说无色品

Āruppaniddeso

Paṭhamāruppavaṇṇanā

CST275

1

Brahmavihārânantaraṃ uddiṭṭhesu pana catūsu āruppesu ākāsānañcâyatanaṃ tāva bhāvetukāmo,

“Dissante kho pana rūpâdhikaraṇaṃ daṇḍâdāna-satthâdāna-kalaha-viggaha-vivādā ‘natthi kho pan’etaṃ sabbaso āruppe’ ti, so iti paṭisaṅkhāya rūpānaṃ yeva nibbidāya virāgāya nirodhāya paṭipanno hotī” ti (ma. ni. 2.103)

vacanato etesaṃ daṇḍâdānâdīnañ c’eva cakkhu-sota-rogâdīnañ ca ābādha-sahassānaṃ vasena karajarūpe ādīnavaṃ disvā tassa samatikkamāya ṭhapetvā paricchinnâkāsakasiṇaṃ navasu pathavīkasiṇâdīsu aññatarasmiṃ catutthajjhānaṃ uppādeti.

2

Tassa kiñcâpi rūpāvacara-catutthajjhānavasena karajarūpaṃ atikkantaṃ hoti, atha kho kasiṇarūpam pi yasmā tappaṭibhāgam eva, tasmā tam pi samatikkamitukāmo hoti.

3

Kathaṃ? Yathā ahibhīruko puriso araññe sappena anubaddho vegena palāyitvā palātaṭṭhāne lekhācittaṃ tālapaṇṇaṃ vā valliṃ vā rajjuṃ vā phalitāya vā pana pathaviyā phalitantaraṃ disvā bhāyat’eva uttasat’eva, n’eva naṃ dakkhitukāmo hoti. Yathā ca anatthakārinā veripurisena saddhiṃ ekagāme vasamāno puriso tena vadha-bandha-gehajhāpanâdīhi upadduto aññaṃ gāmaṃ vasanatthāya gantvā tatrâpi verinā samāna-rūpa-sadda-samudācāraṃ purisaṃ disvā bhāyat’eva uttasat’eva, n’eva naṃ dakkhitukāmo hoti.

4

Tatr’idaṃ opamma-saṃsandanaṃ. Tesaṃ hi purisānaṃ ahinā verinā vā upadduta-kālo viya bhikkhuno ārammaṇavasena karajarūpa-samaṅgi-kālo. Tesaṃ vegena palāyana-aññagāma-gamanāni viya bhikkhuno rūpāvacara-catutthajjhānavasena karajarūpa-samatikkamana-kālo. Tesaṃ palātaṭṭhāne ca aññagāme ca lekhācitta-tālapaṇṇâdīni c’eva verisadisaṃ purisañ ca disvā bhaya-santāsa-adassanakāmatā viya bhikkhuno kasiṇarūpam pi “tappaṭibhāgam eva idan” ti sallakkhetvā tam pi samatikkamitukāmatā. Sūkarâbhihatasunakha-pisācabhīrukâdikā pi c’ettha upamā veditabbā.

CST276

5

Evaṃ so tasmā catutthajjhānassa ārammaṇabhūtā kasiṇarūpā nibbijja pakkamitukāmo pañcah’ākārehi ciṇṇavasī hutvā paguṇa-rūpāvacara-catutthajjhānato vuṭṭhāya tasmiṃ jhāne “imaṃ mayā nibbiṇṇaṃ rūpaṃ ārammaṇaṃ karotī” ti ca “āsanna-somanassa-paccatthikan” ti ca “santavimokkhato oḷārikan” ti ca ādīnavaṃ passati. Aṅgoḷārikatā pan’ettha natthi. Yath’eva h’etaṃ rūpaṃ duvaṅgikaṃ, evaṃ āruppāni pī ti.

6

So tattha evaṃ ādīnavaṃ disvā nikantiṃ pariyādāya ākāsānañcâyatanaṃ santato anantato manasikaritvā cakkavāḷa-pariyantaṃ vā yattakaṃ icchati tattakaṃ vā kasiṇaṃ pattharitvā tena phuṭṭhokāsaṃ “ākāso ākāso” ti vā “ananto ākāso” ti vā manasikaronto ugghāṭeti.

7

Kasiṇaṃ ugghāṭento hi n’eva kilañjaṃ viya saṃvelleti, na kapālato pūvaṃ viya uddharati, kevalaṃ pana taṃ n’eva āvajjeti, na manasikaroti, na paccavekkhati, anāvajjento amanasikaronto apaccavekkhanto ca, aññadatthu tena phuṭṭhokāsaṃ “ākāso ākāso” ti manasikaronto kasiṇaṃ ugghāṭeti nāma.

8

Kasiṇam pi ugghāṭiyamānaṃ n’eva ubbaṭṭati na vivaṭṭati, kevalaṃ imassa amanasikārañ ca “ākāso ākāso” ti manasikārañ ca paṭicca ugghāṭitaṃ nāma hoti, kasiṇugghāṭimâkāsa-mattaṃ paññāyati. Kasiṇugghāṭimâkāsan ti vā kasiṇaphuṭṭhokāso ti vā kasiṇavivittâkāsan ti vā sabbam etaṃ ekam eva.

9

So taṃ kasiṇugghāṭimâkāsa-nimittaṃ “ākāso ākāso” ti punappunaṃ āvajjeti, takkâhataṃ vitakkâhataṃ karoti. Tass’evaṃ punappunaṃ āvajjayato takkâhataṃ vitakkâhataṃ karoto nīvaraṇāni vikkhambhanti, sati santiṭṭhati, upacārena cittaṃ samādhiyati. So taṃ nimittaṃ punappunaṃ āsevati, bhāveti, bahulīkaroti.

10

Tass’evaṃ punappunaṃ āvajjayato manasikaroto pathavīkasiṇâdīsu rūpāvacara-cittaṃ viya ākāse ākāsānañcâyatana-cittaṃ appeti. Idhâpi hi purimabhāge tīṇi cattāri vā javanāni kāmāvacarāni upekkhāvedanā-sampayuttān’eva honti, catutthaṃ pañcamaṃ vā arūpāvacaraṃ. Sesaṃ pathavīkasiṇe vuttanayam eva.

11

Ayaṃ pana viseso. Evaṃ uppanne arūpāvacaracitte so bhikkhu yathā nāma yāna-pputoḷi¹-kumbhi-mukhâdīnaṃ aññataraṃ nīla-pilotikāya vā pīta-lohitodātâdīnaṃ vā aññatarāya pilotikāya bandhitvā pekkhamāno puriso vātavegena vā aññena vā kenaci apanītāya pilotikāya ākāsaṃ yeva pekkhamāno tiṭṭheyya, evam eva pubbe kasiṇamaṇḍalaṃ jhānacakkhunā pekkhamāno viharitvā “ākāso ākāso” ti iminā parikamma-manasikārena sahasā apanīte tasmiṃ nimitte ākāsañ ñeva pekkhamāno viharati.

12

Ettāvatā c’esa,

“Sabbaso rūpasaññānaṃ samatikkamā, paṭighasaññānaṃ atthaṅgamā, nānattasaññānaṃ amanasikārā ‘ananto ākāso’ ti ākāsānañcâyatanaṃ upasampajja viharatī” ti (vibha. 508; dī. ni. 2.129)

vuccati.

CST277

13

Tattha sabbaso ti sabbâkārena, sabbāsaṃ vā anavasesānan ti attho. Rūpasaññānan ti saññāsīsena vutta-rūpāvacarajjhānānañ c’eva tadārammaṇānañ ca. Rūpāvacarajjhānam pi hi rūpan ti vuccati,

“Rūpī rūpāni passatī” ti (dī. ni. 2.129)

ādīsu, tassa ārammaṇam pi

“Bahiddhā rūpāni passati suvaṇṇadubbaṇṇānī” ti (dī. ni. 2.173)

ādīsu. Tasmā idha rūpe saññā rūpasaññā ti evaṃ saññāsīsena vutta-rūpāvacarajjhānass’etaṃ adhivacanaṃ. Rūpaṃ saññā assā ti rūpasaññaṃ, rūpaṃ assa nāman ti vuttaṃ hoti, ² pathavīkasiṇâdi-bhedassa tadārammaṇassa c’etaṃ adhivacanan ti veditabbaṃ.

14

Samatikkamā ti virāgā nirodhā ca. Kiṃ vuttaṃ hoti? Etāsaṃ kusala-vipāka-kiriya-vasena pañcadasannaṃ jhāna-saṅkhātānaṃ rūpasaññānaṃ, etesañ ca pathavīkasiṇâdivasena navannaṃ ārammaṇa-saṅkhātānaṃ rūpasaññānaṃ, sabbâkārena anavasesānaṃ vā virāgā ca nirodhā ca, virāgahetuñ c’eva nirodhahetuñ ca ākāsānañcâyatanaṃ upasampajja viharati. Na hi sakkā sabbaso anatikkanta-rūpasaññena etaṃ upasampajja viharitun ti.

15

Tattha yasmā ārammaṇe avirattassa saññā-samatikkamo na hoti, samatikkantāsu ca saññāsu ārammaṇaṃ samatikkantam eva hoti, tasmā ārammaṇa-samatikkamaṃ avatvā,

“Tattha katamā rūpasaññā? Rūpāvacara-samāpattiṃ samāpannassa vā upapannassa vā diṭṭhadhamma-sukhavihārissa vā saññā sañjānanā sañjānitattaṃ, imā vuccanti rūpasaññāyo. Imā rūpasaññāyo atikkanto hoti vītikkanto samatikkanto, tena vuccati sabbaso rūpasaññānaṃ samatikkamā” ti (vibha. 602)

evaṃ Vibhaṅge saññānaṃ yeva samatikkamo vutto. Yasmā pana ārammaṇa-samatikkamena pattabbā etā samāpattiyo, na ekasmiñ ñeva ārammaṇe paṭhamajjhānâdīni viya, tasmā ayaṃ ārammaṇa-samatikkama-vasenâpi atthavaṇṇanā katā ti veditabbā.

CST278

16

Paṭighasaññānaṃ atthaṅgamā ti cakkhâdīnaṃ vatthūnaṃ, rūpâdīnaṃ ārammaṇānañ ca paṭighātena samuppannā saññā paṭighasaññā, rūpasaññâdīnaṃ etam adhivacanaṃ. Yath’āha:

“Tattha katamā paṭighasaññā? Rūpasaññā saddasaññā gandhasaññā rasasaññā phoṭṭhabbasaññā, imā vuccanti paṭighasaññāyo” ti. (vibha. 603)

Tāsaṃ kusalavipākānaṃ pañcannaṃ, akusalavipākānaṃ pañcannan ti sabbaso dasannam pi paṭighasaññānaṃ atthaṅgamā pahānā asamuppādā appavattiṃ katvā ti vuttaṃ hoti.

17

Kāmañ c’etā paṭhamajjhānâdīni samāpannassâpi na santi. Na hi tasmiṃ samaye pañcadvāravasena cittaṃ pavattati. Evaṃ sante pi, aññattha pahīnānaṃ sukhadukkhānaṃ catutthajjhāne viya, sakkāyadiṭṭhâdīnaṃ tatiyamagge viya ca imasmiṃ jhāne ussāha-jananatthaṃ imassa jhānassa pasaṃsāvasena etāsam ettha vacanaṃ veditabbaṃ.

18

Atha vā kiñcâpi tā rūpāvacaraṃ samāpannassâpi na santi, atha kho na pahīnattā na santi. Na hi rūpavirāgāya rūpāvacara-bhāvanā saṃvattati, rūpâyattā ca etāsaṃ pavatti, ayaṃ pana bhāvanā rūpavirāgāya saṃvattati, tasmā tā ettha pahīnā ti vattuṃ vaṭṭati. Na kevalañ ca vattuṃ, ekaṃsen’eva evaṃ dhāretum pi vaṭṭati.

19

Tāsañ hi ito pubbe appahīnattā yeva paṭhamaṃ jhānaṃ samāpannassa “saddo kaṇṭako” ti (a. ni. 10.72) vutto Bhagavatā, idha ca pahīnattā yeva arūpasamāpattīnaṃ āneñjatā³ (vibha. 226) santavimokkhatā⁴ (ma. ni. 1.66) ca vuttā. Āḷāro ca Kālāmo arūpasamāpanno pañcamattāni sakaṭasatāni nissāya nissāya atikkamantāni n’eva addasa, na pana saddaṃ assosī ti (dī. ni. 2.192).

CST279

20

Nānattasaññānaṃ amanasikārā ti nānatte vā gocare pavattānaṃ saññānaṃ, nānattānaṃ vā saññānaṃ. Yasmā hi etā,

“Tattha katamā nānattasaññā? Asamāpannassa manodhātu-samaṅgissa vā manoviññāṇadhātu-samaṅgissa vā saññā sañjānanā sañjānitattaṃ, imā vuccanti nānattasaññāyo” ti (vibha. 604)

evaṃ Vibhaṅge vibhajitvā vuttā idha adhippetā asamāpannassa manodhātu-manoviññāṇadhātu-saṅgahitā saññā rūpa-saddâdi-bhede nānatte nānāsabhāve gocare pavattanti. Yasmā c’etā aṭṭha kāmāvacara-kusalasaññā, dvādasâkusalasaññā, ekādasa kāmāvacara-kusalavipākasaññā, dve akusalavipākasaññā, ekādasa kāmāvacara-kiriyasaññā ti evaṃ catucattālīsam pi saññā nānattā nānāsabhāvā aññamaññaṃ asadisā, tasmā nānattasaññā ti vuttā. Tāsaṃ sabbaso nānattasaññānaṃ amanasikārā anāvajjanā asamannāhārā apaccavekkhaṇā. Yasmā tā nâvajjeti, na manasikaroti, na paccavekkhati, tasmā ti vuttaṃ hoti.

21

Yasmā c’ettha purimā rūpasaññā paṭighasaññā ca iminā jhānena nibbatte bhave pi na vijjanti, pageva tasmiṃ bhave imaṃ jhānaṃ upasampajja viharaṇakāle, tasmā tāsaṃ “samatikkamā atthaṅgamā” ti dvedhā pi abhāvo yeva vutto. Nānattasaññāsu pana yasmā aṭṭha kāmāvacara-kusalasaññā, nava kiriyasaññā, dasâkusalasaññā ti imā sattavīsati saññā iminā jhānena nibbatte bhave vijjanti, tasmā tāsaṃ “amanasikārā” ti vuttan ti veditabbaṃ. Tatrâpi hi imaṃ jhānaṃ upasampajja viharanto tāsaṃ amanasikārā yeva upasampajja viharati, tā pana manasikaronto asamāpanno hotī ti.

22

Saṅkhepato c’ettha “rūpasaññānaṃ samatikkamā” ti iminā sabba-rūpāvacara-dhammānaṃ pahānaṃ vuttaṃ, “paṭighasaññānaṃ atthaṅgamā nānattasaññānaṃ amanasikārā” ti iminā sabbesaṃ kāmāvacara-citta-cetasikānaṃ pahānañ ca amanasikāro ca vutto ti veditabbo.

CST280

23

Ananto ākāso ti ettha nâssa uppādanto vā vayanto vā paññāyatī ti ananto, ākāso ti kasiṇugghāṭimâkāso vuccati. Manasikāravasenâpi c’ettha anantatā veditabbā. Ten’eva Vibhaṅge vuttaṃ:

“Tasmiṃ ākāse cittaṃ ṭhapeti, saṇṭhapeti, anantaṃ pharati, tena vuccati ananto ākāso” ti. (vibha. 605)

24

Ākāsānañcâyatanaṃ upasampajja viharatī ti ettha pana nâssa anto ti anantaṃ, ākāsaṃ anantaṃ ākāsânantaṃ, ākāsânantam eva ākāsānañcaṃ, taṃ ākāsānañcaṃ adhiṭṭhānaṭṭhena āyatanam assa sasampayuttadhammassa jhānassa devānaṃ devâyatanam ivā ti ākāsānañcâyatanaṃ. Upasampajja viharatī ti tam ākāsānañcâyatanaṃ patvā nipphādetvā tadanurūpena iriyāpathavihārena viharatī ti.

Ayaṃ ākāsānañcâyatana-kammaṭṭhāne vitthārakathā.

Viññāṇañcāyatanakathā

CST281

25

Viññāṇañcâyatanaṃ bhāvetukāmena pana pañcah’ākārehi ākāsānañcâyatana-samāpattiyaṃ ciṇṇavasībhāvena “āsanna-rūpāvacarajjhāna-paccatthikā ayaṃ samāpatti, no ca viññāṇañcâyatanam iva santā” ti ākāsānañcâyatane ādīnavaṃ disvā, tattha nikantiṃ pariyādāya, viññāṇañcâyatanaṃ santato manasikaritvā taṃ ākāsaṃ pharitvā pavattaviññāṇaṃ “viññāṇaṃ viññāṇan” ti punappunaṃ āvajjitabbaṃ, manasikātabbaṃ, paccavekkhitabbaṃ, takkâhataṃ vitakkâhataṃ kātabbaṃ, “anantaṃ anantan” ti pana na manasikātabbaṃ.

26

Tass’evaṃ tasmiṃ nimitte punappunaṃ cittaṃ cārentassa nīvaraṇāni vikkhambhanti, sati santiṭṭhati, upacārena cittaṃ samādhiyati. So taṃ nimittaṃ punappunaṃ āsevati, bhāveti, bahulīkaroti. Tass’evaṃ karoto ākāse ākāsānañcâyatanaṃ viya ākāsaphuṭe viññāṇe viññāṇañcâyatana-cittaṃ appeti. Appanānayo pan’ettha vuttanayen’eva veditabbo.

27

Ettāvatā c’esa,

“Sabbaso ākāsānañcâyatanaṃ samatikkamma, ‘anantaṃ viññāṇan’ ti viññāṇañcâyatanaṃ upasampajja viharatī” ti (vibha. 508; dī. ni. 2.129)

vuccati.

CST282

28

Tattha sabbaso ti idaṃ vuttanayam eva. Ākāsānañcâyatanaṃ samatikkammā ti ettha pana pubbe vuttanayena jhānam pi ākāsānañcâyatanaṃ, ārammaṇam pi. Ārammaṇam pi hi purimanayen’eva ākāsānañcañ ca taṃ, paṭhamassa āruppajjhānassa ārammaṇattā devānaṃ devâyatanaṃ viya adhiṭṭhānaṭṭhena āyatanañ cā ti ākāsānañcâyatanaṃ. Tathā ākāsānañcañ ca taṃ, tassa jhānassa sañjātihetuttā “kambojā assānaṃ āyatanan” ti ādīni viya sañjātidesaṭṭhena āyatanañ cā ti pi ākāsānañcâyatanaṃ. Evam etaṃ jhānañ ca ārammaṇañ cā ti ubhayam pi appavattikaraṇena ca amanasikaraṇena ca samatikkamitvā va yasmā idaṃ viññāṇañcâyatanaṃ upasampajja vihātabbaṃ, tasmā ubhayam p’etaṃ ekajjhaṃ katvā “ākāsānañcâyatanaṃ samatikkammā” ti idaṃ vuttan ti veditabbaṃ.

29

Anantaṃ viññāṇan ti taṃ yeva “ananto ākāso” ti evaṃ pharitvā pavattaviññāṇaṃ “anantaṃ viññāṇan” ti evaṃ manasikaronto ti vuttaṃ hoti. Manasikāravasena vā anantaṃ. So hi tam ākāsârammaṇaṃ viññāṇaṃ anavasesato manasikaronto “anantan” ti manasikaroti.

30

Yaṃ pana Vibhaṅge vuttaṃ,

“Anantaṃ viññāṇan ti, taṃ yeva ākāsaṃ viññāṇena phuṭaṃ manasikaroti, anantaṃ pharati, tena vuccati anantaṃ viññāṇan” ti (vibha. 610)

tattha viññāṇenā ti upayogatthe karaṇavacanaṃ veditabbaṃ. Evañ hi Aṭṭhakathâcariyā tassa atthaṃ vaṇṇayanti “anantaṃ pharati, tañ ñeva ākāsaṃ phuṭaṃ viññāṇaṃ manasikarotī” ti vuttaṃ hoti.

31

Viññāṇañcâyatanaṃ upasampajja viharatī ti ettha pana nâssa anto ti anantaṃ, anantam eva ānañcaṃ, viññāṇaṃ ānañcaṃ viññāṇânañcan ti avatvā viññāṇañcan ti vuttaṃ. Ayañ h’ettha rūḷhīsaddo. Taṃ viññāṇañcaṃ adhiṭṭhānaṭṭhena āyatanam assa sasampayuttadhammassa jhānassa devānaṃ devâyatanam ivā ti viññāṇañcâyatanaṃ. Sesaṃ purimasadisam evā ti.

Ayaṃ viññāṇañcâyatana-kammaṭṭhāne vitthārakathā.

Ākiñcaññāyatanakathā

CST283

32

Ākiñcaññâyatanaṃ bhāvetukāmena pana pañcah’ākārehi viññāṇañcâyatana-samāpattiyaṃ ciṇṇavasībhāvena “āsanna-ākāsānañcâyatana-paccatthikā ayaṃ samāpatti, no ca ākiñcaññâyatanam iva santā” ti viññāṇañcâyatane ādīnavaṃ disvā tattha nikantiṃ pariyādāya ākiñcaññâyatanaṃ santato manasikaritvā tass’eva viññāṇañcâyatanârammaṇa-bhūtassa ākāsānañcâyatana-viññāṇassa abhāvo suññatā vivittâkāro manasikātabbo.

33

Kathaṃ? Taṃ viññāṇaṃ amanasikaritvā “natthi natthī” ti vā “suññaṃ suññan” ti vā “vivittaṃ vivittan” ti vā punappunaṃ āvajjitabbaṃ, manasikātabbaṃ, paccavekkhitabbaṃ, takkâhataṃ vitakkâhataṃ kātabbaṃ.

34

Tass’evaṃ tasmiṃ nimitte cittaṃ cārentassa nīvaraṇāni vikkhambhanti, sati santiṭṭhati, upacārena cittaṃ samādhiyati. So taṃ nimittaṃ punappunaṃ āsevati, bhāveti, bahulīkaroti. Tass’evaṃ karoto ākāse phuṭe mahaggataviññāṇe viññāṇañcâyatanaṃ viya tass’eva ākāsaṃ pharitvā pavattassa mahaggataviññāṇassa suñña-vivitta-natthibhāve ākiñcaññâyatana-cittaṃ appeti. Etthâpi ca appanānayo vuttanayen’eva veditabbo.

35

Ayaṃ pana viseso. Tasmiṃ hi appanācitte uppanne so bhikkhu yathā nāma puriso maṇḍalamāḷâdīsu kenacid eva karaṇīyena sannipatitaṃ bhikkhusaṅghaṃ disvā katthaci gantvā sannipātakiccâvasāne va uṭṭhāya pakkantesu bhikkhūsu āgantvā dvāre ṭhatvā puna taṃ ṭhānaṃ olokento suññam eva passati, vivittam eva passati, nâssa evaṃ hoti “ettakā nāma bhikkhū kālaṅkatā vā disāpakkantā vā” ti, atha kho “suññam idaṃ vivittan” ti natthibhāvam eva passati, evam eva pubbe ākāse pavattita-viññāṇaṃ viññāṇañcâyatana-jjhānacakkhunā passanto viharitvā “natthi natthī” ti ādinā parikamma-manasikārena antarahite tasmiṃ viññāṇe tassa apagama-saṅkhātaṃ abhāvam eva passanto viharati.

36

Ettāvatā c’esa,

“Sabbaso viññāṇañcâyatanaṃ samatikkamma, ‘natthi kiñcī’ ti ākiñcaññâyatanaṃ upasampajja viharatī” ti (vibha. 508; dī. ni. 2.129)

vuccati.

CST284

37

Idhâpi sabbaso ti idaṃ vuttanayam eva. Viññāṇañcâyatanan ti etthâpi ca pubbe vuttanayen’eva jhānam pi viññāṇañcâyatanaṃ, ārammaṇam pi. Ārammaṇam pi hi purimanayen’eva viññāṇañcañ ca taṃ, dutiyassa āruppajjhānassa ārammaṇattā devānaṃ devâyatanaṃ viya adhiṭṭhānaṭṭhena āyatanañ cā ti viññāṇañcâyatanaṃ. Tathā viññāṇañcañ ca taṃ, tass’eva jhānassa sañjātihetuttā “kambojā assānaṃ āyatanan” ti ādīni viya sañjātidesaṭṭhena āyatanañ cā ti pi viññāṇañcâyatanaṃ. Evam etaṃ jhānañ ca ārammaṇañ cā ti ubhayam pi appavattikaraṇena ca amanasikaraṇena ca samatikkamitvā va yasmā idaṃ ākiñcaññâyatanaṃ upasampajja vihātabbaṃ, tasmā ubhayam p’etaṃ ekajjhaṃ katvā “viññāṇañcâyatanaṃ samatikkammā” ti idaṃ vuttan ti veditabbaṃ.

38

Natthi kiñcī ti “natthi natthi, suññaṃ suññaṃ, vivittaṃ vivittan” ti evaṃ manasikaronto ti vuttaṃ hoti. Yam pi Vibhaṅge vuttaṃ,

“Natthi kiñcī ti tañ ñeva viññāṇaṃ abhāveti vibhāveti antaradhāpeti, ‘natthi kiñcī’ ti passati, tena vuccati natthi kiñcī” ti

taṃ kiñcâpi khayato sammasanaṃ viya vuttaṃ, atha khv assa evam eva attho daṭṭhabbo. Tañ hi viññāṇaṃ anāvajjento amanasikaronto apaccavekkhanto kevalam assa natthibhāvaṃ suññabhāvaṃ vivittabhāvam eva manasikaronto abhāveti vibhāveti antaradhāpetī ti vuccati, na aññathā ti.

39

Ākiñcaññâyatanaṃ upasampajja viharatī ti ettha pana nâssa kiñcanan ti akiñcanaṃ, antamaso bhaṅgamattam pi assa avasiṭṭhaṃ natthī ti vuttaṃ hoti. Akiñcanassa bhāvo ākiñcaññaṃ, ākāsānañcâyatana-viññāṇâpagamass’etaṃ adhivacanaṃ. Taṃ ākiñcaññaṃ adhiṭṭhānaṭṭhena āyatanam assa jhānassa devānaṃ devâyatanam ivā ti ākiñcaññâyatanaṃ. Sesaṃ purimasadisam evā ti.

Ayaṃ ākiñcaññâyatana-kammaṭṭhāne vitthārakathā.

Nevasaññanāsaññāyatanakathā

CST285

40

Nevasaññanâsaññâyatanaṃ bhāvetukāmena pana pañcah’ākārehi ākiñcaññâyatana-samāpattiyaṃ ciṇṇavasībhāvena “āsanna-viññāṇañcâyatana-paccatthikā ayaṃ samāpatti, no ca nevasaññanâsaññâyatanaṃ viya santā” ti vā,

“Saññā rogo, saññā gaṇḍo, saññā sallaṃ… etaṃ santaṃ, etaṃ paṇītaṃ yad idaṃ nevasaññānāsaññā” ti (ma. ni.)

vā evaṃ ākiñcaññâyatane ādīnavaṃ, upari ānisaṃsañ ca disvā ākiñcaññâyatane nikantiṃ pariyādāya nevasaññanâsaññâyatanaṃ santato manasikaritvā “sā va abhāvaṃ ārammaṇaṃ katvā pavattitā ākiñcaññâyatana-samāpatti santā santā” ti punappunaṃ āvajjitabbā, manasikātabbā, paccavekkhitabbā, takkâhatā vitakkâhatā kātabbā.

41

Tass’evaṃ tasmiṃ nimitte punappunaṃ mānasaṃ cārentassa nīvaraṇāni vikkhambhanti, sati santiṭṭhati, upacārena cittaṃ samādhiyati. So taṃ nimittaṃ punappunaṃ āsevati, bhāveti, bahulīkaroti. Tass’evaṃ karoto viññāṇâpagame ākiñcaññâyatanaṃ viya ākiñcaññâyatana-samāpatti-saṅkhātesu catūsu khandhesu nevasaññanâsaññâyatana-cittaṃ appeti. Appanānayo pan’ettha vuttanayen’eva veditabbo.

42

Ettāvatā c’esa,

“Sabbaso ākiñcaññâyatanaṃ samatikkamma, nevasaññanâsaññâyatanaṃ upasampajja viharatī” ti (vibha. 508; dī. ni. 2.129)

vuccati.

CST286

43

Idhâpi sabbaso ti idaṃ vuttanayam eva. Ākiñcaññâyatanaṃ samatikkammā ti etthâpi pubbe vuttanayen’eva jhānam pi ākiñcaññâyatanaṃ, ārammaṇam pi. Ārammaṇam pi hi purimanayen’eva ākiñcaññañ ca taṃ, tatiyassa āruppajjhānassa ārammaṇattā devānaṃ devâyatanaṃ viya adhiṭṭhānaṭṭhena āyatanañ cā ti ākiñcaññâyatanaṃ. Tathā ākiñcaññañ ca taṃ, tass’eva jhānassa sañjātihetuttā “kambojā assānaṃ āyatanan” ti ādīni viya sañjātidesaṭṭhena āyatanañ cā ti pi ākiñcaññâyatanaṃ. Evam etaṃ jhānañ ca ārammaṇañ cā ti ubhayam pi appavattikaraṇena ca amanasikaraṇena ca samatikkamitvā va yasmā idaṃ nevasaññanâsaññâyatanaṃ upasampajja vihātabbaṃ, tasmā ubhayam p’etaṃ ekajjhaṃ katvā “ākiñcaññâyatanaṃ samatikkammā” ti idaṃ vuttan ti veditabbaṃ.

44

Nevasaññanâsaññâyatanan ti ettha pana yāya saññāya bhāvato taṃ nevasaññanâsaññâyatanan ti vuccati. Yathā paṭipannassa sā saññā hoti, taṃ tāva dassetuṃ Vibhaṅge “nevasaññī-nâsaññī” ti uddharitvā,

“Tañ ñeva ākiñcaññâyatanaṃ santato manasikaroti, saṅkhārâvasesa-samāpattiṃ bhāveti, tena vuccati nevasaññī-nâsaññī” ti (vibha. 619)

vuttaṃ.

45

Tattha santato manasikarotī ti “santā vatâyaṃ samāpatti, yatra hi nāma natthibhāvam pi ārammaṇaṃ karitvā ṭhassatī” ti evaṃ santârammaṇatāya taṃ santā ti manasikaroti. Santato ce manasikaroti, kathaṃ samatikkamo hotī ti? Asamāpajjitukāmatāya. So hi kiñcâpi taṃ santato manasikaroti, atha khv assa “aham etaṃ āvajjissāmi, samāpajjissāmi, adhiṭṭhahissāmi, vuṭṭhahissāmi, paccavekkhissāmī” ti esa ābhogo samannāhāro manasikāro na hoti. Kasmā? Ākiñcaññâyatanato nevasaññanâsaññâyatanassa santatara-paṇītataratāya.

46

Yathā hi rājā mahacca rājânubhāvena hatthikkhandha-varagato nagara-vīthiyaṃ vicaranto dantakārâdayo sippike ekaṃ vatthaṃ daḷhaṃ nivāsetvā ekena sīsaṃ veṭhetvā dantacuṇṇâdīhi samokiṇṇagatte anekāni dantavikati-ādīni sippāni karonte disvā “aho vata re chekā ācariyā, īdisāni pi nāma sippāni karissantī” ti evaṃ tesaṃ chekatāya tussati, na c’assa evaṃ hoti “aho vatâhaṃ rajjaṃ pahāya evarūpo sippiko bhaveyyan” ti. Taṃ kissa hetu? Rajjasiriyā mahânisaṃsatāya. So sippino samatikkamitvā va gacchati. Evam eva esa kiñcâpi taṃ samāpattiṃ santato manasikaroti, atha khv assa “aham etaṃ samāpattiṃ āvajjissāmi, samāpajjissāmi, adhiṭṭhahissāmi, vuṭṭhahissāmi, paccavekkhissāmī” ti n’eva esa ābhogo samannāhāro manasikāro hoti.

47

So taṃ santato manasikaronto pubbe vuttanayena taṃ paramasukhumaṃ appanāppattaṃ saññaṃ pāpuṇāti, yāya nevasaññī-nâsaññī nāma hoti, saṅkhārâvasesa-samāpattiṃ bhāvetī ti vuccati. Saṅkhārâvasesa-samāpattin ti accantasukhuma-bhāvappatta-saṅkhāraṃ catutthâruppa-samāpattiṃ.

CST287

48

Idāni yaṃ taṃ evam adhigatāya saññāya vasena nevasaññanâsaññâyatanan ti vuccati, taṃ atthato dassetuṃ,

“Nevasaññanâsaññâyatanan ti nevasaññanâsaññâyatanaṃ samāpannassa vā upapannassa vā diṭṭhadhamma-sukhavihārissa vā cittacetasikā dhammā” ti (vibha. 620)

vuttaṃ, tesu idha samāpannassa cittacetasikā dhammā adhippetā.

49

Vacanattho pan’ettha oḷārikāya saññāya abhāvato sukhumāya ca bhāvato n’ev’assa sasampayuttadhammassa jhānassa saññā nâsaññan ti nevasaññānâsaññaṃ, nevasaññānâsaññañ ca taṃ, manâyatana-dhammâyatana-pariyāpannattā āyatanañ cā ti nevasaññanâsaññâyatanaṃ.

50

Atha vā yā’yam ettha saññā, sā paṭusaññākiccaṃ kātuṃ asamatthatāya n’eva saññā, saṅkhārâvasesa-sukhumabhāvena vijjamānattā nâsaññā ti nevasaññānâsaññā, nevasaññānâsaññā ca sā sesadhammānaṃ adhiṭṭhānaṭṭhena āyatanañ cā ti nevasaññanâsaññâyatanaṃ. Na kevalañ c’ettha saññā va edisī, atha kho vedanā pi n’eva vedanā nâvedanā, cittam pi n’eva cittaṃ nâcittaṃ, phasso pi n’eva phasso nâphasso. Esa nayo sesa-sampayuttadhammesu. Saññāsīsena panâyaṃ desanā katā ti veditabbā.

51

Pattamakkhana-telappabhutīhi ca upamāhi esa attho vibhāvetabbo. Sāmaṇero kira telena pattaṃ makkhetvā ṭhapesi. Taṃ yāgupānakāle thero “pattam āharā” ti āha. So “patte telam atthi, bhante” ti āha. Tato “āhara, sāmaṇera, telaṃ, nāḷiṃ pūressāmī” ti vutte “natthi, bhante, telan” ti āha. Tattha yathā anto vutthattā yāguyā saddhiṃ akappiyaṭṭhena “telam atthī” ti hoti, nāḷipūraṇâdīnaṃ vasena “natthī” ti hoti. Evaṃ sā pi saññā paṭusaññākiccaṃ kātuṃ asamatthatāya n’eva saññā, saṅkhārâvasesa-sukhumabhāvena vijjamānattā nâsaññā hoti.

52

Kiṃ pan’ettha saññākiccan ti? Ārammaṇa-sañjānanañ c’eva vipassanāya ca visayabhāvaṃ upagantvā nibbidājananaṃ. Dahanakiccam iva hi sukhodake tejodhātu, sañjānanakiccaṃ p’esā paṭuṃ kātuṃ na sakkoti, sesa-samāpattīsu saññā viya vipassanāya visayabhāvaṃ upagantvā nibbidājananam pi kātuṃ na sakkoti.

53

Aññesu hi khandhesu akatâbhiniveso bhikkhu nevasaññanâsaññâyatana-kkhandhe sammasitvā nibbidaṃ pattuṃ samattho nāma natthi, api ca āyasmā Sāriputto, pakativipassako pana mahāpañño Sāriputta-sadiso va sakkuṇeyya. So pi,

“Evaṃ kir’ime dhammā ahutvā sambhonti, hutvā paṭiventī” ti (ma. ni. 3.95)

evaṃ kalāpa-sammasana-vasen’eva, no anupadadhamma-vipassanāvasena. Evaṃ sukhumattaṃ gatā esā samāpatti.

54

Yathā ca pattamakkhana-telûpamāya, evaṃ maggudakûpamāya pi ayam attho vibhāvetabbo. Maggappaṭipannassa kira therassa purato gacchanto sāmaṇero thokaṃ udakaṃ disvā “udakaṃ, bhante, upāhanā omuñcathā” ti āha. Tato therena “sace udakam atthi, āhara nhānasāṭikaṃ, nhāyissāmā” ti vutte “natthi, bhante” ti āha. Tattha yathā upāhana-temana-mattaṭṭhena “udakam atthī” ti hoti, nhāyanaṭṭhena “natthī” ti hoti. Evam pi sā paṭusaññākiccaṃ kātuṃ asamatthatāya n’eva saññā, saṅkhārâvasesa-sukhumabhāvena vijjamānattā nâsaññā hoti.

55

Na kevalañ ca etāh’eva, aññāhi pi anurūpāhi upamāhi esa attho vibhāvetabbo. Upasampajja viharatī ti idaṃ vuttanayam evā ti.

Ayaṃ nevasaññanâsaññâyatana-kammaṭṭhāne vitthārakathā.

Pakiṇṇakakathā

CST288

56

Asadisarūpo nātho āruppaṃ yaṃ catubbidhaṃ āha,
taṃ iti ñatvā tasmiṃ pakiṇṇakakathā pi viññeyyā.

CST289

57

Āruppa-samāpattiyo hi,

Ārammaṇâtikkamato catasso pi bhavant’imā,
aṅgâtikkamam etāsaṃ na icchanti vibhāvino.

58

Etāsu hi rūpanimittâtikkamato paṭhamā, ākāsâtikkamato dutiyā, ākāse pavattita-viññāṇâtikkamato tatiyā, ākāse pavattita-viññāṇassa apagamâtikkamato catutthī ti sabbathā ārammaṇâtikkamato catasso pi bhavant’imā āruppa-samāpattiyo ti veditabbā. Aṅgâtikkamaṃ pana etāsaṃ na icchanti paṇḍitā. Na hi rūpāvacara-samāpattīsu viya etāsu aṅgâtikkamo atthi. Sabbāsu pi hi etāsu upekkhā cittekaggatā ti dve eva jhānaṅgāni honti.

CST290

59

Evaṃ sante pi,

Suppaṇītatarā honti pacchimā pacchimā idha,
upamā tattha viññeyyā pāsādatala-sāṭikā.

60

Yathā hi catubhūmikassa pāsādassa heṭṭhimatale dibba-nacca-gīta-vādita-surabhi-gandha-mālā-bhojana-sayana-cchādanâdi-vasena paṇītā pañcakāmaguṇā paccupaṭṭhitā assu, dutiye tato paṇītatarā, tatiye tato paṇītatarā, catutthe sabbapaṇītatarā. Tattha kiñcâpi tāni cattāri pi pāsādatalān’eva, natthi nesaṃ pāsādatalabhāvena viseso, pañcakāmaguṇa-samiddha-visesena pana heṭṭhimato heṭṭhimato uparimaṃ uparimaṃ paṇītataraṃ hoti.

Yathā ca ekāya itthiyā kantita-thūla-saṇha-saṇhatara-saṇhatama-suttānaṃ catupala-tipala-dvipala-ekapala-sāṭikā assu, āyāmena ca vitthārena ca samappamāṇā. Tattha kiñcâpi tā sāṭikā catasso pi āyāmato ca vitthārato ca samappamāṇā, natthi tāsaṃ pamāṇato viseso, sukhasamphassa-sukhumabhāva-mahaggha-bhāvehi pana purimāya purimāya pacchimā pacchimā paṇītatarā honti.

Evam eva kiñcâpi catūsu etāsu upekkhā cittekaggatā ti etāni dve yeva aṅgāni honti, atha kho bhāvanā-visesena tesaṃ aṅgāni paṇīta-paṇītatara-bhāvena suppaṇītatarā honti pacchimā pacchimā idhā ti veditabbā.

CST291

61

Evaṃ anupubbena paṇīta-paṇītā c’etā,

Asucimhi maṇḍape laggo eko, tannissito paro,
añño bahi anissāya taṃ, taṃ nissāya câparo

Ṭhito, catūhi etehi purisehi yathākkamaṃ
samānatāya ñātabbā catasso pi vibhāvinā.

62

Tatrâyam atthayojanā. Asucimhi kira dese eko maṇḍapo. Ath’eko puriso āgantvā taṃ asuciṃ jigucchamāno taṃ maṇḍapaṃ hatthehi ālambitvā tattha laggo laggito viya aṭṭhāsi. Athâparo āgantvā taṃ maṇḍape laggaṃ purisaṃ nissito. Ath’añño āgantvā cintesi “yo esa maṇḍapalaggo, yo ca tannissito, ubho p’ete duṭṭhitā, dhuvo ca nesaṃ maṇḍapapapāte pāto, handâhaṃ bahi yeva tiṭṭhāmī” ti, so tannissitaṃ anissāya bahi yeva aṭṭhāsi. Athâparo āgantvā maṇḍapalaggassa ca tannissitassa ca akhemabhāvaṃ cintetvā “bahiṭṭhitañ ca suṭṭhito⁵” ti mantvā taṃ nissāya aṭṭhāsi.

63

Tattha asucimhi dese maṇḍapo viya kasiṇugghāṭimâkāsaṃ daṭṭhabbaṃ. Asucijigucchāya maṇḍapalaggo puriso viya rūpanimitta-jigucchāya ākāsârammaṇaṃ ākāsānañcâyatanaṃ. Maṇḍapalaggaṃ purisaṃ nissito viya ākāsârammaṇaṃ ākāsānañcâyatanaṃ ārabbha pavattaṃ viññāṇañcâyatanaṃ. Tesaṃ dvinnam pi akhemabhāvaṃ cintetvā anissāya taṃ maṇḍapalaggaṃ bahiṭṭhito viya ākāsānañcâyatanaṃ ārammaṇaṃ akatvā tadabhāvârammaṇaṃ ākiñcaññâyatanaṃ. Maṇḍapalaggassa tannissitassa ca akhemataṃ cintetvā bahiṭṭhitañ ca suṭṭhito ti mantvā taṃ nissāya ṭhito viya viññāṇâbhāva-saṅkhāte bahipadese ṭhitaṃ ākiñcaññâyatanaṃ ārabbha pavattaṃ nevasaññanâsaññâyatanaṃ daṭṭhabbaṃ.

CST292

64

Evaṃ pavattamānañ ca,

Ārammaṇaṃ karot’eva aññâbhāvena taṃ idaṃ,
diṭṭhadosam pi rājānaṃ vuttihetu jano yathā.

65

Idañ hi nevasaññanâsaññâyatanaṃ “āsanna-viññāṇañcâyatana-paccatthikā ayaṃ samāpattī” ti evaṃ diṭṭhadosam pi taṃ ākiñcaññâyatanaṃ aññassa ārammaṇassa abhāvā ārammaṇaṃ karot’eva. Yathā kiṃ? Diṭṭhadosam pi rājānaṃ vuttihetu yathā jano. Yathā hi asaṃyataṃ pharusa-kāya-vacī-mano-samācāraṃ kañci sabbadisampatiṃ rājānaṃ “pharusa-samācāro ayan” ti evaṃ diṭṭhadosam pi aññattha vuttiṃ alabhamāno jano vuttihetu nissāya vattati, evaṃ diṭṭhadosam pi taṃ ākiñcaññâyatanaṃ aññaṃ ārammaṇaṃ alabhamānam idaṃ nevasaññanâsaññâyatanaṃ ārammaṇaṃ karot’eva.

CST293

66

Evaṃ kurumānañ ca,

Āruḷho⁶ dīghanisseṇiṃ yathā nisseṇibāhukaṃ,
pabbataggañ ca āruḷho yathā pabbatamatthakaṃ,

Yathā vā girim ārūḷho attano yeva jaṇṇukaṃ
olubbhati, tath’ev’etaṃ⁷ jhānam olubbha vattatī ti.