说随念业处品

Anussatikammaṭṭhānaniddeso

Maraṇassatikathā

CST167

1

Idāni ito anantarāya maraṇassatiyā bhāvanāniddeso anuppatto. Tattha maraṇan ti ekabhava-pariyāpannassa jīvitindriyassa upacchedo. Yaṃ pan’etaṃ arahantānaṃ vaṭṭadukkhasamuccheda-saṅkhātaṃ samuccheda-maraṇaṃ, saṅkhārānaṃ khaṇabhaṅga-saṅkhātaṃ khaṇika-maraṇaṃ, rukkho mato lohaṃ matan ti ādīsu sammuti-maraṇañ ca, na taṃ idha adhippetaṃ.

2

Yam pi c’etaṃ adhippetaṃ, taṃ kālamaraṇaṃ akālamaraṇan ti duvidhaṃ hoti. Tattha kālamaraṇaṃ puññakkhayena vā āyukkhayena vā ubhayakkhayena vā hoti. Akālamaraṇaṃ kammupacchedaka-kammavasena.

3

Tattha yaṃ vijjamānāya pi āyusantāna-janaka-paccaya-sampattiyā kevalaṃ paṭisandhi-janakassa kammassa vipakka-vipākattā maraṇaṃ hoti, idaṃ puññakkhayena maraṇaṃ nāma. Yaṃ gati-kālâhārâdi-sampattiyā abhāvena ajjatanakāla¹-purisānaṃ viya vassasata-matta-parimāṇassa āyuno khayavasena maraṇaṃ hoti, idaṃ āyukkhayena maraṇaṃ nāma. Yaṃ pana Dūsīmāra-Kalāburājâdīnaṃ viya taṅkhaṇañ ñeva ṭhānā cāvana-samatthena kammunā upacchinna-santānānaṃ, purimakammavasena vā satthâharaṇâdīhi upakkamehi upacchijjamāna-santānānaṃ maraṇaṃ hoti, idaṃ akālamaraṇaṃ nāma. Taṃ sabbam pi vuttappakārena jīvitindriyupacchedena saṅgahitaṃ. Iti jīvitindriyupaccheda-saṅkhātassa maraṇassa saraṇaṃ maraṇassati.

CST168

4

Taṃ bhāvetukāmena rahogatena paṭisallīnena “maraṇaṃ bhavissati, jīvitindriyaṃ upacchijjissatī” ti vā, “maraṇaṃ maraṇan” ti vā yoniso manasikāro pavattetabbo.

5

Ayoniso pavattayato hi iṭṭhajana-maraṇânussaraṇe soko uppajjati, vijātamātuyā piyaputta-maraṇânussaraṇe viya, aniṭṭhajana-maraṇânussaraṇe pāmojjaṃ uppajjati, verīnaṃ verimaraṇânussaraṇe viya, majjhattajana-maraṇânussaraṇe saṃvego na uppajjati, matakaḷevara-dassane chavaḍāhakassa viya, attano maraṇânussaraṇe santāso uppajjati, ukkhittâsikaṃ vadhakaṃ disvā bhīrukajātikassa viya.

6

Tad etaṃ sabbam pi sati-saṃvega-ñāṇa-virahato hoti. Tasmā tattha tattha hatamatasatte oloketvā diṭṭhapubbasampattīnaṃ sattānaṃ matānaṃ maraṇaṃ āvajjetvā satiñ ca saṃvegañ ca ñāṇañ ca yojetvā “maraṇaṃ bhavissatī” ti ādinā nayena manasikāro pavattetabbo. Evaṃ pavattento hi yoniso pavatteti, upāyena pavattetī ti attho.

7

Evaṃ pavattayato yeva hi ekaccassa nīvaraṇāni vikkhambhanti, maraṇârammaṇā sati saṇṭhāti, upacārappattam eva kammaṭṭhānaṃ hoti.

CST169

8

Yassa pana ettāvatā na hoti, tena

1. vadhaka-paccupaṭṭhānato,
2. sampattivipattito,
3. upasaṃharaṇato,
4. kāyabahusādhāraṇato,
5. āyudubbalato,
6. animittato,
7. addhāna-paricchedato,
8. khaṇaparittato ti

imehi aṭṭhah’ākārehi maraṇaṃ anussaritabbaṃ.

9

Tattha vadhaka-paccupaṭṭhānato ti vadhakassa viya paccupaṭṭhānato. Yathā hi “imassa sīsaṃ chindissāmī” ti asiṃ gahetvā gīvāya cārayamāno vadhako paccupaṭṭhito va hoti, evaṃ maraṇam pi paccupaṭṭhitam evā ti anussaritabbaṃ. Kasmā? Saha jātiyā āgatato, jīvitaharaṇato ca.

10

Yathā hi ahicchattaka-makuḷaṃ matthakena paṃsuṃ gahetvā va uggacchati, evaṃ sattā jarāmaraṇaṃ gahetvā va nibbattanti. Tathā hi nesaṃ paṭisandhicittaṃ uppādânantaram eva jaraṃ patvā pabbatasikharato patitasilā viya bhijjati saddhiṃ sampayuttakhandhehi. Evaṃ khaṇikamaraṇaṃ tāva saha jātiyā āgataṃ. Jātassa pana avassaṃ maraṇato idhâdhippeta-maraṇam pi saha jātiyā āgataṃ.

11

Tasmā esa satto jātakālato paṭṭhāya yathā nāma uṭṭhito sūriyo atthâbhimukho gacchat’eva, gatagataṭṭhānato īsakam pi na nivattati, yathā vā nadī pabbateyyā sīghasotā hārahārinī sandat’eva vattat’eva īsakam pi na nivattati, evaṃ īsakam pi anivattamāno maraṇâbhimukho va yāti. Tena vuttaṃ:

“Yam ekarattiṃ paṭhamaṃ gabbhe vasati māṇavo,
abbhuṭṭhito va so yāti, sa gacchaṃ na nivattatī” ti. (jā. 1.15.363)

12

Evaṃ gacchato c’assa, gimhâbhitattānaṃ kunnadīnaṃ khayo viya, pāto āporasânugata-bandhanānaṃ dumapphalānaṃ patanaṃ viya, muggarâbhitāḷitānaṃ mattika-bhājanānaṃ bhedo viya, sūriyarasmi-samphuṭṭhānaṃ ussāvabindūnaṃ viddhaṃsanaṃ viya ca maraṇam eva āsannaṃ hoti. Ten’āha:

“Accayanti ahorattā, jīvitam uparujjhati,
āyu khīyati maccānaṃ, kunnadīnaṃ va odakaṃ. (saṃ. ni. 1.146)

“Phalānam iva pakkānaṃ pāto papatato bhayaṃ,
evaṃ jātāna maccānaṃ niccaṃ maraṇato bhayaṃ.

Yathā pi kumbhakārassa kataṃ mattika-bhājanaṃ,
khuddakañ ca mahantañ ca yaṃ pakkaṃ yañ ca āmakaṃ,²
sabbaṃ bhedana-pariyantaṃ, evaṃ maccāna jīvitaṃ”. (su. ni. 582-583)

“Ussāvo va tiṇaggamhi sūriyuggamanaṃ³ pati,
evam āyu manussānaṃ, mā maṃ amma nivārayā” ti. (jā. 1.11.79)

13

Evaṃ ukkhittâsiko vadhako viya saha jātiyā āgataṃ pan’etaṃ maraṇaṃ gīvāya asiṃ cārayamāno so vadhako viya jīvitaṃ harati yeva, na aharitvā⁴ nivattati. Tasmā saha jātiyā āgatato, jīvitaharaṇato ca ukkhittâsiko vadhako viya maraṇam pi paccupaṭṭhitam evā ti evaṃ vadhaka-paccupaṭṭhānato maraṇaṃ anussaritabbaṃ.

CST170

14

Sampattivipattito ti idha sampatti nāma tāvad eva sobhati, yāva naṃ vipatti nâbhibhavati, na ca sā sampatti nāma atthi, yā vipattiṃ atikkamma tiṭṭheyya. Tathā hi,

“Sakalaṃ mediniṃ bhutvā datvā koṭisataṃ sukhī
aḍḍhâmalaka-mattassa ante issarataṃ gato,

Ten’eva dehabandhena puññamhi khayam āgate
maraṇâbhimukho so pi Asoko sokam āgato” ti.

15

Api ca sabbaṃ ārogyaṃ byādhi-pariyosānaṃ, sabbaṃ yobbanaṃ jarā-pariyosānaṃ, sabbaṃ jīvitaṃ maraṇa-pariyosānaṃ, sabbo yeva lokasannivāso jātiyā anugato, jarāya anusaṭo, byādhinā abhibhūto, maraṇena abbhāhato. Ten’āha:

“Yathā pi selā vipulā nabhaṃ āhacca pabbatā
samantā anupariyeyyuṃ nippothentā catuddisā,

Evaṃ jarā ca maccu ca adhivattanti pāṇine,
khattiye brāhmaṇe vesse sudde caṇḍāla-pukkuse,
na kiñci parivajjeti, sabbam evâbhimaddati.

Na tattha hatthīnaṃ bhūmi, na rathānaṃ na pattiyā,
na câpi manta-yuddhena sakkā jetuṃ dhanena vā” ti. (saṃ. ni. 1.136)

Evaṃ jīvitasampattiyā maraṇavipatti-pariyosānataṃ vavatthapentena sampattivipattito maraṇaṃ anussaritabbaṃ.

CST171

16

Upasaṃharaṇato ti parehi saddhiṃ attano upasaṃharaṇato. Tattha sattah’ākārehi upasaṃharaṇato maraṇaṃ anussaritabbaṃ:

1. yasamahattato,
2. puññamahattato,
3. thāmamahattato,
4. iddhimahattato,
5. paññāmahattato,
6. paccekabuddhato,
7. Sammāsambuddhato ti.

17

Kathaṃ? Idaṃ maraṇaṃ nāma mahāyasānaṃ mahāparivārānaṃ sampanna-dhana-vāhanānaṃ Mahāsammata-Mandhātu-Mahāsudassana-Daḷhanemi-Nimippabhutīnam pi upari nirāsaṅkam eva patitaṃ, kim aṅgaṃ pana mayhaṃ upari na patissati?

Mahāyasā rājavarā, Mahāsammata-ādayo,
te pi maccuvasaṃ pattā, mādisesu kathā va kā ti?

Evaṃ tāva yasamahattato anussaritabbaṃ.

18

Kathaṃ puññamahattato?

Jotiko Jaṭilo Uggo Meṇḍako atha Puṇṇako,
ete c’aññe ca ye loke mahāpuññā ti vissutā,
sabbe maraṇam āpannā, mādisesu kathā va kā ti?

Evaṃ puññamahattato anussaritabbaṃ.

19

Kathaṃ thāmamahattato?

Vāsudevo Baladevo Bhīmaseno Yudhiṭṭhilo,
Cānuro yo mahāmallo⁵ Antakassa vasaṃ gatā.

Evaṃ thāmabalûpetā iti lokamhi vissutā,
ete pi maraṇaṃ yātā, mādisesu kathā va kā ti?

Evaṃ thāmamahattato anussaritabbaṃ.

20

Kathaṃ iddhimahattato?

Pādaṅguṭṭhaka-mattena Vejayantam akampayi
yo nām’iddhimataṃ seṭṭho dutiyo aggasāvako,

So pi maccumukhaṃ ghoraṃ, migo sīhamukhaṃ viya,
paviṭṭho saha iddhīhi, mādisesu kathā va kā ti?

Evaṃ iddhimahattato anussaritabbaṃ.

21

Kathaṃ paññāmahattato?

Lokanāthaṃ ṭhapetvāna ye c’aññe atthi pāṇino,
paññāya Sāriputtassa kalaṃ nâgghanti soḷasiṃ.

Evaṃ nāma mahāpañño paṭhamo aggasāvako
maraṇassa vasaṃ patto, mādisesu kathā va kā ti?

Evaṃ paññāmahattato anussaritabbaṃ.

22

Kathaṃ paccekabuddhato? Ye pi te attano ñāṇavīriyabalena sabbakilesa-sattu-nimmathanaṃ katvā paccekabodhiṃ pattā⁶ khaggavisāṇakappā sayambhuno, te pi maraṇato na muttā, kuto panâhaṃ muccissāmī ti?

Taṃ taṃ nimittam āgamma vīmaṃsantā mahesayo
sayambhuññāṇa-tejena ye pattā āsavakkhayaṃ,

Ekacariyanivāsena khaggasiṅga-samûpamā,
te pi nâtigatā maccuṃ, mādisesu kathā va kā ti?

Evaṃ paccekabuddhato anussaritabbaṃ.

23

Kathaṃ Sammāsambuddhato? Yo pi so Bhagavā asīti-anubyañjanapaṭimaṇḍita-dvattiṃsa-mahāpurisalakkhaṇa-vicitra-rūpakāyo sabbâkāra-parisuddha-sīlakkhandhâdi-guṇaratana-samiddha-dhammakāyo yasamahatta-puññamahatta-thāmamahatta-iddhimahatta-paññāmahattānaṃ pāraṃ gato asamo asamasamo appaṭipuggalo arahaṃ Sammāsambuddho, so pi salila-vuṭṭhinipātena mahā-aggikkhandho viya maraṇa-vuṭṭhinipātena ṭhānaso vūpasanto.

Evaṃ mahânubhāvassa yaṃ nām’etaṃ mahesino
na bhayena na lajjāya maraṇaṃ vasam āgataṃ,

Nillajjaṃ vītasārajjaṃ sabbasattâbhimaddanaṃ,
tayidaṃ mādisaṃ sattaṃ kathaṃ nâbhibhavissatī ti?

Evaṃ Sammāsambuddhato anussaritabbaṃ.

24

Tass’evaṃ yasamahattatâdi-sampannehi parehi saddhiṃ maraṇa-sāmaññatāya attānaṃ upasaṃharitvā, tesaṃ viya sattavisesānaṃ mayham pi maraṇaṃ bhavissatī ti anussarato upacārappattaṃ kammaṭṭhānaṃ hotī ti. Evaṃ upasaṃharaṇato maraṇaṃ anussaritabbaṃ.

CST172

25

Kāyabahusādhāraṇato ti ayaṃ kāyo bahusādhāraṇo. Asītiyā tāva kimikulānaṃ sādhāraṇo, tattha chavi-nissitā pāṇā chaviṃ khādanti, camma-nissitā cammaṃ khādanti, maṃsa-nissitā maṃsaṃ khādanti, nhāru-nissitā nhāruṃ khādanti, aṭṭhi-nissitā aṭṭhiṃ khādanti, miñja-nissitā miñjaṃ khādanti, tatth’eva jāyanti jīyanti mīyanti uccāra-passāvaṃ karonti. Kāyo va⁷ nesaṃ sūtigharañ⁸ c’eva gilānasālā ca susānañ ca vaccakuṭi ca passāvadoṇikā ca. Svâyaṃ tesam pi kimikulānaṃ⁹ pakopena maraṇaṃ nigacchati yeva. Yathā ca asītiyā kimikulānaṃ, evaṃ ajjhattikānaṃ yeva anekasatānaṃ rogānaṃ, bāhirānañ ca ahi-vicchikâdīnaṃ maraṇassa paccayānaṃ sādhāraṇo.

26

Yathā hi catumahāpathe ṭhapite lakkhamhi sabbadisāhi āgatā sara-satti-tomara-pāsāṇâdayo nipatanti, evaṃ kāye pi sabbupaddavā nipatanti. Svâyaṃ tesam pi upaddavānaṃ nipātena maraṇaṃ nigacchati yeva. Ten’āha Bhagavā:

“Idha, bhikkhave, bhikkhu divase nikkhante rattiyā paṭihitāya iti paṭisañcikkhati: bahukā kho me paccayā maraṇassa, ahi vā maṃ ḍaṃseyya, vicchiko vā maṃ ḍaṃseyya, satapadī vā maṃ ḍaṃseyya, tena me assa kālaṅkiriyā, so mam’assa antarāyo, upakkhalitvā vā papateyyaṃ, bhattaṃ vā me bhuttaṃ byāpajjeyya, pittaṃ vā me kuppeyya, semhaṃ vā me kuppeyya, satthakā vā me vātā kuppeyyuṃ, tena me assa kālaṅkiriyā, so mam’assa antarāyo” ti. (a. ni. 6.20)

Evaṃ kāyabahusādhāraṇato maraṇaṃ anussaritabbaṃ.

CST173

27

Āyudubbalato ti āyu nām’etaṃ abalaṃ dubbalaṃ. Tathā hi sattānaṃ jīvitaṃ assāsapassāsûpanibaddhañ c’eva iriyāpathûpanibaddhañ ca sītuṇhûpanibaddhañ ca mahābhūtûpanibaddhañ ca āhārûpanibaddhañ ca.

28

Tad etaṃ assāsapassāsānaṃ samavuttitaṃ labhamānam eva pavattati, bahi nikkhanta-nāsika-vāte pana anto apavisante, paviṭṭhe vā anikkhamante mato nāma hoti. Catunnaṃ iriyāpathānam pi samavuttitaṃ labhamānam eva pavattati, aññataraññatarassa pana adhimattatāya āyusaṅkhārā upacchijjanti. Sītuṇhānam pi samavuttitaṃ labhamānam eva pavattati, atisītena pana ati-uṇhena vā abhibhūtassa vipajjati. Mahābhūtānam pi samavuttitaṃ labhamānam eva pavattati, pathavīdhātuyā pana āpodhātu-ādīnaṃ vā aññataraññatarassa pakopena balasampanno pi puggalo patthaddha-kāyo vā atisārâdivasena kilinnapūti-kāyo vā mahāḍāhapareto vā sambhijjamāna-sandhibandhano vā hutvā jīvitakkhayaṃ pāpuṇāti. Kabaḷīkārâhāram pi yuttakāle labhantass’eva jīvitaṃ pavattati, āhāraṃ alabhamānassa pana parikkhayaṃ gacchatī ti. Evaṃ āyudubbalato maraṇaṃ anussaritabbaṃ.

CST174

29

Animittato ti avavatthānato, paricchedâbhāvato ti attho. Sattānaṃ hi,

Jīvitaṃ byādhi kālo ca dehanikkhepanaṃ gati,
pañc’ete jīvalokasmiṃ animittā na nāyare.

30

Tattha jīvitaṃ tāva “ettakam eva jīvitabbaṃ, na ito paran” ti vavatthānâbhāvato animittaṃ. Kalalakāle pi hi sattā maranti, abbuda-pesi-ghana-māsika-dvemāsa-temāsa-catumāsa-pañcamāsa-dasamāsa-kāle pi, kucchito nikkhantasamaye pi, tato paraṃ vassasatassa anto pi bahi pi maranti yeva.

31

Byādhi pi “iminā va byādhinā sattā maranti, nâññenā” ti ¹⁰ vavatthānâbhāvato animitto. Cakkhurogenâpi hi sattā maranti, sotarogâdīnaṃ aññatarenâpi.

32

Kālo pi “imasmiṃ yeva kāle maritabbaṃ, nâññasmin” ti evaṃ vavatthānâbhāvato animitto. Pubbaṇhe pi hi sattā maranti, majjhanhikâdīnaṃ aññatarasmim pi.

33

Dehanikkhepanam pi “idh’eva mīyamānānaṃ dehena patitabbaṃ, nâññatrā” ti evaṃ vavatthānâbhāvato animittaṃ. Antogāme jātānaṃ hi bahigāme pi attabhāvo patati, bahigāme jātānam pi antogāme, tathā thalajānaṃ vā jale, jalajānaṃ vā thale ti anekappakārato vitthāretabbaṃ.

34

Gati pi “ito cutena idha nibbattitabban” ti evaṃ vavatthānâbhāvato animittā. Devalokato hi cutā manussesu pi nibbattanti, manussalokato cutā devalokādīnam pi yattha katthaci nibbattantī ti evaṃ yantayuttagoṇo viya gatipañcake loko samparivattatī ti. Evaṃ animittato maraṇaṃ anussaritabbaṃ.

CST175

35

Addhāna-paricchedato ti manussānaṃ jīvitassa nāma etarahi paritto addhā, uo ciraṃ jīvati, so vassasataṃ, appaṃ vā bhiyyo. Ten’āha Bhagavā:

“Appam idaṃ, bhikkhave, manussānaṃ āyu, gamanīyo samparāyo, kattabbaṃ kusalaṃ, caritabbaṃ brahmacariyaṃ, natthi jātassa amaraṇaṃ. Yo, bhikkhave, ciraṃ jīvati, so vassasataṃ, appaṃ vā bhiyyo ti…

Appam āyu manussānaṃ, hīḷeyya naṃ suporiso,
careyy’ādittasīso va, natthi maccuss’anāgamo” ti. (saṃ. ni. 1.145)

Aparam pi āha:

“Bhūtapubbaṃ, bhikkhave, Arako nāma satthā ahosī” ti (a. ni.)

sabbam pi sattahi upamāhi alaṅkataṃ suttaṃ vitthāretabbaṃ.

36

Aparam pi āha:

“Yo câyaṃ, bhikkhave, bhikkhu evaṃ maraṇassatiṃ bhāveti: aho vatâhaṃ rattindivaṃ jīveyyaṃ, Bhagavato sāsanaṃ manasikareyyaṃ, bahuṃ vata me kataṃ assā ti.

Yo câyaṃ, bhikkhave, bhikkhu evaṃ maraṇassatiṃ bhāveti: aho vatâhaṃ divasaṃ jīveyyaṃ, Bhagavato sāsanaṃ manasikareyyaṃ, bahuṃ vata me kataṃ assā ti.

Yo câyaṃ, bhikkhave, bhikkhu evaṃ maraṇassatiṃ bhāveti: aho vatâhaṃ tadantaraṃ jīveyyaṃ, yadantaraṃ ekaṃ piṇḍapātaṃ bhuñjāmi, Bhagavato sāsanaṃ manasikareyyaṃ, bahuṃ vata me kataṃ assā ti.

Yo câyaṃ, bhikkhave, bhikkhu evaṃ maraṇassatiṃ bhāveti: aho vatâhaṃ tadantaraṃ jīveyyaṃ, yadantaraṃ cattāro pañca ālope saṅkhāditvā ajjhoharāmi, Bhagavato sāsanaṃ manasikareyyaṃ, bahuṃ vata me kataṃ assā ti. Ime vuccanti, bhikkhave, bhikkhū pamattā viharanti, dandhaṃ maraṇassatiṃ bhāventi āsavānaṃ khayāya.

37

Yo ca khvâyaṃ, bhikkhave, bhikkhu evaṃ maraṇassatiṃ bhāveti: aho vatâhaṃ tadantaraṃ jīveyyaṃ, yadantaraṃ ekaṃ ālopaṃ saṅkhāditvā ajjhoharāmi, Bhagavato sāsanaṃ manasikareyyaṃ, bahuṃ vata me kataṃ assā ti.

Yo câyaṃ, bhikkhave, bhikkhu evaṃ maraṇassatiṃ bhāveti: aho vatâhaṃ tadantaraṃ jīveyyaṃ, yadantaraṃ assasitvā vā passasāmi, passasitvā vā assasāmi, Bhagavato sāsanaṃ manasikareyyaṃ, bahuṃ vata me kataṃ assā ti. Ime vuccanti, bhikkhave, bhikkhū appamattā viharanti, tikkhaṃ maraṇassatiṃ bhāventi āsavānaṃ khayāyā” ti. (a. ni. 6.19)

38

Evaṃ catupañcâlopa-saṅkhādana-mattaṃ avissāsiyo paritto jīvitassa addhā ti evaṃ addhāna-paricchedato maraṇaṃ anussaritabbaṃ.

CST176

39

Khaṇaparittato ti paramatthato hi atiparitto sattānaṃ jīvitakkhaṇo ekacittappavattimatto yeva. Yathā nāma rathacakkaṃ pavattamānam pi eken’eva nemippadesena pavattati, tiṭṭhamānam pi eken’eva tiṭṭhati, evam eva ekacittakkhaṇikaṃ sattānaṃ jīvitaṃ, tasmiṃ citte niruddhamatte satto niruddho ti vuccati. Yath’āha:

“Atīte cittakkhaṇe jīvittha, na jīvati, na jīvissati, anāgate cittakkhaṇe na jīvittha, na jīvati, jīvissati, paccuppanne cittakkhaṇe na jīvittha, jīvati, na jīvissati.

Jīvitaṃ attabhāvo ca sukhadukkhā ca kevalā
ekacittasamāyuttā lahu so vattate khaṇo.

Ye niruddhā marantassa tiṭṭhamānassa vā idha,
sabbe pi sadisā khandhā gatā appaṭisandhikā.

Anibbattena na jāto, paccuppannena jīvati,
cittabhaṅgā mato loko, paññatti paramatthiyā” ti. (mahāni. 39)

Evaṃ khaṇaparittato maraṇaṃ anussaritabbaṃ.

CST177

40

Iti imesaṃ aṭṭhannaṃ ākārānaṃ aññataraññatarena anussarato pi punappunaṃ manasikāravasena cittaṃ āsevanaṃ labhati, maraṇârammaṇā sati santiṭṭhati, nīvaraṇāni vikkhambhanti, jhānaṅgāni pātubhavanti. Sabhāvadhammattā pana saṃvejanīyattā ca ārammaṇassa appanaṃ appatvā upacārappattam eva jhānaṃ hoti.

Lokuttarajjhānaṃ pana dutiya-catutthāni ca āruppajjhānāni sabhāvadhamme pi bhāvanāvisesena appanaṃ pāpuṇanti. Visuddhi-bhāvanânukkamavasena hi lokuttaraṃ appanaṃ pāpuṇāti, ārammaṇâtikkama-bhāvanāvasena āruppaṃ. Appanāpattass’eva hi jhānassa ārammaṇa-samatikkamana-mattaṃ tattha hoti. Idha pana tad ubhayam pi natthi, tasmā upacārappattam eva jhānaṃ hoti.

Tad etaṃ maraṇassatibalena uppannattā maraṇassat’icc eva saṅkhaṃ gacchati.

41

Imañ ca pana maraṇassatiṃ anuyutto bhikkhu satataṃ appamatto hoti, sabbabhavesu anabhiratisaññaṃ paṭilabhati, jīvitanikantiṃ jahāti, pāpagarahī hoti, asannidhibahulo parikkhāresu vigata-malamacchero, aniccasaññā c’assa paricayaṃ gacchati, tadanusāren’eva dukkhasaññā anattasaññā ca upaṭṭhāti, yathā abhāvitamaraṇā sattā sahasā vāḷamiga-yakkha-sappa-cora-vadhakâbhibhūtā viya maraṇasamaye bhayaṃ santāsaṃ sammohaṃ āpajjanti, evaṃ anāpajjitvā abhayo asammūḷho kālaṃ karoti, sace diṭṭhe va dhamme amataṃ n’ārādheti¹¹, kāyassa bhedā sugatiparāyano hoti.

Tasmā have appamādaṃ kayirātha sumedhaso
evaṃ mahânubhāvāya maraṇassatiyā sadā ti.

Idaṃ maraṇassatiyaṃ vitthārakathāmukhaṃ.

Kāyagatāsatikathā

CST178

42

Idāni yaṃ taṃ aññatra buddhuppādā appavattapubbaṃ, sabbatitthiyānaṃ avisayabhūtaṃ, tesu tesu suttantesu,

“Ekadhammo, bhikkhave, bhāvito bahulīkato mahato saṃvegāya saṃvattati, mahato atthāya saṃvattati, mahato yogakkhemāya saṃvattati, mahato satisampajaññāya saṃvattati, ñāṇadassana-paṭilābhāya saṃvattati, diṭṭhadhamma-sukhavihārāya saṃvattati. vijjā-vimutti-phala-sacchikiriyāya saṃvattati. Katamo ekadhammo? Kāyagatāsati… (a. ni. 1.563 ādayo)

Amataṃ te, bhikkhave, paribhuñjanti, ye kāyagatāsatiṃ paribhuñjanti. Amataṃ te, bhikkhave, na paribhuñjanti, ye kāyagatāsatiṃ na paribhuñjanti. Amataṃ tesaṃ, bhikkhave, paribhuttaṃ… aparibhuttaṃ… parihīnaṃ… aparihīnaṃ… viraddhaṃ… aviraddhaṃ, yesaṃ kāyagatāsati āraddhā” ti (a. ni. 1.603)

evaṃ Bhagavatā anekehi ākārehi pasaṃsitvā,

“Kathaṃ bhāvitā, bhikkhave, kāyagatāsati kathaṃ bahulīkatā mahapphalā hoti mahānisaṃsā? Idha, bhikkhave, bhikkhu araññagato vā” ti (ma. ni. 3.154)

ādinā nayena, ānāpāna-pabbaṃ, iriyāpatha-pabbaṃ, catusampajañña-pabbaṃ, paṭikkūlamanasikāra-pabbaṃ, dhātumanasikāra-pabbaṃ, nava sivathika-pabbānī ti imesaṃ cuddasannaṃ pabbānaṃ vasena kāyagatāsati-kammaṭṭhānaṃ niddiṭṭhaṃ, tassa bhāvanāniddeso anuppatto.

43

Tattha yasmā iriyāpatha-pabbaṃ catusampajañña-pabbaṃ dhātumanasikāra-pabban ti imāni tīṇi vipassanāvasena vuttāni, nava sivathika-pabbāni vipassanāñāṇesu yeva ādīnavânupassanāvasena vuttāni, — yā pi c’ettha uddhumātakâdīsu samādhibhāvanā ijjheyya, sā Asubhaniddese pakāsitā yeva, — ānāpāna-pabbaṃ pana paṭikkūlamanasikāra-pabbañ ca imān’ev’ettha dve samādhivasena vuttāni, tesu ānāpāna-pabbaṃ ānāpānassativasena visuṃ kammaṭṭhānaṃ yeva.

44

Yaṃ pan’etaṃ,

“Puna ca paraṃ, bhikkhave, bhikkhu imam eva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati: atthi imasmiṃ kāye kesā lomā…pe… muttan” ti (ma. ni. 3.154)

evaṃ matthaluṅgaṃ aṭṭhimiñjena saṅgahetvā paṭikkūlamanasikāravasena desitaṃ dvattiṃsâkāra-kammaṭṭhānaṃ, idam idha kāyagatāsatī ti adhippetaṃ.

CST179

45

Tatthâyaṃ pāḷivaṇṇanā-pubbaṅgamo bhāvanāniddeso. Imam eva kāyan ti imaṃ catumahābhūtikaṃ pūtikāyaṃ. Uddhaṃ pādatalā ti pādatalato upari. Adho kesamatthakā ti kesaggato heṭṭhā. Tacapariyantan ti tiriyaṃ tacaparicchinnaṃ. Pūraṃ nānappakārassa asucino paccavekkhatī ti nānappakāra-kesâdi-asuci-bharito ayaṃ kāyo ti passati. Kathaṃ? Atthi imasmiṃ kāye kesā…pe… muttan ti.

46

Tattha atthī ti saṃvijjanti. Imasmin ti yvâyaṃ uddhaṃ pādatalā adho kesamatthakā tacapariyanto pūro nānappakārassa asucino ti vuccati, tasmiṃ. Kāye ti sarīre. Sarīraṃ hi asucisañcayato kucchitānaṃ kesâdīnañ c’eva cakkhurogâdīnañ ca rogasatānaṃ āyabhūtato kāyo ti vuccati. Kesā lomā ti ete kesâdayo dvattiṃsâkārā, tattha “atthi imasmiṃ kāye kesā, atthi imasmiṃ kāye lomā” ti evaṃ sambandho veditabbo.

47

Imasmiṃ hi pādatalā paṭṭhāya upari, kesamatthakā paṭṭhāya heṭṭhā, tacato paṭṭhāya parito ti ettake byāmamatte kaḷevare sabbâkārena pi vicinanto na koci kiñci muttaṃ vā maṇiṃ vā veḷuriyaṃ vā agaruṃ vā kuṅkumaṃ vā kappūraṃ vā vāsacuṇṇâdiṃ vā aṇumattam pi sucibhāvaṃ passati, atha kho parama-duggandha-jegucchaṃ asirika-dassanaṃ nānappakāraṃ kesalomâdi-bhedaṃ asuciṃ yeva passati, tena vuttaṃ “atthi imasmiṃ kāye kesā lomā…pe… muttan” ti. Ayam ettha padasambandhato vaṇṇanā.

CST180

48

Imaṃ pana kammaṭṭhānaṃ bhāvetukāmena ādikammikena kulaputtena vuttappakāraṃ kalyāṇamittaṃ upasaṅkamitvā idaṃ kammaṭṭhānaṃ gahetabbaṃ. Tenâpi’ssa kammaṭṭhānaṃ kathentena sattadhā uggahakosallaṃ, dasadhā ca manasikārakosallaṃ ācikkhitabbaṃ. Tattha vacasā manasā vaṇṇato saṇṭhānato disato okāsato paricchedato ti evaṃ sattadhā uggahakosallaṃ ācikkhitabbaṃ.

49

Imasmiṃ hi paṭikkūlamanasikāra-kammaṭṭhāne yo pi tipiṭako hoti, tenâpi manasikārakāle paṭhamaṃ vācāya sajjhāyo kātabbo. Ekaccassa hi sajjhāyaṃ karontass’eva kammaṭṭhānaṃ pākaṭaṃ hoti, Malayavāsī Mahādevattherassa santike uggahita-kammaṭṭhānānaṃ dvinnaṃ therānaṃ viya. Thero kira tehi kammaṭṭhānaṃ yācito “cattāro māse imaṃ yeva sajjhāyaṃ karothā” ti dvattiṃsâkārapāḷiṃ adāsi. Te kiñcâpi nesaṃ dve tayo nikāyā paguṇā, padakkhiṇaggāhitāya pana cattāro māse dvattiṃsâkāraṃ sajjhāyantā va sotāpannā ahesuṃ. Tasmā kammaṭṭhānaṃ kathentena ācariyena antevāsiko vattabbo “paṭhamaṃ tāva vācāya sajjhāyaṃ karohī” ti.

50

Karontena ca tacapañcakâdī ni paricchinditvā anuloma-paṭiloma-vasena sajjhāyo kātabbo. “Kesā lomā nakhā dantā taco” ti hi vatvā puna paṭilomato “taco dantā nakhā lomā kesā” ti vattabbaṃ.

51

Tadanantaraṃ vakkapañcake “maṃsaṃ nhāru aṭṭhi aṭṭhimiñjaṃ vakkan” ti vatvā puna paṭilomato “vakkaṃ aṭṭhimiñjaṃ aṭṭhi nhāru maṃsaṃ, taco dantā nakhā lomā kesā” ti vattabbaṃ.

52

Tato papphāsapañcake “hadayaṃ yakanaṃ kilomakaṃ pihakaṃ papphāsan” ti vatvā puna paṭilomato “papphāsaṃ pihakaṃ kilomakaṃ yakanaṃ hadayaṃ, vakkaṃ aṭṭhimiñjaṃ aṭṭhi nhāru maṃsaṃ, taco dantā nakhā lomā kesā” ti vattabbaṃ.

53

Tato matthaluṅgapañcake “antaṃ antaguṇaṃ udariyaṃ karīsaṃ matthaluṅgan” ti vatvā puna paṭilomato “matthaluṅgaṃ karīsaṃ udariyaṃ antaguṇaṃ antaṃ, papphāsaṃ pihakaṃ kilomakaṃ yakanaṃ hadayaṃ, vakkaṃ aṭṭhimiñjaṃ aṭṭhi nhāru maṃsaṃ, taco dantā nakhā lomā kesā” ti vattabbaṃ.

54

Tato medachakke “pittaṃ semhaṃ pubbo lohitaṃ sedo medo” ti vatvā puna paṭilomato “medo sedo lohitaṃ pubbo semhaṃ pittaṃ, matthaluṅgaṃ karīsaṃ udariyaṃ antaguṇaṃ antaṃ, papphāsaṃ pihakaṃ kilomakaṃ yakanaṃ hadayaṃ, vakkaṃ aṭṭhimiñjaṃ aṭṭhi nhāru maṃsaṃ, taco dantā nakhā lomā kesā” ti vattabbaṃ.

55

Tato muttachakke “assu vasā kheḷo siṅghāṇikā lasikā muttan” ti vatvā puna paṭilomato “muttaṃ lasikā siṅghāṇikā kheḷo vasā assu, medo sedo lohitaṃ pubbo semhaṃ pittaṃ, matthaluṅgaṃ karīsaṃ udariyaṃ antaguṇaṃ antaṃ, papphāsaṃ pihakaṃ kilomakaṃ yakanaṃ hadayaṃ, vakkaṃ aṭṭhimiñjaṃ aṭṭhi nhāru maṃsaṃ, taco dantā nakhā lomā kesā” ti vattabbaṃ.

56

Evaṃ kālasataṃ kālasahassaṃ kālasatasahassam pi vācāya sajjhāyo kātabbo. Vacasā sajjhāyena hi kammaṭṭhāna-tanti paguṇā hoti, na ito c’ito ca cittaṃ vidhāvati, koṭṭhāsā pākaṭā honti, hattha-saṅkhalikā viya vatipāda-panti viya ca khāyanti.

57

Yathā pana vacasā, tath’eva manasā pi sajjhāyo kātabbo. Vacasā sajjhāyo hi manasā sajjhāyassa paccayo hoti, manasā sajjhāyo lakkhaṇapaṭivedhassa paccayo hoti.

58

Vaṇṇato ti kesâdīnaṃ vaṇṇo vavatthapetabbo. Saṇṭhānato ti tesañ ñeva saṇṭhānaṃ vavatthapetabbaṃ. Disato ti, imasmiṃ hi sarīre nābhito uddhaṃ uparimadisā, adho heṭṭhimadisā, tasmā “ayaṃ koṭṭhāso imissā nāma disāyā” ti disā vavatthapetabbā. Okāsato ti “ayaṃ koṭṭhāso imasmiṃ nāma okāse patiṭṭhito” ti evaṃ tassa tassa okāso vavatthapetabbo.

59

Paricchedato ti sabhāga-paricchedo visabhāga-paricchedo ti dve paricchedā. Tattha “ayaṃ koṭṭhāso heṭṭhā ca upari ca tiriyañ ca iminā nāma paricchinno” ti evaṃ sabhāga-paricchedo veditabbo. “Kesā na lomā, lomā pi na kesā” ti evaṃ amissakatāvasena visabhāga-paricchedo veditabbo.

60

Evaṃ sattadhā uggahakosallaṃ ācikkhantena pana “idaṃ kammaṭṭhānaṃ asukasmiṃ sutte paṭikkūlavasena kathitaṃ, asukasmiṃ dhātuvasenā” ti ñatvā ācikkhitabbaṃ. Idañ hi Mahāsatipaṭṭhāne (dī. ni. 2.377) paṭikkūlavasen’eva kathitaṃ, Mahāhatthipadopama- (ma. ni. 1.300 ādayo) Mahārāhulovāda- (ma. ni. 2.113 ādayo) Dhātuvibhaṅgesu (ma. ni. 3.342 ādayo) dhātuvasena kathitaṃ. Kāyagatāsatisutte (ma. ni. 3.153) pana yassa vaṇṇato upaṭṭhāti, taṃ sandhāya cattāri jhānāni vibhattāni. Tattha dhātuvasena kathitaṃ vipassanā-kammaṭṭhānaṃ hoti, paṭikkūlavasena kathitaṃ samatha-kammaṭṭhānaṃ, tad etaṃ idha samatha-kammaṭṭhānam evā ti.

CST181

61

Evaṃ sattadhā uggahakosallaṃ ācikkhitvā,

1. anupubbato,
2. nâtisīghato,
3. nâtisaṇikato,
4. vikkhepa-paṭibāhanato,
5. paṇṇatti-samatikkamanato,
6. anupubba-muñcanato,
7. appanāto,
8. tayo ca suttantā ti

evaṃ dasadhā manasikārakosallaṃ ācikkhitabbaṃ.

62

Tattha anupubbato ti idañ hi sajjhāyakaraṇato paṭṭhāya anupaṭipāṭiyā manasikātabbaṃ, na ekantarikāya. Ekantarikāya hi manasikaronto yathā nāma akusalo puriso dvattiṃsapadaṃ nisseṇiṃ ekantarikāya ārohanto kilantakāyo patati, na ārohanaṃ sampādeti, evam eva bhāvanāsampattivasena adhigantabbassa assādassa anadhigamā kilantacitto patati, na bhāvanaṃ sampādeti.

63

Anupubbato manasikarontenâpi ca nâtisīghato manasikātabbaṃ. Atisīghato manasikaroto hi yathā nāma tiyojana-maggaṃ paṭipajjitvā okkamana-vissajjanaṃ asallakkhetvā sīghena javena satakkhattum pi gamanâgamanaṃ karoto purisassa, kiñcâpi addhānaṃ parikkhayaṃ gacchati, atha kho pucchitvā va gantabbaṃ hoti, evam eva kevalaṃ kammaṭṭhānaṃ pariyosānaṃ pāpuṇāti, avibhūtaṃ pana hoti, na visesaṃ āvahati, tasmā nâtisīghato manasikātabbaṃ.

64

Yathā ca nâtisīghato, evaṃ nâtisaṇikato pi. Atisaṇikato manasikaroto hi yathā nāma tadahe va tiyojana-maggaṃ gantukāmassa purisassa antarāmagge rukkha-pabbata-taḷākâdīsu vilambamānassa maggo parikkhayaṃ na gacchati, dvîha-tîhena pariyosāpetabbo hoti, evam eva kammaṭṭhānaṃ pariyosānaṃ na gacchati, visesâdhigamassa paccayo na hoti.

65

Vikkhepa-paṭibāhanato ti kammaṭṭhānaṃ vissajjetvā bahiddhā puthuttârammaṇe cetaso vikkhepo paṭibāhitabbo. Appaṭibāhato hi yathā nāma ekapadikaṃ papātamaggaṃ paṭipannassa purisassa akkamanapadaṃ asallakkhetvā ito c’ito ca vilokayato padavāro virajjhati, tato sataporise papāte patitabbaṃ hoti, evam eva bahiddhā vikkhepe sati kammaṭṭhānaṃ parihāyati paridhaṃsati. Tasmā vikkhe-papaṭibāhanato manasikātabbaṃ.

66

Paṇṇatti-samatikkamanato ti yâyaṃ kesā lomā ti ādikā paṇṇatti, taṃ atikkamitvā paṭikkūlan ti cittaṃ ṭhapetabbaṃ. Yathā hi udaka-dullabhakāle manussā araññe udapānaṃ disvā tattha tālapaṇṇâdikaṃ kiñcid eva saññāṇaṃ bandhitvā tena saññāṇena āgantvā nhāyanti c’eva pivanti ca, yadā pana nesaṃ abhiṇha-sañcārena āgatâgatapadaṃ pākaṭaṃ hoti, tadā saññāṇena kiccaṃ na hoti, icchiticchitakkhaṇe gantvā nhāyanti c’eva pivanti ca, evam eva pubbabhāge kesā lomā ti paṇṇattivasena manasikaroto paṭikkūlabhāvo pākaṭo hoti, atha kesā lomā ti paṇṇattiṃ samatikkamitvā paṭikkūlabhāve yeva cittaṃ ṭhapetabbaṃ.

67

Anupubba-muñcanato ti yo yo koṭṭhāso na upaṭṭhāti, taṃ taṃ muñcantena anupubba-muñcanato manasikātabbaṃ. Ādikammikassa hi kesā ti manasikaroto manasikāro gantvā muttan ti imaṃ pariyosāna-koṭṭhāsam eva āhacca tiṭṭhati, muttan ti ca manasikaroto manasikāro gantvā kesā ti imaṃ ādi-koṭṭhāsam eva āhacca tiṭṭhati, ath’assa manasikaroto manasikaroto keci koṭṭhāsā upaṭṭhahanti, keci na upaṭṭhahanti, tena ye ye upaṭṭhahanti, tesu tesu tāva kammaṃ kātabbaṃ, yāva dvīsu upaṭṭhitesu tesam pi eko suṭṭhutaraṃ upaṭṭhahati, evaṃ upaṭṭhitaṃ pana tam eva punappunaṃ manasikarontena appanā uppādetabbā.

68

Tatrâyaṃ upamā: yathā hi dvattiṃsa-tālake tālavane vasantaṃ makkaṭaṃ gahetukāmo luddo ādimhi ṭhitatālassa paṇṇaṃ sarena vijjhitvā ukkuṭṭhiṃ kareyya, atha kho so makkaṭo paṭipāṭiyā tasmiṃ tasmiṃ tāle patitvā pariyantatālam eva gaccheyya, tattha pi gantvā luddena tath’eva kate puna ten’eva nayena āditālaṃ āgaccheyya, so evaṃ punappunaṃ paripātiyamāno¹² ukkuṭṭhukkuṭṭhi-ṭṭhāne yeva uṭṭhahitvā anukkamena ekasmiṃ tāle nipatitvā tassa vemajjhe makuḷa-tālapaṇṇa-sūciṃ daḷhaṃ gahetvā vijjhiyamāno pi na uṭṭhaheyya, evaṃsampadam idaṃ daṭṭhabbaṃ.

69

Tatr’idaṃ opamma-saṃsandanaṃ: yathā hi tālavane dvattiṃsa tālā, evaṃ imasmiṃ kāye dvattiṃsa koṭṭhāsā, makkaṭo viya cittaṃ, luddo viya yogâvacaro. Makkaṭassa dvattiṃsa-tālake tālavane nivāso viya yogino cittassa dvattiṃsa-koṭṭhāsake kāye ārammaṇavasena anusañcaraṇaṃ. Luddena ādimhi ṭhitatālassa paṇṇaṃ sarena vijjhitvā ukkuṭṭhiyā katāya makkaṭassa tasmiṃ tasmiṃ tāle patitvā pariyantatāla-gamanaṃ viya yogino kesā ti manasikāre āraddhe paṭipāṭiyā gantvā pariyosāna-koṭṭhāse yeva cittassa saṇṭhānaṃ. Puna paccāgamane pi es’eva nayo. Punappunaṃ paripātiyamānassa makkaṭassa ukkuṭṭhukkuṭṭhi-ṭṭhāne uṭṭhānaṃ viya punappunaṃ manasikaroto kesuci kesuci upaṭṭhitesu anupaṭṭhahante vissajjetvā upaṭṭhitesu parikammakaraṇaṃ. Anukkamena ekasmiṃ tāle nipatitvā tassa majjhe¹³ makuḷa-tālapaṇṇa-sūciṃ daḷhaṃ gahetvā vijjhiyamānassa pi anuṭṭhānaṃ viya avasāne dvīsu upaṭṭhitesu yo suṭṭhutaraṃ upaṭṭhāti, tam eva punappunaṃ manasikaritvā appanāya uppādanaṃ.

70

Aparā pi upamā: yathā nāma piṇḍapātiko bhikkhu dvattiṃsa-kulaṃ gāmaṃ upanissāya vasanto paṭhamagehe yeva dve bhikkhā labhitvā parato ekaṃ vissajjeyya, puna divase tisso labhitvā parato dve vissajjeyya, tatiyadivase ādimhi yeva pattapūraṃ labhitvā āsanasālaṃ gantvā paribhuñjeyya, evaṃsampadam idaṃ daṭṭhabbaṃ.

71

Dvattiṃsa-kulagāmo viya hi dvattiṃsâkāro, piṇḍapātiko viya yogâvacaro. Tassa taṃ gāmaṃ upanissāya vāso viya yogino dvattiṃsâkāre parikammakaraṇaṃ. Paṭhamagehe dve bhikkhā labhitvā parato ekissā vissajjanaṃ viya dutiyadivase tisso labhitvā parato dvinnaṃ vissajjanaṃ viya ca manasikaroto manasikaroto anupaṭṭhahante vissajjetvā upaṭṭhitesu yāva koṭṭhāsa-dvaye parikammakaraṇaṃ. Tatiyadivase ādimhi yeva pattapūraṃ labhitvā āsanasālāyaṃ nisīditvā paribhogo viya dvīsu yo suṭṭhutaraṃ upaṭṭhāti, tam eva punappunaṃ manasikaritvā appanāya uppādanaṃ.

72

Appanāto ti appanā-koṭṭhāsato. “Kesâdīsu ekekasmiṃ koṭṭhāse appanā hotī” ti veditabbā ti ayam ev’ettha adhippāyo.

73

Tayo ca suttantā ti Adhicittaṃ, Sītibhāvo, Bojjhaṅgakosallan ti ime tayo suttantā vīriya-samādhi-yojanatthaṃ veditabbā ti ayam ettha adhippāyo.

74

Tattha,

“Adhicittam anuyuttena, bhikkhave, bhikkhunā tīṇi nimittāni kālena kālaṃ manasikātabbāni, kālena kālaṃ samādhinimittaṃ manasikātabbaṃ, kālena kālaṃ paggahanimittaṃ manasikātabbaṃ, kālena kālaṃ upekkhānimittaṃ manasikātabbaṃ. Sace, bhikkhave, adhicittam anuyutto bhikkhu ekantaṃ samādhinimittañ ñeva manasikareyya, ṭhānaṃ taṃ cittaṃ kosajjāya saṃvatteyya. Sace, bhikkhave, adhicittam anuyutto bhikkhu ekantaṃ paggahanimittañ ñeva manasikareyya, ṭhānaṃ taṃ cittaṃ uddhaccāya saṃvatteyya. Sace, bhikkhave, adhicittam anuyutto bhikkhu ekantaṃ upekkhānimittañ ñeva manasikareyya, ṭhānaṃ taṃ cittaṃ na sammā samādhiyeyya āsavānaṃ khayāya. Yato ca kho, bhikkhave, adhicittam anuyutto bhikkhu kālena kālaṃ samādhinimittaṃ… paggahanimittaṃ… upekkhānimittaṃ manasikaroti, taṃ hoti cittaṃ muduñ ca kammaññañ ca pabhassarañ ca, na ca pabhaṅgu, sammā samādhiyati āsavānaṃ khayāya.

75

“Seyyathā pi, bhikkhave, suvaṇṇakāro vā suvaṇṇakārantevāsī vā ukkaṃ bandhati, ukkaṃ bandhitvā ukkāmukhaṃ ālimpeti, ukkāmukhaṃ ālimpetvā saṇḍāsena jātarūpaṃ gahetvā ukkāmukhe pakkhipitvā kālena kālaṃ abhidhamati, kālena kālaṃ udakena paripphoseti, kālena kālaṃ ajjhupekkhati. Sace, bhikkhave, suvaṇṇakāro vā suvaṇṇakārantevāsī vā taṃ jātarūpaṃ ekantaṃ abhidhameyya, ṭhānaṃ taṃ jātarūpaṃ ḍaheyya. Sace, bhikkhave, suvaṇṇakāro vā suvaṇṇakārantevāsī vā taṃ jātarūpaṃ ekantaṃ udakena paripphoseyya, ṭhānaṃ taṃ jātarūpaṃ nibbāyeyya. Sace, bhikkhave, suvaṇṇakāro vā suvaṇṇakārantevāsī vā taṃ jātarūpaṃ ekantaṃ ajjhupekkheyya, ṭhānaṃ taṃ jātarūpaṃ na sammā paripākaṃ gaccheyya. Yato ca kho, bhikkhave, suvaṇṇakāro vā suvaṇṇakārantevāsī vā taṃ jātarūpaṃ kālena kālaṃ abhidhamati, kālena kālaṃ udakena paripphoseti, kālena kālaṃ ajjhupekkhati, taṃ hoti jātarūpaṃ muduñ ca kammaññañ ca pabhassarañ ca, na ca pabhaṅgu, sammā upeti kammāya, yassā yassā ca piḷandhanavikatiyā ākaṅkhati, yadi paṭikāya yadi kuṇḍalāya yadi gīveyyāya yadi suvaṇṇamālāya, tañ c’assa atthaṃ anubhoti.

76

“Evam eva kho, bhikkhave, adhicittam anuyuttena…pe… samādhiyati āsavānaṃ khayāya, yassa yassa ca abhiññā-sacchikaraṇīyassa dhammassa cittaṃ abhininnāmeti abhiññā-sacchikiriyāya, tatra tatr’eva sakkhibhabbataṃ pāpuṇāti, sati sati āyatane” ti. (a. ni. 3.103)

Idaṃ suttaṃ Adhicittan ti veditabbaṃ.

77

“Chahi, bhikkhave, dhammehi samannāgato bhikkhu bhabbo anuttaraṃ sītibhāvaṃ sacchikātuṃ. Katamehi chahi? Idha, bhikkhave, bhikkhu yasmiṃ samaye cittaṃ niggahetabbaṃ, tasmiṃ samaye cittaṃ niggaṇhāti, yasmiṃ samaye cittaṃ paggahetabbaṃ, tasmiṃ samaye cittaṃ paggaṇhāti, yasmiṃ samaye cittaṃ sampahaṃsitabbaṃ, tasmiṃ samaye cittaṃ sampahaṃseti, yasmiṃ samaye cittaṃ ajjhupekkhitabbaṃ, tasmiṃ samaye cittaṃ ajjhupekkhati, paṇītâdhimuttiko ca hoti nibbānâbhirato. Imehi kho, bhikkhave, chahi dhammehi samannāgato bhikkhu bhabbo anuttaraṃ sītibhāvaṃ sacchikātun” ti. (a. ni. 6.85)

Idaṃ suttaṃ Anuttaraṃ Sītibhāvo ti veditabbaṃ.

78

Bojjhaṅgakosallaṃ pana,

“Evam eva kho, bhikkhave, yasmiṃ samaye līnaṃ cittaṃ hoti, akālo tasmiṃ samaye passaddhi-sambojjhaṅgassa bhāvanāyā” ti (saṃ. ni. 5.234)

appanākosallakathāyaṃ dassitam eva (IV.51, 57).

79

Iti idaṃ sattavidhaṃ uggahakosallaṃ suggahitaṃ katvā idañ ca dasavidhaṃ manasikārakosallaṃ suṭṭhu vavatthapetvā tena yoginā ubhayakosallavasena kammaṭṭhānaṃ sādhukaṃ uggahetabbaṃ.

80

Sace pan’assa ācariyena saddhiṃ ekavihāre yeva phāsu hoti, evaṃ vitthārena akathāpetvā kammaṭṭhānaṃ suṭṭhu vavatthapetvā kammaṭṭhānaṃ anuyujjantena visesaṃ labhitvā uparûpari kathāpetabbaṃ. Aññattha vasitukāmena yathāvuttena vidhinā vitthārato kathāpetvā punappunaṃ parivattetvā sabbaṃ gaṇṭhiṭṭhānaṃ chinditvā, Pathavīkasiṇaniddese vuttanayen’eva ananurūpaṃ senāsanaṃ pahāya anurūpe vihāre vasantena khuddaka-palibodhupacchedaṃ katvā paṭikkūla-manasikāre parikammaṃ kātabbaṃ.

81

Karontena pana kesesu tāva nimittaṃ gahetabbaṃ. Kathaṃ? Ekaṃ vā dve vā kese luñcitvā hatthatale ṭhapetvā vaṇṇo tāva vavatthapetabbo, chinnaṭṭhāne pi kese oloketuṃ vaṭṭati, udakapatte vā yāgupatte vā oloketum pi vaṭṭati yeva. Kāḷakakāle disvā kāḷakā ti manasikātabbā, setakāle setā ti, missakakāle pana ussadavasena manasikātabbā honti. Yathā ca kesesu, evaṃ sakale pi tacapañcake disvā va nimittaṃ gahetabbaṃ.

Koṭṭhāsavavatthāpanakathā

CST182

82

Evaṃ nimittaṃ gahetvā sabbakoṭṭhāse vaṇṇa-saṇṭhāna-disokāsa-pariccheda-vasena vavatthapetvā vaṇṇa-saṇṭhāna-gandha-āsayokāsa-vasena pañcadhā paṭikkūlato¹⁴ vavatthapetabbā.

83

Tatrâyaṃ sabbakoṭṭhāsesu anupubbakathā. Kesā tāva pakativaṇṇena kāḷakā addâriṭṭhakavaṇṇā. Saṇṭhānato dīghavaṭṭalikā tulādaṇḍasaṇṭhānā. Disato uparimadisāya jātā. Okāsato ubhosu passesu kaṇṇacūḷikāhi, purato nalāṭantena, pacchato galavāṭakena paricchinnā, sīsakaṭāhaveṭhanaṃ allacammaṃ kesānaṃ okāso. Paricchedato kesā sīsaveṭhanacamme vīhaggamattaṃ pavisitvā patiṭṭhitena heṭṭhā attano mūlatalena, upari ākāsena, tiriyaṃ aññamaññena paricchinnā, “dve kesā ekato natthī” ti ayaṃ sabhāga-paricchedo, “kesā na lomā, lomā na kesā” ti evaṃ avasesa-ekatiṃsa-koṭṭhāsehi amissīkatā kesā nāma pāṭiyekko ekakoṭṭhāso ti ayaṃ visabhāga-paricchedo. Idaṃ kesānaṃ vaṇṇâdito vavatthāpanaṃ.

CST183

84

Idaṃ pana nesaṃ vaṇṇâdivasena pañcadhā paṭikkūlato vavatthāpanaṃ. Kesā nām’ete vaṇṇato pi paṭikkūlā, saṇṭhānato pi gandhato pi āsayato pi okāsato pi paṭikkūlā.

85

Manuññe pi hi yāgupatte vā bhattapatte vā kesavaṇṇaṃ kiñci disvā “kesamissakam idaṃ, haratha nan” ti jigucchanti, evaṃ kesā vaṇṇato paṭikkūlā. Rattiṃ bhuñjantā pi kesasaṇṭhānaṃ akka-vākaṃ vā makaci-vākaṃ vā chupitvā pi tath’eva jigucchanti, evaṃ saṇṭhānato paṭikkūlā.

86

Telamakkhana-pupphadhūpâdi-saṅkhāra-virahitānañ ca kesānaṃ gandho paramajeguccho hoti, tato jegucchataro aggimhi pakkhittānaṃ. Kesā hi vaṇṇa-saṇṭhānato appaṭikkūlā pi siyuṃ, gandhena pana paṭikkūlā yeva. Yathā hi daharassa kumārassa vaccaṃ vaṇṇato haliddi-vaṇṇaṃ, saṇṭhānato pi haliddipiṇḍa-saṇṭhānaṃ, saṅkāraṭṭhāne chaḍḍitañ ca uddhumātaka-kāḷasunakha-sarīraṃ vaṇṇato tālapakkavaṇṇaṃ, saṇṭhānato vaṭṭetvā vissaṭṭha-mudiṅga-saṇṭhānaṃ, dāṭhā pi’ssa sumanamakuḷa-sadisā ti ubhayam pi vaṇṇa-saṇṭhānato siyā appaṭikkūlaṃ, gandhena pana paṭikkūlam eva, evaṃ kesā pi siyuṃ vaṇṇa-saṇṭhānato appaṭikkūlā gandhena pana paṭikkūlā yevā ti.

87

Yathā pana asuciṭṭhāne gāma-nissandena jātāni sūpeyyapaṇṇāni nāgarika-manussānaṃ jegucchāni honti aparibhogāni, evaṃ kesā pi pubba-lohita-mutta-karīsa-pitta-semhâdi-nissandena jātattā jegucchā ti. Idaṃ nesaṃ āsayato pāṭikkulyaṃ.

88

Ime ca kesā nāma gūtha-rāsimhi uṭṭhitakaṇṇikaṃ viya ekatiṃsa-koṭṭhāsa-rāsimhi jātā. Te susāna-saṅkāra-ṭṭhānâdīsu jātasākaṃ viya, parikkhâdīsu jāta-kamala-kuvalayâdi-pupphaṃ viya ca asuciṭṭhāne jātattā paramajegucchā ti. Idaṃ nesaṃ okāsato pāṭikkulyaṃ.

89

Yathā ca kesānaṃ, evaṃ sabbakoṭṭhāsānaṃ vaṇṇa-saṇṭhāna-gandhâsayokāsa-vasena pañcadhā paṭikkūlatā veditabbā, vaṇṇa-saṇṭhāna-disokāsa-pariccheda-vasena pana sabbe pi visuṃ visuṃ vavatthapetabbā.

CST184

90

Tattha lomā tāva pakativaṇṇato na kesā viya asambhinnakāḷakā, kāḷapiṅgalā pana honti. Saṇṭhānato onataggā tālamūlasaṇṭhānā. Disato dvīsu disāsu jātā. Okāsato ṭhapetvā kesānaṃ patiṭṭhitokāsañ ca hatthapādatalāni ca yebhuyyena avasesa-sarīra-veṭhanacamme jātā. Paricchedato sarīra-veṭhanacamme likhāmattaṃ pavisitvā patiṭṭhitena heṭṭhā attano mūlatalena, upari ākāsena, tiriyaṃ aññamaññena paricchinnā, “dve lomā ekato natthi” ayaṃ nesaṃ sabhāga-paricchedo, visabhāga-paricchedo pana kesa-sadiso yeva.

CST185

91

Nakhā ti vīsatiyā nakhapattānaṃ nāmaṃ. Te sabbe pi vaṇṇato setā. Saṇṭhānato maccha-sakalika-saṇṭhānā. Disato pādanakhā heṭṭhimadisāya, hatthanakhā uparimadisāyā ti dvīsu disāsu jātā. Okāsato aṅgulīnaṃ aggapiṭṭhesu patiṭṭhitā. Paricchedato dvīsu disāsu aṅgulikoṭi-maṃsehi, anto aṅgulipiṭṭhi-maṃsena, bahi c’eva agge ca ākāsena, tiriyaṃ aññamaññena paricchinnā, “dve nakhā ekato natthi” ayaṃ nesaṃ sabhāga-paricchedo, visabhāga-paricchedo pana kesa-sadiso yeva.

CST186

92

Dantā ti paripuṇṇadantassa dvattiṃsa dantaṭṭhikāni. Te pi vaṇṇato setā. Saṇṭhānato anekasaṇṭhānā. Tesaṃ hi heṭṭhimāya tāva dantapāḷiyā majjhe cattāro dantā mattikāpiṇḍe paṭipāṭiyā ṭhapita-alābu-bīja-saṇṭhānā, tesaṃ ubhosu passesu ekeko ekamūlako ekakoṭiko mallika-makuḷa-saṇṭhāno, tato ekeko dvimūlako dvikoṭiko yānaka-upatthambhini-saṇṭhāno, tato dve dve timūlā tikoṭikā, tato dve dve catumūlā catukoṭikā ti, uparimapāḷiyā pi es’eva nayo. Disato uparimadisāya jātā. Okāsato dvīsu hanukaṭṭhikesu patiṭṭhitā. Paricchedato heṭṭhā hanukaṭṭhike patiṭṭhitena attano mūlatalena, upari ākāsena, tiriyaṃ aññamaññena paricchinnā, “dve dantā ekato natthi” ayaṃ nesaṃ sabhāga-paricchedo, visabhāga-paricchedo pana kesa-sadiso yeva.

CST187

93

Taco ti sakalasarīraṃ veṭhetvā ṭhitacammaṃ. Tassa upari kāḷa-sāma-pītâdi-vaṇṇā chavi nāma, yā sakalasarīrato pi saṅkaḍḍhiyamānā badaraṭṭhi-mattā hoti. Taco pana vaṇṇato seto yeva, so c’assa setabhāvo aggijālâbhighāta-paharaṇappahārâdīhi viddhaṃsitāya chaviyā pākaṭo hoti. Saṇṭhānato sarīrasaṇṭhāno va hoti. Ayam ettha saṅkhepo.

94

Vitthārato pana pādaṅgulittaco kosakāraka-kosa-saṇṭhāno. Piṭṭhipādattaco puṭabandha-upāhana-saṇṭhāno. Jaṅghattaco bhattapuṭaka-tālapaṇṇa-saṇṭhāno. Ūruttaco taṇḍulabharita-dīghatthavika-saṇṭhāno. Ānisadattaco udakapūrita-paṭaparissāvana-saṇṭhāno. Piṭṭhittaco phalakonaddha-cammasaṇṭhāno. Kucchittaco vīṇādoṇikonaddha-cammasaṇṭhāno. Urattaco yebhuyyena caturassa-saṇṭhāno. Ubhayabāhuttaco tūṇironaddha-cammasaṇṭhāno. Piṭṭhihatthattaco khurakosa-saṇṭhāno, phaṇaka-tthavika-saṇṭhāno vā. Hatthaṅgulittaco kuñcikā-kosaka-saṇṭhāno. Gīvattaco gala-kañcuka-saṇṭhāno. Mukhattaco chiddâvachiddo-kīṭa-kulāvaka-saṇṭhāno. Sīsattaco patta-tthavika-saṇṭhāno ti.

95

Tacapariggaṇhakena ca yogâvacarena uttaroṭṭhato paṭṭhāya uparimukhaṃ ñāṇaṃ pesetvā paṭhamaṃ tāva mukhaṃ pariyonandhitvā ṭhitacammaṃ vavatthapetabbaṃ, tato nalāṭaṭṭhicammaṃ. Tato thavikāya pakkhittapattassa ca thavikāya ca antarena hattham iva sīsaṭṭhikassa ca sīsacammassa ca antarena ñāṇaṃ pesetvā aṭṭhikena saddhiṃ cammassa ekâbaddhabhāvaṃ viyojentena sīsacammaṃ vavatthapetabbaṃ. Tato khandhacammaṃ, tato anulomena paṭilomena ca dakkhiṇahatthacammaṃ, atha ten’eva nayena vāmahatthacammaṃ. Tato piṭṭhicammaṃ taṃ vavatthapetvā anulomena paṭilomena ca dakkhiṇapādacammaṃ, atha ten’eva nayena vāmapādacammaṃ. Tato anukkamen’eva vatthi-udara-hadaya-gīvacammāni vavatthapetabbāni. Atha gīvacammânantaraṃ heṭṭhima-hanucammaṃ vavatthapetvā adharoṭṭha-pariyosānaṃ pāpetvā niṭṭhapetabbaṃ. Evaṃ oḷārikoḷārikaṃ pariggaṇhantassa sukhumam pi pākaṭaṃ hoti.

96

Disato dvīsu disāsu jāto. Okāsato sakalasarīraṃ pariyonandhitvā ṭhito. Paricchedato heṭṭhā patiṭṭhitatalena, upari ākāsena paricchinno, ayam assa sabhāga-paricchedo, visabhāga-paricchedo pana kesa-sadiso yeva.

CST188

97

Maṃsan ti nava maṃsapesisatāni. Taṃ sabbam pi vaṇṇato rattaṃ kiṃsuka-puppha-sadisaṃ. Saṇṭhānato jaṅghapiṇḍikamaṃsaṃ tālapaṇṇa-puṭa-bhatta-saṇṭhānaṃ. Ūrumaṃsaṃ nisadapota-saṇṭhānaṃ. Ānisadamaṃsaṃ uddhana-koṭi-saṇṭhānaṃ. Piṭṭhimaṃsaṃ tālaguḷa-paṭala-saṇṭhānaṃ. Phāsuka¹⁵-dvayamaṃsaṃ koṭṭhalikāya kucchiyaṃ tanu-mattikâlepa-saṇṭhānaṃ. Thanamaṃsaṃ vaṭṭetvā avakkhitta-mattikā-piṇḍa-saṇṭhānaṃ. Bāhu-dvayamaṃsaṃ dviguṇaṃ katvā ṭhapita-niccamma-mahāmūsika-saṇṭhānaṃ. Evaṃ oḷārikoḷārikaṃ pariggaṇhantassa sukhumam pi pākaṭaṃ hoti.

98

Disato dvīsu disāsu jātaṃ. Okāsato vīsâdhikāni¹⁶ tīṇi aṭṭhisatāni anulimpitvā ṭhitaṃ. Paricchedato heṭṭhā aṭṭhisaṅghāte patiṭṭhitatalena, upari tacena, tiriyaṃ aññamaññena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST189

99

Nhārū ti nava nhārusatāni. Vaṇṇato sabbe pi nhārū setā. Saṇṭhānato nānāsaṇṭhānā. Etesu hi gīvāya uparimabhāgato paṭṭhāya pañca mahānhārū sarīraṃ vinandhamānā purimapassena otiṇṇā, pañca pacchimapassena, pañca dakkhiṇapassena, pañca vāmapassena, dakkhiṇahatthaṃ vinandhamānā pi hatthassa purimapassena pañca, pacchimapassena pañca, tathā vāmahatthaṃ vinandhamānā, dakkhiṇapādaṃ vinandhamānā pi pādassa purimapassena pañca, pacchimapassena pañca, tathā vāmapādaṃ vinandhamānā pī ti evaṃ sarīradhārakā nāma saṭṭhi mahānhārū kāyaṃ vinandhamānā otiṇṇā, ye kaṇḍarā ti pi vuccanti, te sabbe pi kandala-makuḷa-saṇṭhānā. Aññe pana taṃ taṃ padesaṃ ajjhottharitvā ṭhitā, tato sukhumatarā suttarajjuka-saṇṭhānā, aññe tato sukhumatarā pūtilatā-saṇṭhānā, aññe tato sukhumatarā mahāvīṇātanti-saṇṭhānā, aññe thūlasuttaka-saṇṭhānā. Hatthapādapiṭṭhīsu nhārū sakuṇapāda-saṇṭhānā. Sīse nhārū dārakānaṃ sīsajālaka-saṇṭhānā. Piṭṭhiyaṃ nhārū ātape pasārita-allajāla-saṇṭhānā. Avasesā taṃ taṃ aṅgapaccaṅgânugatā nhārū sarīre paṭimukka-jālakañcuka-saṇṭhānā.

100

Disato dvīsu disāsu jātā. Okāsato sakalasarīre aṭṭhīni ābandhitvā ṭhitā. Paricchedato heṭṭhā tiṇṇaṃ aṭṭhisatānaṃ upari patiṭṭhitatalehi, upari maṃsacammāni āhacca ṭhitappadesehi, tiriyaṃ aññamaññena paricchinnā, ayaṃ nesaṃ sabhāga-paricchedo, visabhāga-paricchedo pana kesa-sadiso yeva.

CST190

101

Aṭṭhī ti ṭhapetvā dvattiṃsa dantaṭṭhīni, avasesāni catusaṭṭhi hatthaṭṭhīni, catusaṭṭhi pādaṭṭhīni, catusaṭṭhi maṃsanissitāni mudu-aṭṭhīni, dve paṇhikaṭṭhīni, ekekasmiṃ pāde dve dve gopphakaṭṭhīni, dve jaṅghaṭṭhīni, ekaṃ jaṇṇukaṭṭhi, ekaṃ ūruṭṭhi, dve kaṭiṭṭhīni, aṭṭhārasa piṭṭhikaṇṭakaṭṭhīni, catuvīsati phāsukaṭṭhīni, cuddasa uraṭṭhīni, ekaṃ hadayaṭṭhi, dve akkhakaṭṭhīni, dve koṭṭaṭṭhīni, dve bāhuṭṭhīni, dve dve aggabāhuṭṭhīni, satta gīvaṭṭhīni, dve hanukaṭṭhīni, ekaṃ nāsikaṭṭhi, dve akkhiṭṭhīni, dve kaṇṇaṭṭhīni, ekaṃ nalāṭaṭṭhi, ekaṃ muddhaṭṭhi¹⁷, nava sīsakapālaṭṭhīnī ti evaṃ timattāni aṭṭhisatāni. Tāni sabbāni pi vaṇṇato setāni, saṇṭhānato nānāsaṇṭhānāni.

102

Tattha hi aggapādaṅguli-aṭṭhīni katakabīja-saṇṭhānāni, tadanantarāni majjhapabbaṭṭhīni panasaṭṭhi-saṇṭhānāni, mūlapabbaṭṭhīni paṇava-saṇṭhānāni, piṭṭhipādaṭṭhīni koṭṭita-kandala-kanda-rāsi-saṇṭhānāni. Paṇhikaṭṭhi ekaṭṭhi-tālaphala-bīja-saṇṭhānaṃ.

103

Gopphakaṭṭhīni baddha-kīḷāgoḷaka-saṇṭhānāni. Jaṅghaṭṭhīnaṃ gopphakaṭṭhīsu patiṭṭhitaṭṭhānaṃ apanīta-taca-sindikaḷīra-saṇṭhānaṃ, khuddaka-jaṅghaṭṭhikaṃ dhanukadaṇḍa-saṇṭhānaṃ, mahantaṃ milāta-sappapiṭṭhi-saṇṭhānaṃ. Jaṇṇukaṭṭhi ekato parikkhīṇa-pheṇaka-saṇṭhānaṃ, tattha jaṅghaṭṭhikassa patiṭṭhitaṭṭhānaṃ atikhiṇagga-gosiṅga-saṇṭhānaṃ. Ūruṭṭhi duttacchita-vāsi-parasu¹⁸-daṇḍa-saṇṭhānaṃ, tassa kaṭiṭṭhimhi patiṭṭhitaṭṭhānaṃ kīḷāgoḷaka-saṇṭhānaṃ, tena kaṭiṭṭhino patiṭṭhitaṭṭhānaṃ aggacchinna-mahāpunnāgaphala-saṇṭhānaṃ.

104

Kaṭiṭṭhīni dve pi ekâbaddhāni hutvā kumbhakārika-uddhana-saṇṭhānāni, pāṭiyekkaṃ kammāra-kūṭa-yottaka-saṇṭhānāni. Koṭiyaṃ ṭhitaṃ ānisadaṭṭhi adhomukhaṃ katvā gahita-sappaphaṇa-saṇṭhānaṃ, sattaṭṭhaṭṭhānesu chiddâvachiddaṃ. Piṭṭhikaṇṭakaṭṭhīni abbhantarato uparûpari ṭhapita-sīsapaṭṭa-veṭhaka-saṇṭhānāni, bāhirato vaṭṭanâvaḷi-saṇṭhānāni, tesaṃ antarantarā kakacadanta-sadisā dve tayo kaṇṭakā honti.

105

Catuvīsatiyā phāsukaṭṭhīsu aparipuṇṇāni aparipuṇṇa-asi-saṇṭhānāni, paripuṇṇāni paripuṇṇa-asi-saṇṭhānāni, sabbāni pi odāta-kukkuṭassa pasārita-pakkha-saṇṭhānāni. Cuddasa uraṭṭhīni jiṇṇa-sandamānika-pañjara-saṇṭhānāni. Hadayaṭṭhi dabbiphaṇa-saṇṭhānaṃ. Akkhakaṭṭhīni khuddaka-lohavāsi-daṇḍa-saṇṭhānāni. Koṭṭaṭṭhīni ekato-parikkhīṇa-sīhaḷa-kuddāla-saṇṭhānāni.

106

Bāhuṭṭhīni ādāsa-daṇḍaka-saṇṭhānāni. Aggabāhuṭṭhīni yamaka-tālakanda-saṇṭhānāni. Maṇibandhaṭṭhīni ekato alliyāpetvā ṭhapita-sīsakapaṭṭa-veṭhaka-saṇṭhānāni, piṭṭhihatthaṭṭhīni koṭṭita-kandala-kanda-rāsi-saṇṭhānāni, hatthaṅgulīsu mūlapabbaṭṭhīni paṇava-saṇṭhānāni, majjhapabbaṭṭhīni aparipuṇṇa-panasaṭṭhi-saṇṭhānāni, aggapabbaṭṭhīni katakabīja-saṇṭhānāni.

107

Satta gīvaṭṭhīni daṇḍena vijjhitvā paṭipāṭiyā ṭhapita-vaṃsakaḷīra-cakkalaka-saṇṭhānāni. Heṭṭhima-hanukaṭṭhi kammārānaṃ ayokūṭa-yottaka-saṇṭhānaṃ, uparimaṃ avalekhana-satthaka-saṇṭhānaṃ. Akkhikūpa-nāsakūpaṭṭhīni apanītamiñja-taruṇa-tālaṭṭhi-saṇṭhānāni. Nalāṭaṭṭhi adhomukhaṭṭhapita-saṅkhathālaka-kapāla-saṇṭhānaṃ. Kaṇṇacūḷikaṭṭhīni nhāpita-khurakosa-saṇṭhānāni, nalāṭa-kaṇṇacūḷikānaṃ upari paṭṭabandhanokāse aṭṭhi saṅkuṭita-ghaṭa-puṇṇa-paṭalakhaṇḍa-saṇṭhānaṃ. Muddhaṭṭhi mukhacchinna-vaṅka-nāḷikera-saṇṭhānaṃ. Sīsaṭṭhīni sibbetvā ṭhapita-jajjara-lābukaṭāha-saṇṭhānāni.

108

Disato dvīsu disāsu jātāni. Okāsato avisesena sakalasarīre ṭhitāni. Visesena pan’ettha sīsaṭṭhīni givaṭṭhīsu patiṭṭhitāni, gīvaṭṭhīni piṭṭhikaṇṭakaṭṭhīsu, piṭṭhikaṇṭakaṭṭhīni kaṭiṭṭhīsu, kaṭiṭṭhīni ūruṭṭhīsu, ūruṭṭhīni jaṇṇukaṭṭhīsu, jaṇṇukaṭṭhīni jaṅghaṭṭhīsu, jaṅghaṭṭhīni gopphakaṭṭhīsu, gopphakaṭṭhīni piṭṭhipādaṭṭhīsu patiṭṭhitāni. Paricchedato anto aṭṭhimiñjena, uparito maṃsena, agge mūle ca aññamaññena paricchinnāni, ayaṃ nesaṃ sabhāga-paricchedo, visabhāga-paricchedo pana kesa-sadiso yeva.

CST191

109

Aṭṭhimiñjan ti tesaṃ tesaṃ aṭṭhīnaṃ abbhantaragataṃ miñjaṃ. Taṃ vaṇṇato setaṃ. Saṇṭhānato mahanta-mahantānaṃ aṭṭhīnaṃ abbhantaragataṃ veḷunāḷiyaṃ pakkhittasedita-mahāvettagga-saṇṭhānaṃ, khuddânukhuddakānaṃ abbhantaragataṃ veḷuyaṭṭhi-pabbesu pakkhittasedita-tanuvettagga-saṇṭhānaṃ. Disato dvīsu disāsu jātaṃ. Okāsato aṭṭhīnaṃ abbhantare patiṭṭhitaṃ. Paricchedato aṭṭhīnaṃ abbhantaratalehi paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST192

110

Vakkan ti ekabandhanā dve maṃsapiṇḍikā. Taṃ vaṇṇato mandarattaṃ pāḷibhaddakaṭṭhi-vaṇṇaṃ. Saṇṭhānato dārakānaṃ yamaka-kīḷāgoḷaka-saṇṭhānaṃ, ekavaṇṭapaṭibaddha-ambaphaladvaya-saṇṭhānaṃ vā. Disato uparimāya disāya jātaṃ. Okāsato galavāṭakā nikkhantena ekamūlena thokaṃ gantvā dvidhā bhinnena thūla-nhārunā vinibaddhaṃ hutvā hadayamaṃsaṃ parikkhipitvā ṭhitaṃ. Paricchedato vakkaṃ vakkabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST193

111

Hadayan ti hadayamaṃsaṃ. Taṃ vaṇṇato rattapaduma-pattapiṭṭhi-vaṇṇaṃ. Saṇṭhānato bāhirapattāni apanetvā adhomukhaṃ ṭhapita-paduma-makuḷa-saṇṭhānaṃ, bahi maṭṭhaṃ, anto kosātakī-phalassa abbhantara-sadisaṃ, paññavantānaṃ thokaṃ vikasitaṃ, mandapaññānaṃ makuḷitam eva. Anto c’assa punnāgaṭṭhi-patiṭṭhānamatto āvāṭako hoti, yattha addhapasata-mattaṃ lohitaṃ saṇṭhāti, yaṃ nissāya manodhātu ca manoviññāṇadhātu ca vattanti.

112

Taṃ pan’etaṃ rāgacaritassa rattaṃ hoti, dosacaritassa kāḷakaṃ, mohacaritassa maṃsadhovana-udakasadisaṃ, vitakkacaritassa kulattha-yūsa-vaṇṇaṃ, saddhācaritassa kaṇikāra-puppha-vaṇṇaṃ, paññācaritassa acchaṃ vippasannaṃ anāvilaṃ paṇḍaraṃ parisuddhaṃ, niddhota-jātimaṇi viya jutimantaṃ khāyati.

113

Disato uparimāya disāya jātaṃ. Okāsato sarīrabbhantare dvinnaṃ thanānaṃ majjhe patiṭṭhitaṃ. Paricchedato hadayaṃ hadayabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST194

114

Yakanan ti yamaka-maṃsa-paṭalaṃ. Taṃ vaṇṇato rattaṃ paṇḍuka-dhātukaṃ, nâtiratta-kumudassa pattapiṭṭhivaṇṇaṃ. Saṇṭhānato mūle ekaṃ, agge yamakaṃ koviḷāra-patta-saṇṭhānaṃ. Tañ ca dandhānaṃ ekam eva hoti mahantaṃ, paññavantānaṃ dve vā tīṇi vā khuddakāni. Disato uparimāya disāya jātaṃ, okāsato dvinnaṃ thanānaṃ abbhantare dakkhiṇapassaṃ nissāya ṭhitaṃ. Paricchedato yakanaṃ yakanabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST195

115

Kilomakan ti paṭicchannâpaṭicchanna-bhedato duvidhaṃ pariyonahana-maṃsaṃ. Taṃ duvidham pi vaṇṇato setaṃ dukūla-pilotika-vaṇṇaṃ. Saṇṭhānato attano okāsa-saṇṭhānaṃ. Disato paṭicchannakilomakaṃ uparimāya disāya, itaraṃ dvīsu disāsu jātaṃ. Okāsato paṭicchannakilomakaṃ hadayañ ca vakkañ ca paṭicchādetvā, appaṭicchannakilomakaṃ sakalasarīre cammassa heṭṭhato maṃsaṃ pariyonandhitvā ṭhitaṃ. Paricchedato heṭṭhā maṃsena, upari cammena, tiriyaṃ kilomakabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST196

116

Pihakan ti udara-jivhā-maṃsaṃ. Taṃ vaṇṇato nīlaṃ nigguṇḍi-puppha-vaṇṇaṃ. Saṇṭhānato sattaṅgula-ppamāṇaṃ abandhanaṃ kāḷavacchaka-jivhā-saṇṭhānaṃ. Disato uparimāya disāya jātaṃ. Okāsato hadayassa vāmapasse udarapaṭalassa matthakapassaṃ nissāya ṭhitaṃ, yasmiṃ paharaṇappahārena bahinikkhante sattānaṃ jīvitakkhayo hoti. Paricchedato pihakabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST197

117

Papphāsan ti dvattiṃsa-maṃsakhaṇḍa-ppabhedaṃ papphāsa-maṃsaṃ. Taṃ vaṇṇato rattaṃ nâtipakka-udumbaraphala-vaṇṇaṃ. Saṇṭhānato visamacchinna-bahala-pūvakhaṇḍa-saṇṭhānaṃ, abbhantare asitapītānaṃ abhāve uggatena kammaja-tejusmānā abbhāhatattā saṃkhādita-palāla-piṇḍam iva nirasaṃ nirojaṃ. Disato uparimāya disāya jātaṃ. Okāsato sarīrabbhantare dvinnaṃ thanānaṃ antare hadayañ ca yakanañ ca upari chādetvā olambantaṃ ṭhitaṃ. Paricchedato papphāsabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST198

118

Antan ti purisassa dvattiṃsahatthā itthiyā aṭṭhavīsatihatthā ekavīsatiyā ṭhānesu obhaggā antavaṭṭi. Tad etaṃ vaṇṇato setaṃ sakkhara-sudhā-vaṇṇaṃ. Saṇṭhānato lohitadoṇiyaṃ ābhujitvā ṭhapita-sīsacchinna-sappa-saṇṭhānaṃ. Disato dvīsu disāsu jātaṃ. Okāsato upari galavāṭake heṭṭhā ca karīsamagge vinibandhattā galavāṭaka-karīsamagga-pariyante sarīrabbhantare ṭhitaṃ. Paricchedato antabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST199

119

Antaguṇan ti antabhogaṭṭhānesu bandhanaṃ. Taṃ vaṇṇato setaṃ dakasītalika-mūla-vaṇṇaṃ. Saṇṭhānato dakasītalika-mūla-saṇṭhānam eva. Disato dvīsu disāsu jātaṃ. Okāsato kuddāla-pharasu-kammâdīni karontānaṃ yantâkaḍḍhanakāle yantasuttakam iva yantaphalakāni antabhoge ekato agaḷante ābandhitvā, pādapuñchana-rajjumaṇḍalakassa antarā saṃsibbitvā ṭhitarajjukā viya ekavīsatiyā antabhogānaṃ antarā ṭhitaṃ. Paricchedato antaguṇabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST200

120

Udariyan ti udare bhavaṃ asita-pīta-khāyita-sāyitaṃ. Taṃ vaṇṇato ajjhohaṭâhāravaṇṇaṃ. Saṇṭhānato parissāvane sithilabaddha-taṇḍula-saṇṭhānaṃ. Disato uparimāya disāya jātaṃ. Okāsato udare ṭhitaṃ.

121

Udaraṃ nāma ubhato nippīḷiyamānassa allasāṭakassa majjhe sañjāta-phoṭaka-sadisaṃ antapaṭalaṃ, bahi maṭṭhaṃ, anto maṃsa-kasambu-paliveṭhana-kiliṭṭha-pāvāraka-pupphaka-sadisaṃ, kuthita-panasa-tacassa abbhantara-sadisan ti pi vattuṃ vaṭṭati.

Yattha takkoṭakā gaṇḍuppādakā tālahīrakā sūcimukhakā paṭatanta-suttakā icc evamādi-dvattiṃsakula-ppabhedā kimayo ākulabyākulā saṇḍasaṇḍacārino hutvā nivasanti, ye pānabhojanâdimhi avijjamāne ullaṅghitvā viravantā hadayamaṃsaṃ abhihananti, pānabhojanâdi-ajjhoharaṇa-velāyañ ca uddhaṃmukhā hutvā paṭhamajjhohaṭe dve tayo ālope turitaturitā viluppanti, yaṃ tesaṃ kimīnaṃ sūtigharaṃ vaccakuṭi gilānasālā susānañ ca hoti.

Yattha seyyathā pi nāma caṇḍāla-gāmadvāre candanikāya nidāghasamaye thūlaphusitake deve vassante udakena vuyhamānaṃ mutta-karīsa-camma-aṭṭhi-nhāru-khaṇḍa-kheḷa-siṅghāṇikā-lohita-ppabhuti-nānākuṇapa-jātaṃ nipatitvā kaddamodakâluḷitaṃ dvîha-tîhaccayena sañjāta-kimikulaṃ sūriyâtapa-santāpa-vega-kuthitaṃ upari pheṇa-pupphuḷake muñcantaṃ abhinīlavaṇṇaṃ parama-duggandha-jegucchaṃ, n’eva upagantuṃ na daṭṭhuṃ araharūpataṃ āpajjitvā tiṭṭhati, pageva ghāyituṃ vā sāyituṃ vā?

Evam eva nānappakāraṃ pāna-bhojanâdi dantamusala-sañcuṇṇitaṃ jivhāhattha-parivattita-kheḷalālā-palibuddhaṃ taṅkhaṇa-vigatavaṇṇagandharasâdi-sampadaṃ, tantavāyakhali-suvānavamathu-sadisaṃ nipatitvā pitta-semha-vāta-paliveṭhitaṃ hutvā udaraggi-santāpa-vega-kuthitaṃ kimikulâkulaṃ uparûpari pheṇa-pupphuḷakāni muñcantaṃ parama-kasambu-duggandha-jeguccha-bhāvaṃ āpajjitvā tiṭṭhati, yaṃ sutvā pi pāna-bhojanâdīsu amanuññatā saṇṭhāti, pageva paññācakkhunā avaloketvā?

Yattha ca patitaṃ pāna-bhojanâdi pañcadhā vivekaṃ gacchati: ekaṃ bhāgaṃ pāṇakā khādanti, ekaṃ bhāgaṃ udaraggi jhāpeti, eko bhāgo muttaṃ hoti, eko bhāgo karīsaṃ, eko bhāgo rasabhāvaṃ āpajjitvā soṇita-maṃsâdīni upabrūhayati.

122

Paricchedato udarapaṭalena c’eva udariyabhāgena ca paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST201

123

Karīsan ti vaccaṃ. Taṃ vaṇṇato yebhuyyena ajjhohaṭâhāravaṇṇam eva hoti. Saṇṭhānato okāsasaṇṭhānaṃ. Disato heṭṭhimāya disāya jātaṃ. Okāsato pakkāsaye ṭhitaṃ.

124

Pakkāsayo nāma heṭṭhānābhi-piṭṭhikaṇṭakamūlānaṃ antare antâvasāne ubbedhena aṭṭhaṅgula-matto veḷunāḷika-sadiso. Yattha seyyathā pi nāma upari bhūmibhāge patitaṃ vassodakaṃ ogaḷitvā heṭṭhā bhūmibhāgaṃ pūretvā tiṭṭhati, evam eva yaṃ kiñci āmāsaye patitaṃ pāna-bhojanâdikaṃ udaragginā pheṇuddehakaṃ pakkaṃ pakkaṃ nisadāya pisitam iva saṇhabhāvaṃ āpajjitvā antabilena ogaḷitvā ogaḷitvā omadditvā veḷupabbe pakkhipamāna-paṇḍu-mattikā viya sannicitaṃ hutvā tiṭṭhati.

125

Paricchedato pakkāsaya-paṭalena c’eva karīsabhāgena ca paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST202

126

Matthaluṅgan ti sīsakaṭāhabbhantare ṭhita-miñjarāsi. Taṃ vaṇṇato setaṃ ahicchattaka-piṇḍa-vaṇṇaṃ, dadhibhāvaṃ asampattaṃ duṭṭha-khīra-vaṇṇan ti pi vattuṃ vaṭṭati. Saṇṭhānato okāsasaṇṭhānaṃ. Disato uparimāya disāya jātaṃ. Okāsato sīsakaṭāhabbhantare cattāro sibbinimagge nissāya samodhānetvā ṭhapitā cattāro piṭṭhapiṇḍā viya samohitaṃ tiṭṭhati. Paricchedato sīsakaṭāhassa abbhantaratalehi c’eva matthaluṅgabhāgena ca paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST203

127

Pittan ti dve pittāni: baddhapittañ ca abaddhapittañ ca. Tattha baddhapittaṃ vaṇṇato bahala-madhuka-tela-vaṇṇaṃ. Abaddhapittaṃ milāta-ākuli-puppha-vaṇṇaṃ. Saṇṭhānato ubhayam pi okāsasaṇṭhānaṃ. Disato baddhapittaṃ uparimāya disāya jātaṃ, itaraṃ dvīsu disāsu jātaṃ. Okāsato abaddhapittaṃ, ṭhapetvā kesa-loma-danta-nakhānaṃ maṃsa-vinimutta-ṭṭhānañ c’eva thaddha-sukkha-cammañ ca, udakam iva telabindu avasesasarīraṃ byāpetvā ṭhitaṃ, yamhi kupite akkhīni pītakāni honti bhamanti, gattaṃ kampati kaṇḍūyati. Baddhapittaṃ hadaya-papphāsānaṃ antare yakana-maṃsaṃ nissāya patiṭṭhite mahākosātakī-kosaka-sadise pitta-kosake ṭhitaṃ, yamhi kupite sattā ummattakā honti vipallatthacittā, hirottappaṃ chaḍḍetvā akātabbaṃ karonti, abhāsitabbaṃ bhāsanti, acintitabbaṃ cintenti. Paricchedato pittabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST204

128

Semhan ti sarīrabbhantare ekapattha¹⁹-pūrappamāṇaṃ semhaṃ. Taṃ vaṇṇato setaṃ nāgabalā-paṇṇarasa-vaṇṇaṃ. Saṇṭhānato okāsasaṇṭhānaṃ. Disato uparimāya disāya jātaṃ. Okāsato udarapaṭale ṭhitaṃ, yaṃ pāna-bhojanâdi-ajjhoharaṇakāle, seyyathā pi nāma udake sevāla-paṇakaṃ kaṭṭhe vā kathale vā patante chijjitvā dvidhā hutvā puna ajjhottharitvā tiṭṭhati, evam eva pāna-bhojanâdimhi nipatante chijjitvā dvidhā hutvā puna ajjhottharitvā tiṭṭhati. Yamhi ca mandībhūte pakkagaṇḍo viya, pūti-kukkuṭaṇḍam iva ca udaraṃ parama-jegucchaṃ kuṇapa-gandhaṃ hoti, tato uggatena ca gandhena uddeko pi mukham pi duggandhaṃ pūtikuṇapa-sadisaṃ hoti, so ca puriso “apehi duggandhaṃ vāyasī” ti vattabbataṃ āpajjati. Yañ ca vaḍḍhitvā bahalattam āpannaṃ, pidhāna-phalakam iva vaccakuṭiyaṃ, udarapaṭalassa abbhantare yeva kuṇapagandhaṃ sannirumbhitvā tiṭṭhati. Paricchedato semhabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST205

129

Pubbo ti pūtilohitavasena pavattapubbaṃ. Taṃ vaṇṇato paṇḍu-palāsa-vaṇṇo, matasarīre pana pūti-bahalâcāma-vaṇṇo hoti. Saṇṭhānato okāsasaṇṭhāno. Disato dvīsu disāsu hoti. Okāsato pana pubbassa okāso nāma nibaddho natthi, yattha so sannicito tiṭṭheyya. Yatra yatra khāṇu-kaṇṭaka-paharaṇaggijālâdīhi abhihate sarīrappadese lohitaṃ saṇṭhahitvā paccati, gaṇḍa-pīḷakâdayo vā uppajjanti, tatra tatra tiṭṭhati. Paricchedato pubbabhāgena paricchinno, ayam assa sabhāga-paricchedo, visabhāga-paricchedo pana kesa-sadiso yeva.

CST206

130

Lohitan ti dve lohitāni: sannicitalohitañ ca saṃsaraṇalohitañ ca. Tattha sannicitalohitaṃ vaṇṇato nipakka-bahala-lākhārasa-vaṇṇaṃ, saṃsaraṇalohitaṃ accha-lākhārasa-vaṇṇaṃ. Saṇṭhānato ubhayam pi okāsasaṇṭhānaṃ. Disato sannicitalohitaṃ uparimāya disāya jātaṃ, itaraṃ dvisu disāsu jātaṃ. Okāsato saṃsaraṇalohitaṃ, ṭhapetvā kesa-loma-danta-nakhānaṃ maṃsa-vinimutta-ṭṭhānañ c’eva thaddha-sukkha-cammañ ca dhamani-jālânusārena sabbaṃ upādiṇṇasarīraṃ pharitvā ṭhitaṃ. Sannicitalohitaṃ yakanaṭṭhānassa heṭṭhābhāgaṃ pūretvā ekapattha-pūramattaṃ hadaya-vakka-papphāsānaṃ upari thokaṃ thokaṃ paggharantaṃ vakka-hadaya-yakana-papphāse temayamānaṃ ṭhitaṃ. Tasmiṃ hi vakka-hadayâdīni atemente sattā pipāsitā honti. Paricchedato lohitabhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST207

131

Sedo ti lomakūpâdīhi paggharaṇaka-āpodhātu. So vaṇṇato vippasanna-tilatelavaṇṇo. Saṇṭhānato okāsasaṇṭhāno. Disato dvīsu disāsu jāto. Okāsato sedassokāso nāma nibaddho natthi, yattha so lohitaṃ viya sadā tiṭṭheyya. Yadā pana aggisantāpa-sūriyasantāpa-utuvikārâdīhi sarīraṃ santapati, tadā udakato abbūḷhamatta-visamacchinna-bhisamuḷāla-kumudanāḷa-kalāpo viya sabba-kesaloma-kūpa-vivarehi paggharati, tasmā tassa saṇṭhānam pi kesaloma-kūpa-vivarānañ ñeva vasena veditabbaṃ. Sedapariggaṇhakena ca yoginā kesaloma-kūpa-vivare pūretvā ṭhitavasen’eva sedo manasikātabbo. Paricchedato sedabhāgena paricchinno, ayam assa sabhāga-paricchedo, visabhāga-paricchedo pana kesa-sadiso yeva.

132

Medo ti thinasineho. So vaṇṇato phālita-haliddi-vaṇṇo. Saṇṭhānato thūlasarīrassa tāva camma-maṃsantare ṭhapita-haliddivaṇṇa-dukūlapilotika-saṇṭhāno hoti, kisasarīrassa jaṅgha-maṃsaṃ ūru-maṃsaṃ piṭṭhikaṇṭaka-nissitaṃ piṭṭhi-maṃsaṃ udaravaṭṭi-maṃsan ti etāni nissāya diguṇa-tiguṇaṃ katvā ṭhapita-haliddivaṇṇa-dukūlapilotika-saṇṭhāno. Disato dvīsu disāsu jāto. Okāsato thūlassa sakalasarīraṃ pharitvā, kisassa jaṅgha-maṃsâdīni nissāya ṭhito, yaṃ sinehasaṅkhaṃ gatam pi parama-jegucchattā n’eva muddhani telatthāya, na nāsatelâdīnam atthāya gaṇhanti. Paricchedato heṭṭhā maṃsena, upari cammena, tiriyaṃ medabhāgena paricchinno, ayam assa sabhāga-paricchedo, visabhāga-paricchedo pana kesa-sadiso yeva.

CST208

133

Assū ti akkhīhi paggharaṇaka-āpodhātu. Taṃ vaṇṇato vippasanna-tilatela-vaṇṇaṃ. Saṇṭhānato okāsasaṇṭhānaṃ. Disato uparimāya disāya jātaṃ. Okāsato akkhikūpakesu ṭhitaṃ. Na c’etaṃ, pittakosake pittam iva akkhikūpakesu sadā sannicitaṃ tiṭṭhati, yadā pana sattā somanassajātā mahāhasitaṃ hasanti, domanassajātā rodanti paridevanti, tathārūpaṃ vā visamâhāraṃ āhārenti, yadā ca nesaṃ akkhīni dhūma-raja-paṃsukâdīhi abhihaññanti, tadā etehi somanassa-domanassa-visabhāgâhāra-utūhi samuṭṭhahitvā akkhikūpake pūretvā tiṭṭhati vā paggharati vā. Assupariggaṇhakena ca yoginā akkhikūpake pūretvā ṭhitavasen’eva pariggaṇhitabbaṃ. Paricchedato assubhāgena paricchinnaṃ, ayam assa sabhāga-paricchedo, visabhāga-paricchedo pana kesa-sadiso yeva.

CST209

134

Vasā ti vilīnasineho. Sā vaṇṇato nāḷikera-tela-vaṇṇā, ācāme āsitta-tela-vaṇṇā ti pi vattuṃ vaṭṭati. Saṇṭhānato nhānakāle pasanna-udakassa upari paribbhamanta-sinehabindu-visaṭa-saṇṭhānā. Disato dvīsu disāsu jātā. Okāsato yebhuyyena hatthatala-hatthapiṭṭhi-pādatala-pādapiṭṭhi-nāsapuṭa-nalāṭa-aṃsakūṭesu ṭhitā. Na c’esā etesu okāsesu sadā vilīnāva hutvā tiṭṭhati, yadā pana aggisantāpa-sūriyasantāpa-utuvisabhāga-dhātuvisabhāgehi te padesā usmājātā honti, tadā tattha nhānakāle pasanna-udakûpari-sinehabindu-visaṭo viya ito c’ito ca sañcarati. Paricchedato vasābhāgena paricchinnā, ayam assa sabhāga-paricchedo, visabhāga-paricchedo pana kesa-sadiso yeva.

CST210

135

Kheḷo ti antomukhe pheṇamissā āpodhātu. So vaṇṇato seto pheṇavaṇṇo. Saṇṭhānato okāsasaṇṭhāno, pheṇasaṇṭhāno ti pi vattuṃ vaṭṭati. Disato uparimāya disāya jāto. Okāsato ubhohi kapola-passehi oruyha jivhāya ṭhito. Na c’esa ettha sadā sannicito hutvā tiṭṭhati, yadā pana sattā tathārūpam āhāraṃ passanti vā saranti vā, uṇha-titta-kaṭuka-loṇambilānaṃ vā kiñci mukhe ṭhapenti, yadā vā nesaṃ hadayaṃ āgilāyati, kismiñcid eva vā jigucchā uppajjati, tadā kheḷo uppajjitvā ubhohi kapola-passehi oruyha jivhāya saṇṭhāti. Aggajivhāya c’esa tanuko hoti, mūlajivhāya bahalo. Mukhe pakkhittañ ca puthukaṃ vā taṇḍulaṃ vā aññaṃ vā kiñci khādanīyaṃ nadīpuline khatakūpaka-salilaṃ viya parikkhayaṃ agacchanto va temetuṃ samattho hoti. Paricchedato kheḷabhāgena paricchinno, ayam assa sabhāga-paricchedo, visabhāga-paricchedo pana kesa-sadiso va.

CST211

136

Siṅghāṇikā ti matthaluṅgato paggharaṇaka-asuci. Sā vaṇṇato taruṇa-tālaṭṭhi-miñja-vaṇṇā. Saṇṭhānato okāsasaṇṭhānā. Disato uparimāya disāya jātā. Okāsato nāsāpuṭe pūretvā ṭhitā. Na c’esā ettha sadā sannicitā hutvā tiṭṭhati, atha kho yathā nāma puriso paduminipatte dadhiṃ bandhitvā heṭṭhā kaṇṭakena vijjheyya, athânena chiddena dadhimuttaṃ gaḷitvā bahi pateyya, evam eva yadā sattā rodanti, visabhāgâhāra-utuvasena vā sañjāta-dhātukhobhā honti, tadā anto sīsato pūtisemha-bhāvam āpannaṃ matthaluṅgaṃ gaḷitvā tālumatthaka-vivarena otaritvā nāsāpuṭe pūretvā tiṭṭhati vā paggharati vā. Siṅghāṇikā-pariggaṇhakena ca yoginā nāsāpuṭe pūretvā ṭhitavasen’eva pariggaṇhitabbā. Paricchedato siṅghāṇikābhāgena paricchinnā, ayam assā sabhāga-paricchedo, visabhāga-paricchedo pana kesa-sadiso va.

CST212

137

Lasikā ti sarīrasandhīnaṃ abbhantare picchila-kuṇapaṃ. Sā vaṇṇato kaṇikāra-niyyāsa-vaṇṇā. Saṇṭhānato okāsasaṇṭhānā. Disato dvīsu disāsu jātā. Okāsato aṭṭhisandhīnaṃ abbhañjanakiccaṃ sādhayamānā asītisata-sandhīnaṃ abbhantare ṭhitā. Yassa c’esā mandā hoti, tassa uṭṭhahantassa nisīdantassa abhikkamantassa paṭikkamantassa samiñjantassa pasārentassa aṭṭhikāni kaṭakaṭāyanti, accharāsaddaṃ karonto viya sañcarati, ekayojana-dviyojana-mattaṃ addhānaṃ gatassa vāyodhātu kuppati, gattāni dukkhanti. Yassa pana bahukā honti, tassa uṭṭhāna-nisajjâdīsu na aṭṭhīni kaṭakaṭāyanti, dīgham pi addhānaṃ gatassa na vāyodhātu kuppati, na gattāni dukkhanti. Paricchedato lasikābhāgena paricchinnā, ayam assā sabhāga-paricchedo, visabhāga-paricchedo pana kesa-sadiso va.

CST213

138

Muttan ti muttarasaṃ. Taṃ vaṇṇato māsa-khārodaka-vaṇṇaṃ. Saṇṭhānato adhomukha-ṭṭhapita-udakakumbha-abbhantaragata-udaka-saṇṭhānaṃ. Disato heṭṭhimāya disāya jātaṃ. Okāsato vatthissa abbhantare ṭhitaṃ. Vatthi nāma vatthipuṭo vuccati. Yattha seyyathā pi candanikāya pakkhitte amukhe²⁰ ravaṇaghaṭe candanikā-raso pavisati, na c’assa pavisanamaggo paññāyati, evam eva sarīrato muttaṃ pavisati, na c’assa pavisanamaggo paññāyati, nikkhamanamaggo pana pākaṭo hoti, yamhi ca muttassa bharite “passāvaṃ karomā” ti sattānaṃ āyūhanaṃ hoti. Paricchedato vatthi-abbhantarena c’eva muttabhāgena ca paricchinnaṃ, ayam assa sabhāga-paricchedo, visabhāga-paricchedo pana kesa-sadiso va.

CST214

139

Evañ hi kesâdike koṭṭhāse vaṇṇa-saṇṭhāna-disokāsa-pariccheda-vasena vavatthapetvā, anupubbato nâtisīghato ti ādinā nayena vaṇṇa-saṇṭhāna-gandhâsayokāsa-vasena pañcadhā “paṭikkūlā paṭikkūlā” ti manasikaroto, paṇṇatti-samatikkamâvasāne, seyyathā pi cakkhumato purisassa dvattiṃsavaṇṇānaṃ kusumānaṃ ekasuttaka-ganthitaṃ mālaṃ olokentassa sabbapupphāni apubbâpariyam iva pākaṭāni honti, evam eva “atthi imasmiṃ kāye kesā” ti imaṃ kāyaṃ olokentassa sabbe te dhammā apubbâpariyā va pākaṭā honti. Tena vuttaṃ manasikārakosalla-kathāyaṃ:

“Ādikammikassa hi kesā ti manasikaroto manasikāro gantvā muttan ti imaṃ pariyosāna-koṭṭhāsam eva āhacca tiṭṭhatī” ti. (VIII.67)

140

Sace pana bahiddhā pi manasikāraṃ upasaṃharati, ath’assa evaṃ sabbakoṭṭhāsesu pākaṭībhūtesu āhiṇḍantā manussa-tiracchānâdayo sattâkāraṃ vijahitvā koṭṭhāsa-rāsi-vasen’eva upaṭṭhahanti, tehi ca ajjhohariyamānaṃ pāna-bhojanâdi koṭṭhāsa-rāsimhi pakkhipamānam iva upaṭṭhāti.

141

Ath’assa anupubbamuñcanâdivasena “paṭikkūlā paṭikkūlā” ti punappunaṃ manasikaroto anukkamena appanā uppajjati. Tattha kesâdīnaṃ vaṇṇa-saṇṭhāna-disokāsa-pariccheda-vasena upaṭṭhānaṃ uggahanimittaṃ, sabbâkārato paṭikkūlavasena upaṭṭhānaṃ paṭibhāganimittaṃ. Taṃ āsevato bhāvayato vuttanayena asubhakammaṭṭhānesu viya paṭhamajjhānavasen’eva appanā uppajjati.

Sā yassa eko va koṭṭhāso pākaṭo hoti, ekasmiṃ vā koṭṭhāse appanaṃ patvā puna aññasmiṃ yogaṃ na karoti, tassa ekā va uppajjati.

142

Yassa pana aneke koṭṭhāsā pākaṭā honti, ekasmiṃ vā jhānaṃ patvā puna aññasmiṃ pi yogaṃ karoti, tassa Mallakattherassa viya koṭṭhāsagaṇanāya paṭhamajjhānāni nibbattanti.

So kir’āyasmā Dīghabhāṇaka-Abhayattheraṃ hatthe gahetvā “āvuso Abhaya, imaṃ tāva pañhaṃ uggaṇhāhī” ti vatvā āha “Mallakatthero dvattiṃsa-koṭṭhāsesu dvattiṃsāya paṭhamajjhānānaṃ lābhī, sace rattiṃ ekaṃ divā ekaṃ samāpajjati, atirekaddhamāsena puna sampajjati, sace pana devasikaṃ ekaṃ samāpajjati, atirekamāsena puna sampajjatī” ti.

143

Evaṃ paṭhamajjhānavasena ijjhamānam pi c’etaṃ kammaṭṭhānaṃ vaṇṇa-saṇṭhānâdīsu satibalena ijjhanato kāyagatāsatī ti vuccati.

144

Imañ ca kāyagatāsatim anuyutto bhikkhu,

“Aratirati-saho hoti, na ca naṃ arati sahati, uppannaṃ aratiṃ abhibhuyya abhibhuyya viharati. Bhayabherava-saho hoti, na ca naṃ bhayabheravaṃ sahati, uppannaṃ bhayabheravaṃ abhibhuyya abhibhuyya viharati. Khamo hoti sītassa uṇhassa…pe… pāṇaharānaṃ adhivāsakajātiko hoti” (ma. ni. 3.159)

kesâdīnaṃ vaṇṇabhedaṃ nissāya catunnaṃ jhānānaṃ lābhī hoti, cha abhiññā paṭivijjhati.

Tasmā have appamatto anuyuñjetha paṇḍito
evaṃ anekânisaṃsaṃ imaṃ kāyagatāsatin ti.

Idaṃ kāyagatāsatiyaṃ vitthārakathāmukhaṃ.

Ānāpānassatikathā

CST215

145

Idāni yaṃ taṃ Bhagavatā,

“Ayam pi kho, bhikkhave, ānāpānassatisamādhi bhāvito bahulīkato santo c’eva paṇīto ca asecanako ca sukho ca vihāro, uppannuppanne ca pāpake akusale dhamme ṭhānaso antaradhāpeti vūpasametī” ti

evaṃ pasaṃsitvā,

“Kathaṃ bhāvito ca, bhikkhave, ānāpānassatisamādhi, kathaṃ bahulīkato santo c’eva paṇīto ca asecanako ca sukho ca vihāro, uppannuppanne ca pāpake akusale dhamme ṭhānaso antaradhāpeti vūpasameti? Idha, bhikkhave, bhikkhu araññagato vā rukkhamūlagato vā suññâgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā, so sato va assasati sato ²¹ passasati.

1. Dīghaṃ vā assasanto “dīghaṃ assasāmī” ti pajānāti, dīghaṃ vā passasanto…pe…
2. Rassaṃ vā assasanto…pe… rassaṃ vā passasanto “rassaṃ passasāmī” ti pajānāti.
3. Sabbakāyapaṭisaṃvedī assasissāmī ti sikkhati, sabbakāyapaṭisaṃvedī passasissāmī ti sikkhati.
4. Passambhayaṃ kāyasaṅkhāraṃ assasissāmī ti sikkhati, passambhayaṃ kāyasaṅkhāraṃ passasissāmī ti sikkhati.
5. Pītipaṭisaṃvedī…
6. Sukhapaṭisaṃvedī…
7. Cittasaṅkhārapaṭisaṃvedī…
8. Passambhayaṃ cittasaṅkhāraṃ…
9. Cittapaṭisaṃvedī…
10. Abhippamodayaṃ cittaṃ…
11. Samādahaṃ cittaṃ…
12. Vimocayaṃ cittaṃ…
13. Aniccânupassī…
14. Virāgânupassī…
15. Nirodhânupassī…
16. Paṭinissaggânupassī assasissāmī ti sikkhati, paṭinissaggânupassī passasissāmī ti sikkhatī” ti

evaṃ soḷasavatthukaṃ ānāpānassati-kammaṭṭhānaṃ niddiṭṭhaṃ, tassa bhāvanā-nayo²² anuppatto.

146

So pana yasmā pāḷivaṇṇanânusāren’eva vuccamāno sabbâkāra-paripūro hoti, tasmā ayam ettha pāḷivaṇṇanā-pubbaṅgamo niddeso.

CST216

“Kathaṃ bhāvito ca, bhikkhave, ānāpānassatisamādhī” ti ettha tāva kathan ti ānāpānassatisamādhi-bhāvanaṃ nānappakārato vitthāretukamyatā-pucchā, “bhāvito ca bhikkhave ānāpānassatisamādhī” ti nānappakārato vitthāretukamyatāya puṭṭhadhamma-nidassanaṃ, “kathaṃ bahulīkato…pe… vūpasametī” ti etthâpi es’eva nayo.

147

Tattha bhāvito ti uppādito vaḍḍhito vā. Ānāpānassatisamādhī ti ānāpāna-pariggāhikāya satiyā saddhiṃ sampayutto samādhi, ānāpānassatiyaṃ vā samādhi ānāpānassatisamādhi. Bahulīkato ti punappunaṃ kato.

148

Santo c’eva paṇīto cā ti santo c’eva paṇīto c’eva, ubhayattha eva saddena niyamo veditabbo. Kiṃ vuttaṃ hoti? Ayañ hi yathā asubhakammaṭṭhānaṃ kevalaṃ paṭivedhavasena santañ ca paṇītañ ca, oḷārikârammaṇattā pana paṭikkūlârammaṇattā ca ārammaṇavasena n’eva santaṃ na paṇītaṃ, na evaṃ kenaci pariyāyena asanto vā apaṇīto vā, atha kho ārammaṇasantatāya pi santo vūpasanto nibbuto, paṭivedha-saṅkhāta-aṅgasantatāya pi, ārammaṇapaṇītatāya pi paṇīto atittikaro, aṅgapaṇītatāya pī ti. Tena vuttaṃ “santo c’eva paṇīto cā” ti.

149

Asecanako ca sukho ca vihāro ti ettha pana nâssa secanan ti asecanako, anāsittako abbokiṇṇo pāṭiyekko āveṇiko, natthi ettha parikammena vā upacārena vā santatā, ādisamannāhārato pabhuti attano sabhāven’eva santo ca paṇīto cā ti attho. Keci pana “asecanako ti anāsittako ojavanto sabhāven’eva madhuro” ti vadanti. Evaṃ ayaṃ asecanako ca, appitappita-kkhaṇe kāyika-cetasika-sukha-paṭilābhāya saṃvattanato sukho ca vihāro ti veditabbo.

150

Uppannuppanne ti avikkhambhite avikkhambhite. Pāpake ti lāmake. Akusale dhamme ti akosallasambhūte dhamme. Ṭhānaso antaradhāpetī ti khaṇen’eva antaradhāpeti vikkhambheti. Vūpasametī ti suṭṭhu upasameti, nibbedha-bhāgiyattā vā anupubbena ariyamagga-vuddhippatto samucchindati, paṭippassambhetī ti vuttaṃ hoti.

151

Ayaṃ pan’ettha saṅkhepattho: bhikkhave, kena pakārena ken’ākārena kena vidhinā bhāvito ānāpānassatisamādhi? kena pakārena bahulīkato santo c’eva…pe… vūpasametī ti?

CST217

152

Idāni tam atthaṃ vitthārento “idha, bhikkhave” ti ādim āha. Tattha idha bhikkhave bhikkhū ti bhikkhave, imasmiṃ sāsane bhikkhu. Ayañ hi ettha idha-saddo sabbappakāra-ānāpānassatisamādhi-nibbattakassa puggalassa sannissayabhūta-sāsanaparidīpano, aññasāsanassa tathābhāva-paṭisedhano ca. Vuttañ h’etaṃ:

“Idh’eva, bhikkhave, samaṇo…pe… suññā parappavādā samaṇebhi aññehī” ti. (ma. ni. 1.139)

Tena vuttaṃ “imasmiṃ sāsane bhikkhū” ti.

153

Araññagato vā…pe… suññâgāragato vā ti idam assa ānāpānassatisamādhi-bhāvanânurūpa-senāsanapariggaha-paridīpanaṃ. Imassa hi bhikkhuno dīgharattaṃ rūpâdīsu ārammaṇesu anuvisaṭaṃ cittaṃ ānāpānassatisamādhi-ārammaṇaṃ abhiruhituṃ na icchati, kūṭagoṇa-yuttaratho viya uppatham eva dhāvati. Tasmā seyyathā pi nāma gopo kūṭadhenuyā sabbaṃ khīraṃ pivitvā vaḍḍhitaṃ kūṭavacchaṃ dametukāmo dhenuto apanetvā ekamante mahantaṃ thambhaṃ nikhaṇitvā tattha yottena bandheyya, ath’assa so vaccho ito c’ito ca vipphanditvā palāyituṃ asakkonto tam eva thambhaṃ upanisīdeyya vā upanipajjeyya vā, evam eva iminā pi bhikkhunā dīgharattaṃ rūpârammaṇâdi-rasapāna-vaḍḍhitaṃ duṭṭhacittaṃ dametukāmena rūpâdi-ārammaṇato apanetvā araññaṃ vā…pe… suññâgāraṃ vā pavesetvā tattha assāsapassāsa-thambhe sati-yottena bandhitabbaṃ, evam assa taṃ cittaṃ ito c’ito ca vipphanditvā pi pubbe āciṇṇârammaṇaṃ alabhamānaṃ sati-yottaṃ chinditvā palāyituṃ asakkontaṃ, tam ev’ārammaṇaṃ upacārappanāvasena upanisīdati c’eva upanipajjati ca.

154

Ten’āhu porāṇā:

“Yathā thambhe nibandheyya vacchaṃ damaṃ naro idha,
bandheyy’evaṃ sakaṃ cittaṃ satiy’ārammaṇe daḷhan” ti. (pārā. aṭṭha. 2.165; dī. ni. aṭṭha. 3.374; ma. ni. aṭṭha. 1.107)

Evam ass’etaṃ senāsanaṃ bhāvanânurūpaṃ hoti. Tena vuttaṃ,

“Idam assa ānāpānassatisamādhi-bhāvanânurūpa-senāsanapariggaha-paridīpanan” ti.

155

Atha vā yasmā idaṃ kammaṭṭhānappabhede muddhabhūtaṃ sabbaññu²³-buddha-paccekabuddha-buddhasāvakānaṃ visesâdhigama-diṭṭhadhamma-sukhavihāra-padaṭṭhānaṃ ānāpānassati-kammaṭṭhānaṃ itthi-purisa-hatthi-assâdi-sadda-samākulaṃ gāmantaṃ apariccajitvā na sukaraṃ bhāvetuṃ, saddakaṇṭakattā jhānassa, agāmake pana araññe sukaraṃ yogâvacarena idaṃ kammaṭṭhānaṃ pariggahetvā ānāpāna-catutthajjhānaṃ nibbattetvā tad eva pādakaṃ katvā saṅkhāre sammasitvā aggaphalaṃ arahattaṃ sampāpuṇituṃ, tasmā’ssa anurūpasenāsanaṃ dassento Bhagavā “araññagato vā” ti ādim āha.

156

Vatthuvijjâcariyo viya hi Bhagavā. So yathā vatthuvijjâcariyo nagarabhūmiṃ passitvā suṭṭhu upaparikkhitvā “ettha nagaraṃ māpethā” ti upadisati, sotthinā ca nagare niṭṭhite rājakulato mahāsakkāraṃ labhati, evam eva yogâvacarassa anurūpasenāsanaṃ upaparikkhitvā “ettha kammaṭṭhānaṃ anuyuñjitabban” ti upadisati, tato tattha kammaṭṭhānaṃ anuyuttena yoginā kamena arahatte patte “Sammāsambuddho vata so Bhagavā” ti mahantaṃ sakkāraṃ labhati.

157

Ayaṃ pana bhikkhu dīpisadiso ti vuccati. Yathā hi mahādīpirājā araññe tiṇagahanaṃ vā vanagahanaṃ vā pabbatagahanaṃ vā nissāya nilīyitvā vanamahiṃsa-gokaṇṇa-sūkarâdayo mige gaṇhāti, evam eva ayaṃ araññâdīsu kammaṭṭhānaṃ anuyuñjanto bhikkhu yathākkamena sotāpatti-sakadāgāmi-anāgāmi-arahattamagge c’eva ariyaphalañ ca gaṇhatī ti veditabbo. Ten’āhu porāṇā:

“Yathā pi dīpiko nāma nilīyitvā gaṇhatī mige,
tath’evâyaṃ buddhaputto yuttayogo vipassako
araññaṃ pavisitvāna gaṇhāti phalam uttaman” ti. (pārā. aṭṭha. 2.165; dī. ni. aṭṭha. 2.374; ma. ni. aṭṭha. 1.107)

Ten’assa parakkama-javayogga-bhūmiṃ arañña-senāsanaṃ dassento Bhagavā “araññagato vā” ti ādim āha.

CST218

158

Tattha araññagato ti,

“Araññan ti²⁴ nikkhamitvā bahi indakhīlā sabbam etaṃ araññan” ti (vibha. 529)

ca,

“Āraññakaṃ nāma senāsanaṃ pañcadhanusatikaṃ pacchiman” ti (pārā. 654)

ca evaṃ vuttalakkhaṇesu araññesu yaṃ kiñci pavivekasukhaṃ araññaṃ gato. Rukkhamūlagato ti rukkhasamīpaṃ gato. Suññâgāragato ti suññaṃ vivittokāsaṃ gato. Ettha ca ṭhapetvā araññañ ca rukkhamūlañ ca, avasesa-sattavidha-senāsanagato pi suññâgāragato ti vattuṃ vaṭṭati.

159

Evam assa ututtayânukūlaṃ dhātucariyânukūlañ ca ānāpānassati-bhāvanânurūpaṃ senāsanaṃ upadisitvā alīnânuddhacca-pakkhikaṃ santaṃ iriyāpathaṃ upadisanto nisīdatī ti āha.

Ath’assa nisajjāya daḷhabhāvaṃ assāsapassāsānaṃ pavattanasukhataṃ ārammaṇa-pariggahûpāyañ ca dassento “pallaṅkaṃ ābhujitvā” ti ādim āha.

160

Tattha pallaṅkan ti samantato ūrubaddhâsanaṃ. Ābhujitvā ti bandhitvā. Ujuṃ kāyaṃ paṇidhāyā ti uparima²⁵-sarīraṃ ujukaṃ ṭhapetvā, aṭṭhārasa piṭṭhikaṇṭake koṭiyā koṭiṃ paṭipādetvā. Evañ hi nisīdantassa camma-maṃsa-nhārūni na paṇamanti, ath’assa yā tesaṃ paṇamana-ppaccayā khaṇe khaṇe vedanā uppajjeyyuṃ, tā na uppajjanti, tāsu anuppajjamānāsu cittaṃ ekaggaṃ hoti, kammaṭṭhānaṃ na paripatati, vuddhiṃ phātiṃ upagacchati.

161

Parimukhaṃ satiṃ upaṭṭhapetvā ti kammaṭṭhānâbhimukhaṃ satiṃ ṭhapayitvā. Atha vā,

“Parī ti pariggahaṭṭho, mukhan ti niyyānaṭṭho, satī ti upaṭṭhānaṭṭho, tena vuccati parimukhaṃ satin” ti (paṭi. ma. 1.164)

evaṃ Paṭisambhidāyaṃ vuttanayena p’ettha attho daṭṭhabbo. Tatrâyaṃ saṅkhepo: pariggahitaniyyānaṃ satiṃ katvā ti.

CST219

162

So sato va assasati sato passasatī ti so bhikkhu evaṃ nisīditvā evañ ca satiṃ upaṭṭhapetvā taṃ satiṃ avijahanto sato eva assasati sato passasati, satokārī hotī ti vuttaṃ hoti.

163

Idāni yeh’ākārehi satokārī hoti, te dassetuṃ “dīghaṃ vā assasanto” ti ādim āha. Vuttañ h’etaṃ Paṭisambhidāyaṃ,

“So sato va assasati sato passasatī” ti

etass’eva vibhaṅge:

“Bāttiṃsāya ākārehi satokārī hoti. Dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā tena ñāṇena satokārī hoti. Dīghaṃ passāsavasena…pe… Paṭinissaggânupassī assāsavasena, paṭinissaggânupassī passāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā tena ñāṇena satokārī hotī” ti. (paṭi. ma. 1.165)

164

Tattha dīghaṃ vā assasanto ti dīghaṃ vā assāsaṃ pavattayanto.

“Assāso ti bahi nikkhamanavāto, passāso ti anto pavisanavāto” ti

Vinayaṭṭhakathāyaṃ vuttaṃ, Suttantaṭṭhakathāsu pana uppaṭipāṭiyā āgataṃ. Tattha sabbesam pi gabbhaseyyakānaṃ mātukucchito nikkhamanakāle paṭhamaṃ abbhantaravāto bahi nikkhamati, pacchā bāhiravāto sukhumarajaṃ gahetvā abbhantaraṃ pavisanto tāluṃ āhacca nibbāyati. Evaṃ tāva assāsapassāsā veditabbā.

165

Yā pana tesaṃ dīgha-rassatā, sā addhānavasena veditabbā. Yathā hi okāsaddhānaṃ pharitvā ṭhitaṃ udakaṃ vā vālikā vā “dīgham udakaṃ dīghā vālikā, rassam udakaṃ rassā vālikā” ti vuccati, evaṃ cuṇṇavicuṇṇā pi assāsapassāsā hatthisarīre ca ahisarīre ca tesaṃ attabhāva-saṅkhātaṃ dīghaṃ addhānaṃ saṇikaṃ pūretvā saṇikam eva nikkhamanti, tasmā dīghā ti vuccanti, sunakha-sasâdīnaṃ attabhāva-saṅkhātaṃ rassaṃ addhānaṃ sīghaṃ pūretvā sīgham eva nikkhamanti, tasmā rassā ti vuccanti.

166

Manussesu pana keci hatthi-ahi-ādayo viya kāladdhānavasena dīghaṃ assasanti ca passasanti ca, keci sunakha-sasâdayo viya rassaṃ, tasmā tesaṃ kālavasena dīgham addhānaṃ nikkhamantā ca pavisantā ca te “dīghā”, ittaram addhānaṃ nikkhamantā ca pavisantā ca “rassā” ti veditabbā.

167

Tatrâyaṃ bhikkhu navah’ākārehi dīghaṃ assasanto passasanto ca “dīghaṃ assasāmi, passasāmī” ti pajānāti. Evaṃ pajānato c’assa eken’ākārena kāyânupassanā-satipaṭṭhāna-bhāvanā sampajjatī ti veditabbā.

168

Yath’āha Paṭisambhidāyaṃ:

“Kathaṃ dīghaṃ assasanto dīghaṃ assasāmī ti pajānāti, dīghaṃ passasanto dīghaṃ passasāmī ti pajānāti? Dīghaṃ assāsaṃ addhānasaṅkhāte assasati, dīghaṃ passāsaṃ addhānasaṅkhāte passasati, dīghaṃ assāsapassāsaṃ addhānasaṅkhāte assasati pi passasati pi, dīghaṃ assāsapassāsaṃ addhānasaṅkhāte assasato pi passasato pi chando uppajjati.

Chandavasena tato sukhumataraṃ dīghaṃ assāsaṃ addhānasaṅkhāte assasati, chandavasena tato sukhumataraṃ dīghaṃ passāsaṃ…pe… dīghaṃ assāsapassāsaṃ addhānasaṅkhāte assasati pi passasati pi, chandavasena tato sukhumataraṃ dīghaṃ assāsapassāsaṃ addhānasaṅkhāte assasato pi passasato pi pāmojjaṃ uppajjati.

Pāmojjavasena tato sukhumataraṃ dīghaṃ assāsaṃ addhānasaṅkhāte assasati, pāmojjavasena tato sukhumataraṃ dīghaṃ passāsaṃ…pe… dīghaṃ assāsapassāsaṃ addhānasaṅkhāte assasati pi passasati pi, pāmojjavasena tato sukhumataraṃ dīghaṃ assāsapassāsaṃ addhānasaṅkhāte assasato pi passasato pi dīghaṃ assāsapassāsā cittaṃ vivattati, upekkhā saṇṭhāti.

Imehi navahi ākārehi dīghaṃ assāsapassāsā kāyo, upaṭṭhānaṃ sati, anupassanā ñāṇaṃ, kāyo upaṭṭhānaṃ no sati, sati upaṭṭhānañ c’eva sati ca, tāya satiyā tena ñāṇena taṃ kāyaṃ anupassati, tena vuccati kāye kāyânupassanā-satipaṭṭhāna-bhāvanā” ti. (paṭi. ma. 1.166)

169

Esa nayo rassapade pi. Ayaṃ pana viseso. Yathā ettha “dīghaṃ assāsaṃ addhānasaṅkhāte” ti vuttaṃ, evam idha “rassaṃ assāsaṃ ittarasaṅkhāte assasatī” ti āgataṃ, tasmā rassavasena yāva “tena vuccati kāye kāyânupassanā-satipaṭṭhāna-bhāvanā” ti, tāva yojetabbaṃ.

170

Evaṃ ayaṃ addhānavasena ittaravasena ca imeh’ākārehi assāsapassāse pajānanto “dīghaṃ vā assasanto dīghaṃ assasāmī ti pajānāti…pe… rassaṃ vā passasanto rassaṃ passasāmī” ti pajānātī” ti veditabbo. Evaṃ pajānato c’assa:

Dīgho rasso ca assāso passāso pi ca tādiso,
cattāro vaṇṇā vattanti nāsikagge va bhikkhuno ti. (pārā. aṭṭha. 2.165)

CST220

171

Sabbakāyapaṭisaṃvedī assasissāmi…pe… passasissāmī ti sikkhatī ti sakalassa assāsakāyassa ādi-majjha-pariyosānaṃ viditaṃ karonto pākaṭaṃ karonto assasissāmī ti sikkhati, sakalassa passāsakāyassa ādi-majjha-pariyosānaṃ viditaṃ karonto pākaṭaṃ karonto passasissāmī ti sikkhati. Evaṃ viditaṃ karonto pākaṭaṃ karonto ñāṇasampayutta-cittena assasati c’eva passasati ca, tasmā “assasissāmi passasissāmī” ti sikkhatī ti vuccati.

172

Ekassa hi bhikkhuno cuṇṇavicuṇṇavisaṭe assāsakāye passāsakāye vā ādi pākaṭo hoti, na majjha-pariyosānaṃ, so ādim eva pariggahetuṃ sakkoti, majjha-pariyosāne kilamati. Ekassa majjhaṃ pākaṭaṃ hoti, na ādi-pariyosānaṃ… Ekassa pariyosānaṃ pākaṭaṃ hoti, na ādi-majjhaṃ, so pariyosānaṃ yeva pariggahetuṃ sakkoti, ādi-majjhe kilamati. Ekassa sabbam pi pākaṭaṃ hoti, so sabbam pi pariggahetuṃ sakkoti, na katthaci kilamati, tādisena bhavitabban ti dassento āha: “sabbakāyapaṭisaṃvedī assasissāmī ti…pe… passasissāmī ti sikkhatī” ti.

173

Tattha sikkhatī ti evaṃ ghaṭati vāyamati. Yo vā tathābhūtassa saṃvaro, ayam ettha adhisīlasikkhā, yo tathābhūtassa samādhi, ayaṃ adhicittasikkhā, yā tathābhūtassa paññā, ayaṃ adhipaññāsikkhā ti imā tisso sikkhāyo tasmiṃ ārammaṇe, tāya satiyā tena manasikārena sikkhati āsevati bhāveti bahulīkarotī ti evam ettha attho daṭṭhabbo.

174

Tattha yasmā purimanaye kevalaṃ assasitabbaṃ passasitabbam eva, na ca aññaṃ kiñci kātabbaṃ, ito paṭṭhāya pana ñāṇuppādanâdīsu yogo karaṇīyo, tasmā tattha “assasāmī ti pajānāti passasāmī ti pajānāt’” icc eva vattamānakālavasena pāḷiṃ vatvā, ito paṭṭhāya kattabbassa ñāṇuppādanâdino ākārassa dassanatthaṃ “sabbakāyapaṭisaṃvedī assasissāmī” ti ādinā nayena anāgatavacanavasena pāḷi āropitā ti veditabbā.

175

Passambhayaṃ kāyasaṅkhāraṃ assasissāmī ti…pe… passasissāmī ti sikkhatī ti oḷārikaṃ kāyasaṅkhāraṃ passambhento paṭippassambhento nirodhento vūpasamento assasissāmi passasissāmī ti sikkhati.

176

Tatra evaṃ oḷārika-sukhumatā ca passaddhi ca veditabbā. Imassa hi bhikkhuno pubbe apariggahitakāle kāyo ca cittañ ca sadarathā honti oḷārikā. Kāyacittānaṃ oḷārikatte avūpasante assāsapassāsā pi oḷārikā honti, balavatarā hutvā pavattanti, nāsikā nappahoti, mukhena assasanto pi passasanto pi tiṭṭhati. Yadā pan’assa kāyo pi cittam pi pariggahitā honti, tadā te santā honti vūpasantā. Tesu vūpasantesu assāsapassāsā sukhumā hutvā pavattanti “atthi nu kho natthī” ti vicetabbatâkārappattā honti.

177

Seyyathā pi purisassa dhāvitvā pabbatā vā orohitvā mahābhāraṃ vā sīsato oropetvā ṭhitassa oḷārikā assāsapassāsā honti, nāsikā nappahoti, mukhena assasanto pi passasanto pi tiṭṭhati. Yadā pan’esa taṃ parissamaṃ vinodetvā nhatvā ca pivitvā ca allasāṭakaṃ hadaye katvā sītāya chāyāya nipanno hoti, ath’assa te assāsapassāsā sukhumā honti “atthi nu kho natthī” ti vicetabbatâkārappattā. Evam eva imassa bhikkhuno pubbe apariggahitakāle kāyo ca…pe… vicetabbatâkārappattā honti.

178

Taṃ kissa hetu? Tathā hi’ssa pubbe apariggahitakāle “oḷārikoḷārike kāyasaṅkhāre passambhemī” ti ābhoga-samannāhāra-manasikāra-paccavekkhaṇā natthi, pariggahitakāle pana atthi, ten’assa apariggahitakālato pariggahitakāle kāyasaṅkhāro sukhumo hoti. Ten’āhu porāṇā:

“Sāraddhe kāye citte ca adhimattaṃ pavattati,
asāraddhamhi kāyamhi sukhumaṃ sampavattatī” ti. (pārā. aṭṭha. 2.165)

CST221

179

Pariggahe pi oḷāriko, paṭhamajjhānupacāre sukhumo, tasmim pi oḷāriko, paṭhamajjhāne sukhumo, paṭhamajjhāne ca dutiyajjhānupacāre ca oḷāriko, dutiyajjhāne sukhumo, dutiyajjhāne ca tatiyajjhānupacāre ca oḷāriko, tatiyajjhāne sukhumo, tatiyajjhāne ca catutthajjhānupacāre ca oḷāriko, catutthajjhāne atisukhumo appavattim eva pāpuṇātī ti. Idaṃ tāva Dīghabhāṇaka-Saṃyuttabhāṇakānaṃ mataṃ.

Majjhimabhāṇakā pana paṭhamajjhāne oḷāriko, dutiyajjhānupacāre sukhumo ti evaṃ heṭṭhima-heṭṭhima-jjhānato uparûpari-jjhānupacāre pi sukhumataram icchanti.

Sabbesañ ñeva pana matena apariggahitakāle pavatta-kāyasaṅkhāro pariggahitakāle paṭippassambhati, pariggahitakāle pavatta-kāyasaṅkhāro paṭhamajjhānupacāre…pe… catutthajjhānupacāre pavatta-kāyasaṅkhāro catutthajjhāne paṭippassambhati. Ayaṃ tāva samathe nayo.

180

Vipassanāyaṃ pana apariggahe pavatto kāyasaṅkhāro oḷāriko, mahābhūta-pariggahe sukhumo, so pi oḷāriko, upādārūpa-pariggahe sukhumo, so pi oḷāriko, sakalarūpa-pariggahe sukhumo, so pi oḷāriko, arūpa-pariggahe sukhumo, so pi oḷāriko, rūpârūpa-pariggahe sukhumo, so pi oḷāriko, paccaya-pariggahe sukhumo, so pi oḷāriko, sappaccaya-nāmarūpa-pariggahe²⁶ sukhumo, so pi oḷāriko, lakkhaṇârammaṇika-vipassanāya sukhumo, so pi dubbala-vipassanāya oḷāriko, balava-vipassanāya sukhumo. Tattha pubbe vuttanayen’eva purimassa purimassa pacchimena pacchimena paṭippassaddhi veditabbā. Evam ettha oḷārika-sukhumatā ca passaddhi ca veditabbā.

181

Paṭisambhidāyaṃ pan’assa saddhiṃ codanā-sodhanāhi evam attho vutto:

“Kathaṃ passambhayaṃ kāyasaṅkhāraṃ assasissāmi…pe… passasissāmī ti sikkhati? Katame kāyasaṅkhārā? Dīghaṃ assāsa… passāsā kāyikā ete dhammā kāyapaṭibaddhā kāyasaṅkhārā. Te kāyasaṅkhāre passambhento nirodhento vūpasamento sikkhati…pe…

Yathārūpehi kāyasaṅkhārehi kāyassa ānamanā, vinamanā, sannamanā, paṇamanā, iñjanā, phandanā, calanā, kampanā, — passambhayaṃ kāyasaṅkhāraṃ assasissāmī ti sikkhati, passambhayaṃ kāyasaṅkhāraṃ passasissāmī ti sikkhati.

Yathārūpehi kāyasaṅkhārehi kāyassa na ānamanā, na vinamanā, na sannamanā, na paṇamanā, aniñjanā, aphandanā, acalanā, akampanā, — santaṃ sukhumaṃ passambhayaṃ kāyasaṅkhāraṃ assasissāmi… passasissāmī ti sikkhati.

182

“Iti kira passambhayaṃ kāyasaṅkhāraṃ assasissāmī ti sikkhati, passambhayaṃ kāyasaṅkhāraṃ passasissāmī ti sikkhati. Evaṃ sante vātûpaladdhiyā ca pabhāvanā na hoti, assāsapassāsānañ ca pabhāvanā na hoti, ānāpānassatiyā ca pabhāvanā na hoti, ānāpānassatisamādhissa ca pabhāvanā na hoti, na ca naṃ taṃ samāpattiṃ paṇḍitā samāpajjanti pi vuṭṭhahanti pi.

183

“Iti kira passambhayaṃ kāyasaṅkhāraṃ assasissāmi… passasissāmī ti sikkhati. Evaṃ sante vātûpaladdhiyā ca pabhāvanā hoti, assāsapassāsānañ ca pabhāvanā hoti, ānāpānassatiyā ca pabhāvanā hoti, ānāpānassatisamādhissa ca pabhāvanā hoti, tañ ca naṃ samāpattiṃ paṇḍitā samāpajjanti pi vuṭṭhahanti pi.

184

“Yathā kathaṃ viya? Seyyathā pi kaṃse ākoṭite paṭhamaṃ oḷārikā saddā pavattanti, oḷārikānaṃ saddānaṃ nimittaṃ sugahitattā sumanasikatattā sûpadhāritattā niruddhe pi oḷārike sadde, atha pacchā sukhumakā saddā pavattanti, sukhumakānaṃ saddānaṃ nimittaṃ suggahitattā sumanasikatattā sûpadhāritattā niruddhe pi sukhumake sadde, atha pacchā sukhuma-sadda-nimittârammaṇatā pi cittaṃ pavattati.

Evam eva paṭhamaṃ oḷārikā assāsapassāsā pavattanti, oḷārikānaṃ assāsapassāsānaṃ nimittaṃ suggahitattā sumanasikatattā sûpadhāritattā niruddhe pi oḷārike assāsapassāse, atha pacchā sukhumakā assāsapassāsā pavattanti, sukhumakānaṃ assāsapassāsānaṃ nimittaṃ suggahitattā sumanasikatattā sûpadhāritattā niruddhe pi sukhumake assāsapassāse, atha pacchā sukhuma-assāsapassāsa-nimittârammaṇatā pi cittaṃ na vikkhepaṃ gacchati.

Evaṃ sante vātûpaladdhiyā ca pabhāvanā hoti, assāsapassāsānañ ca pabhāvanā hoti, ānāpānassatiyā ca pabhāvanā hoti, ānāpānassatisamādhissa ca pabhāvanā hoti, tañ ca naṃ samāpattiṃ paṇḍitā samāpajjanti pi vuṭṭhahanti pi.

185

“Passambhayaṃ kāyasaṅkhāraṃ assāsapassāsā kāyo, upaṭṭhānaṃ sati, anupassanā ñāṇaṃ, kāyo upaṭṭhānaṃ no sati, sati upaṭṭhānañ c’eva sati ca, tāya satiyā tena ñāṇena taṃ kāyaṃ anupassati, tena vuccati kāye kāyânupassanā-satipaṭṭhāna-bhāvanā” ti. (paṭi. ma. 1.171)

Ayaṃ tāv’ettha kāyânupassanāvasena vuttassa paṭhama-catukkassa anupubba-padavaṇṇanā.

CST222

186

Yasmā pan’ettha idam eva catukkaṃ ādikammikassa kammaṭṭhānavasena vuttaṃ, itarāni pana tīṇi catukkāni ettha pattajjhānassa vedanā-citta-dhammânupassanāvasena vuttāni, tasmā idaṃ kammaṭṭhānaṃ bhāvetvā ānāpāna-catuttha-jjhāna-padaṭṭhānāya vipassanāya saha paṭisambhidāhi arahattaṃ pāpuṇitukāmena ādikammikena kulaputtena pubbe vuttanayen’eva sīlaparisodhanâdīni sabbakiccāni katvā vuttappakārassa ācariyassa santike pañcasandhikaṃ kammaṭṭhānaṃ uggahetabbaṃ.

187

Tatr’ime pañca sandhayo: uggaho, paripucchā, upaṭṭhānaṃ, appanā, lakkhaṇan ti. Tattha uggaho nāma kammaṭṭhānassa uggaṇhanaṃ. Paripucchā nāma kammaṭṭhānassa paripucchanā. Upaṭṭhānaṃ nāma kammaṭṭhānassa upaṭṭhānaṃ. Appanā nāma kammaṭṭhānassa appanā. Lakkhaṇaṃ nāma kammaṭṭhānassa lakkhaṇaṃ, “evaṃlakkhaṇam idaṃ kammaṭṭhānan” ti kammaṭṭhāna-sabhāvûpadhāraṇan ti vuttaṃ hoti.

188

Evaṃ pañcasandhikaṃ kammaṭṭhānaṃ uggaṇhanto attanā pi na kilamati, ācariyam pi na viheseti. Tasmā thokaṃ uddisāpetvā bahukālaṃ sajjhāyitvā evaṃ pañcasandhikaṃ kammaṭṭhānaṃ uggahetvā ācariyassa santike vā aññatra vā pubbe vuttappakāre senāsane vasantena upacchinna-khuddaka-palibodhena kata-bhattakiccena bhattasammadaṃ paṭivinodetvā sukhanisinnena ratanattaya-guṇânussaraṇena cittaṃ sampahaṃsetvā ācariyuggahato ekapadam pi asammuyhantena idaṃ ānāpānassati-kammaṭṭhānaṃ manasikātabbaṃ.

189

Tatrâyaṃ manasikāravidhi:

CST223

Gaṇanā anubandhanā phusanā ṭhapanā sallakkhaṇā
vivaṭṭanā pārisuddhi, tesañ ca paṭipassanā ti.

Tattha gaṇanā ti gaṇanā yeva. Anubandhanā ti anuvahanā. Phusanā ti phuṭṭhaṭṭhānaṃ. Ṭhapanā ti appanā. Sallakkhaṇā ti vipassanā. Vivaṭṭanā ti maggo. Pārisuddhī ti phalaṃ. Tesañ ca paṭipassanā ti paccavekkhaṇā.

190

Tattha iminā ādikammikena kulaputtena paṭhamaṃ gaṇanāya idaṃ kammaṭṭhānaṃ manasikātabbaṃ. Gaṇentena ca pañcannaṃ heṭṭhā na ṭhapetabbaṃ, dasannaṃ upari na netabbaṃ, antarā khaṇḍaṃ na dassetabbaṃ. Pañcannaṃ heṭṭhā ṭhapentassa hi sambādhe okāse cittuppādo vipphandati, sambādhe vaje sanniruddha-gogaṇo viya. Dasannam pi upari nentassa gaṇana-nissitako cittuppādo hoti. Antarā khaṇḍaṃ dassentassa “sikhāppattaṃ nu kho me kammaṭṭhānaṃ, no” ti cittaṃ vikampati. Tasmā ete dose vajjetvā gaṇetabbaṃ.

191

Gaṇentena ca paṭhamaṃ dandhagaṇanāya dhaññamāpaka-gaṇanāya gaṇetabbaṃ. Dhaññamāpako hi nāḷiṃ pūretvā “ekan” ti vatvā okirati, puna pūrento kiñci kacavaraṃ disvā taṃ chaḍḍento “ekaṃ ekan” ti vadati, esa nayo “dve dve” ti ādīsu. Evam eva iminā pi assāsapassāsesu yo upaṭṭhāti, taṃ gahetvā “ekaṃ ekan” ti ādiṃ katvā yāva “dasa dasā” ti pavattamānaṃ pavattamānaṃ upalakkhetvā va gaṇetabbaṃ.

192

Tassa evaṃ gaṇayato nikkhamantā ca pavisantā ca assāsapassāsā pākaṭā honti. Athânena taṃ dandhagaṇanaṃ dhaññamāpaka-gaṇanaṃ pahāya sīghagaṇanāya gopālaka-gaṇanāya gaṇetabbaṃ. Cheko hi gopālako sakkharâdayo²⁷ ucchaṅgena gahetvā rajjudaṇḍa-hattho pāto va vajaṃ gantvā gāvo piṭṭhiyaṃ paharitvā paligha-tthambha-matthake nisinno dvārappattaṃ dvārappattaṃ yeva gāviṃ “ekā dve” ti sakkharaṃ khipitvā gaṇeti. Tiyāma-rattiṃ sambādhe okāse dukkhaṃ vuttha-gogaṇo nikkhamanto nikkhamanto aññamaññaṃ upanighaṃsanto vegena vegena puñjapuñjo hutvā nikkhamati. So vegena vegena “tīṇi cattāri pañca dasā” ti gaṇeti yeva. Evam imassâpi purimanayena gaṇayato assāsapassāsā pākaṭā hutvā sīghaṃ sīghaṃ punappunaṃ sañcaranti.

193

Tato nena “punappunaṃ sañcarantī” ti ñatvā anto ca bahi ca agahetvā dvārappattaṃ dvārappattaṃ yeva gahetvā “eko dve tīṇi cattāri pañca cha, eko dve tīṇi cattāri pañca cha satta…pe… aṭṭha… nava… dasā” ti sīghaṃ sīyaṃ²⁸ gaṇetabbam eva. Gaṇanapaṭibaddhe hi kammaṭṭhāne gaṇanabalen’eva cittaṃ ekaggaṃ hoti, arittupatthambhana-vasena caṇḍasote nāvā-ṭṭhapanam iva.

194

Tass’evaṃ sīghaṃ sīghaṃ gaṇayato kammaṭṭhānaṃ nirantaraṃ pavattaṃ viya hutvā upaṭṭhāti. Atha “nirantaraṃ pavattatī” ti ñatvā anto ca bahi ca vātaṃ apariggahetvā purimanayen’eva vegena vegena gaṇetabbaṃ. Anto pavisanavātena hi saddhiṃ cittaṃ pavesayato abbhantaraṃ²⁹ vātabbhâhataṃ medapūritaṃ viya hoti. Bahi nikkhamanavātena saddhiṃ cittaṃ nīharato bahiddhā puthuttârammaṇe cittaṃ vikkhipati. Phuṭṭha-phuṭṭhokāse pana satiṃ ṭhapetvā bhāventass’eva bhāvanā sampajjati. Tena vuttaṃ “anto ca bahi ca vātaṃ apariggahetvā purimanayen’eva vegena vegena gaṇetabban” ti.

195

Kīvaciraṃ pan’etaṃ gaṇetabban ti? Yāva vinā gaṇanāya assāsapassāsârammaṇe sati santiṭṭhati. Bahi visaṭa-vitakka-vicchedaṃ katvā assāsapassāsârammaṇe sati-saṇṭhāpanatthaṃ yeva hi gaṇanā ti.

CST224

196

Evaṃ gaṇanāya manasikatvā anubandhanāya manasikātabbaṃ. Anubandhanā nāma gaṇanaṃ paṭisaṃharitvā satiyā nirantaraṃ assāsapassāsānaṃ anugamanaṃ, tañ ca kho na ādi-majjha-pariyosānânugamanavasena.

197

Bahi nikkhamanavātassa hi nābhi ādi, hadayaṃ majjhaṃ, nāsikaggaṃ³⁰ pariyosānaṃ. Abbhantaraṃ pavisanavātassa nāsikaggaṃ ādi, hadayaṃ majjhaṃ, nābhi pariyosānaṃ. Tañ c’assa anugacchato vikkhepagataṃ cittaṃ sāraddhāya c’eva hoti iñjanāya ca. Yath’āha:

“Assāsâdi-majjha-pariyosānaṃ satiyā anugacchato ajjhattaṃ vikkhepagatena cittena kāyo pi cittam pi sāraddhā ca honti iñjitā ca phanditā ca.

Passāsâdi-majjha-pariyosānaṃ satiyā anugacchato bahiddhā vikkhepagatena cittena kāyo pi cittam pi sāraddhā ca honti iñjitā ca phanditā cā” ti. (paṭi. ma. 1.157)

Tasmā anubandhanāya manasikarontena ādi-majjha-pariyosāna-vasena na manasikātabbaṃ, api ca kho phusanāvasena ca ṭhapanāvasena ca manasikātabbaṃ.

198

Gaṇanânubandhanā-vasena viya hi phusanā-ṭhapanā-vasena visuṃ manasikāro natthi, phuṭṭha-phuṭṭha-ṭṭhāne yeva pana gaṇento gaṇanāya ca phusanāya ca manasikaroti, tatth’eva gaṇanaṃ paṭisaṃharitvā te satiyā anubandhanto, appanāvasena ca cittaṃ ṭhapento, anubandhanāya ca phusanāya ca ṭhapanāya ca manasikarotī ti vuccati. Svâyam attho Aṭṭhakathāsu vutta-paṅguḷa-dovārikûpamāhi, Paṭisambhidāyaṃ vutta-kakacûpamāya ca veditabbo.

CST225

199

Tatrâyaṃ paṅguḷopamā. Seyyathā pi paṅguḷo dolāya kīḷataṃ mātāputtānaṃ dolaṃ khipitvā tatth’eva dolā-thambhamūle nisinno kamena āgacchantassa ca gacchantassa ca dolāphalakassa ubho koṭiyo majjhañ ca passati, na ca ubhokoṭi-majjhānaṃ dassanatthaṃ byāvaṭo hoti, evam evâyaṃ bhikkhu sativasena upanibandhana-thambhamūle ṭhatvā assāsapassāsa-dolaṃ khipitvā tatth’eva nimitte satiyā nisīdanto kamena āgacchantānañ ca gacchantānañ ca phuṭṭhaṭṭhāne assāsapassāsānaṃ ādi-majjha-pariyosānaṃ satiyā anugacchanto, tattha ca cittaṃ ṭhapento passati, na ca tesaṃ dassanatthaṃ byāvaṭo hoti. Ayaṃ paṅguḷopamā.

CST226

200

Ayaṃ pana dovārikûpamā. Seyyathā pi dovāriko nagarassa anto ca bahi ca purise “ko tvaṃ? kuto vā āgato? kuhiṃ vā gacchasi? kiṃ vā te hatthe” ti na vīmaṃsati, — na hi tassa te bhārā, — dvārappattaṃ dvārappattaṃ yeva pana vīmaṃsati, evam eva imassa bhikkhuno anto paviṭṭhavātā ca bahi nikkhantavātā ca na bhārā honti, dvārappattā dvārappattā yeva bhārā ti. Ayaṃ dovārikûpamā.

CST227

201

Kakacûpamā pana ādito paṭṭhāya evaṃ veditabbā. Vuttañ h’etaṃ:

“Nimittaṃ assāsapassāsā anārammaṇam ekacittassa,
ajānato ca tayo dhamme bhāvanā n’upalabbhati.

Nimittaṃ assāsapassāsā anārammaṇam ekacittassa,
jānato ca tayo dhamme bhāvanā upalabbhatī” ti.

202

“Kathaṃ ime tayo dhammā ekacittassa ārammaṇā na honti, na c’ime tayo dhammā aviditā honti, na ca cittaṃ vikkhepaṃ gacchati, padhānañ ca paññāyati, payogañ ca sādheti, visesam adhigacchati?

Seyyathā pi rukkho same bhūmibhāge nikkhitto, tam enaṃ puriso kakacena chindeyya, rukkhe phuṭṭha-kakacadantānaṃ vasena purisassa sati upaṭṭhitā hoti, na āgate vā gate vā kakacadante manasikaroti, na āgatā vā gatā vā kakacadantā aviditā honti, padhānañ ca paññāyati, payogañ ca sādheti, visesam adhigacchati.

Yathā rukkho same bhūmibhāge nikkhitto, evaṃ upanibandhanā-nimittaṃ, yathā kakacadantā, evaṃ assāsapassāsā, yathā rukkhe phuṭṭha-kakacadantānaṃ vasena purisassa sati upaṭṭhitā hoti, na āgate vā gate vā kakacadante manasikaroti, na āgatā vā gatā vā kakacadantā aviditā honti, padhānañ ca paññāyati, payogañ ca sādheti, visesam adhigacchati, evam eva bhikkhu nāsikagge vā mukhanimitte vā satiṃ upaṭṭhapetvā nisinno hoti, na āgate vā gate vā assāsapassāse manasikaroti, na ca āgatā vā gatā vā assāsapassāsā aviditā honti, padhānañ ca paññāyati, payogañ ca sādheti, visesam adhigacchati.

203

“Padhānan ti katamaṃ padhānaṃ? Āraddhavīriyassa kāyo pi cittam pi kammaniyaṃ hoti, idaṃ padhānaṃ. Katamo payogo? Āraddhavīriyassa upakkilesā pahīyanti, vitakkā vūpasamanti, ayaṃ payogo. Katamo viseso? Āraddhavīriyassa saṃyojanā pahīyanti, anusayā byantīhonti, ayaṃ viseso.

Evaṃ ime tayo dhammā ekacittassa ārammaṇā na honti, na c’ime tayo dhammā aviditā honti, na ca cittaṃ vikkhepaṃ gacchati, padhānañ ca paññāyati, payogañ ca sādheti, visesam adhigacchati”. (paṭi. ma. 1.159)

“Ānāpānassati yassa paripuṇṇā subhāvitā
anupubbaṃ paricitā yathā Buddhena desitā,
so imaṃ lokaṃ pabhāseti abbhā mutto va candimā” ti. (paṭi. ma. 1.160)

Ayaṃ kakacûpamā. Idha pan’assa āgatâgatavasena amanasikāra-mattam eva payojanan ti veditabbaṃ.

CST228

204

Idaṃ kammaṭṭhānaṃ manasikaroto kassaci na ciren’eva nimittañ ca uppajjati, avasesa-jhānaṅga-paṭimaṇḍitā appanā-saṅkhātā ṭhapanā ca sampajjati.

205

Kassaci pana gaṇanāvasen’eva manasikārakālato pabhuti anukkamato oḷārika-assāsapassāsa-nirodhavasena kāyadarathe vūpasante kāyo pi cittam pi lahukaṃ hoti, sarīraṃ ākāse laṅghanâkārappattaṃ viya hoti.³¹ Yathā sāraddhakāyassa mañce vā pīṭhe vā nisīdato mañcapīṭhaṃ onamati, vikūjati, paccattharaṇaṃ valiṃ gaṇhāti, asāraddhakāyassa pana nisīdato n’eva mañcapīṭhaṃ onamati, na vikūjati, na paccattharaṇaṃ valiṃ gaṇhāti, tūlapicu-pūritaṃ viya mañcapīṭhaṃ hoti. Kasmā? Yasmā asāraddho kāyo lahuko hoti. Evam eva gaṇanāvasena manasikārakālato pabhuti anukkamato oḷārika-assāsapassāsa-nirodhavasena kāyadarathe vūpasante kāyo pi cittam pi lahukaṃ hoti, sarīraṃ ākāse laṅghanâkārappattaṃ viya hoti.

206

Tassa oḷārike assāsapassāse niruddhe sukhumassāsapassāsa-nimittârammaṇaṃ cittaṃ pavattati. Tasmim pi niruddhe aparâparaṃ tato sukhumataraṃ sukhumataraṃ nimittârammaṇaṃ pavattati yeva.

207

Kathaṃ? Yathā puriso mahatiyā lohasalākāya kaṃsathālaṃ ākoṭeyya, ekappahārena mahāsaddo uppajjeyya, tassa oḷārika-saddârammaṇaṃ cittaṃ pavatteyya, niruddhe oḷārike sadde atha pacchā sukhumasadda-nimittârammaṇaṃ, tasmim pi niruddhe aparâparaṃ tato sukhumataraṃ sukhumataraṃ sadda-nimittârammaṇaṃ pavattat’eva, evan ti veditabbaṃ. Vuttam pi c’etaṃ:

“Seyyathā pi kaṃse ākoṭite” ti (paṭi. ma. 1.171)

vitthāro (VIII.184).

CST229

208

Yathā hi aññāni kammaṭṭhānāni uparûpari vibhūtāni honti, na tathā idaṃ. Idaṃ pana uparûpari bhāventassa sukhumattaṃ gacchati, upaṭṭhānam pi na upagacchati. Evaṃ anupaṭṭhahante pana tasmiṃ tena bhikkhunā uṭṭhāy’āsanā cammakhaṇḍaṃ papphoṭetvā na gantabbaṃ. Kiṃ kātabbaṃ? “Ācariyaṃ pucchissāmī” ti vā, “naṭṭhaṃ dāni me kammaṭṭhānan” ti vā na vuṭṭhātabbaṃ. Iriyāpathaṃ vikopetvā gacchato hi kammaṭṭhānaṃ nava-navam eva hoti. Tasmā yathānisinnen’eva desato āharitabbaṃ.

209

Tatrâyaṃ āharaṇûpāyo. Tena hi bhikkhunā kammaṭṭhānassa anupaṭṭhānabhāvaṃ ñatvā iti paṭisañcikkhitabbaṃ “ime assāsapassāsā nāma kattha atthi, kattha natthi, kassa vā atthi, kassa vā natthī” ti. Ath’evaṃ paṭisañcikkhatā “ime anto mātukucchiyaṃ natthi, udake nimuggānaṃ natthi, tathā asaññībhūtānaṃ, matānaṃ, catutthajjhāna-samāpannānaṃ, rūpârūpabhava-samaṅgīnaṃ, nirodha-samāpannānan” ti ñatvā evaṃ attanā va attā paṭicodetabbo “na nu tvaṃ, paṇḍita, n’eva mātukucchigato, na udake nimuggo, na asaññībhūto, na mato, na catutthajjhāna-samāpanno, na rūpârūpabhava-samaṅgī, na nirodha-samāpanno, atthi yeva te assāsapassāsā, mandapaññatāya pana pariggahetuṃ na sakkosī” ti. Athânena pakati-phuṭṭhavasena cittaṃ ṭhapetvā manasikāro pavattetabbo.

210

Ime hi dīghanāsikassa nāsāpuṭaṃ ghaṭṭentā pavattanti, rassanāsikassa uttaroṭṭhaṃ. Tasmā’nena “imaṃ nāma ṭhānaṃ ghaṭṭentī” ti nimittaṃ ṭhapetabbaṃ. Imam eva hi atthavasaṃ paṭicca vuttaṃ Bhagavatā:

“Nâhaṃ, bhikkhave, muṭṭhasatissa asampajānassa ānāpānassatibhāvanaṃ vadāmī” ti. (ma. ni. 3.149; saṃ. ni. 5.992)

CST230

211

Kiñcâpi hi yaṃ kiñci kammaṭṭhānaṃ satassa sampajānass’eva sampajjati, ito aññaṃ pana manasikarontassa pākaṭaṃ hoti. Idaṃ pana ānāpānassati-kammaṭṭhānaṃ garukaṃ garukabhāvanaṃ Buddha-paccekabuddha-buddhaputtānaṃ mahāpurisānaṃ yeva manasikārabhūmibhūtaṃ, na c’eva ittaraṃ, na ca ittarasatta-samāsevitaṃ. Yathā yathā manasikarīyati, tathā tathā santañ c’eva hoti sukhumañ ca, tasmā ettha balavatī sati ca paññā ca icchitabbā.

212

Yathā hi maṭṭhasāṭakassa tunnakaraṇakāle sūci pi sukhumā icchitabbā, sūcipāsavedhanam pi tato sukhumataraṃ, evam eva maṭṭhasāṭaka-sadisassa imassa kammaṭṭhānassa bhāvanākāle sūci-paṭibhāgā sati pi, sūcipāsavedhana-paṭibhāgā taṃsampayuttā paññā pi balavatī icchitabbā. Tāhi ca pana sati-paññāhi samannāgatena bhikkhunā na te assāsapassāsā aññatra pakati-phuṭṭhokāsā pariyesitabbā.

213

Yathā pana kassako kasiṃ kasitvā balībadde muñcitvā gocaramukhe katvā chāyāya nisinno vissameyya, ath’assa te balībaddā vegena aṭaviṃ paviseyyuṃ. Yo hoti cheko kassako, so puna te gahetvā yojetukāmo na tesaṃ anupadaṃ gantvā aṭaviṃ āhiṇḍahi, atha kho rasmiñ ca patodañ ca gahetvā ujukam eva tesaṃ nipātana-titthaṃ gantvā nisīdati vā nipajjati vā, atha te goṇe divasabhāgaṃ caritvā nipātana-titthaṃ otaritvā nhatvā ca pivitvā ca paccuttaritvā ṭhite disvā rasmiyā bandhitvā patodena vijjhanto ānetvā yojetvā puna kammaṃ karoti.

Evam eva tena bhikkhunā na te assāsapassāsā aññatra pakati-phuṭṭhokāsā pariyesitabbā, sati-rasmiṃ pana paññā-patodañ ca gahetvā pakati-phuṭṭhokāse cittaṃ ṭhapetvā manasikāro pavattetabbo. Evañ hi’ssa manasikaroto na cirass’eva te upaṭṭhahanti, nipātana-titthe viya goṇā. Tato’nena sati-rasmiyā bandhitvā tasmiṃ yeva ṭhāne yojetvā paññā-patodena vijjhantena punappunaṃ kammaṭṭhānaṃ anuyuñjitabbaṃ.

CST231

214

Tass’evam anuyuñjato na cirass’eva nimittaṃ upaṭṭhāti. Taṃ pan’etaṃ na sabbesaṃ ekasadisaṃ hoti. Api ca kho kassaci sukhasamphassaṃ uppādayamāno tūlapicu viya kappāsapicu viya vātadhārā viya ca upaṭṭhātī ti ekacce āhu.

215

Ayaṃ pana Aṭṭhakathāsu vinicchayo. Idañ hi kassaci tārakarūpaṃ viya maṇiguḷikā viya muttāguḷikā viya ca, kassaci khara-samphassaṃ hutvā kappāsaṭṭhi viya dārusārasūci viya ca, kassaci dīghapāmaṅgasuttaṃ viya kusumadāmaṃ viya dhūmasikhā viya ca, kassaci vitthataṃ makkaṭakasuttaṃ viya valāhakapaṭalaṃ viya padumapupphaṃ viya rathacakkaṃ viya candamaṇḍalaṃ viya sūriyamaṇḍalaṃ viya ca upaṭṭhāti.

216

Tañ ca pan’etaṃ yathā sambahulesu bhikkhūsu suttantaṃ sajjhāyitvā nisinnesu, ekena bhikkhunā “tumhākaṃ kīdisaṃ hutvā idaṃ suttaṃ upaṭṭhātī” ti vutte, eko “mayhaṃ mahatī pabbateyyā nadī viya hutvā upaṭṭhātī” ti āha, aparo “mayhaṃ ekā vanarāji viya”, añño “mayhaṃ eko sītacchāyo sākhāsampanno phalabhāra-bharita-rukkho viyā” ti. Tesaṃ hi taṃ ekam eva suttaṃ saññānānatāya nānato upaṭṭhāti. Evaṃ ekam eva kammaṭṭhānaṃ saññānānatāya nānato upaṭṭhāti. Saññajañ hi etaṃ saññānidānaṃ saññāpabhavaṃ, tasmā saññānānatāya nānato upaṭṭhātī ti veditabbaṃ.

217

Ettha ca aññam eva assāsârammaṇaṃ cittaṃ, aññaṃ passāsârammaṇaṃ, aññaṃ nimittârammaṇaṃ. Yassa hi ime tayo dhammā natthi, tassa kammaṭṭhānaṃ n’eva appanaṃ, na upacāraṃ pāpuṇāti. Yassa pana ime tayo dhammā atthi, tass’eva kammaṭṭhānaṃ upacārañ ca appanañ ca pāpuṇāti. Vuttañ h’etaṃ:

“Nimittaṃ assāsapassāsā anārammaṇam ekacittassa,
ajānato tayo dhamme bhāvanā n’upalabbhati.

Nimittaṃ assāsapassāsā anārammaṇam ekacittassa,
jānato va tayo dhamme bhāvanā upalabbhatī” ti. (pārā. aṭṭha. 2.165)

CST232

218

Evaṃ upaṭṭhite pana nimitte tena bhikkhunā ācariyassa santikaṃ gantvā ārocetabbaṃ “mayhaṃ, bhante, evarūpaṃ nāma upaṭṭhātī” ti. Ācariyena pana etaṃ nimittan ti vā na vā nimittan ti na vattabbaṃ, “evaṃ hoti, āvuso” ti vatvā “punappunaṃ manasikarohī” ti vattabbo. Nimittan ti hi vutte vosānaṃ āpajjeyya, na nimittan ti vutte nirāso visīdeyya. Tasmā tad ubhayam pi avatvā manasikāre yeva niyojetabbo ti. Evaṃ tāva Dīghabhāṇakā. Majjhimabhāṇakā pan’āhu “nimittam idaṃ, āvuso, kammaṭṭhānaṃ punappunaṃ manasikarohi sappurisā” ti vattabbo ti.

219

Athânena nimitte yeva cittaṃ ṭhapetabbaṃ, evam assâyaṃ ito pabhuti ṭhapanāvasena bhāvanā hoti. Vuttañ h’etaṃ porāṇehi:

“Nimitte ṭhapayaṃ cittaṃ nānâkāraṃ vibhāvayaṃ
dhīro assāsapassāse sakaṃ cittaṃ nibandhatī” ti. (pārā. aṭṭha. 2.165)

220

Tass’evaṃ nimittupaṭṭhānato pabhuti nīvaraṇāni vikkhambhitān’eva honti, kilesā sannisinnā va, sati upaṭṭhitā yeva, cittaṃ upacārasamādhinā samāhitam eva.

221

Athânena taṃ nimittaṃ n’eva vaṇṇato manasikātabbaṃ, na lakkhaṇato paccavekkhitabbaṃ, api ca kho khattiyamahesiyā cakkavattigabbho viya, kassakena sāli-yava-gabbho viya ca, āvāsâdīni satta asappāyāni vajjetvā, tān’eva satta sappāyāni sevantena sādhukaṃ rakkhitabbaṃ. Atha naṃ evaṃ rakkhitvā punappunaṃ manasikāravasena vuddhiṃ virūḷhiṃ gamayitvā dasavidhaṃ appanākosallaṃ sampādetabbaṃ, vīriyasamatā yojetabbā.

222

Tass’evaṃ ghaṭentassa pathavīkasiṇe vuttânukkamen’eva tasmiṃ nimitte catukka-pañcaka-jjhānāni nibbattanti.

CST233

Evaṃ nibbatta-catukka-pañcaka-jjhāno pan’ettha bhikkhu sallakkhaṇā-vivaṭṭanā-vasena kammaṭṭhānaṃ vaḍḍhetvā pārisuddhiṃ pattukāmo tad eva jhānaṃ pañcah’ākārehi vasippattaṃ paguṇaṃ katvā nāmarūpaṃ vavatthapetvā vipassanaṃ paṭṭhapeti.

223

Kathaṃ? So hi samāpattito vuṭṭhāya “assāsapassāsānaṃ samudayo karajakāyo ca cittañ cā” ti passati. Yathā hi kammāra-gaggariyā dhamamānāya bhastañ ca purisassa ca tajjaṃ vāyāmaṃ paṭicca vāto sañcarati, evam eva kāyañ ca cittañ ca paṭicca assāsapassāsā ti, tato assāsapassāse ca kāyañ ca rūpan ti cittañ ca taṃsampayuttadhamme ca arūpan ti vavatthapeti. Ayam ettha saṅkhepo, vitthārato pana nāmarūpavavatthānaṃ parato āvibhavissati (XVIII.3-24).

224

Evaṃ nāmarūpaṃ vavatthapetvā tassa paccayaṃ pariyesati, pariyesanto ca naṃ disvā tīsu pi addhāsu nāmarūpassa pavattiṃ ārabbha kaṅkhaṃ vitarati. Vitiṇṇakaṅkho kalāpa-sammasana-vasena tilakkhaṇaṃ āropetvā, udayabbayânupassanāya pubbabhāge uppanne obhāsâdayo dasa vipassanupakkilese pahāya, “upakkilesavimuttaṃ paṭipadāñāṇaṃ maggo” ti vavatthapetvā, udayaṃ pahāya bhaṅgânupassanaṃ patvā, nirantaraṃ bhaṅgânupassanena vayato³² upaṭṭhitesu sabbasaṅkhāresu nibbindanto virajjanto vimuccanto yathākkamena cattāro ariyamagge pāpuṇitvā arahattaphale patiṭṭhāya ekūnavīsati-bhedassa paccavekkhaṇāñāṇassa pariyantaṃ patto sadevakassa lokassa aggadakkhiṇeyyo hoti.

225

Ettāvatā c’assa gaṇanaṃ ādiṃ katvā vipassanā³³-pariyosānā ānāpānassatisamādhi-bhāvanā samattā hotī ti. Ayaṃ sabbâkārato paṭhama-catukka-vaṇṇanā.

CST234

226

Itaresu pana tīsu catukkesu yasmā visuṃ kammaṭṭhāna-bhāvanānayo nāma natthi, tasmā anupadavaṇṇanā-nayen’eva tesaṃ evaṃ attho veditabbo.

Pītipaṭisaṃvedī ti pītiṃ paṭisaṃviditaṃ karonto, pākaṭaṃ karonto, assasissāmi passasissāmī ti sikkhati. Tattha dvīh’ākārehi pīti paṭisaṃviditā hoti: ārammaṇato ca asammohato ca.

227

Kathaṃ ārammaṇato pīti paṭisaṃviditā hoti? Sappītike dve jhāne samāpajjati, tassa samāpattikkhaṇe jhānapaṭilābhena ārammaṇato pīti paṭisaṃviditā hoti, ārammaṇassa paṭisaṃviditattā.

Kathaṃ asammohato? Sappītike dve jhāne samāpajjitvā vuṭṭhāya jhānasampayuttaṃ pītiṃ khayato vayato sammasati, tassa vipassanākkhaṇe lakkhaṇapaṭivedhena asammohato pīti paṭisaṃviditā hoti.

228

Vuttañ h’etaṃ Paṭisambhidāyaṃ:

“Dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā tena ñāṇena sā pīti paṭisaṃviditā hoti. Dīghaṃ passāsavasena… Rassaṃ assāsavasena… Rassaṃ passāsavasena… Sabbakāyapaṭisaṃvedī assāsapassāsavasena… Passambhayaṃ kāyasaṅkhāraṃ assāsapassāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā tena ñāṇena sā pīti paṭisaṃviditā hoti.

Āvajjato sā pīti paṭisaṃviditā hoti, jānato passato paccavekkhato cittaṃ adhiṭṭhahato saddhāya adhimuccato vīriyaṃ paggaṇhato satiṃ upaṭṭhāpayato cittaṃ samādahato paññāya pajānato abhiññeyyaṃ… pariññeyyaṃ… pahātabbaṃ… bhāvetabbaṃ… sacchikātabbaṃ sacchikaroto sā pīti paṭisaṃviditā hoti. Evaṃ sā pīti paṭisaṃviditā hotī” ti. (paṭi. ma. 1.172)

229

Eten’eva nayena avasesapadāni pi atthato veditabbāni. Idam pan’ettha visesamattaṃ. Tiṇṇaṃ jhānānaṃ vasena sukhapaṭisaṃveditā, catunnam pi vasena cittasaṅkhārapaṭisaṃveditā veditabbā. Cittasaṅkhāro ti vedanâdayo dve khandhā. Sukhapaṭisaṃvedī-pade c’ettha vipassanābhūmi-dassanatthaṃ,

“Sukhan ti dve sukhāni kāyikañ ca sukhaṃ cetasikañ cā” ti (paṭi. ma. 1.173)

Paṭisambhidāyaṃ vuttaṃ. Passambhayaṃ cittasaṅkhāran ti oḷārikaṃ oḷārikaṃ cittasaṅkhāraṃ passambhento, nirodhento ti attho. So vitthārato kāyasaṅkhāre vuttanayen’eva veditabbo (VIII.176-185).

230

Api c’ettha pītipade pītisīsena vedanā vuttā, sukhapade sarūpen’eva vedanā, dvīsu cittasaṅkhārapadesu,

“Saññā ca vedanā ca cetasikā ete dhammā cittapaṭibaddhā cittasaṅkhārā” ti (paṭi. ma. 1.174; ma. ni. 1.463)

vacanato, saññāsampayuttā vedanā ti evaṃ vedanânupassanā-nayena idaṃ catukkaṃ bhāsitan ti veditabbaṃ.

CST235

231

Tatiya-catukke pi catunnaṃ jhānānaṃ vasena cittapaṭisaṃveditā veditabbā. Abhippamodayaṃ cittan ti cittaṃ modento pamodento hāsento pahāsento assasissāmi passasissāmī ti sikkhati. Tattha dvīh’ākārehi abhippamodo hoti: samādhivasena ca vipassanāvasena ca.

Kathaṃ samādhivasena? Sappītike dve jhāne samāpajjati, so samāpattikkhaṇe sampayuttapītiyā cittaṃ āmodeti pamodeti.

Kathaṃ vipassanāvasena? Sappītike dve jhāne samāpajjitvā vuṭṭhāya jhānasampayutta-pītiṃ khayato vayato sammasati, evaṃ vipassanākkhaṇe jhānasampayuttaṃ pītiṃ ārammaṇaṃ katvā cittaṃ āmodeti pamodeti.

Evaṃ paṭipanno “abhippamodayaṃ cittaṃ assasissāmi passasissāmī ti sikkhatī” ti vuccati.

232

Samādahaṃ cittan ti paṭhamajjhānâdivasena ārammaṇe cittaṃ samaṃ ādahanto, samaṃ ṭhapento, tāni vā pana jhānāni samāpajjitvā vuṭṭhāya jhānasampayuttaṃ cittaṃ khayato vayato sampassato³⁴ vipassanākkhaṇe lakkhaṇa-paṭivedhena uppajjati khaṇika-cittekaggatā, evaṃ uppannāya khaṇika-cittekaggatāya vasena pi ārammaṇe cittaṃ samaṃ ādahanto samaṃ ṭhapento “samādahaṃ cittaṃ assasissāmi passasissāmī ti sikkhatī” ti vuccati.

233

Vimocayaṃ cittan ti paṭhamajjhānena nīvaraṇehi cittaṃ mocento vimocento, dutiyena vitakka-vicārehi, tatiyena pītiyā, catutthena sukha-dukkhehi cittaṃ mocento vimocento, tāni vā pana jhānāni samāpajjitvā vuṭṭhāya jhānasampayuttaṃ cittaṃ khayato vayato sammasati, so vipassanākkhaṇe aniccânupassanāya niccasaññāto cittaṃ mocento, dukkhânupassanāya sukhasaññāto, anattânupassanāya attasaññāto, nibbidânupassanāya nandito, virāgânupassanāya rāgato, nirodhânupassanāya samudayato, paṭinissaggânupassanāya ādānato cittaṃ mocento, assasati c’eva passasati ca, tena vuccati “vimocayaṃ cittaṃ assasissāmi passasissāmī ti sikkhatī” ti.

Evaṃ cittânupassanā-vasena idaṃ catukkaṃ bhāsitan ti veditabbaṃ.

CST236

234

Catuttha-catukke pana aniccânupassī ti ettha tāva aniccaṃ veditabbaṃ, aniccatā veditabbā, aniccânupassanā veditabbā, aniccânupassī veditabbo. Tattha aniccan ti pañcakkhandhā. Kasmā? Uppāda-vayaññathatta-bhāvā. Aniccatā ti tesaṃ yeva uppāda-vayaññathattaṃ, hutvā abhāvo vā, nibbattānaṃ ten’ev’ākārena aṭṭhatvā khaṇabhaṅgena bhedo ti attho. Aniccânupassanā ti tassā aniccatāya vasena rūpâdīsu aniccan ti anupassanā. Aniccânupassī ti tāya anupassanāya samannāgato. Tasmā evaṃbhūto assasanto passasanto ca idha “aniccânupassī assasissāmi passasissāmī ti sikkhatī” ti veditabbo.

235

Virāgânupassī ti ettha pana dve virāgā: khayavirāgo ca accantavirāgo ca. Tattha khayavirāgo ti saṅkhārānaṃ khaṇabhaṅgo. Accantavirāgo ti nibbānaṃ. Virāgânupassanā ti tadubhaya-dassana-vasena pavattā vipassanā ca maggo ca. Tāya duvidhāya pi anupassanāya samannāgato hutvā assasanto passasanto ca “virāgânupassī assasissāmi passasissāmī ti sikkhatī” ti veditabbo. Nirodhânupassī-pade pi es’eva nayo.

236

Paṭinissaggânupassī ti etthâpi dve paṭinissaggā: pariccāga-paṭinissaggo ca pakkhandana-paṭinissaggo ca. Paṭinissaggo yeva anupassanā paṭinissaggânupassanā, vipassanā-maggānaṃ etam adhivacanaṃ.

Vipassanā hi tadaṅgavasena saddhiṃ khandhâbhisaṅkhārehi kilese pariccajati, saṅkhata-dosa-dassanena ca tabbiparīte nibbāne tanninnatāya pakkhandatī ti pariccāga-paṭinissaggo c’eva pakkhandana-paṭinissaggo ti ca vuccati

Maggo samucchedavasena saddhiṃ khandhâbhisaṅkhārehi kilese pariccajati, ārammaṇakaraṇena ca nibbāne pakkhandatī ti pariccāga-paṭinissaggo c’eva pakkhandana-paṭinissaggo ti ca vuccati.

Ubhayam pi pana purima-purimaññāṇānaṃ anu-anupassanato anupassanā ti vuccati. Tāya duvidhāya pi paṭinissaggânupassanāya samannāgato hutvā assasanto passasanto ca “paṭinissaggânupassī assasissāmi passasissāmī ti sikkhatī” ti veditabbo.

237

Idaṃ catuttha-catukkaṃ suddha-vipassanā-vasen’eva vuttaṃ, purimāni pana tīṇi samatha-vipassanā-vasena. Evaṃ catunnaṃ catukkānaṃ vasena soḷasavatthukāya ānāpānassatiyā bhāvanā veditabbā. Evaṃ soḷasavatthuvasena ca pana ayaṃ ānāpānassati mahapphalā hoti mahânisaṃsā.

CST237

238

Tatr’assa,

“Ayam pi kho, bhikkhave, ānāpānassatisamādhi bhāvito bahulīkato santo c’eva paṇīto cā” ti (VIII.145)

ādivacanato santabhāvâdi-vasenâpi mahânisaṃsatā veditabbā, vitakkupaccheda-samatthatāya pi. Ayañ hi santa-paṇīta-asecanaka-sukhavihārattā samādhi-antarāyakarānaṃ vitakkānaṃ vasena ito c’ito ca cittassa vidhāvanaṃ vicchinditvā ānāpānârammaṇâbhimukham eva cittaṃ karoti. Ten’eva vuttaṃ:

“Ānāpānassati bhāvetabbā vitakkupacchedāyā” ti. (a. ni. 9.1)

239

Vijjā-vimutti-pāripūriyā mūlabhāvenâpi c’assā mahânisaṃsatā veditabbā. Vuttañ h’etaṃ Bhagavatā:

“Ānāpānassati, bhikkhave, bhāvitā bahulīkatā cattāro satipaṭṭhāne paripūreti, cattāro satipaṭṭhānā bhāvitā bahulīkatā satta bojjhaṅge paripūrenti, satta bojjhaṅgā bhāvitā bahulīkatā vijjāvimuttiṃ paripūrentī” ti. (ma. ni. 3.147)

240

Api ca carimakānaṃ assāsapassāsānaṃ viditabhāvakaraṇato pi’ssā mahânisaṃsatā veditabbā. Vuttañ h’etaṃ Bhagavatā:

“Evaṃ bhāvitāya kho, Rāhula, ānāpānassatiyā, evaṃ bahulīkatāya, ye pi te carimakā assāsapassāsā, te pi viditā va nirujjhanti, no aviditā” ti. (ma. ni. 2.121)

CST238

241

Tattha nirodhavasena tayo carimakā: bhavacarimakā, jhānacarimakā, cuticarimakā ti. Bhavesu hi kāmabhave assāsapassāsā pavattanti, rūpârūpabhavesu nappavattanti, tasmā te bhavacarimakā. Jhānesu purime jhānattaye pavattanti, catutthe nappavattanti, tasmā te jhānacarimakā. Ye pana cuticittassa purato soḷasamena cittena saddhiṃ uppajjitvā cuticittena saha nirujjhanti, ime cuticarimakā nāma. Ime idha “carimakā” ti adhippetā.

242

Imaṃ kira kammaṭṭhānaṃ anuyuttassa bhikkhuno ānāpānârammaṇassa suṭṭhu pariggahitattā, cuticittassa purato soḷasamassa cittassa uppādakkhaṇe uppādaṃ āvajjayato uppādo pi nesaṃ pākaṭo hoti, thitiṃ āvajjayato ṭhiti pi nesaṃ pākaṭā hoti, bhaṅgaṃ āvajjayato ca bhaṅgo nesaṃ pākaṭo hoti.

243

Ito aññaṃ kammaṭṭhānaṃ bhāvetvā arahattaṃ pattassa bhikkhuno hi āyu-antaraṃ paricchinnaṃ vā hoti, aparicchinnaṃ vā, idaṃ pana soḷasavatthukaṃ ānāpānassatiṃ bhāvetvā arahattaṃ pattassa āyu-antaraṃ paricchinnam eva hoti. So “ettakaṃ dāni me āyusaṅkhārā pavattissanti, na ito paran” ti ñatvā attano dhammatāya eva sarīra-paṭijaggana-nivāsana-pārupanâdīni sabbakiccāni katvā akkhīni nimīleti, Koṭapabbatavihāra-vāsī Tissatthero viya, Mahākarañjiyavihāra-vāsī Mahātissatthero viya, Devaputtamahāraṭṭhe Piṇḍapātika-Tissatthero viya, Cittalapabbatavihāra-vāsino dve Bhātiyattherā viya ca.

244

Tatr’idaṃ ekavatthu-paridīpanaṃ. Dvebhātiyattherānaṃ kir’eko puṇṇamuposathadivase pātimokkhaṃ osāretvā³⁵ bhikkhusaṅgha-parivuto attano vasanaṭṭhānaṃ gantvā caṅkame ṭhito candâlokaṃ oloketvā attano āyusaṅkhāre upadhāretvā bhikkhusaṅgham āha “tumhehi kathaṃ parinibbāyantā bhikkhū diṭṭhapubbā” ti? Tatra keci āhaṃsu “amhehi āsane nisinnakā va parinibbāyantā diṭṭhapubbā” ti, keci “amhehi ākāse pallaṅkam ābhujitvā nisinnakā” ti. Thero āha “ahaṃ dāni vo caṅkamantam eva parinibbāyamānaṃ dassessāmī” ti tato caṅkame lekhaṃ katvā “ahaṃ ito caṅkamakoṭito parakoṭiṃ gantvā nivattamāno imaṃ lekhaṃ patvā va parinibbāyissāmī” ti vatvā caṅkamaṃ oruyha parabhāgaṃ gantvā nivattamāno ekena pādena lekhaṃ akkantakkhaṇe yeva parinibbāyi.

Tasmā have appamatto anuyuñjetha paṇḍito
evaṃ anekânisaṃsaṃ ānāpānassatiṃ sadā ti.

Idaṃ ānāpānassatiyaṃ vitthārakathāmukhaṃ.

Upasamānussatikathā

CST239

245

Ānāpānassatiyā anantaraṃ uddiṭṭhaṃ pana upasamânussatiṃ bhāvetukāmena rahogatena paṭisallīnena:

“Yāvatā, bhikkhave, dhammā saṅkhatā vā asaṅkhatā vā virāgo tesaṃ dhammānaṃ aggam akkhāyati, yad idaṃ mada-nimmadano pipāsa-vinayo ālaya-samugghāto vaṭṭupacchedo taṇhakkhayo virāgo nirodho nibbānan” ti (a. ni. 4.34; itivu. 90)

evaṃ sabbadukkhûpasama-saṅkhātassa nibbānassa guṇā anussaritabbā.

246

Tattha yāvatā ti yattakā. Dhammā ti sabhāvā. Saṅkhatā vā asaṅkhatā vā ti saṅgamma samāgamma paccayehi katā vā akatā vā. Virāgo tesaṃ dhammānaṃ aggam akkhāyatī ti tesaṃ saṅkhatâsaṅkhata-dhammānaṃ virāgo aggam akkhāyati, seṭṭho uttamo ti vuccati.

247

Tattha virāgo ti na rāgâbhāvamattam eva, atha kho “yad idaṃ mada-nimmadano…pe… nibbānan” ti yo so mada-nimmadano ti ādīni nāmāni asaṅkhata-dhammo labhati, so virāgo ti paccetabbo. So hi yasmā tam āgamma sabbe pi mānamada-purisamadâdayo madā nimmadā amadā honti vinassanti, tasmā mada-nimmadano ti vuccati. Yasmā ca tam āgamma sabbā pi kāmapipāsā vinayaṃ abbhatthaṃ yāti, tasmā pipāsa-vinayo ti vuccati. Yasmā pana tam āgamma pañcakāmaguṇâlayā samugghātaṃ gacchanti, tasmā ālaya-samugghāto ti vuccati. Yasmā ca tam āgamma tebhūmakaṃ vaṭṭaṃ upacchijjati, tasmā vaṭṭupacchedo ti vuccati. Yasmā pana tam āgamma sabbaso taṇhā khayaṃ gacchati virajjati nirujjhati ca, tasmā taṇhakkhayo virāgo nirodho ti vuccati. Yasmā pan’esa catasso yoniyo, pañca gatiyo, satta viññāṇaṭṭhitiyo, nava ca sattâvāse aparâparabhāvāya vinanato ābandhanato saṃsibbanato vānan ti laddhavohārāya taṇhāya nikkhanto nissaṭo visaṃyutto, tasmā nibbānan ti vuccatī ti.

248

Evam etesaṃ mada-nimmadanatâdīnaṃ guṇānaṃ vasena nibbāna-saṅkhāto upasamo anussaritabbo. Ye vā pan’aññe pi Bhagavatā:

“Asaṅkhatañ ca vo, bhikkhave, desessāmi… Saccañ ca… Pārañ ca… Sududdasañ ca… Ajarañ ca… Dhuvañ ca… Nippapañcañ ca… Amatañ ca… Sivañ ca… Khemañ ca… Abbhutañ ca… Anītikañ ca… Abyābajjhañ ca… Visuddhiñ ca… Dīpañ ca… Tāṇañ ca… Leṇañ ca vo, bhikkhave, desessāmī” ti (saṃ. ni. 4.366)

ādīsu suttesu upasamaguṇā vuttā, tesam pi vasena anussaritabbo yeva.

249

Tass’evaṃ mada-nimmadanatâdi-guṇavasena upasamaṃ anussarato,

“N’eva tasmiṃ samaye rāgapariyuṭṭhitaṃ cittaṃ hoti, na dosa… na mohapariyuṭṭhitaṃ cittaṃ hoti, ujugatam ev’assa tasmiṃ samaye cittaṃ hoti upasamaṃ ārabbhā” ti (VII.65)

Buddhânussati-ādīsu vuttanayen’eva vikkhambhita-nīvaraṇassa ekakkhaṇe jhānaṅgāni uppajjanti. Upasamaguṇānaṃ pana gambhīratāya nānappakāra-guṇânussaraṇâdhimuttatāya vā appanaṃ appatvā upacārappattam eva jhānaṃ hoti. Tad etam upasamaguṇânussaraṇavasena ³⁶ upasamânussat’icc eva saṅkhyaṃ gacchati.

250

Cha anussatiyo viya ca ayam pi ariyasāvakass’eva ijjhati. Evaṃ sante pi upasamagarukena puthujjanenâpi manasikātabbā. Sutavasenâpi hi upasame cittaṃ pasīdati.

251

Imañ ca pana upasamânussatiṃ anuyutto bhikkhu sukhaṃ supati, sukhaṃ paṭibujjhati, santindriyo hoti santamānaso, hirottappa-samannāgato, pāsādiko, paṇītâdhimuttiko, sabrahmacārīnaṃ garu ca bhāvanīyo ca, uttari appaṭivijjhanto pana sugatiparāyano hoti.

Tasmā have appamatto bhāvayetha vicakkhaṇo
evaṃ anekânisaṃsaṃ ariye upasame satin ti.

Idaṃ upasamânussatiyaṃ vitthārakathāmukhaṃ.