说道非道智见清净品

Maggâmaggañāṇadassanavisuddhiniddeso

Sammasanañāṇakathā

CST692

1

Ayaṃ maggo, ayaṃ na maggo ti evaṃ maggañ ca amaggañ ca ñatvā ṭhitaṃ ñāṇaṃ pana maggâmaggañāṇadassana-visuddhi nāma.

2

Taṃ sampādetukāmena kalāpa-sammasana-saṅkhātāya naya-vipassanāya tāva yogo karaṇīyo. Kasmā? Āraddhavipassakassa obhāsâdi-sambhave maggâmaggañāṇasambhavato. Āraddhavipassakassa hi obhāsâdīsu sambhūtesu maggâmaggañāṇaṃ hoti, vipassanāya ca kalāpa-sammasanaṃ ādi, tasmā etaṃ kaṅkhāvitaraṇânantaraṃ uddiṭṭhaṃ. Api ca yasmā tīraṇapariññāya vattamānāya1 maggâmaggañāṇaṃ uppajjati, tīraṇapariññā ca ñātapariññânantarā, tasmā pi taṃ maggâmaggañāṇadassana-visuddhiṃ sampādetukāmena kalāpa-sammasane tāva yogo kātabbo.

CST693

3

Tatrâyaṃ vinicchayo. Tisso hi lokiyapariññā: ñātapariññā tīraṇapariññā pahānapariññā ca. Yā sandhāya vuttaṃ:

“Abhiññāpaññā ñātaṭṭhe ñāṇaṃ, pariññāpaññā tīraṇaṭṭhe ñāṇaṃ, pahānapaññā pariccāgaṭṭhe ñāṇan” ti. (paṭi. ma. 1.75)

Tattha “ruppana-lakkhaṇaṃ rūpaṃ, vedayita-lakkhaṇā vedanā” ti evaṃ tesaṃ tesaṃ dhammānaṃ paccattalakkhaṇa-sallakkhaṇa-vasena pavattā paññā ñātapariññā nāma. “Rūpaṃ aniccaṃ, vedanā aniccā” ti ādinā nayena tesaṃ yeva dhammānaṃ sāmañña-lakkhaṇaṃ āropetvā pavattā lakkhaṇârammaṇika-vipassanā-paññā tīraṇapariññā nāma. Tesu yeva pana dhammesu niccasaññâdi-pajahanavasena pavattā lakkhaṇârammaṇika-vipassanā-paññā pahānapariññā nāma.

4

Tattha saṅkhāra-paricchedato paṭṭhāya yāva paccaya-pariggahā ñātapariññāya bhūmi. Etasmiṃ hi antare dhammānaṃ paccattalakkhaṇa-paṭivedhass’eva ādhipaccaṃ hoti. Kalāpa-sammasanato pana paṭṭhāya yāva udayabbayânupassanā tīraṇapariññāya bhūmi. Etasmiṃ hi antare sāmaññalakkhaṇa-paṭivedhass’eva ādhipaccaṃ hoti. Bhaṅgânupassanaṃ ādiṃ katvā upari pahānapariññāya bhūmi. Tato paṭṭhāya hi,

“Aniccato anupassanto niccasaññaṃ pajahati, dukkhato anupassanto sukhasaññaṃ, anattato anupassanto attasaññaṃ, nibbindanto nandiṃ, virajjanto rāgaṃ, nirodhento samudayaṃ, paṭinissajjanto ādānaṃ pajahatī” ti (paṭi. ma. 1.52)

evaṃ niccasaññâdi-pahāna-sādhikānaṃ sattannaṃ anupassanānaṃ ādhipaccaṃ.

5

Iti imāsu tīsu pariññāsu saṅkhāra-paricchedassa c’eva paccaya-pariggahassa ca sādhitattā iminā yoginā ñātapariññā va adhigatā hoti, itarā ca adhigantabbā. Tena vuttaṃ:

“Yasmā tīraṇapariññāya vattamānāya maggâmaggañāṇaṃ uppajjati, tīraṇapariññā ca ñātapariññânantarā, tasmā pi taṃ maggâmaggañāṇadassana-visuddhiṃ sampādetukāmena kalāpa-sammasane tāva yogo kātabbo” ti. (XX.2)

CST694

6

Tatrâyaṃ pāḷi:

“Kathaṃ atītânāgata-paccuppannānaṃ dhammānaṃ saṅkhipitvā vavatthāne paññā sammasane ñāṇaṃ? Yaṃ kiñci rūpaṃ atītânāgata-paccuppannaṃ ajjhattaṃ vā…pe… yaṃ dūre santike vā, sabbaṃ rūpaṃ aniccato vavatthapeti, ekaṃ sammasanaṃ, dukkhato vavatthapeti, ekaṃ sammasanaṃ, anattato vavatthapeti, ekaṃ sammasanaṃ. Yā kāci vedanā…pe… yaṃ kiñci viññāṇaṃ…pe… anattato vavatthapeti, ekaṃ sammasanaṃ.

Cakkhuṃ…pe… Jarāmaraṇaṃ atītânāgata-paccuppannaṃ aniccato vavatthapeti, ekaṃ sammasanaṃ, dukkhato… anattato vavatthapeti, ekaṃ sammasanaṃ.

7

“Rūpaṃ atītânāgata-paccuppannaṃ aniccaṃ khayaṭṭhena, dukkhaṃ bhayaṭṭhena, anattā asārakaṭṭhenā ti saṅkhipitvā vavatthāne paññā sammasane ñāṇaṃ. Vedanaṃ… Viññāṇaṃ… Cakkhuṃ…pe… Jarāmaraṇaṃ…pe… sammasane ñāṇaṃ.

Rūpaṃ atītânāgata-paccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhamman ti saṅkhipitvā vavatthāne paññā sammasane ñāṇaṃ. Vedanaṃ… Viññāṇaṃ… Cakkhuṃ… Jarāmaraṇaṃ atītânāgata-paccuppannaṃ aniccaṃ saṅkhataṃ…pe… nirodhadhamman ti saṅkhipitvā vavatthāne paññā sammasane ñāṇaṃ.

8

“Jātipaccayā jarāmaraṇaṃ, asati jātiyā natthi jarāmaraṇan ti saṅkhipitvā vavatthāne paññā sammasane ñāṇaṃ. Atītam pi addhānaṃ anāgatam pi addhānaṃ jātipaccayā jarāmaraṇaṃ, asati jātiyā natthi jarāmaraṇan ti saṅkhipitvā vavatthāne paññā sammasane ñāṇaṃ. Bhavapaccayā jāti…pe… avijjāpaccayā saṅkhārā, asati avijjāya natthi saṅkhārā ti saṅkhipitvā vavatthāne paññā sammasane ñāṇaṃ. Atītam pi addhānaṃ anāgatam pi addhānaṃ avijjāpaccayā saṅkhārā, asati avijjāya natthi saṅkhārā ti saṅkhipitvā vavatthāne paññā sammasane ñāṇaṃ.

Taṃ ñātaṭṭhena ñāṇaṃ, pajānanaṭṭhena paññā, tena vuccati atītânāgata-paccuppannānaṃ dhammānaṃ saṅkhipitvā vavatthāne paññā sammasane ñāṇan” ti. (paṭi. ma. 1.48)

9

Ettha ca “cakkhuṃ…pe… jarāmaraṇan” ti iminā peyyālena dvārârammaṇehi saddhiṃ dvārappavattā dhammā, pañcakkhandhā, cha dvārāni, cha ārammaṇāni, cha viññāṇāni, cha phassā, cha vedanā, cha saññā, cha cetanā, cha taṇhā, cha vitakkā, cha vicārā, cha dhātuyo, dasa kasiṇāni, dvattiṃsa koṭṭhāsā, dvādas’āyatanāni, aṭṭhārasa dhātuyo, bāvīsati indriyāni, tisso dhātuyo, nava bhavā, cattāri jhānāni, catasso appamaññā, catasso samāpattiyo, dvādasa paṭiccasamuppādaṅgānī ti ime dhammarāsayo saṃkhittā ti veditabbā.

10

Vuttaṃ h’etaṃ Abhiññeyyaniddese:

“Sabbaṃ, bhikkhave, abhiññeyyaṃ. Kiñ ca, bhikkhave, sabbaṃ abhiññeyyaṃ? Cakkhu, bhikkhave, abhiññeyyaṃ, rūpā… cakkhuviññāṇaṃ… cakkhusamphasso… yam p’idaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tam pi abhiññeyyaṃ. Sotaṃ…pe… yam p’idaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tam pi abhiññeyyaṃ.

11

“Rūpaṃ…pe… viññāṇaṃ… Cakkhu…pe… mano… Rūpā…pe… dhammā… Cakkhuviññāṇaṃ…pe… manoviññāṇaṃ… Cakkhusamphasso…pe… manosamphasso…

Cakkhusamphassajā vedanā…pe… manosamphassajā vedanā… Rūpasaññā…pe… dhammasaññā… Rūpasañcetanā…pe… dhammasañcetanā… Rūpataṇhā…pe… dhammataṇhā… Rūpavitakko…pe… dhammavitakko… Rūpavicāro…pe… dhammavicāro…

Pathavīdhātu…pe… viññāṇadhātu… Pathavīkasiṇaṃ…pe… viññāṇakasiṇaṃ… Kesā…pe… muttaṃ… matthaluṅgaṃ…

Cakkhâyatanaṃ…pe… dhammâyatanaṃ… Cakkhudhātu…pe… manodhātu… manoviññāṇadhātu… Cakkhundriyaṃ…pe… aññātāvindriyaṃ…

Kāmadhātu rūpadhātu arūpadhātu… Kāmabhavo rūpabhavo arūpabhavo… saññābhavo asaññābhavo nevasaññānâsaññābhavo… ekavokārabhavo catuvokārabhavo pañcavokārabhavo…

Paṭhamaṃ jhānaṃ…pe… catutthaṃ jhānaṃ… Mettā cetovimutti…pe… upekkhā cetovimutti… Ākāsānañcâyatanasamāpatti…pe… nevasaññanâsaññâyatanasamāpatti… Avijjā abhiññeyyā…pe… jarāmaraṇaṃ abhiññeyyan” ti. (paṭi. ma. 1.3; saṃ. ni. 4.46)

12

Taṃ tattha evaṃ vitthārena vuttattā idha sabbaṃ peyyālena saṃkhittaṃ. Evaṃ saṃkhitte pan’ettha ye lokuttarā dhammā āgatā, te asammasanupagattā imasmiṃ adhikāre na gahetabbā. Ye pi ca sammasanupagā, tesu ye yassa pākaṭā honti, sukhena pariggahaṃ gacchanti, tesu tena sammasanaṃ ārabhitabbaṃ.

CST695

13

Tatrâyaṃ khandhavasena ārabbha vidhānayojanā.

Yaṃ kiñci rūpaṃ…pe… sabbaṃ rūpaṃ aniccato vavatthapeti, ekaṃ sammasanaṃ, dukkhato anattato vavatthapeti, ekaṃ sammasanan ti (XX.6)

ettāvatā ayaṃ bhikkhu “yaṃ kiñci rūpan” ti evaṃ aniyama-niddiṭṭhaṃ sabbam pi rūpaṃ atīta-ttikena c’eva catūhi ca ajjhattâdi-dukehī ti ekādasahi okāsehi paricchinditvā sabbaṃ rūpaṃ aniccato vavatthapeti, aniccan ti sammasati. Kathaṃ? Parato vuttanayena. Vuttañ h’etaṃ:

“Rūpaṃ atītânāgata-paccuppannaṃ aniccaṃ khayaṭṭhenā” ti. (XX.7)

14

Tasmā esa yaṃ atītaṃ rūpaṃ, taṃ yasmā atīte yeva khīṇaṃ, nayimaṃ bhavaṃ sampattan ti aniccaṃ khayaṭṭhena, yaṃ anāgataṃ anantarabhave nibbattissati, tam pi tatth’eva khīyissati, na tato paraṃ bhavaṃ gamissatī ti aniccaṃ khayaṭṭhena, yaṃ paccuppannaṃ rūpaṃ, tam pi idh’eva khīyati, na ito gacchatī ti aniccaṃ khayaṭṭhena, yaṃ ajjhattaṃ, tam pi ajjhattam eva khīyati, na bahiddhābhāvaṃ gacchatī ti aniccaṃ khayaṭṭhena, yaṃ bahiddhā…pe… oḷārikaṃ…pe… sukhumaṃ…pe… hīnaṃ…pe… paṇītaṃ…pe… dūre…pe… santike, tam pi tatth’eva khīyati, na dūrabhāvaṃ gacchatī ti aniccaṃ khayaṭṭhenā ti sammasati. Idaṃ sabbam pi “aniccaṃ khayaṭṭhenā” ti etassa vasena ekaṃ sammasanaṃ, bhedato pana ekādasavidhaṃ hoti.

15

Sabbam eva ca taṃ dukkhaṃ bhayaṭṭhena. Bhayaṭṭhenā ti sappaṭibhayatāya. Yañ hi aniccaṃ, taṃ bhayâvahaṃ hoti, Sīhopamasutte (saṃ. ni. 3.78; a. ni. 4.33) devānaṃ viya. Iti idam pi “dukkhaṃ bhayaṭṭhenā” ti etassa vasena ekaṃ sammasanaṃ, bhedato pana ekādasavidhaṃ hoti.

16

Yathā ca dukkhaṃ, evaṃ sabbam pi taṃ anattā asārakaṭṭhena. Asārakaṭṭhenā ti “attā nivāsī kārako vedako sayaṃvasī” ti evaṃ parikappitassa attasārassa abhāvena. Yañ hi aniccaṃ dukkhaṃ, taṃ attano pi aniccataṃ vā udayabbaya-pīḷanaṃ vā vāretuṃ na sakkoti, kuto tassa kārakâdi-bhāvo? Ten’āha:

“Rūpañ ca h’idaṃ, bhikkhave, attā abhavissa, nayidaṃ rūpaṃ ābādhāya saṃvatteyyā” ti (saṃ. ni. 3.59)

ādi. Iti idam pi “anattā asārakaṭṭhenā” ti etassa vasena ekaṃ sammasanaṃ, bhedato pana ekādasavidhaṃ hoti. Esa nayo vedanâdīsu.

CST696

17

Yaṃ pana aniccaṃ, taṃ yasmā niyamato saṅkhatâdi-bhedaṃ hoti, ten’assa pariyāya-dassanatthaṃ, nānâkārehi vā manasikāra-ppavatti-dassanatthaṃ,

“Rūpaṃ atītânāgata-paccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhamman” ti (XX.7)

puna pāḷi vuttā. Esa nayo vedanâdīsū ti.

Cattārīsākāraanupassanākathā

CST697

18

So tass’eva pañcasu khandhesu anicca-dukkhânatta-sammasanassa thirabhāvatthāya, yaṃ taṃ Bhagavatā,

“Katamehi cattārīsāya ākārehi anulomikaṃ khantiṃ paṭilabhati, katamehi cattārīsāya ākārehi sammatta-niyāmaṃ okkamatī” ti?

etassa vibhaṅge,

“Pañcakkhandhe aniccato, dukkhato, rogato, gaṇḍato, sallato, aghato, ābādhato, parato, palokato, ītito, upaddavato, bhayato, upasaggato, calato, pabhaṅguto, addhuvato, atāṇato, aleṇato, asaraṇato, rittato, tucchato, suññato, anattato, ādīnavato, vipariṇāmadhammato, asārakato, aghamūlato, vadhakato, vibhavato, sâsavato, saṅkhatato, mārâmisato, jātidhammato, jarādhammato, byādhidhammato, maraṇadhammato, sokadhammato, paridevadhammato, upāyāsadhammato, saṃkilesikadhammato” ti (paṭi. ma. 3.37)

cattārīsāya ākārehi,

“Pañcakkhandhe aniccato passanto anulomikaṃ khantiṃ paṭilabhati, pañcannaṃ khandhānaṃ nirodho niccaṃ nibbānan ti passanto sammatta-niyāmaṃ okkamatī” ti (paṭi. ma. 3.38)

ādinā nayena anulomañāṇaṃ vibhajantena pabhedato aniccâdi-sammasanaṃ vuttaṃ, tassâpi vasena ime pañcakkhandhe sammasati.

CST698

19

Kathaṃ? So hi ekekaṃ khandhaṃ

  1. anaccantikatāya ādi-antavantatāya ca aniccato,
  2. uppādavaya-paṭipīḷanatāya dukkhavatthutāya ca dukkhato,
  3. paccaya-yāpanīyatāya rogamūlatāya ca rogato,
  4. dukkhatā-sūla-yogitāya kilesâsuci-paggharaṇatāya uppāda-jarā-bhaṅgehi uddhumāta-paripakka-pabhinnatāya ca gaṇḍato,
  5. pīḷājanakatāya antotudanatāya dunnīharaṇīyatāya ca sallato,
  6. vigarahaṇīyatāya avaḍḍhi-āvahanatāya aghavatthutāya ca aghato,
  7. aseribhāva-janakatāya ābādha-padaṭṭhānatāya ca ābādhato,
  8. avasatāya avidheyyatāya ca parato,
  9. byādhi-jarāmaraṇehi palujjanatāya palokato,
  10. aneka-byasanâvahanatāya ītito,
  11. aviditānaṃ yeva vipulānaṃ anatthānaṃ āvahanato sabbupaddava-vatthutāya ca upaddavato,
  12. sabbabhayānaṃ ākaratāya dukkhavūpasama-saṅkhātassa paramassāsassa paṭipakkha-bhūtatāya ca bhayato,
  13. anekehi anatthehi anubaddhatāya dosûpasaṭṭhatāya upasaggo viya anadhivāsanârahatāya ca upasaggato,
  14. byādhi-jarāmaraṇehi c’eva lābhâlābhâdīhi ca lokadhammehi pacalitatāya calato,
  15. upakkamena c’eva sarasena ca pabhaṅgupagamana-sīlatāya pabhaṅguto,
  16. sabbâvattha-nipātitāya thirabhāvassa ca abhāvatāya addhuvato,
  17. atāyanatāya c’eva alabbhaneyya-khematāya ca atāṇato,
  18. allīyituṃ anarahatāya allīnānam pi ca leṇakiccâkāritāya aleṇato,
  19. nissitānaṃ bhaya-sārakattâbhāvena asaraṇato,
  20. yathāparikappitehi dhuva-subha-sukhatta-bhāvehi rittatāya rittato,
  21. rittatāy’eva tucchato, appakattā vā, — appakam pi hi loke tucchan ti vuccati,
  22. sāmi-nivāsi-kāraka-vedakâdhiṭṭhāyaka-virahitatāya suññato,
  23. sayañ ca assāmika-bhāvâditāya anattato,
  24. pavatti-dukkhatāya dukkhassa ca ādīnavatāya ādīnavato, — atha vā ādīnaṃ vāti gacchati pavattatī ti ādīnavo, kapaṇa-manussass’etaṃ adhivacanaṃ, khandhā pi ca kapaṇā yevā ti ādīnava-sadisatāya ādīnavato,
  25. jarāya c’eva maraṇena cā ti dvedhā pariṇāma-pakatitāya vipariṇāmadhammato,
  26. dubbalatāya, pheggu viya sukha-bhañjanīyatāya ca asārakato,
  27. aghahetutāya aghamūlato,
  28. mittamukha-sapatto viya vissāsa-ghātitāya vadhakato,
  29. vigatabhavatāya vibhava-sambhūtatāya ca vibhavato,
  30. āsava-padaṭṭhānatāya sâsavato,
  31. hetupaccayehi abhisaṅkhatatāya saṅkhatato,
  32. maccumāra-kilesamārānaṃ āmisabhūtatāya mārâmisato,
  33. jāti-jarā-byādhi-maraṇa-pakatitāya jāti-jarā-byādhi-maraṇa-dhammato,
  34. soka-parideva-upāyāsa-hetutāya soka-parideva-upāyāsa-dhammato,
  35. taṇhā-diṭṭhi-duccarita-saṃkilesānaṃ visayadhammatāya saṃkilesikadhammato ti

evaṃ pabhedato vuttassa aniccâdi-sammasanassa vasena sammasati.

20

Ettha hi aniccato, palokato, calato, pabhaṅguto, addhuvato, vipariṇāmadhammato, asārakato, vibhavato, saṅkhatato, maraṇadhammato ti ekekasmiṃ khandhe dasa dasa katvā paññāsa aniccânupassanāni. Parato, rittato, tucchato, suññato, anattato ti ekekasmiṃ khandhe pañca pañca katvā pañcavīsati anattânupassanāni. Sesāni dukkhato, rogato ti ādīni ekekasmiṃ khandhe pañcavīsati pañcavīsati katvā pañcavīsati-sataṃ dukkhânupassanānī ti.

Icc assa iminā dvisatabhedena aniccâdi-sammasanena pañcakkhandhe sammasato taṃ naya-vipassanā-saṅkhātaṃ anicca-dukkhânatta-sammasanaṃ thiraṃ hoti. Idaṃ tāv’ettha pāḷi-nayânusārena sammasanârambha-vidhānaṃ.

Indriyatikkhakāraṇanavakakathā

CST699

21

Yassa pana evaṃ naya-vipassanāya yogaṃ karoto pi naya-vipassanā na sampajjati, tena “navah’ākārehi indriyāni tikkhāni bhavanti: uppannuppannānaṃ saṅkhārānaṃ khayam eva passati, tattha ca

  1. sakkacca-kiriyāya sampādeti,
  2. sātacca-kiriyāya sampādeti,
  3. sappāya-kiriyāya sampādeti,
  4. samādhissa ca nimittaggāhena,
  5. bojjhaṅgānañ ca anupavattanatāya,
  6. kāye ca
  7. jīvite ca anapekkhataṃ upaṭṭhāpeti,
  8. tattha ca abhibhuyya nekkhammena,
  9. antarā ca abyosānenā” ti

evaṃ vuttānaṃ navannaṃ ākārānaṃ vasena indriyāni tikkhāni katvā Pathavīkasiṇaniddese vuttanayena (IV.35-41) satta asappāyāni vajjetvā, satta sappāyāni sevamānena kālena rūpaṃ sammasitabbaṃ, kālena arūpaṃ.

22

Rūpaṃ sammasantena rūpassa nibbatti passitabbā.

Rūpanibbattipassanākārakathā

CST700

Seyyathidaṃ: idaṃ rūpaṃ nāma kammâdivasena catūhi kāraṇehi nibbattati. Tattha sabbesaṃ sattānaṃ rūpaṃ nibbattamānaṃ paṭhamaṃ kammato nibbattati. Paṭisandhikkhaṇe yeva hi gabbhaseyyakānaṃ tāva ti-santati-vasena vatthu-kāya-bhāva-dasaka-saṅkhātāni tiṃsa rūpāni nibbattanti, tāni ca kho paṭisandhicittassa uppādakkhaṇe yeva, yathā ca uppādakkhaṇe, tathā ṭhitikkhaṇe pi bhaṅgakkhaṇe pi.

23

Tattha rūpaṃ dandhanirodhaṃ garuparivatti, cittaṃ khippanirodhaṃ lahuparivatti. Ten’āha:

“Nâhaṃ, bhikkhave, aññaṃ ekadhammam pi samanupassāmi, yaṃ evaṃ lahuparivattaṃ yathayidaṃ, bhikkhave, cittan” ti. (a. ni. 1.48)

24

Rūpe dharante yeva hi soḷasavāre bhavaṅgacittaṃ uppajjitvā nirujjhati. Cittassa uppādakkhaṇo pi ṭhitikkhaṇo pi bhaṅgakkhaṇo pi ekasadisā. Rūpassa pana uppāda-bhaṅga-kkhaṇā yeva lahukā, tehi sadisā, ṭhitikkhaṇo pana mahā, yāva soḷasa cittāni uppajjitvā nirujjhanti, tāva vattati.

25

Paṭisandhicittassa uppādakkhaṇe uppannaṃ ṭhānappattaṃ purejātaṃ vatthuṃ nissāya dutiyaṃ bhavaṅgaṃ uppajjati. Tena saddhiṃ uppannaṃ ṭhānappattaṃ purejātaṃ vatthuṃ nissāya tatiyaṃ bhavaṅgaṃ uppajjati. Iminā nayena yāvatâyukaṃ cittappavatti veditabbā. Āsannamaraṇassa pana ekam eva ṭhānappattaṃ purejātaṃ vatthuṃ nissāya soḷasa cittāni uppajjanti.

26

Paṭisandhicittassa uppādakkhaṇe uppannaṃ rūpaṃ paṭisandhicittato uddhaṃ soḷasamena cittena saddhiṃ nirujjhati, ṭhānakkhaṇe uppannaṃ sattarasamassa uppādakkhaṇena saddhiṃ nirujjhati, bhaṅgakkhaṇe uppannaṃ sattarasamassa ṭhānakkhaṇaṃ patvā nirujjhati. Yāva pavatti nāma atthi, evam eva pavattati. Opapātikānam pi satta-santati-vasena sattati rūpāni evam eva pavattanti.

CST701

27

Tattha kammaṃ, kammasamuṭṭhānaṃ, kammapaccayaṃ, kammapaccaya-cittasamuṭṭhānaṃ, kammapaccaya-āhārasamuṭṭhānaṃ, kammapaccaya-utusamuṭṭhānan ti esa vibhāgo veditabbo.

28

Tattha kammaṃ nāma kusalâkusala-cetanā. Kammasamuṭṭhānaṃ nāma vipākakkhandhā ca cakkhudasakâdi-samasattati-rūpañ ca. Kammapaccayaṃ nāma tad eva. Kammaṃ hi kammasamuṭṭhānassa upatthambhaka-paccayo pi hoti.

29

Kammapaccaya-cittasamuṭṭhānaṃ nāma vipākacittasamuṭṭhānaṃ rūpaṃ. Kammapaccaya-āhārasamuṭṭhānaṃ nāma kammasamuṭṭhānarūpesu ṭhānappattā ojā aññaṃ ojaṭṭhamakaṃ samuṭṭhāpeti, tatrâpi ojā ṭhānaṃ patvā aññan ti evaṃ catasso vā pañca vā pavattiyo ghaṭeti. Kammapaccaya-utusamuṭṭhānaṃ nāma kammaja-tejodhātu ṭhānappattā utusamuṭṭhānaṃ ojaṭṭhamakaṃ samuṭṭhāpeti, tatrâpi utu aññaṃ ojaṭṭhamakan ti evaṃ catasso vā pañca vā pavattiyo ghaṭeti. Evaṃ tāva kammajarūpassa nibbatti passitabbā.

CST702

30

Cittajesu pi cittaṃ, cittasamuṭṭhānaṃ, cittapaccayaṃ, cittapaccaya-āhārasamuṭṭhānaṃ, cittapaccaya-utusamuṭṭhānanti esa vibhāgo veditabbo.

31

Tattha cittaṃ nāma ekūnanavuti-cittāni, tesu

Dvattiṃsa cittāni chabbīs’ekūnavīsati2 soḷasa
rūpiriyāpatha-viññatti-janakā3 matā.

Kāmāvacarato hi aṭṭha kusalāni, dvādasâkusalāni, manodhātu-vajjā dasa kiriyā, kusala-kiriyato dve abhiññācittānī ti dvattiṃsa cittāni rūpaṃ, iriyāpathaṃ, viññattiñ ca janenti.

Vipāka-vajjāni sesa-dasa-rūpāvacarāni, aṭṭha arūpāvacarāni, aṭṭha lokuttaracittānī ti chabbīsati cittāni rūpaṃ, iriyāpathañ ca janayanti, na viññattiṃ.

Kāmāvacare dasa bhavaṅgacittāni, rūpāvacare pañca, tisso manodhātuyo, ekā vipākâhetuka-manoviññāṇadhātu somanassasahagatā ti ekūnavīsati cittāni rūpam eva janayanti, na iriyāpathaṃ, na viññattiṃ.

Dve pañcaviññāṇāni, sabbasattānaṃ paṭisandhicittaṃ, khīṇāsavānaṃ cuticittaṃ, cattāri āruppavipākānī ti soḷasa cittāni n’eva rūpaṃ janayanti, na iriyāpathaṃ, na viññattiṃ.

Yāni c’ettha rūpaṃ janenti, tāni na ṭhitikkhaṇe, bhaṅgakkhaṇe vā. Tadā hi cittaṃ dubbalaṃ hoti, uppādakkhaṇe pana balavaṃ, tasmā taṃ tadā purejātaṃ vatthuṃ nissāya rūpaṃ samuṭṭhāpeti.

32

Cittasamuṭṭhānaṃ nāma tayo arūpino khandhā, “sadda-navakaṃ, kāyaviññatti, vacīviññatti, ākāsadhātu, lahutā, mudutā, kammaññatā, upacayo, santatī” ti sattarasavidhaṃ rūpañ ca. Cittapaccayaṃ nāma,

“Pacchājātā citta-cetasikā dhammā purejātassa imassa kāyassā” ti (paṭṭhā. 1.1.11)

evaṃ vuttaṃ catu-samuṭṭhāna-rūpaṃ.

33

Cittapaccaya-āhārasamuṭṭhānaṃ nāma cittasamuṭṭhānarūpesu ṭhānappattā ojā aññaṃ ojaṭṭhamakaṃ samuṭṭhāpeti, evaṃ dve tisso pavattiyo ghaṭeti.

34

Cittapaccaya-utusamuṭṭhānaṃ nāma cittasamuṭṭhāno utu ṭhānappatto aññaṃ ojaṭṭhamakaṃ samuṭṭhāpeti, evaṃ dve tisso pavattiyo ghaṭeti. Evaṃ cittajarūpassa nibbatti passitabbā.

CST703

35

Āhārajesu pi āhāro, āhārasamuṭṭhānaṃ, āhārapaccayaṃ, āhārapaccaya-āhārasamuṭṭhānaṃ, āhārapaccaya-utusamuṭṭhānan ti esa vibhāgo veditabbo.

36

Tattha āhāro nāma kabaḷīkāro āhāro. Āhārasamuṭṭhānaṃ nāma upādiṇṇaṃ kammajarūpaṃ paccayaṃ labhitvā tattha patiṭṭhāya ṭhānappattāya ojāya samuṭṭhāpitaṃ ojaṭṭhamakaṃ, ākāsadhātu, lahutā, mudutā, kammaññatā, upacayo, santatī ti cuddasavidhaṃ rūpaṃ. Āhārapaccayaṃ nāma,

“Kabaḷīkāro āhāro imassa kāyassa āhārapaccayena paccayo” ti (paṭṭhā. 1.1.15)

evaṃ vuttaṃ catu-samuṭṭhāna-rūpaṃ.

37

Āhārapaccaya-āhārasamuṭṭhānaṃ nāma āhārasamuṭṭhānesu rūpesu ṭhānappattā ojā aññaṃ ojaṭṭhamakaṃ samuṭṭhāpeti, tatrâpi ojā aññan ti evaṃ dasa-dvādasa-vāre pavattiṃ ghaṭeti. Ekadivasaṃ paribhuttâhāro sattâham pi upatthambheti. Dibbā pana ojā ekamāsaṃ dvemāsam pi upatthambheti. Mātarā paribhuttâhāro pi dārakassa sarīraṃ pharitvā rūpaṃ samuṭṭhāpeti. Sarīre makkhitâhāro pi rūpaṃ samuṭṭhāpeti. Kammajâhāro upādiṇṇakâhāro nāma. So pi ṭhānappatto rūpaṃ samuṭṭhāpeti, tatrâpi ojā aññaṃ samuṭṭhāpetī ti evaṃ catasso vā pañca vā pavattiyo ghaṭeti.

38

Āhārapaccaya-utusamuṭṭhānaṃ nāma āhārasamuṭṭhānā tejodhātu ṭhānappattā utusamuṭṭhānaṃ ojaṭṭhamakaṃ samuṭṭhāpeti. Tatrâyaṃ āhāro āhārasamuṭṭhānānaṃ janako hutvā paccayo hoti, sesānaṃ nissayâhāra-atthi-avigata-vasenā ti. Evaṃ āhārajarūpassa nibbatti passitabbā.

CST704

39

Utujesu pi utu, utusamuṭṭhānaṃ, utupaccayaṃ, utupaccaya-utusamuṭṭhānaṃ, utupaccaya-āhārasamuṭṭhānan ti esa vibhāgo veditabbo.

40

Tattha utu nāma catusamuṭṭhānā tejodhātu, uṇha-utu sīta-utū ti evaṃ pan’esa duvidho hoti. Utusamuṭṭhānaṃ nāma catusamuṭṭhāno utu upādiṇṇakaṃ paccayaṃ labhitvā ṭhānappatto sarīre rūpaṃ samuṭṭhāpeti, taṃ sadda-navakaṃ, ākāsadhātu, lahutā, mudutā, kammaññatā, upacayo, santatī ti pannarasavidhaṃ hoti. Utupaccayaṃ nāma utu catusamuṭṭhānika-rūpānaṃ pavattiyā ca vināsassa ca paccayo hoti.

41

Utupaccaya-utusamuṭṭhānaṃ nāma utusamuṭṭhānā tejodhātu ṭhānappattā aññaṃ ojaṭṭhamakaṃ samuṭṭhāpeti, tatrâpi utu aññan ti evaṃ dīgham pi addhānaṃ anupādiṇṇapakkhe ṭhatvā pi utusamuṭṭhānaṃ pavattati yeva.

42

Utupaccaya-āhārasamuṭṭhānaṃ nāma utusamuṭṭhānā ṭhānappattā ojā aññaṃ ojaṭṭhamakaṃ samuṭṭhāpeti, tatrâpi ojā aññan ti evaṃ dasa-dvādasa-vāre pavattiṃ ghaṭeti. Tatrâyaṃ utu utusamuṭṭhānānaṃ janako hutvā paccayo hoti, sesānaṃ nissaya-atthi-avigata-vasenā ti. Evaṃ utujarūpassa nibbatti passitabbā. Evañ hi rūpassa nibbattiṃ passanto “kālena rūpaṃ sammasati” nāma.

Arūpanibbattipassanākārakathā

CST705

43

Yathā ca rūpaṃ sammasantena rūpassa, evaṃ arūpaṃ sammasantena pi arūpassa nibbatti passitabbā. Sā ca kho ekâsīti-lokiyacittuppāda-vasen’eva.

Seyyathidaṃ: idañ hi arūpaṃ nāma purimabhave āyūhita-kammavasena paṭisandhiyaṃ tāva ekūnavīsati-cittuppāda-ppabhedaṃ nibbattati. Nibbattanâkāro pan’assa Paṭiccasamuppādaniddese (XVII.134-45) vuttanayen’eva veditabbo. Tad eva paṭisandhicittassa anantaracittato paṭṭhāya bhavaṅgavasena, āyupariyosāne cutivasena. Yaṃ tattha kāmāvacaraṃ, taṃ chasu dvāresu balavârammaṇe tadārammaṇa-vasena.

44

Pavatte pana asambhinnattā cakkhussa, āpāthagatattā rūpānaṃ āloka-sannissitaṃ manasikāra-hetukaṃ cakkhuviññāṇaṃ nibbattati saddhiṃ sampayuttadhammehi. Cakkhupasādassa hi ṭhitikkhaṇe ṭhitippattam eva rūpaṃ cakkhuṃ ghaṭṭeti. Tasmiṃ ghaṭṭite dvikkhattuṃ bhavaṅgaṃ uppajjitvā nirujjhati. Tato tasmiṃ yeva ārammaṇe kiriyamanodhātu āvajjana-kiccaṃ sādhayamānā uppajjati. Tadanantaraṃ tad eva rūpaṃ passamānaṃ kusalavipākaṃ akusalavipākaṃ vā cakkhuviññāṇaṃ. Tato tad eva rūpaṃ sampaṭicchamānā vipāka-manodhātu. Tato tad eva rūpaṃ santīrayamānā vipākâhetuka-manoviññāṇadhātu. Tato tad eva rūpaṃ vavatthāpayamānā kiriyâhetuka-manoviññāṇadhātu upekkhāsahagatā. Tato paraṃ kāmāvacara-kusalâkusala-kiriya-cittesu ekaṃ vā upekkhāsahagatâhetukaṃ cittaṃ pañca satta vā javanāni. Tato kāmāvacara-sattānaṃ ekādasasu tadārammaṇacittesu javanânurūpaṃ4 yaṃ kiñci tadārammaṇan ti. Esa nayo sesadvāresu pi. Manodvāre pana mahaggatacittāni pi uppajjantī ti. Evaṃ chasu dvāresu arūpassa nibbatti passitabbā. Evañ hi arūpassa nibbattiṃ passanto “kālena arūpaṃ sammasati” nāma.

45

Evaṃ kālena rūpaṃ, kālena arūpaṃ sammasitvā pi tilakkhaṇaṃ āropetvā anukkamena paṭipajjamāno eko paññābhāvanaṃ sampādeti.

Rūpasattakasammasanakathā

CST706

Aparo rūpasattaka-arūpasattaka-vasena tilakkhaṇaṃ āropetvā saṅkhāre sammasati.

46

Tattha ādāna-nikkhepanato, vayovuḍḍhatthaṅgamato, āhāramayato, utumayato, kammajato, cittasamuṭṭhānato, dhammatārūpato ti imehi ākārehi āropetvā sammasanto rūpasattakavasena āropetvā sammasati nāma. Ten’āhu porāṇā:

“Ādāna-nikkhepanato vayovuḍḍhatthagāmito
āhārato ca ututo kammato câpi cittato
dhammatārūpato satta vitthārena vipassatī” ti.

47

Tattha ādānan ti paṭisandhi, nikkhepanan ti cuti. Iti yogâvacaro imehi ādāna-nikkhepehi ekaṃ vassasataṃ paricchinditvā saṅkhāresu tilakkhaṇaṃ āropeti. Kathaṃ? Etth’antare sabbe saṅkhārā aniccā. Kasmā? Uppādavaya-vattito, vipariṇāmato, tāvakālikato, niccapaṭikkhepato ca. Yasmā pana uppannā saṅkhārā ṭhitiṃ pāpuṇanti, ṭhitiyaṃ jarāya kilamanti, jaraṃ patvā avassaṃ bhijjanti, tasmā abhiṇha-sampaṭipīḷanato dukkhamato dukkhavatthuto sukhapaṭikkhepato ca dukkhā. Yasmā ca “uppannā saṅkhārā ṭhitiṃ mā pāpuṇantu, ṭhānappattā mā jīrantu, jarappattā mā bhijjantū” ti imesu tīsu ṭhānesu kassaci vasavattibhāvo natthi, suññā tena vasavattanâkārena, tasmā suññato, assāmikato, avasavattito, attapaṭikkhepato ca anattā ti.

CST707

48

Evaṃ ādāna-nikkhepanavasena vassasata-paricchinne rūpe tilakkhaṇaṃ āropetvā tato paraṃ vayovuḍḍhatthaṅgamato āropeti. Tattha vayovuḍḍhatthaṅgamo nāma vayavasena vuḍḍhassa vaḍḍhitassa rūpassa atthaṅgamo, tassa vasena tilakkhaṇaṃ āropetī ti attho.

49

Kathaṃ? So tam eva vassasataṃ paṭhamavayena majjhimavayena pacchimavayenā ti tīhi vayehi paricchindati. Tattha ādito tettiṃsa vassāni paṭhamavayo nāma, tato catuttiṃsa majjhimavayo nāma, tato tettiṃsa pacchimavayo nāmā ti. Iti imehi tīhi vayehi paricchinditvā “paṭhamavaye pavattaṃ rūpaṃ majjhimavayaṃ appatvā tatth’eva nirujjhati, tasmā taṃ aniccaṃ, yad aniccaṃ, taṃ dukkhaṃ, yaṃ dukkhaṃ, tad anattā, majjhimavaye pavattarūpam pi pacchimavayaṃ appatvā tatth’eva nirujjhati, tasmā tam pi aniccaṃ dukkham anattā, pacchimavaye tettiṃsa vassāni pavattarūpam pi maraṇato paraṃ gamana-samatthaṃ nāma natthi, tasmā tam pi aniccaṃ dukkham anattā” ti tilakkhaṇaṃ āropeti.

CST708

50

Evaṃ paṭhamavayâdi-vasena vayovuḍḍhatthaṅgamato tilakkhaṇaṃ āropetvā puna “mandadasakaṃ, khiḍḍādasakaṃ, vaṇṇadasakaṃ, baladasakaṃ, paññādasakaṃ, hānidasakaṃ, pabbhāradasakaṃ, vaṅkadasakaṃ5, momūhadasakaṃ, sayanadasakan” ti imesaṃ dasannaṃ dasakānaṃ vasena vayovuḍḍhatthaṅgamato tilakkhaṇaṃ āropeti.

51

Tattha dasakesu tāva vassasatajīvino puggalassa paṭhamāni dasa vassāni mandadasakaṃ nāma, tadā hi so mando hoti capalo kumārako. Tato parāni dasa khiḍḍādasakaṃ nāma, tadā hi so khiḍḍārati-bahulo hoti. Tato parāni dasa vaṇṇadasakaṃ nāma, tadā hi’ssa vaṇṇâyatanaṃ vepullaṃ pāpuṇāti. Tato parāni dasa baladasakaṃ nāma, tadā hi’ssa balañ ca thāmo ca vepullaṃ pāpuṇāti. Tato parāni dasa paññādasakaṃ nāma, tadā hi’ssa paññā suppatiṭṭhitā hoti, pakatiyā kira dubbalapaññassâpi tasmiṃ kāle appamattakā paññā uppajjati yeva. Tato parāni dasa hānidasakaṃ nāma, tadā hi’ssa khiḍḍārati-vaṇṇa-bala-paññā parihāyanti. Tato parāni dasa pabbhāradasakaṃ nāma, tadā hi’ssa attabhāvo purato pabbhāro hoti. Tato parāni dasa vaṅkadasakaṃ nāma, tadā hi’ssa attabhāvo naṅgalakoṭi viya vaṅko hoti. Tato parāni dasa momūhadasakaṃ nāma, tadā hi so momūho hoti, kataṃ kataṃ pamussati. Tato parāni dasa sayanadasakaṃ nāma, vassasatiko hi sayana-bahulo va hoti.

52

Tatrâyaṃ yogī etesaṃ dasakānaṃ vasena vayovuḍḍhatthaṅgamato tilakkhaṇaṃ āropetuṃ iti paṭisañcikkhati: “paṭhamadasake pavattarūpaṃ dutiyadasakaṃ appatvā tatth’eva nirujjhati, tasmā taṃ aniccaṃ dukkham anattā, dutiyadasake…pe… navamadasake pavattarūpaṃ dasamadasakaṃ appatvā tatth’eva nirujjhati, dasamadasake pavattarūpaṃ punabbhavaṃ appatvā idh’eva nirujjhati, tasmā tam pi aniccaṃ dukkham anattā” ti tilakkhaṇaṃ āropeti.

CST709

53

Evaṃ dasakavasena6 vayovuḍḍhatthaṅgamato tilakkhaṇaṃ āropetvā puna tad eva vassasataṃ pañca-pañca-vassa-vasena vīsati-koṭṭhāse katvā vayovuḍḍhatthaṅgamato tilakkhaṇaṃ āropeti.

54

Kathaṃ? So hi iti paṭisañcikkhati: “paṭhame vassapañcake pavattarūpaṃ dutiyaṃ vassapañcakaṃ appatvā tatth’eva nirujjhati, tasmā taṃ aniccaṃ dukkham anattā, dutiye vassapañcake pavattarūpaṃ tatiyaṃ…pe… ekūnavīsatime vassapañcake pavattarūpaṃ vīsatimaṃ vassapañcakaṃ appatvā tatth’eva nirujjhati, vīsatime vassapañcake pavattarūpaṃ maraṇato paraṃ gamana-samatthaṃ nāma natthi, tasmā tam pi aniccaṃ dukkham anattā” ti.

55

Evaṃ vīsati-koṭṭhāsavasena vayovuḍḍhatthaṅgamato tilakkhaṇaṃ āropetvā puna pañcavīsati koṭṭhāse katvā catunnaṃ catunnaṃ vassānaṃ vasena āropeti, tato tettiṃsa koṭṭhāse katvā tiṇṇaṃ tiṇṇaṃ vassānaṃ vasena, paññāsa koṭṭhāse katvā dvinnaṃ dvinnaṃ vassānaṃ vasena, sataṃ koṭṭhāse katvā ekekavassavasena. Tato ekaṃ vassaṃ tayo koṭṭhāse katvā vassāna-hemanta-gimhesu tīsu utūsu ekeka-utuvasena tasmiṃ vayovuḍḍhatthaṅgamarūpe tilakkhaṇaṃ āropeti.

56

Kathaṃ? “Vassāne catumāsaṃ pavattarūpaṃ hemantaṃ appatvā tatth’eva niruddhaṃ, hemante pavattarūpaṃ gimhaṃ appatvā tatth’eva niruddhaṃ, gimhe pavattarūpaṃ puna vassānaṃ appatvā tatth’eva niruddhaṃ, tasmā taṃ aniccaṃ dukkham anattā” ti.

57

Evaṃ āropetvā puna ekaṃ vassaṃ cha koṭṭhāse katvā “vassāne dvemāsaṃ pavattarūpaṃ saradaṃ appatvā tatth’eva niruddhaṃ, sarade pavattarūpaṃ hemantaṃ, hemante pavattarūpaṃ sisiraṃ, sisire pavattarūpaṃ vasantaṃ, vasante pavattarūpaṃ gimhaṃ, gimhe pavattarūpaṃ puna vassānaṃ appatvā tatth’eva niruddhaṃ, tasmā aniccaṃ dukkham anattā” ti evaṃ tasmiṃ vayovuḍḍhatthaṅgamarūpe tilakkhaṇaṃ āropeti.

58

Evaṃ āropetvā tato kāḷajuṇhavasena “kāḷe pavattarūpaṃ juṇhaṃ appatvā, juṇhe pavattarūpaṃ kāḷaṃ appatvā tatth’eva niruddhaṃ, tasmā aniccaṃ dukkham anattā” ti tilakkhaṇaṃ āropeti.

59

Tato rattindivavasena “rattiṃ pavattarūpaṃ divasaṃ appatvā tatth’eva niruddhaṃ, divasaṃ pavattarūpam pi rattiṃ appatvā tatth’eva niruddhaṃ, tasmā aniccaṃ dukkham anattā” ti tilakkhaṇaṃ āropeti.

60

Tato tad eva rattindivaṃ pubbaṇhâdi-vasena cha koṭṭhāse katvā “pubbaṇhe pavattarūpaṃ majjhanhaṃ appatvā, majjhanhe pavattarūpaṃ sāyanhaṃ, sāyanhe pavattarūpaṃ paṭhamayāmaṃ, paṭhamayāme pavattarūpaṃ majjhimayāmaṃ, majjhimayāme pavattarūpaṃ pacchimayāmaṃ appatvā tatth’eva niruddhaṃ, pacchimayāme pavattarūpaṃ puna pubbaṇhaṃ appatvā tatth’eva niruddhaṃ, tasmā aniccaṃ dukkham anattā” ti tilakkhaṇaṃ āropeti.

CST710

61

Evaṃ āropetvā puna tasmiṃ yeva rūpe abhikkama-paṭikkama-ālokana-vilokana-samiñjana-pasāraṇa-vasena “abhikkame pavattarūpaṃ paṭikkamaṃ appatvā tatth’eva nirujjhati, paṭikkame pavattarūpaṃ ālokanaṃ, ālokane pavattarūpaṃ vilokanaṃ, vilokane pavattarūpaṃ samiñjanaṃ, samiñjane pavattarūpaṃ pasāraṇaṃ appatvā tatth’eva nirujjhati, tasmā aniccaṃ dukkham anattā” ti tilakkhaṇaṃ āropeti.

62

Tato ekapadavāraṃ uddharaṇa-atiharaṇa-vītiharaṇa-vossajjana-sannikkhepana-sannirumbhana-vasena cha koṭṭhāse karoti.

63

Tattha uddharaṇaṃ nāma pādassa bhūmito ukkhipanaṃ, atiharaṇaṃ nāma purato haraṇaṃ, vītiharaṇaṃ nāma khāṇu-kaṇṭaka-dīghajāti-ādīsu kiñcid eva disvā ito c’ito ca pāda-sañcāraṇaṃ, vossajjanaṃ nāma pādassa heṭṭhā oropanaṃ, sannikkhepanaṃ nāma pathavītale ṭhapanaṃ, sannirumbhanaṃ nāma puna pāduddharaṇakāle pādassa pathaviyā saddhiṃ abhinippīḷanaṃ.

64

Tattha uddharaṇe pathavīdhātu āpodhātū ti dve dhātuyo omattā honti mandā, itarā dve adhimattā honti balavatiyo, tathā atiharaṇa-vītiharaṇesu. Vossajjane tejodhātu vāyodhātū ti dve dhātuyo omattā honti mandā, itarā dve adhimattā honti balavatiyo, tathā sannikkhepana-sannirumbhanesu. Evaṃ cha koṭṭhāse katvā tesaṃ vasena tasmiṃ vayovuḍḍhatthaṅgamarūpe tilakkhaṇaṃ āropeti.

65

Kathaṃ? So iti paṭisañcikkhati: “yā uddharaṇe pavattā dhātuyo, yāni ca tad upādāya rūpāni, sabbe te dhammā atiharaṇaṃ appatvā etth’eva nirujjhanti, tasmā aniccā dukkhā anattā, tathā atiharaṇe pavattā vītiharaṇaṃ, vītiharaṇe pavattā vossajjanaṃ, vossajjane pavattā sannikkhepanaṃ, sannikkhepane pavattā sannirumbhanaṃ appatvā etth’eva nirujjhanti, iti tattha tattha uppannā itaraṃ itaraṃ koṭṭhāsaṃ appatvā tattha tatth’eva pabbaṃ pabbaṃ sandhi sandhi odhi odhi hutvā tattakapāle pakkhittatilā viya taṭataṭāyantā saṅkhārā bhijjanti, tasmā aniccā dukkhā anattā” ti. Tass’evaṃ pabbapabbagate saṅkhāre vipassato rūpasammasanaṃ sukhumaṃ hoti.

CST711

66

Sukhumatte ca pan’assa idaṃ opammaṃ. Eko kira dāru-tiṇukkâdīsu kataparicayo adiṭṭhapubba-padīpo paccanta-vāsiko nagaram āgamma antarâpaṇe jalamānaṃ padīpaṃ disvā ekaṃ purisaṃ pucchi “ambho, kiṃ nām’etaṃ evaṃ manāpan” ti? Tam enaṃ so āha “kim ettha manāpaṃ, padīpo nām’esa, telakkhayena vaṭṭikkhayena ca gatamaggo pi’ssa na paññāyissatī” ti. Tam añño evam āha “idaṃ oḷārikaṃ, imissā hi vaṭṭiyā anupubbena ḍayhamānāya tatiyabhāge tatiyabhāge jālā itarītaraṃ padesaṃ appatvā va nirujjhissatī” ti. Tam añño evam āha “idam pi oḷārikaṃ, imissā hi aṅgulaṅgulantare aḍḍhaṅgulaḍḍhaṅgulantare tantumhi tantumhi aṃsumhi aṃsumhi jālā itarītaraṃ aṃsuṃ appatvā va nirujjhissati, aṃsuṃ pana muñcitvā na sakkā jālaṃ paññāpetun” ti.

67

Tattha “telakkhayena vaṭṭikkhayena ca padīpassa gatamaggo pi na paññāyissatī” ti purisassa ñāṇaṃ viya yogino ādāna-nikkhepanato vassasatena paricchinnarūpe tilakkhaṇâropanaṃ. “Vaṭṭiyā tatiyabhāge tatiyabhāge jālā itarītaraṃ padesaṃ appatvā va nirujjhissatī” ti purisassa ñāṇaṃ viya yogino vassasatassa tatiyakoṭṭhāsa-paricchinne vayovuḍḍhatthaṅgamarūpe tilakkhaṇâropanaṃ. “Aṅgulaṅgulantare jālā itarītaraṃ appatvā va nirujjhissatī” ti purisassa ñāṇaṃ viya yogino dasavassa-pañcavassa-catuvassa-tivassa-dvivassa-ekavassa-paricchinne rūpe tilakkhaṇâropanaṃ. “Aḍḍhaṅgulaḍḍhaṅgulantare jālā itarītaraṃ appatvā va nirujjhissatī” ti purisassa ñāṇaṃ viya yogino ekeka-utuvasena ekaṃ vassaṃ tidhā chadhā ca vibhajitvā catumāsa-dvimāsa-paricchinne rūpe tilakkhaṇâropanaṃ. “Tantumhi tantumhi jālā itarītaraṃ appatvā va nirujjhissatī” ti purisassa ñāṇaṃ viya yogino kāḷajuṇhavasena rattindivavasena ekarattindivaṃ cha koṭṭhāse katvā pubbaṇhâdi-vasena ca paricchinne rūpe tilakkhaṇâropanaṃ. “Aṃsumhi aṃsumhi jālā itarītaraṃ appatvā va nirujjhissatī” ti purisassa ñāṇaṃ viya yogino abhikkamâdi-vasena c’eva uddharaṇâdīsu ca ekekakoṭṭhāsavasena paricchinne rūpe tilakkhaṇâropanan ti.

CST712

68

So evaṃ nānâkārehi vayovuḍḍhatthaṅgamarūpe tilakkhaṇaṃ āropetvā puna tad eva rūpaṃ visaṅkharitvā āhāramayâdi-vasena cattāro koṭṭhāse katvā ekekakoṭṭhāse tilakkhaṇaṃ āropeti.

Tatrâssa āhāramayaṃ rūpaṃ chāta-suhita-vasena pākaṭaṃ hoti. Chātakāle samuṭṭhitaṃ rūpaṃ hi jhattaṃ hoti kilantaṃ, jhāmakhāṇuko viya, aṅgārapacchiyaṃ nilīnakāko viya ca dubbaṇṇaṃ dussaṇṭhitaṃ, suhitakāle samuṭṭhitaṃ dhātaṃ pīṇitaṃ mudu siniddhaṃ phassavantaṃ hoti. So taṃ pariggahetvā “chātakāle pavattarūpaṃ suhitakālaṃ appatvā etth’eva nirujjhati, suhitakāle samuṭṭhitam pi chātakālaṃ appatvā etth’eva nirujjhati, tasmā taṃ aniccaṃ dukkham anattā” ti evaṃ tattha tilakkhaṇaṃ āropeti.

CST713

69

Utumayaṃ sītuṇha-vasena pākaṭaṃ hoti. Uṇhakāle samuṭṭhitaṃ rūpaṃ hi jhattaṃ hoti kilantaṃ dubbaṇṇaṃ, sīta-utunā samuṭṭhitaṃ rūpaṃ dhātaṃ pīṇitaṃ 7 siniddhaṃ hoti. So taṃ pariggahetvā “uṇhakāle pavattarūpaṃ sītakālaṃ appatvā etth’eva nirujjhati, sītakāle pavattarūpaṃ uṇhakālaṃ appatvā etth’eva nirujjhati, tasmā taṃ aniccaṃ dukkham anattā” ti evaṃ tattha tilakkhaṇaṃ āropeti.

CST714

70

Kammajaṃ āyatana-dvāra-vasena pākaṭaṃ hoti. Cakkhudvārasmiṃ hi cakkhu-kāya-bhāva-dasakavasena tiṃsa kammajarūpāni, upatthambhakāni pana tesaṃ utu-cittâhāra-samuṭṭhānāni catuvīsatī ti catupaṇṇāsa honti, tathā sota-ghāna-jivhā-dvāresu. Kāyadvāre kāya-bhāva-dasakavasena c’eva utusamuṭṭhānâdi-vasena ca catucattālīsa. Manodvāre hadayavatthu-kāya-bhāva-dasakavasena c’eva utusamuṭṭhānâdi-vasena ca catupaṇṇāsam eva.

So sabbam pi taṃ rūpaṃ pariggahetvā “cakkhudvāre pavattarūpaṃ sotadvāraṃ appatvā etth’eva nirujjhati, sotadvāre pavattarūpaṃ ghānadvāraṃ, ghānadvāre pavattarūpaṃ jivhādvāraṃ, jivhādvāre pavattarūpaṃ kāyadvāraṃ, kāyadvāre pavattarūpaṃ manodvāraṃ appatvā etth’eva nirujjhati, tasmā taṃ aniccaṃ dukkham anattā” ti evaṃ tattha tilakkhaṇaṃ āropeti.

CST715

71

Cittasamuṭṭhānaṃ somanassita-domanassita-vasena pākaṭaṃ hoti. Somanassitakāle uppannaṃ hi rūpaṃ siniddhaṃ mudu pīṇitaṃ phassavantaṃ hoti, domanassitakāle uppannaṃ jhattaṃ kilantaṃ dubbaṇṇaṃ hoti. So taṃ pariggahetvā “somanassitakāle pavattarūpaṃ domanassitakālaṃ appatvā etth’eva nirujjhati, domanassitakāle pavattarūpaṃ somanassitakālaṃ appatvā etth’eva nirujjhati, tasmā taṃ aniccaṃ dukkham anattā” ti evaṃ tattha tilakkhaṇaṃ āropeti.

72

Tass’evaṃ cittasamuṭṭhānarūpaṃ pariggahetvā tattha tilakkhaṇaṃ āropayato ayam attho pākaṭo hoti:

“Jīvitaṃ attabhāvo ca sukhadukkhā ca kevalā
ekacittasamāyuttā, lahuso vattate khaṇo.

Cullâsīti sahassāni kappaṃ tiṭṭhanti ye marū,
na tv eva te pi tiṭṭhanti dvīhi cittehi samohitā.

Ye niruddhā marantassa tiṭṭhamānassa vā idha,
sabbe va sadisā khandhā gatā appaṭisandhikā.

Anantarā ca ye bhaggā, ye ca bhaggā anāgate,
tadantarā niruddhānaṃ vesamaṃ natthi lakkhaṇe.

Anibbattena na jāto paccuppannena jīvati,
cittabhaṅgā mato loko paññatti paramatthiyā.

Anidhānagatā bhaggā, puñjo natthi anāgate,
nibbattā ye pi tiṭṭhanti āragge sāsapûpamā.

Nibbattānañ ca dhammānaṃ bhaṅgo nesaṃ purakkhato,
palokadhammā tiṭṭhanti purāṇehi amissitā.

Adassanato āyanti bhaggā gacchantudassanaṃ8,
vijjuppādo va ākāse uppajjanti vayanti cā” ti. (mahāni. 10)

CST716

73

Evaṃ āhāramayâdīsu tilakkhaṇaṃ āropetvā puna dhammatārūpe tilakkhaṇaṃ āropeti. Dhammatārūpaṃ nāma bahiddhā anindriyabaddhaṃ aya-loha-tipu-sīsa-suvaṇṇa-rajata-muttā-maṇi-veḷuriya-saṅkha-silā-pavāḷa-lohitaṅga-masāragalla-bhūmi-pāsāṇa-pabbata-tiṇa-rukkha-latâdi-bhedaṃ vivaṭṭakappato paṭṭhāya uppajjanakarūpaṃ. Tad assa asokaṅkurâdi-vasena pākaṭaṃ hoti.

74

Asokaṅkuraṃ9 hi ādito va tanurattaṃ hoti, tato dvîha-tîhaccayena ghanarattaṃ, puna dvîha-tîhaccayena mandarattaṃ, tato taruṇapallava-vaṇṇaṃ, tato pariṇatapallava-vaṇṇaṃ, tato haritapaṇṇa-vaṇṇaṃ, tato nīlapaṇṇa-vaṇṇaṃ, tato nīlapaṇṇa-vaṇṇa-kālato paṭṭhāya sabhāga-rūpa-santatim anuppabandhāpayamānaṃ saṃvaccharamattena paṇḍupalāsaṃ hutvā vaṇṭato chijjitvā patati.

75

So taṃ pariggahetvā “tanurattakāle pavattarūpaṃ ghanarattakālaṃ appatvā nirujjhati, ghanarattakāle pavattarūpaṃ mandarattakālaṃ, mandarattakāle pavattarūpaṃ taruṇapallava-vaṇṇakālaṃ, taruṇapallava-vaṇṇakāle pavattaṃ pariṇatapallava-vaṇṇakālaṃ, pariṇatapallava-vaṇṇakāle pavattaṃ haritapaṇṇa-vaṇṇakālaṃ, haritapaṇṇakāle pavattaṃ nīlapaṇṇa-vaṇṇakālaṃ, nīlapaṇṇa-vaṇṇakāle pavattaṃ paṇḍupalāsakālaṃ, paṇḍupalāsakāle pavattaṃ vaṇṭato chijjitvā patanakālaṃ appatvā va nirujjhati, tasmā taṃ aniccaṃ dukkham anattā” ti tilakkhaṇaṃ āropeti, evaṃ tattha tilakkhaṇaṃ āropetvā iminā nayena sabbam pi dhammatārūpaṃ sammasati. Evaṃ tāva rūpasattakavasena tilakkhaṇaṃ āropetvā saṅkhāre sammasati.

Arūpasattakasammasanakathā

CST717

76

Yaṃ pana vuttaṃ “arūpasattakavasenā” ti (XX.45), tattha ayaṃ mātikā: kalāpato, yamakato, khaṇikato, paṭipāṭito, diṭṭhi-ugghāṭanato, māna-samugghāṭanato, nikanti-pariyādānato ti.

77

Tattha kalāpato ti phassa-pañcamakā dhammā. Kathaṃ kalāpato sammasatī ti? Idha bhikkhu iti paṭisañcikkhati: “ye ime kesā aniccā dukkhā anattā ti sammasane uppannā phassa-pañcamakā dhammā, ye ca lomā…pe… matthaluṅgaṃ aniccaṃ dukkham anattā ti sammasane uppannā phassa-pañcamakā dhammā, sabbe te itarītaraṃ appatvā pabbaṃ pabbaṃ odhi odhi hutvā tattakapāle pakkhittatilā viya taṭataṭāyantā vinaṭṭhā, tasmā aniccā dukkhā anattā” ti. Ayaṃ tāva visuddhikathāyaṃ nayo.

78

Ariyavaṃsakathāyaṃ pana heṭṭhā rūpasattake sattasu ṭhānesu rūpaṃ “aniccaṃ dukkham anattā” ti pavattaṃ cittaṃ aparena cittena “aniccaṃ dukkham anattā” ti sammasanto kalāpato sammasatī ti vuttaṃ, taṃ yuttataraṃ. Tasmā sesāni pi ten’eva nayena vibhajissāma.

CST718

79

Yamakato ti idha bhikkhu ādāna-nikkhepa-rūpaṃ “aniccaṃ dukkham anattā” ti sammasitvā tam pi cittaṃ aparena cittena “aniccaṃ dukkham anattā” ti sammasati. Vayovuḍḍhatthaṅgama-rūpaṃ, āhāramayaṃ, utumayaṃ, kammajaṃ, cittasamuṭṭhānaṃ, dhammatārūpaṃ “aniccaṃ dukkham anattā” ti sammasitvā tam pi cittaṃ aparena cittena “aniccaṃ dukkham anattā” ti sammasati. Evaṃ yamakato sammasati nāma.

CST719

80

Khaṇikato ti idha bhikkhu ādāna-nikkhepa-rūpaṃ “aniccaṃ dukkham anattā” ti sammasitvā taṃ paṭhamacittaṃ dutiyacittena, dutiyaṃ tatiyena, tatiyaṃ catutthena, catutthaṃ pañcamena “etam pi aniccaṃ dukkham anattā” ti sammasati. Vayovuḍḍhatthaṅgama-rūpaṃ, āhāramayaṃ, utumayaṃ, kammajaṃ, cittasamuṭṭhānaṃ, dhammatārūpaṃ “aniccaṃ dukkham anattā” ti sammasitvā taṃ paṭhamacittaṃ dutiyacittena, dutiyaṃ tatiyena, tatiyaṃ catutthena, catutthaṃ pañcamena “etam pi aniccaṃ dukkham anattā” ti sammasati. Evaṃ rūpapariggāhakacittato paṭṭhāya cattāri cattāri cittāni sammasanto khaṇikato sammasati nāma.

CST720

81

Paṭipāṭito ti ādāna-nikkhepa-rūpaṃ “aniccaṃ dukkham anattā” ti sammasitvā taṃ paṭhamacittaṃ dutiyacittena, dutiyaṃ tatiyena, tatiyaṃ catutthena…pe… dasamaṃ ekādasamena “etam pi aniccaṃ dukkham anattā” ti sammasati. Vayovuḍḍhatthaṅgama-rūpaṃ, āhāramayaṃ, utumayaṃ, kammajaṃ, cittasamuṭṭhānaṃ, dhammatārūpaṃ “aniccaṃ dukkham anattā” ti sammasitvā taṃ paṭhamacittaṃ dutiyacittena, dutiyaṃ tatiyena, tatiyaṃ catutthena…pe… dasamaṃ ekādasamena “etam pi aniccaṃ dukkham anattā” ti evaṃ vipassanā paṭipāṭiyā sakalam pi divasabhāgaṃ sammasituṃ vaṭṭeyya. Yāva dasamacitta-sammasanā pana rūpakammaṭṭhānam pi arūpakammaṭṭhānam pi paguṇaṃ hoti, tasmā dasame yeva ṭhapetabban ti vuttaṃ. Evaṃ sammasanto paṭipāṭito sammasati nāma.

CST721

82

Diṭṭhi-ugghāṭanato māna-ugghāṭanato nikanti-pariyādānato ti imesu tīsu visuṃ sammasana-nayo nāma natthi. Yaṃ pan’etaṃ heṭṭhā rūpaṃ, idha ca arūpaṃ pariggahitaṃ, taṃ passanto rūpârūpato uddhaṃ aññaṃ sattaṃ nāma na passati. Sattassa adassanato paṭṭhāya sattasaññā ugghāṭitā hoti. Sattasaññaṃ ugghāṭita-cittena saṅkhāre pariggaṇhato diṭṭhi n’uppajjati. Diṭṭhiyā anuppajjamānāya diṭṭhi ugghāṭitā nāma hoti. Diṭṭhi-ugghāṭita-cittena saṅkhāre pariggaṇhato māno n’uppajjati. Māne anuppajjante māno samugghāṭito nāma hoti. Māna-samugghāṭita-cittena saṅkhāre pariggaṇhato taṇhā n’uppajjati. Taṇhāya anuppajjantiyā nikanti pariyādiṇṇā nāma hotī ti. Idaṃ tāva visuddhikathāyaṃ vuttaṃ.

83

Ariyavaṃsakathāyaṃ pana “diṭṭhi-ugghāṭanato māna-samugghāṭanato nikanti-pariyādānato” ti mātikaṃ ṭhapetvā ayaṃ nayo dassito.

Ahaṃ vipassāmi, mama vipassanā ti gaṇhato hi diṭṭhi-samugghāṭanaṃ nāma na hoti. Saṅkhārā va saṅkhāre vipassanti sammasanti vavatthapenti pariggaṇhanti paricchindantī ti gaṇhato pana diṭṭhi-ugghāṭanaṃ nāma hoti.

Suṭṭhu vipassāmi, manāpaṃ vipassāmī ti gaṇhato māna-samugghāṭo nāma na hoti. Saṅkhārā va saṅkhāre vipassanti sammasanti vavatthapenti pariggaṇhanti paricchindantī ti gaṇhato pana māna-samugghāṭo nāma hoti.

Vipassituṃ sakkomī ti vipassanaṃ assādentassa nikanti-pariyādānaṃ nāma na hoti. Saṅkhārā va saṅkhāre vipassanti sammasanti vavatthapenti pariggaṇhanti paricchindantī ti gaṇhato pana nikanti-pariyādānaṃ nāma hoti.

84

Sace saṅkhārā attā bhaveyyuṃ, attā ti gahetuṃ vaṭṭeyyuṃ, anattā ca pana attā ti gahitā, tasmā te avasavattanaṭṭhena anattā, hutvā abhāvaṭṭhena aniccā, uppādavaya-paṭipīḷanaṭṭhena dukkhā ti passato diṭṭhi-ugghāṭanaṃ nāma hoti.

85

Sace saṅkhārā niccā bhaveyyuṃ, niccā ti gahetuṃ vaṭṭeyyuṃ, aniccā ca pana niccā ti gahitā, tasmā te hutvā abhāvaṭṭhena aniccā, uppādavaya-paṭipīḷanaṭṭhena dukkhā, avasavattanaṭṭhena anattā ti passato māna-samugghāṭo nāma hoti.

86

Sace saṅkhārā sukhā bhaveyyuṃ, sukhā ti gahetuṃ vaṭṭeyyuṃ, dukkhā ca pana sukhā ti gahitā, tasmā te uppādavaya-paṭipīḷanaṭṭhena dukkhā, hutvā abhāvaṭṭhena aniccā, avasavattanaṭṭhena anattā ti passato nikanti-pariyādānaṃ nāma hoti.

87

Evaṃ saṅkhāre anattato passantassa diṭṭhi-samugghāṭanaṃ nāma hoti, aniccato passantassa māna-samugghāṭanaṃ nāma hoti, dukkhato passantassa nikanti-pariyādānaṃ nāma hoti. Iti ayaṃ vipassanā attano attano ṭhāne yeva tiṭṭhatī ti.

88

Evaṃ arūpasattakavasenâpi tilakkhaṇaṃ āropetvā saṅkhāre sammasati. Ettāvatā pan’assa rūpakammaṭṭhānam pi arūpakammaṭṭhānam pi paguṇaṃ hoti.

CST722

89

So evaṃ paguṇa-rūpârūpa-kammaṭṭhāno yā upari-bhaṅgânupassanato paṭṭhāya pahānapariññāvasena sabbâkārato pattabbā aṭṭhārasa mahāvipassanā, tāsaṃ idh’eva tāva ekadesaṃ paṭivijjhanto tappaṭipakkhe dhamme pajahati.

90

Aṭṭhārasa mahāvipassanā nāma aniccânupassanâdikā paññā. Yāsu

  1. aniccânupassanaṃ bhāvento niccasaññaṃ pajahati,
  2. dukkhânupassanaṃ bhāvento sukhasaññaṃ pajahati,
  3. anattânupassanaṃ bhāvento attasaññaṃ pajahati,
  4. nibbidânupassanaṃ bhāvento nandiṃ pajahati,
  5. virāgânupassanaṃ bhāvento rāgaṃ pajahati,
  6. nirodhânupassanaṃ bhāvento samudayaṃ pajahati,
  7. paṭinissaggânupassanaṃ bhāvento ādānaṃ pajahati,
  8. khayânupassanaṃ bhāvento ghanasaññaṃ pajahati,
  9. vayânupassanaṃ bhāvento āyūhanaṃ pajahati,
  10. vipariṇāmânupassanaṃ bhāvento dhuvasaññaṃ pajahati,
  11. animittânupassanaṃ bhāvento nimittaṃ pajahati,
  12. appaṇihitânupassanaṃ bhāvento paṇidhiṃ pajahati,
  13. suññatânupassanaṃ bhāvento abhinivesaṃ pajahati,
  14. adhipaññādhammavipassanaṃ bhāvento sārâdānâbhinivesaṃ pajahati,
  15. yathābhūtañāṇadassanaṃ bhāvento sammohâbhinivesaṃ pajahati,
  16. ādīnavânupassanaṃ bhāvento ālayâbhinivesaṃ pajahati,
  17. paṭisaṅkhânupassanaṃ bhāvento appaṭisaṅkhaṃ pajahati,
  18. vivaṭṭânupassanaṃ bhāvento saṃyogâbhinivesaṃ pajahati.

91

Tāsu yasmā iminā aniccâdi-lakkhaṇattaya-vasena saṅkhārā diṭṭhā, tasmā anicca-dukkha-anattânupassanā paṭividdhā honti. Yasmā ca,

“Yā ca aniccânupassanā yā ca animittânupassanā, ime dhammā ekatthā, byañjanam eva nānaṃ”,

tathā

“Yā ca dukkhânupassanā yā ca appaṇihitânupassanā, ime dhammā ekatthā, byañjanam eva nānaṃ”,

“Yā ca anattânupassanā yā ca suññatânupassanā, ime dhammā ekatthā, byañjanam eva nānan” ti (paṭi. ma. 1.227)

vuttaṃ, tasmā tā pi paṭividdhā honti. Adhipaññādhammavipassanā pana sabbā pi vipassanā. Yathābhūtañāṇadassanaṃ kaṅkhāvitaraṇavisuddhiyā eva saṅgahitaṃ. Iti idam pi dvayaṃ paṭividdham eva hoti. Sesesu vipassanāñāṇesu kiñci paṭividdhaṃ, kiñci appaṭividdhaṃ, tesaṃ vibhāgaṃ parato āvikarissāma (XXI).

92

Yad eva hi paṭividdhaṃ, taṃ sandhāya idaṃ vuttaṃ:

“Evaṃ paguṇa-rūpârūpa-kammaṭṭhāno yā upari-bhaṅgânupassanato paṭṭhāya pahānapariññāvasena sabbâkārato pattabbā aṭṭhārasa mahāvipassanā, tāsaṃ idh’eva tāva ekadesaṃ paṭivijjhanto tappaṭipakkhe dhamme pajahatī” ti. (XX.89)

Udayabbayañāṇakathā

CST723

93

So evaṃ aniccânupassanâdi-paṭipakkhānaṃ niccasaññâdīnaṃ pahānena visuddhañāṇo sammasanañāṇassa pāraṃ gantvā, yaṃ taṃ sammasanañāṇânantaraṃ,

“Paccuppannānaṃ dhammānaṃ vipariṇāmânupassane paññā udayabbayânupassane ñāṇan” ti (paṭi. ma. mātikā 1.6)

udayabbayânupassanaṃ vuttaṃ, tassa adhigamāya yogaṃ ārabhati, ārabhamāno ca saṅkhepato tāva ārabhati.

94

Tatrâyaṃ pāḷi:

“Kathaṃ paccuppannānaṃ dhammānaṃ vipariṇāmânupassane paññā udayabbayânupassane ñāṇaṃ? Jātaṃ rūpaṃ paccuppannaṃ, tassa nibbatti-lakkhaṇaṃ udayo, vipariṇāma-lakkhaṇaṃ vayo, anupassanā ñāṇaṃ. Jātā vedanā… saññā… saṅkhārā… viññāṇaṃ… Jātaṃ cakkhu…pe… Jāto bhavo paccuppanno, tassa nibbatti-lakkhaṇaṃ udayo, vipariṇāma-lakkhaṇaṃ vayo, anupassanā ñāṇan” ti. (paṭi. ma. 1.49)

95

So iminā pāḷinayena jātassa nāmarūpassa nibbatti-lakkhaṇaṃ jātiṃ uppādaṃ abhinavâkāraṃ udayo ti, vipariṇāma-lakkhaṇaṃ khayaṃ bhaṅgaṃ vayo ti samanupassati.

96

So evaṃ pajānāti “imassa nāmarūpassa uppattito pubbe anuppannassa rāsi vā nicayo vā natthi, uppajjamānassâpi rāsito vā nicayato vā āgamanaṃ nāma natthi, nirujjhamānassâpi disā-vidisā-gamanaṃ nāma natthi, niruddhassâpi ekasmiṃ ṭhāne rāsito nicayato nidhānato avaṭṭhānaṃ nāma natthi. Yathā pana vīṇāya vādiyamānāya uppanna-saddassa n’eva uppattito pubbe sannicayo atthi, na uppajjamāno sannicayato āgato, na nirujjhamānassa disā-vidisā-gamanaṃ atthi, na niruddho katthaci sannicito tiṭṭhati, atha kho vīṇañ ca upavīṇañ ca purisassa ca tajjaṃ vāyāmaṃ paṭicca ahutvā sambhoti, hutvā paṭiveti, evaṃ sabbe pi rūpârūpino dhammā ahutvā sambhonti, hutvā paṭiventī” ti.

CST724

97

Evaṃ saṅkhepato udayabbaya-manasikāraṃ katvā, puna yāni etass’eva udayabbayañāṇassa vibhaṅge,

“Avijjāsamudayā rūpasamudayo ti paccayasamudayaṭṭhena rūpakkhandhassa udayaṃ passati, taṇhāsamudayā… kammasamudayā… āhārasamudayā rūpasamudayo ti paccayasamudayaṭṭhena rūpakkhandhassa udayaṃ passati, nibbatti-lakkhaṇaṃ passanto pi rūpakkhandhassa udayaṃ passati. Rūpakkhandhassa udayaṃ passanto imāni pañca lakkhaṇāni passati.

Avijjānirodhā rūpanirodho ti paccayanirodhaṭṭhena rūpakkhandhassa vayaṃ passati, taṇhānirodhā… kammanirodhā… āhāranirodhā rūpanirodho ti paccayanirodhaṭṭhena rūpakkhandhassa vayaṃ passati, vipariṇāma-lakkhaṇaṃ passanto pi rūpakkhandhassa vayaṃ passati. Rūpakkhandhassa vayaṃ passanto pi imāni pañca lakkhaṇāni passati”. (paṭi. ma. 1.50)

Tathā,

“Avijjāsamudayā vedanāsamudayo ti paccayasamudayaṭṭhena vedanākkhandhassa udayaṃ passati, taṇhāsamudayā… kammasamudayā… phassasamudayā vedanāsamudayo ti paccayasamudayaṭṭhena vedanākkhandhassa udayaṃ passati, nibbatti-lakkhaṇaṃ passanto pi vedanākkhandhassa udayaṃ passati. Vedanākkhandhassa udayaṃ passanto imāni pañca lakkhaṇāni passati.

Avijjānirodhā… taṇhānirodhā… kammanirodhā… phassanirodhā vedanānirodho ti paccayanirodhaṭṭhena vedanākkhandhassa vayaṃ passati, vipariṇāma-lakkhaṇaṃ passanto pi vedanākkhandhassa vayaṃ passati. Vedanākkhandhassa vayaṃ passanto imāni pañca lakkhaṇāni passati” (paṭi. ma. 1.50).

Vedanākkhandhassa viya ca saññā-saṅkhāra-viññāṇa-kkhandhānaṃ. Ayaṃ pana viseso: viññāṇakkhandhassa phassaṭṭhāne “nāmarūpasamudayā, nāmarūpanirodhā” ti — evaṃ ekekassa khandhassa udayabbayadassane dasa dasa katvā paññāsa lakkhaṇāni vuttāni, tesaṃ vasena “evam pi rūpassa udayo evam pi rūpassa vayo, evam pi rūpaṃ udeti, evam pi rūpaṃ vetī” ti paccayato c’eva khaṇato ca vitthārena manasikāraṃ karoti.

CST725

98

Tass’evaṃ manasikaroto “iti kir’ime dhammā ahutvā sambhonti, hutvā paṭiventī” ti ñāṇaṃ visadataraṃ hoti. Tass’evaṃ paccayato c’eva khaṇato ca dvedhā udayabbayaṃ passato sacca-paṭiccasamuppāda-naya-lakkhaṇa-bhedā pākaṭā honti.

CST726

99

Yañ hi so avijjâdi-samudayā khandhānaṃ samudayaṃ, avijjâdi-nirodhā ca khandhānaṃ nirodhaṃ passati, idam assa paccayato udayabbayadassanaṃ. Yaṃ pana nibbatti-lakkhaṇa-vipariṇāma-lakkhaṇāni passanto khandhānaṃ udayabbayaṃ passati, idam assa khaṇato udayabbayadassanaṃ. Uppattikkhaṇe yeva hi nibbatti-lakkhaṇaṃ, bhaṅgakkhaṇe ca vipariṇāma-lakkhaṇaṃ.

CST727

100

Icc ass’evaṃ paccayato c’eva khaṇato ca dvedhā udayabbayaṃ passato paccayato udayadassanena samudayasaccaṃ pākaṭaṃ hoti, janakâvabodhato. Khaṇato udayadassanena dukkhasaccaṃ pākaṭaṃ hoti, jāti-dukkhâvabodhato. Paccayato vayadassanena nirodhasaccaṃ pākaṭaṃ hoti, paccayânuppādena paccayavataṃ anuppādâvabodhato. Khaṇato vayadassanena dukkhasaccam eva pākaṭaṃ hoti, maraṇa-dukkhâvabodhato. Yañ c’assa udayabbayadassanaṃ, maggo vâyaṃ lokiko ti maggasaccaṃ pākaṭaṃ hoti, tatra sammohavighātato.

CST728

101

Paccayato c’assa udayadassanena anulomo paṭiccasamuppādo pākaṭo hoti,

“Imasmiṃ sati idaṃ hotī” ti (ma. ni. 1.404; saṃ. ni. 2.21; udā. 1)

avabodhato. Paccayato vayadassanena paṭilomo paṭiccasamuppādo pākaṭo hoti,

“Imassa nirodhā idaṃ nirujjhatī” ti (ma. ni. 1.406; saṃ. ni. 2.21; udā. 2)

avabodhato. Khaṇato pana udayabbayadassanena paṭiccasamuppannā dhammā pākaṭā honti saṅkhata-lakkhaṇâvabodhato. Udayabbayavanto hi saṅkhatā, te ca paṭiccasamuppannā ti.

CST729

102

Paccayato c’assa udayadassanena ekattanayo pākaṭo hoti, hetuphala-sambandhena santānassa anupacchedâvabodhato, atha suṭṭhutaraṃ ucchedadiṭṭhiṃ pajahati. Khaṇato udayadassanena nānattanayo pākaṭo hoti, navanavānaṃ uppādâvabodhato, atha suṭṭhutaraṃ sassatadiṭṭhiṃ pajahati. Paccayato c’assa udayabbayadassanena abyāpāranayo pākaṭo hoti, dhammānaṃ avasavattibhāvâvabodhato, atha suṭṭhutaraṃ attadiṭṭhiṃ pajahati. Paccayato pana udayadassanena evaṃdhammatānayo pākaṭo hoti, paccayânurūpena phalassa uppādâvabodhato, atha suṭṭhutaraṃ akiriyadiṭṭhiṃ pajahati.

CST730

103

Paccayato c’assa udayadassanena anattalakkhaṇaṃ pākaṭaṃ hoti, dhammānaṃ nirīhakatta-paccaya-paṭibaddha-vuttitâvabodhato. Khaṇato udayabbayadassanena aniccalakkhaṇaṃ pākaṭaṃ hoti, hutvā abhāvâvabodhato, pubbantâparanta-vivekâvabodhato ca. Dukkhalakkhaṇam pi pākaṭaṃ hoti, udayabbayehi paṭipīḷanâvabodhato. Sabhāvalakkhaṇam pi pākaṭaṃ hoti, udayabbaya-paricchinnâvabodhato. Sabhāvalakkhaṇe saṅkhatalakkhaṇassa tāvakālikattam pi pākaṭaṃ hoti, udayakkhaṇe vayassa, vayakkhaṇe ca udayassa abhāvâvabodhato ti.

CST731

104

Tass’evaṃ pākaṭībhūta-sacca-paṭiccasamuppāda-naya-lakkhaṇa-bhedassa “evaṃ kira nām’ime dhammā anuppannapubbā uppajjanti, uppannā nirujjhantī” ti niccanavā va hutvā saṅkhārā upaṭṭhahanti. Na kevalañ ca niccanavā, sūriyuggamane ussāvabindu viya udakabubbuḷo viya udake daṇḍarāji viya āragge sāsapo viya vijjuppādo viya ca parittaṭṭhāyino, māyā-marīci-supinanta-alātacakka-gandhabbanagara-pheṇa-kadali-ādayo viya assārā nissārā ti câpi upaṭṭhahanti.

Ettāvatā’nena “vayadhammam eva uppajjati, uppannañ ca vayaṃ upetī” ti iminā ākārena samapaññāsa lakkhaṇāni paṭivijjhitvā ṭhitaṃ udayabbayânupassanaṃ nāma taruṇa10-vipassanāñāṇaṃ adhigataṃ hoti, yassâdhigamā āraddhavipassako ti saṅkhaṃ gacchati.

Vipassanupakkilesakathā

CST732

105

Ath’assa imāya taruṇa-vipassanāya āraddhavipassakassa dasa vipassanupakkilesā uppajjanti. Vipassanupakkilesā hi paṭivedha-ppattassa ariyasāvakassa c’eva vippaṭipannakassa ca nikkhitta-kammaṭṭhānassa kusīta-puggalassa n’uppajjanti, sammāpaṭipannakassa pana yuttapayuttassa āraddhavipassakassa kulaputtassa uppajjanti yeva. Katame pana te dasa upakkilesā ti?

  1. Obhāso,
  2. ñāṇaṃ,
  3. pīti,
  4. passaddhi,
  5. sukhaṃ,
  6. adhimokkho,
  7. paggaho,
  8. upaṭṭhānaṃ,
  9. upekkhā,
  10. nikantī ti.

106

Vuttañ h’etaṃ:

“Kathaṃ dhammuddhacca-viggahitamānasaṃ hoti? Aniccato manasikaroto obhāso uppajjati, ‘obhāso dhammo’ ti obhāsaṃ āvajjati, tato vikkhepo uddhaccaṃ, tena uddhaccena viggahitamānaso aniccato upaṭṭhānaṃ yathābhūtaṃ nappajānāti, dukkhato… anattato upaṭṭhānaṃ yathābhūtaṃ nappajānāti”.

Tathā,

“Aniccato manasikaroto ñāṇaṃ uppajjati…pe… pīti… passaddhi… sukhaṃ… adhimokkho… paggaho… upaṭṭhānaṃ… upekkhā… nikanti uppajjati, ‘nikanti dhammo’ ti nikantiṃ āvajjati, tato vikkhepo uddhaccaṃ, tena uddhaccena viggahitamānaso aniccato upaṭṭhānaṃ yathābhūtaṃ nappajānāti, dukkhato… anattato upaṭṭhānaṃ yathābhūtaṃ nappajānātī” ti. (paṭi. ma. 2.6)

CST733

107

Tattha obhāso ti vipassanobhāso. Tasmiṃ uppanne yogâvacaro “na vata me ito pubbe evarūpo obhāso uppannapubbo, addhā maggappatto’smi phalapatto’smī” ti amaggam eva maggo ti, aphalam eva ca phalan ti gaṇhāti. Tassa amaggaṃ maggo ti aphalaṃ phalan ti gaṇhato vipassanāvīthi ukkantā nāma hoti. So attano mūlakammaṭṭhānaṃ vissajjetvā obhāsam eva assādento nisīdati.

108

So kho panâyaṃ obhāso kassaci bhikkhuno pallaṅkaṭṭhānamattam eva obhāsento uppajjati, kassaci antogabbhaṃ, kassaci bahigabbham pi, kassaci sakalavihāraṃ, gāvutaṃ, aḍḍhayojanaṃ, yojanaṃ, dviyojanaṃ, tiyojanaṃ…pe… kassaci pathavītalato yāva Akaniṭṭhabrahmalokā ekâlokaṃ kurumāno, Bhagavato pana dasasahassilokadhātuṃ obhāsento udapādi.

109

Evaṃ vemattatāya c’assa idaṃ vatthu. Cittalapabbate kira dvikuṭṭagehassa anto dve therā nisīdiṃsu. Taṃ divasañ ca kāḷapakkhuposatho hoti, megha-paṭalacchannā disā, rattibhāge caturaṅga-samannāgataṃ tamaṃ pavattati. Ath’eko thero āha “bhante, mayhaṃ idāni cetiyaṅgaṇamhi sīhâsane pañcavaṇṇāni kusumāni paññāyantī” ti. Taṃ itaro āha “anacchariyaṃ, āvuso, kathesi, mayhaṃ pan’etarahi mahāsamuddamhi yojanaṭṭhāne maccha-kacchapā paññāyantī” ti.

110

Ayaṃ pana vipassanupakkileso yebhuyyena samatha-vipassanā-lābhino uppajjati. So samāpatti-vikkhambhitānaṃ kilesānaṃ asamudācārato “arahā ahan” ti cittaṃ uppādeti. Uccavālikavāsī Mahānāgatthero viya, Haṃkanakavāsī Mahādattatthero viya, Cittalapabbate Niṅkapeṇṇaka-padhānagharavāsī Cūḷasumanatthero viya ca.

111

Tatr’idaṃ ekavatthu-paridīpanaṃ. Talaṅgaravāsī Dhammadinnatthero kira nāma eko pabhinna-paṭisambhido mahākhīṇāsavo mahato bhikkhusaṅghassa ovādadāyako ahosi. So ekadivasaṃ attano divāṭṭhāne nisīditvā “kin nu kho amhākaṃ ācariyassa Uccavālikavāsī-Mahānāgattherassa samaṇabhāvakiccaṃ matthakaṃ pattaṃ, no” ti āvajjanto puthujjanabhāvam ev’assa disvā “mayi agacchante puthujjana-kālakiriyam eva karissatī” ti ca ñatvā iddhiyā vehāsaṃ uppatitvā divāṭṭhāne nisinnassa therassa samīpe orohitvā vanditvā vattaṃ dassetvā ekamantaṃ nisīdi. “Kiṃ, āvuso Dhammadinna, akāle āgato’sī” ti ca vutte, “pañhaṃ, bhante, pucchituṃ āgato’mhī” ti āha. Tato “pucch’āvuso, jānamānā kathayissāmā” ti vutte pañhasahassaṃ pucchi.

112

Thero pucchitapucchitaṃ asajjamāno va kathesi. Tato “atitikkhaṃ vo, bhante, ñāṇaṃ, kadā tumhehi ayaṃ dhammo adhigato” ti vutte, “ito saṭṭhivassakāle, āvuso” ti āha. “Samādhim pi11, bhante, vaḷañjethā” ti? “Na yidaṃ, āvuso, bhāriyan” ti. “Tena hi, bhante, ekaṃ hatthiṃ māpethā” ti. Thero sabbasetaṃ hatthiṃ māpesi. “Idāni, bhante, yathā ayaṃ hatthī añcita-kaṇṇo pasārita-naṅguṭṭho soṇḍaṃ mukhe pakkhipitvā bheravaṃ koñcanādaṃ karonto tumhākaṃ abhimukho āgacchati, tathā naṃ karothā” ti. Thero tathā katvā vegena āgacchato hatthissa bheravaṃ ākāraṃ disvā uṭṭhāya palāyituṃ āraddho. Tam enaṃ khīṇāsavatthero hatthaṃ pasāretvā cīvarakaṇṇe gahetvā “bhante, khīṇāsavassa sārajjaṃ nāma hotī” ti āha.

113

So tamhi kāle attano puthujjanabhāvaṃ ñatvā “avassayo me, āvuso, Dhammadinna hohī” ti vatvā pādamūle ukkuṭikaṃ nisīdi. “Bhante, tumhākaṃ avassayo bhavissām’icc evâhaṃ āgato, mā cintayitthā” ti kammaṭṭhānaṃ kathesi. Thero kammaṭṭhānaṃ gahetvā caṅkamaṃ āruyha tatiye padavāre aggaphalaṃ arahattaṃ pāpuṇi. Thero kira dosacarito ahosi, evarūpā bhikkhū obhāse kampanti.

CST734

114

Ñāṇan ti vipassanāñāṇaṃ. Tassa kira rūpârūpadhamme tulayantassa tīrentassa vissaṭṭha-Inda-vajiram iva avihatavegaṃ tikhiṇaṃ sūraṃ ativisadaṃ ñāṇaṃ uppajjati.

115

Pītī ti vipassanāpīti. Tassa kira tasmiṃ samaye khuddakā pīti, khaṇikā pīti, okkantikā pīti, ubbegā pīti, pharaṇā pītī ti ayaṃ pañcavidhā pīti sakalasarīraṃ pūrayamānā uppajjati.

116

Passaddhī ti vipassanāpassaddhi. Tassa kira tasmiṃ samaye rattiṭṭhāne vā divāṭṭhāne vā nisinnassa kāyacittānaṃ n’eva daratho, na gāravaṃ, na kakkhaḷatā, na akammaññatā, na gelaññaṃ, na vaṅkatā hoti, atha kho pan’assa kāyacittāni passaddhāni lahūni mudūni kammaññāni suvisadāni ujukāni yeva honti. So imehi passaddhâdīhi anuggahita-kāyacitto tasmiṃ samaye amānusiṃ nāma ratiṃ anubhavati. Yaṃ sandhāya vuttaṃ:

“Suññâgāraṃ paviṭṭhassa santacittassa bhikkhuno,
amānusī rati hoti sammā dhammaṃ vipassato.

Yato yato sammasati khandhānaṃ udayabbayaṃ,
labhatī pītipāmojjaṃ amataṃ taṃ vijānatan” ti. (dha. pa. 373-374)

Evam assa imaṃ amānusiṃ ratiṃ sādhayamānā lahutâdi-sampayuttā passaddhi uppajjati.

117

Sukhan ti vipassanāsukhaṃ. Tassa kira tasmiṃ samaye sakalasarīraṃ abhisandayamānaṃ atipaṇītaṃ sukhaṃ uppajjati.

118

Adhimokkho ti saddhā. Vipassanāsampayuttā yeva hi’ssa cittacetasikānaṃ atisaya-pasādabhūtā balavatī saddhā uppajjati.

119

Paggaho ti vīriyaṃ. Vipassanāsampayuttam eva hi’ssa asithilaṃ anaccāraddhaṃ supaggahitaṃ vīriyaṃ uppajjati.

120

Upaṭṭhānan ti sati. Vipassanāsampayuttā yeva hi’ssa supaṭṭhitā supatiṭṭhitā nikhātā acalā pabbatarāja-sadisā sati uppajjati. So yaṃ yaṃ ṭhānaṃ āvajjati samannāharati manasikaroti paccavekkhati, taṃ taṃ ṭhānam assa okkhanditvā pakkhanditvā dibbacakkhuno paraloko viya satiyā upaṭṭhāti.

121

Upekkhā ti vipassanupekkhā c’eva āvajjanupekkhā ca. Tasmiṃ hi’ssa samaye sabbasaṅkhāresu majjhattabhūtā vipassanupekkhā pi balavatī uppajjati, manodvāre āvajjanupekkhā pi. Sā hi’ssa taṃ taṃ ṭhānaṃ āvajjantassa vissaṭṭha-Inda-vajiram iva, pattapuṭe pakkhitta12-tatta-nārāco viya ca sūrā tikhiṇā hutvā vahati.

122

Nikantī ti vipassanānikanti. Evaṃ obhāsâdi-paṭimaṇḍitāya hi’ssa vipassanāya ālayaṃ kurumānā sukhumā santâkārā nikanti uppajjati, yā nikanti-kileso ti pariggahetum pi na sakkā hoti.

123

Yathā ca obhāse, evaṃ etesu pi aññatarasmiṃ uppanne yogâvacaro “na vata me ito pubbe evarūpaṃ ñāṇaṃ uppannapubbaṃ, evarūpā pīti, passaddhi, sukhaṃ, adhimokkho, paggaho, upaṭṭhānaṃ, upekkhā, nikanti uppannapubbā, addhā maggappatto’smi phalappatto’smī” ti amaggam eva maggo ti aphalam eva ca phalan ti gaṇhāti. Tassa amaggaṃ maggo ti aphalaṃ phalan ti gaṇhato vipassanāvīthi ukkantā nāma hoti. So attano mūlakammaṭṭhānaṃ vissajjetvā nikantim eva assādento nisīdatī ti.

CST735

124

Ettha ca obhāsâdayo upakkilesa-vatthutāya upakkilesā ti vuttā, na akusalattā, nikanti pana upakkileso c’eva upakkilesavatthu ca. Vatthuvasen’eva c’ete dasa, gāhavasena pana samatiṃsa honti.

125

Kathaṃ? “Mama obhāso uppanno” ti gaṇhato hi diṭṭhigāho hoti, “manāpo vata obhāso uppanno” ti gaṇhato mānagāho, obhāsaṃ assādayato taṇhāgāho, iti obhāse diṭṭhi-māna-taṇhā-vasena tayo gāhā, tathā sesesu pī ti evaṃ gāhavasena samatiṃsa upakkilesā honti. Tesaṃ vasena akusalo abyatto yogâvacaro obhāsâdīsu kampati vikkhipati, obhāsâdīsu ekekaṃ “etaṃ mama, eso’ham asmi, eso me attā” ti (ma. ni. 1.241) samanupassati. Ten’āhu porāṇā:

“Obhāse c’eva ñāṇe ca pītiyā ca vikampati,
passaddhiyā sukhe c’eva yehi cittaṃ pavedhati,

Adhimokkhe ca paggāhe upaṭṭhāne ca kampati,
upekkhâvajjanāyañ ca upekkhāya nikantiyā” ti. (paṭi. ma. 2.7)

Maggāmaggavavatthānakathā

CST736

126

Kusalo pana paṇḍito byatto buddhisampanno yogâvacaro obhāsâdīsu uppannesu “ayaṃ kho me obhāso uppanno, so kho panâyaṃ anicco saṅkhato paṭiccasamuppanno khayadhammo vayadhammo virāgadhammo nirodhadhammo” ti, iti vā taṃ paññāya paricchindati upaparikkhati. Atha vā pan’assa evaṃ hoti “sace obhāso attā bhaveyya, ‘attā’ ti gahetuṃ vaṭṭeyya, anattā ca panâyaṃ ‘attā’ ti gahito, tasmā so avasavattanaṭṭhena anattā, hutvā abhāvaṭṭhena anicco, uppādavaya-paṭipīḷanaṭṭhena dukkho” ti sabbaṃ arūpasattake vuttanayena (XX.84-86) vitthāretabbaṃ. Yathā ca obhāse, evaṃ sesesu pi.

127

So evaṃ upaparikkhitvā obhāsaṃ “n’etaṃ mama, neso’ham asmi, na m’eso attā” ti (ma. ni. 1.241) samanupassati, ñāṇaṃ…pe… nikantiṃ “n’etaṃ mama, neso’ham asmi, na m’eso attā” ti samanupassati. Evaṃ samanupassanto obhāsâdīsu na kampati na vedhati. Ten’āhu porāṇā:

“Imāni dasa ṭhānāni paññāyassa pariccitā,
dhammuddhaccakusalo hoti na ca vikkhepaṃ gacchatī” ti. (paṭi. ma. 2.7)

128

So evaṃ vikkhepaṃ agacchanto taṃ samatiṃsavidhaṃ upakkilesajaṭaṃ vijaṭetvā obhāsâdayo dhammā na maggo, upakkilesa-vimuttaṃ pana vīthipaṭipannaṃ vipassanāñāṇaṃ maggo ti maggañ ca amaggañ ca vavatthapeti.

129

Tass’evaṃ “ayaṃ maggo, ayaṃ na maggo” ti maggañ ca amaggañ ca ñatvā ṭhitaṃ ñāṇaṃ maggâmaggañāṇadassana-visuddhī ti veditabbaṃ. Ettāvatā ca pana tena tiṇṇaṃ saccānaṃ vavatthānaṃ kataṃ hoti.

130

Kathaṃ? Diṭṭhivisuddhiyaṃ tāva nāmarūpassa vavatthāpanena dukkhasaccassa vavatthānaṃ kataṃ, kaṅkhāvitaraṇavisuddhiyaṃ paccayapariggahaṇena samudayasaccassa vavatthānaṃ, imissaṃ maggâmaggañāṇadassana-visuddhiyaṃ sammāmaggassa avadhāraṇena maggasaccassa vavatthānaṃ katan ti. Evaṃ lokiyen’eva tāva ñāṇena tiṇṇaṃ saccānaṃ vavatthānaṃ kataṃ hoti.

Iti sādhujanapāmojjatthāya kate Visuddhimagge
paññābhāvanâdhikāre Maggâmaggañāṇadassanavisuddhiniddeso nāma vīsatimo paricchedo.

  1. Kosambi pavattamānāya. ↩︎

  2. Kosambi chabbīsa ūnavīsati. ↩︎

  3. Kosambi janakâjanakā. ↩︎

  4. Kosambi javanârammaṇânurūpaṃ. ↩︎

  5. Kosambi pavaṅka°, so as next. ↩︎

  6. Kosambi dasa-dasakavasena. ↩︎

  7. Kosambi adds mudu phassavantaṃ. ↩︎

  8. Kosambi gacchant’adassanaṃ, but mahāni. 10 gacchanty adassanaṃ. ↩︎

  9. Kosambi °aṅkurarūpaṃ. ↩︎

  10. Kosambi paṭhama-taruṇa°. ↩︎

  11. Kosambi hi. ↩︎

  12. Kosambi pakkhanta°, B pakkhanda°. ↩︎