo anubuddho sattānaṃ visuddhiyā…pe… nibbānassa sacchikiriyāya, yad idaṃ cha anussatiṭṭhānāni. Katamāni cha? Idh’āvuso, ariyasāvako Tathāgataṃ anussarati…pe… evam idh’ekacce sattā visuddhidhammā bhavantī” ti (a. ni. 6.26)

evaṃ ariyasāvakass’eva paramattha-visuddhi-dhammatāya okāsâdhigamavasena kathitā.

125

Uposathasutte pi,

“Kathañ ca, Visākhe, ariyûposatho hoti? Upakkiliṭṭhassa, Visākhe, cittassa upakkamena pariyodapanā hoti. Kathañ ca, Visākhe, upakkiliṭṭhassa cittassa upakkamena pariyodapanā hoti? Idha, Visākhe, ariyasāvako Tathāgataṃ anussaratī” ti (a. ni. 3.71)

evaṃ ariyasāvakass’eva uposathaṃ upavasato cittavisodhana-kammaṭṭhānavasena uposathassa mahapphala-bhāva-dassanatthaṃ kathitā.

126

Ekādasanipāte pi,

“Saddho kho, Mahānāma, ārādhako hoti no assaddho, āraddhavīriyo, upaṭṭhitasati, samāhito, paññavā, Mahānāma, ārādhako hoti no duppañño. Imesu kho tvaṃ, Mahānāma, pañcasu dhammesu patiṭṭhāya cha dhamme uttari bhāveyyāsi. Idha tvaṃ, Mahānāma, Tathāgataṃ anussareyyāsi, iti pi so Bhagavā” ti (a. ni. 11.11)

evaṃ ariyasāvakass’eva,

“Tesaṃ no, bhante, nānāvihārena viharataṃ ken’assa vihārena viharitabban” ti

pucchato vihāra-dassanatthaṃ kathitā.

CST166

127

Evaṃ sante pi, parisuddha-sīlâdi-guṇa-samannāgatena puthujjanenâpi manasikātabbā. Anussavavasenâpi hi Buddhâdīnaṃ guṇe anussarato cittaṃ pasīdati yeva, yass’ānubhāvena nīvaraṇāni vikkhambhetvā uḷārapāmojjo vipassanaṃ ārabhitvā arahattaṃ yeva sacchikareyya.

128

Kaṭa-andhakāra-vāsī²⁷ Phussadevatthero viya. So kir’āyasmā Mārena nimmitaṃ Buddharūpaṃ disvā “ayaṃ tāva sarāga-dosa-moho evaṃ sobhati, kathaṃ nu kho Bhagavā na sobhati? So hi sabbaso vītarāga-dosa-moho” ti Buddhârammaṇaṃ pītiṃ paṭilabhitvā vipassanaṃ vaḍḍhetvā arahattaṃ pāpuṇī ti.