说智见清净品

Ñāṇadassanavisuddhiniddeso

Paṭhamamaggañāṇakathā

CST806

1

Ito paraṃ gotrabhuñāṇaṃ hoti. Taṃ maggassa āvajjana-ṭṭhāniyattā n’eva paṭipadā-ñāṇadassana-visuddhiṃ na ñāṇadassana-visuddhiṃ bhajati, antarā abbohārikam eva hoti, vipassanāsote patitattā pana vipassanā ti saṅkhaṃ gacchati.

2

Sotāpattimaggo sakadāgāmimaggo anāgāmimaggo arahattamaggo ti imesu pana catūsu maggesu ñāṇaṃ ñāṇadassanavisuddhi nāma.

3

Tattha paṭhamamaggañāṇaṃ tāva sampādetukāmena aññaṃ kiñci kātabbaṃ nāma natthi. Yañ hi anena kātabbaṃ siyā, taṃ anulomâvasānaṃ vipassanaṃ uppādentena katam eva.

4

Evaṃ uppanna-anulomañāṇassa pan’assa tehi tīhipi anulomañāṇehi attano balânurūpena thūla-thūle sacca-paṭicchādake tamamhi antaradhāpite, sabba-saṅkhāragatesu cittaṃ na pakkhandati na santiṭṭhati nâdhimuccati na sajjati na laggati na bajjhati, padumapalāsato udakaṃ viya patilīyati patikuṭati pativattati, sabbaṃ nimittârammaṇam pi sabbaṃ pavattârammaṇam pi palibodhato upaṭṭhāti.

5

Ath’assa sabbasmiṃ nimitta-pavattârammaṇe palibodhato upaṭṭhite anulomañāṇassa āsevanante animittaṃ appavattaṃ visaṅkhāraṃ nirodhaṃ nibbānaṃ ārammaṇaṃ kurumānaṃ, puthujjana-gottaṃ puthujjana-saṅkhaṃ puthujjana-bhūmiṃ atikkamamānaṃ, ariya-gottaṃ ariya-saṅkhaṃ ariya-bhūmiṃ okkamamānaṃ nibbānârammaṇe paṭhamâvaṭṭana-paṭhamâbhoga-paṭhamasamannāhāra-bhūtaṃ maggassa anantara-samanantarâsevana-upanissaya-natthi-vigatavasena chahi ākārehi paccayabhāvaṃ sādhayamānaṃ sikhāppattaṃ vipassanāya muddhabhūtaṃ apunar-āvaṭṭakaṃ uppajjati gotrabhuñāṇaṃ. Yaṃ sandhāya vuttaṃ:

“Kathaṃ bahiddhā vuṭṭhāna-vivaṭṭane paññā gotrabhuñāṇaṃ? Uppādaṃ abhibhuyyatī ti gotrabhu, pavattaṃ…pe… upāyāsaṃ abhibhuyyatī ti gotrabhu… bahiddhā saṅkhāra-nimittaṃ abhibhuyyatī ti gotrabhu.

Anuppādaṃ pakkhandatī ti gotrabhu, appavattaṃ…pe… anupāyāsaṃ nirodhaṃ nibbānaṃ pakkhandatī ti gotrabhu. Uppādaṃ abhibhuyyitvā anuppādaṃ pakkhandatī ti gotrabhū” ti (paṭi. ma. 1.59)

sabbaṃ vitthāretabbaṃ.

CST807

6

Tatrâyaṃ ekâvajjanena ekavīthiyaṃ pavattamānānam pi anuloma-gotrabhūnaṃ nānârammaṇe pavattanâkāra-dīpikā upamā. Yathā hi mahāmātikaṃ laṅghitvā paratīre patiṭṭhātukāmo puriso vegena dhāvitvā mātikāya orimatīre rukkhasākhāya bandhitvā olambitaṃ rajjuṃ vā yaṭṭhiṃ vā gahetvā ullaṅghitvā paratīra-ninna-poṇa-pabbhāra-kāyo hutvā paratīrassa uparibhāgaṃ patto taṃ muñcitvā vedhamāno paratīre patitvā saṇikaṃ patiṭṭhāti.

Evam evâyaṃ yogâvacaro pi bhava-yoni-gati-ṭṭhiti-nivāsānaṃ paratīra-bhūte nibbāne patiṭṭhātukāmo udayabbayânupassanâdinā vegena dhāvitvā attabhāva-rukkhasākhāya bandhitvā olambitaṃ rūpa-rajjuṃ vā vedanâdīsu aññatara-daṇḍaṃ vā aniccan ti vā dukkhan ti vā anattā ti vāti anulomâvajjanena gahetvā taṃ amuñcamāno va paṭhamena anuloma-cittena ullaṅghitvā, dutiyena paratīra-ninna-poṇa-pabbhāra-kāyo viya nibbāna-ninna-poṇa-pabbhāra-mānaso hutvā, tatiyena paratīrassa uparibhāgaṃ patto viya idāni pattabbassa nibbānassa āsanno hutvā tassa cittassa nirodhena taṃ saṅkhārârammaṇaṃ muñcitvā gotrabhu-cittena visaṅkhāre paratīra-bhūte nibbāne patati. Ekârammaṇe pana aladdhâsevanatāya vedhamāno so puriso viya na tāva suppatiṭṭhito hoti, tato maggañāṇena patiṭṭhātī ti.

CST808

7

Tattha anulomaṃ sacca-paṭicchādakaṃ kilesa-tamaṃ vinodetuṃ sakkoti, na nibbānam ārammaṇaṃ kātuṃ, gotrabhu nibbānam eva ārammaṇaṃ kātuṃ sakkoti, na sacca-paṭicchādakaṃ tamaṃ vinodetuṃ.

8

Tatrâyaṃ upamā. Eko kira cakkhumā puriso “nakkhattayogaṃ jānissāmī” ti rattibhāge nikkhamitvā candaṃ passituṃ uddhaṃ ullokesi, tassa valāhakehi paṭicchannattā cando na paññāyittha. Ath’eko vāto uṭṭhahitvā thūla-thūle valāhake viddhaṃseti, aparo majjhime, aparo sukhume ti¹, tato so puriso vigata-valāhake nabhe candaṃ disvā nakkhattayogaṃ aññāsi.

9

Tattha tayo valāhakā viya sacca-paṭicchādaka-thūla-majjhima-sukhumaṃ kilesandhakāraṃ, tayo vātā viya tīṇi anuloma-cittāni, cakkhumā puriso viya gotrabhuñāṇaṃ, cando viya nibbānaṃ, ekekassa vātassa yathākkamena valāhaka-viddhaṃsanaṃ viya ekekassa anuloma-cittassa sacca-paṭicchādaka-tama-vinodanaṃ, vigata-valāhake nabhe tassa purisassa visuddha-canda-dassanaṃ viya vigate sacca-paṭicchādake tame gotrabhuñāṇassa visuddha-nibbāna-dassanaṃ.

10

Yath’eva hi tayo vātā canda-paṭicchādake valāhake yeva viddhaṃsetuṃ sakkonti, na candaṃ daṭṭhuṃ, evaṃ anulomāni sacca-paṭicchādakaṃ tamañ ñeva vinodetuṃ sakkonti, na nibbānaṃ daṭṭhuṃ. Yathā so puriso candam eva daṭṭhuṃ sakkoti, na valāhake viddhaṃsetuṃ, evaṃ gotrabhuñāṇaṃ nibbānam eva daṭṭhuṃ sakkoti, na kilesa-tamaṃ vinodetuṃ. Ten’eva c’etaṃ maggassa āvajjanan ti vuccati.

11

Tañ hi anāvajjanam pi samānaṃ āvajjanaṭṭhāne ṭhatvā “evaṃ nibbattāhī” ti maggassa saññaṃ datvā viya nirujjhati. Maggo pi tena dinna-saññaṃ amuñcitvā va avīci-santati-vasena taṃ ñāṇaṃ anuppabandhamāno² anibbiddha-pubbaṃ apadālita-pubbaṃ lobhakkhandhaṃ dosakkhandhaṃ mohakkhandhaṃ nibbijjhamāno va padālayamāno va nibbattati.

CST809

12

Tatrâyaṃ upamā. Eko kira issāso aṭṭha-usabhamatte padese phalakasataṃ ṭhapāpetvā vatthena mukhaṃ veṭhetvā saraṃ sannahitvā cakkayante aṭṭhāsi. Añño puriso cakkayantaṃ āvijjhitvā, yadā issāsassa phalakaṃ abhimukhaṃ hoti, tadā tattha daṇḍakena saññaṃ deti. Issāso daṇḍaka-saññaṃ amuñcitvā va saraṃ khipitvā phalakasataṃ nibbijjhati.

13

Tattha daṇḍaka-saññaṃ viya gotrabhuñāṇaṃ, issāso viya maggañāṇaṃ, issāsassa daṇḍaka-saññaṃ amuñcitvā va phalakasata-nibbijjhanaṃ viya maggañāṇassa gotrabhuñāṇena dinna-saññaṃ amuñcitvā va nibbānaṃ ārammaṇaṃ katvā anibbiddha-pubbānaṃ apadālita-pubbānaṃ lobha-dosa-moha-kkhandhānaṃ nibbijjhana-padālanaṃ.

CST810

14

Na kevalañ c’esa maggo lobhakkhandhâdīnaṃ nibbijjhanam eva karoti, api ca kho anamatagga-saṃsāravaṭṭa-dukkhasamuddaṃ soseti, sabba-apāya-dvārāni pidahati, sattannaṃ ariya-dhanānaṃ sammukhībhāvaṃ karoti, aṭṭhaṅgikaṃ micchāmaggaṃ pajahati, sabba-vera-bhayāni vūpasameti, Sammāsambuddhassa orasa-putta-bhāvaṃ upaneti, aññesañ ca anekasatānaṃ ānisaṃsānaṃ paṭilābhāya saṃvattatī ti. Evaṃ anekânisaṃsa-dāyakena sotāpattimaggena sampayuttaṃ ñāṇaṃ sotāpattimagge ñāṇan ti.

Paṭhamamaggañāṇaṃ niṭṭhitaṃ.

Sotāpannapuggalakathā

CST811

15

Imassa pana ñāṇassa anantaraṃ tass’eva vipāka³-bhūtāni dve tīṇi vā phalacittāni uppajjanti. Anantara-vipākattā yeva hi lokuttara-kusalānaṃ

“Samādhim ānantarikañ ñam āhū” ti (su. ni. 228)

ca

“Dandhaṃ ānantarikaṃ pāpuṇāti āsavānaṃ khayāyā” ti (a. ni. 4.162)

ca ādi vuttaṃ.

16

Keci pana “ekaṃ dve tīṇi cattāri vā phalacittānī” ti vadanti, taṃ na gahetabbaṃ. Anulomassa hi āsevanante gotrabhuñāṇaṃ uppajjati, tasmā sabbantimena paricchedena dvīhi anuloma-cittehi bhavitabbaṃ, — na hi ekaṃ āsevana-paccayaṃ labhati. Satta-citta-paramā ca ekâvajjanavīthi⁴, tasmā yassa dve anulomāni, tassa tatiyaṃ gotrabhu catutthaṃ maggacittaṃ tīṇi phalacittāni honti, yassa tīṇi anulomāni, tassa catutthaṃ gotrabhu pañcamaṃ maggacittaṃ dve phalacittāni honti. Tena vuttaṃ “dve tīṇi vā phalacittāni uppajjantī” ti.

17

Keci pana “yassa cattāri anulomāni, tassa pañcamaṃ gotrabhu chaṭṭhaṃ maggacittaṃ ekaṃ phalacittan” ti vadanti, taṃ pana yasmā catutthaṃ pañcamaṃ vā appeti, na tato paraṃ, āsanna-bhavaṅgattā ti (cf. IV.76-77) paṭikkhittaṃ, tasmā na sārato paccetabbaṃ.

CST812

18

Ettāvatā ca pan’esa sotāpanno nāma dutiyo ariyapuggalo hoti, bhusaṃ pamatto pi hutvā sattakkhattuṃ devesu ca manussesu ca sandhāvitvā saṃsaritvā dukkhass’antassa karaṇa-samattho hoti.

19

Phala-pariyosāne pan’assa cittaṃ bhavaṅgaṃ otarati. Tato bhavaṅgaṃ upacchinditvā magga-paccavekkhaṇatthāya uppajjati manodvārâvajjanaṃ, tasmiṃ niruddhe paṭipāṭiyā satta magga-paccavekkhaṇa-javanānī ti. Puna bhavaṅgaṃ otaritvā ten’eva nayena phalâdīnaṃ paccavekkhaṇatthāya āvajjanâdīni uppajjanti, yesaṃ uppattiyā esa maggaṃ paccavekkhati, phalaṃ paccavekkhati, pahīna-kilese paccavekkhati, avasiṭṭha-kilese paccavekkhati, nibbānaṃ paccavekkhati.

20

So hi “iminā vatâhaṃ maggena āgato” ti maggaṃ paccavekkhati, tato “ayaṃ me ānisaṃso laddho” ti phalaṃ paccavekkhati, tato “ime nāma me kilesā pahīnā” ti pahīna-kilese paccavekkhati, tato “ime nāma me kilesā avasiṭṭhā” ti upari-maggattaya-vajjhe kilese paccavekkhati, avasāne ca “ayaṃ me dhammo ārammaṇato paṭividdho” ti amataṃ nibbānaṃ paccavekkhati. Iti sotāpannassa ariyasāvakassa pañca paccavekkhaṇāni honti.

21

Yathā ca sotāpannassa, evaṃ sakadāgāmi-anāgāmīnam pi. Arahato pana avasiṭṭha-kilesa-paccavekkhaṇaṃ nāma natthī ti. Evaṃ sabbāni pi ekūnavīsati paccavekkhaṇāni nāma. Ukkaṭṭha-paricchedo yeva c’eso. Pahīnâvasiṭṭha-kilesa-paccavekkhaṇañ hi sekkhānam pi hoti vā na vā. Tassa hi paccavekkhaṇassa abhāven’eva Mahānāmo Bhagavantaṃ pucchi:

“Ko su nāma me dhammo ajjhattaṃ appahīno, yena me ekadā lobhadhammā pi cittaṃ pariyādāya tiṭṭhantī” ti (ma. ni. 1.175)

sabbaṃ vitthārato veditabbaṃ.

Dutiyamaggañāṇakathā

CST813

22

Evaṃ paccavekkhitvā pana so sotāpanno ariyasāvako tasmiñ ñeva vā āsane nisinno, aparena vā samayena kāmarāga-byāpādānaṃ tanubhāvāya dutiyāya bhūmiyā pattiyā yogaṃ karoti. So indriya-bala-bojjhaṅgāni samodhānetvā, tad eva rūpa-vedanā-saññā-saṅkhāra-viññāṇa-bhedaṃ saṅkhāragataṃ “aniccaṃ dukkham anattā” ti ñāṇena parimaddati, parivatteti, vipassanā-vīthiṃ ogāhati.

23

Tass’evaṃ paṭipannassa vuttanayen’eva saṅkhārupekkhâvasāne ekâvajjanena anuloma-gotrabhu-ñāṇesu uppannesu gotrabhu-anantaraṃ sakadāgāmimaggo uppajjati, tena sampayuttaṃ ñāṇaṃ sakadāgāmimagge ñāṇan ti.

Dutiyañāṇaṃ niṭṭhitaṃ.

Tatiyamaggañāṇakathā

CST814

24

Imassâpi ñāṇassa anantaraṃ vuttanayen’eva phalacittāni veditabbāni. Ettāvatā c’esa sakadāgāmī nāma catuttho ariyapuggalo hoti, sakiṃd eva imaṃ lokaṃ āgantvā dukkhass’anta-karaṇa-samattho. Tato paraṃ paccavekkhaṇaṃ vuttanayam eva.

25

Evaṃ paccavekkhitvā ca so sakadāgāmī ariyasāvako tasmiñ ñeva vā āsane nisinno, aparena vā samayena kāmarāga-byāpādānaṃ anavasesa-ppahānāya tatiyāya bhūmiyā pattiyā yogaṃ karoti. So indriya-bala-bojjhaṅgāni samodhānetvā, tad eva saṅkhāragataṃ “aniccaṃ dukkham anattā” ti ñāṇena parimaddati, parivatteti, vipassanā-vīthiṃ ogāhati.

26

Tass’evaṃ paṭipannassa vuttanayen’eva saṅkhārupekkhâvasāne ekâvajjanena anuloma-gotrabhu-ñāṇesu uppannesu gotrabhu-anantaraṃ anāgāmimaggo uppajjati, tena sampayuttaṃ ñāṇaṃ anāgāmimagge ñāṇan ti.

Tatiyañāṇaṃ niṭṭhitaṃ.

Catutthamaggañāṇakathā

CST815

27

Imassa pi ñāṇassa anantaraṃ vuttanayen’eva phalacittāni veditabbāni. Ettāvatā c’esa anāgāmī nāma chaṭṭho ariyapuggalo hoti, opapātiko tattha parinibbāyī anāvattidhammo, paṭisandhivasena imaṃ lokaṃ puna anāgantā. Tato paraṃ paccavekkhaṇaṃ vuttanayam eva.

28

Evaṃ paccavekkhitvā ca so anāgāmī ariyasāvako tasmiñ ñeva vā āsane nisinno, aparena vā samayena rūpârūparāga-māna-uddhacca-avijjānaṃ anavasesa-ppahānāya catutthāya bhūmiyā pattiyā yogaṃ karoti. So indriya-bala-bojjhaṅgāni samodhānetvā, tad eva saṅkhāragataṃ “aniccaṃ dukkham anattā” ti ñāṇena parimaddati, parivatteti, vipassanā-vīthiṃ ogāhati.

29

Tass’evaṃ paṭipannassa vuttanayen’eva saṅkhārupekkhâvasāne ekâvajjanena anuloma-gotrabhu-ñāṇesu uppannesu gotrabhu-anantaraṃ arahattamaggo uppajjati, tena sampayuttaṃ ñāṇaṃ arahattamagge ñāṇan ti.

Catutthañāṇaṃ niṭṭhitaṃ.

Arahantapuggalakathā

CST816

30

Imassa pi ñāṇassa anantaraṃ vuttanayen’eva phalacittāni veditabbāni. Ettāvatā c’esa arahā nāma aṭṭhamo ariyapuggalo hoti mahākhīṇāsavo antimadeha-dhārī ohitabhāro anuppatta-sadattho parikkhīṇa-bhavasaṃyojano sammādaññā-vimutto sadevakassa lokassa agga-dakkhiṇeyyo ti.

31

Iti yaṃ taṃ vuttaṃ

“Sotāpattimaggo sakadāgāmimaggo anāgāmimaggo arahattamaggo ti imesu pana catūsu maggesu ñāṇaṃ ñāṇadassanavisuddhi nāmā” ti (XXII.2)

taṃ imāni iminā anukkamena pattabbāni cattāri ñāṇāni sandhāya vuttaṃ.

Bodhipakkhiyakathā

CST817

32

Idāni imissā yeva catuñāṇāya ñāṇadassana-visuddhiyā ānubhāva-vijānanatthaṃ,

Paripuṇṇa-bodhipakkhiya-bhāvo vuṭṭhāna-balasamāyogo,
ye yena pahātabbā dhammā tesaṃ pahānañ ca,

Kiccāni pariññâdīni yāni vuttāni abhisamayakāle,
tāni ca yathāsabhāvena jānitabbāni sabbānī ti.

CST818

33

Tattha paripuṇṇa-bodhipakkhiya-bhāvo ti bodhipakkhiyānaṃ paripuṇṇa-bhāvo. Cattāro satipaṭṭhānā, cattāro sammappadhānā, cattāro iddhipādā, pañc’indriyāni, pañca balāni, satta bojjhaṅgā, ariyo aṭṭhaṅgiko maggo ti hi ime sattatiṃsa dhammā bujjhanaṭṭhena bodho ti laddhanāmassa ariyamaggassa pakkhe bhavattā bodhipakkhiyā nāma. Pakkhe bhavattā ti upakārabhāve ṭhitattā.

CST819

34

Tesu tesu ārammaṇesu okkhanditvā pakkhanditvā upaṭṭhānato paṭṭhānaṃ⁵, sati yeva paṭṭhānaṃ satipaṭṭhānaṃ. Kāya-vedanā-citta-dhammesu pan’assā asubha-dukkha-anicca-anattâkāra-gahaṇavasena subha-sukha-nicca-attasaññā-pahānakicca-sādhanavasena ca pavattito catudhā bhedo hoti, tasmā cattāro satipaṭṭhānā ti vuccanti.

CST820

35

Padahanti etenā ti padhānaṃ, sobhanaṃ padhānaṃ sammappadhānaṃ, sammā vā padahanti etenā ti sammappadhānaṃ, sobhanaṃ vā taṃ kilesa-virūpatta-virahato padhānañ ca hita-sukha-nipphādakattena seṭṭhabhāvâvahanato padhānabhāva-kāraṇato cā ti sammappadhānaṃ. Vīriyass’etaṃ adhivacanaṃ. Tayidaṃ uppannânuppannānaṃ akusalānaṃ pahānânuppatti-kiccaṃ, anuppannuppannānañ ca kusalānaṃ uppatti-ṭṭhiti-kiccaṃ sādhayatī ti catubbidhaṃ hoti, tasmā cattāro sammappadhānā ti vuccanti.

CST821

36

Pubbe vuttena (XII.44) ijjhanaṭṭhena iddhi, tassā sampayuttāya pubbaṅgamaṭṭhena, phalabhūtāya pubbabhāga-kāraṇaṭṭhena ca iddhiyā pādo ti iddhipādo. So chandâdi-vasena catubbidho hoti, tasmā cattāro iddhipādā ti vuccanti. Yath’āha:

“Cattāro iddhipādā: chandiddhipādo cittiddhipādo vīriyiddhipādo vīmaṃsiddhipādo” ti. (vibha. 457)

Ime lokuttarā va. Lokiyā pana,

“Chandañ ce bhikkhu adhipatiṃ karitvā labhati samādhiṃ, labhati cittassa ekaggataṃ, ayaṃ vuccati chandasamādhī” ti (vibha. 432)

ādivacanato chandâdi-adhipati-vasena paṭiladdhadhammā pi honti.

CST822

37

Assaddhiya-kosajja-pamāda-vikkhepa-sammohānaṃ abhibhavanato abhibhavana-saṅkhātena adhipatiyaṭṭhena indriyaṃ, assaddhiyâdīhi ca anabhibhavanīyato akampiyaṭṭhena balaṃ. Tad ubhayam pi saddhâdi-vasena pañcavidhaṃ hoti, tasmā pañc’indriyāni pañca balānī ti vuccanti.

CST823

38

Bujjhanaka-sattassa pana aṅgabhāvena sati-ādayo satta bojjhaṅgā. Niyyānikaṭṭhena ca sammādiṭṭhi-ādayo aṭṭha maggaṅgā honti. Tena vuttaṃ “satta bojjhaṅgā ariyo aṭṭhaṅgiko maggo” ti.

CST824

39

Iti ime sattatiṃsa bodhipakkhiya-dhammā pubbabhāge lokiya-vipassanāya vattamānāya,

• cuddasavidhena kāyaṃ pariggaṇhato ca kāyânupassanā-satipaṭṭhānaṃ,
• navavidhena vedanaṃ pariggaṇhato ca vedanânupassanā-satipaṭṭhānaṃ,
• soḷasavidhena cittaṃ pariggaṇhato ca cittânupassanā-satipaṭṭhānaṃ,
• pañcavidhena dhamme pariggaṇhato ca dhammânupassanā-satipaṭṭhānaṃ,
• imasmiṃ attabhāve anuppanna-pubbaṃ parassa uppannaṃ akusalaṃ disvā “yathā paṭipannass’etaṃ uppannaṃ, na tathā paṭipajjissāmi, evaṃ me etaṃ n’uppajjissatī” ti, tassa anuppādāya vāyamana-kāle paṭhamaṃ sammappadhānaṃ,
• attano samudācārappattaṃ akusalaṃ disvā tassa pahānāya vāyamana-kāle dutiyaṃ,
• imasmiṃ attabhāve anuppanna-pubbaṃ jhānaṃ vā vipassanaṃ vā uppādetuṃ vāyamantassa tatiyaṃ,
• uppannaṃ yathā na parihāyati, evaṃ punappunaṃ uppādentassa catutthaṃ sammappadhānaṃ,
• chandaṃ dhuraṃ katvā kusaluppādana-kāle chandiddhipādo…
• micchāvācāya viramaṇa-kāle sammāvācā ti

evaṃ nānācittesu labbhanti, imesaṃ pana catunnaṃ ñāṇānaṃ uppatti-kāle ekacitte labbhanti. Phalakkhaṇe ṭhapetvā cattāro sammappadhāne avasesā tettiṃsa labbhanti.

CST825

40

Evaṃ ekacitte labbhamānesu c’etesu ekā va nibbānârammaṇā sati kāyâdīsu subhasaññâdi-ppahānakicca-sādhanavasena cattāro satipaṭṭhānā ti vuccati, ekam eva ca vīriyaṃ anuppannānaṃ anuppādâdi-kicca-sādhanavasena cattāro sammappadhānā ti vuccati, sesesu pana hāpana-vaḍḍhanaṃ natthi.

CST826

41

Api ca tesu,

Nava ekavidhā, eko dvedhā’tha catu-pañcadhā,
aṭṭhadhā navadhā c’eva, iti chaddhā bhavanti te.

42

Nava ekavidhā ti chando, cittaṃ, pīti, passaddhi, upekkhā, saṅkappo, vācā, kammanto, ājīvo ti ime nava chandiddhipādâdi-vasena ekavidhā va honti, na aññaṃ koṭṭhāsaṃ bhajanti. Eko dvedhā ti saddhā indriya-bala-vasena dvedhā ṭhitā. Atha catu-pañcadhā ti ath’añño eko catudhā, añño pañcadhā ṭhito ti attho, tattha samādhi eko indriya-bala-bojjhaṅga-maggaṅga-vasena catudhā ṭhito, paññā tesañ ca catunnaṃ iddhipāda-koṭṭhāsassa ca vasena pañcadhā. Aṭṭhadhā navadhā c’evā ti aparo eko aṭṭhadhā, eko navadhā ṭhito ti attho, catusatipaṭṭhāna-indriya-bala-bojjhaṅga-maggaṅga-vasena sati aṭṭhadhā ṭhitā, catusammappadhāna-iddhipāda-indriya-bala-bojjhaṅga-maggaṅga-vasena vīriyaṃ navadhā ti.

43

Evaṃ,

Cuddas’eva asambhinnā hont’ete bodhipakkhiyā,
koṭṭhāsato sattavidhā sattatiṃsa-ppabhedato.

Sakicca-nipphādanato sarūpena ca vuttito,
sabbe va ariyamaggassa sambhave sambhavanti te ti.

Evaṃ tāv’ettha paripuṇṇa-bodhipakkhiya-bhāvo jānitabbo.

Vuṭṭhānabalasamāyogakathā

CST827

44

Vuṭṭhāna-balasamāyogo ti vuṭṭhānañ c’eva balasamāyogo ca. Lokiyavipassanā hi nimittârammaṇattā c’eva pavatti⁶-kāraṇassa ca samudayassa asamucchindanato n’eva nimittā na pavattā vuṭṭhāti. Gotrabhuñāṇaṃ samudayassa asamucchindanato pavattā na vuṭṭhāti, nibbānârammaṇato pana nimittā vuṭṭhātī ti ekato vuṭṭhānaṃ hoti. Ten’āha:

“Bahiddhā vuṭṭhāna-vivaṭṭane paññā gotrabhuñāṇan” ti. (paṭi. ma. mātikā 1.10)

Tathā,

“Uppādā vivaṭṭitvā anuppādaṃ pakkhandatī ti gotrabhu, pavattā vivaṭṭitvā” ti (paṭi. ma. 1.59)

sabbaṃ veditabbaṃ. Imāni pana cattāri pi ñāṇāni animittârammaṇattā nimittato vuṭṭhahanti, samudayassa samucchindanato pavattā vuṭṭhahantī ti dubhato vuṭṭhānāni honti.

45

Tena vuttaṃ:

“Kathaṃ dubhato vuṭṭhāna-vivaṭṭane paññā magge ñāṇaṃ? Sotāpatti-maggakkhaṇe dassanaṭṭhena sammādiṭṭhi micchādiṭṭhiyā vuṭṭhāti, tadanuvattaka-kilesehi ca khandhehi ca vuṭṭhāti, bahiddhā ca sabbanimittehi vuṭṭhāti, tena vuccati dubhato vuṭṭhāna-vivaṭṭane paññā magge ñāṇaṃ. Abhiniropanaṭṭhena sammāsaṅkappo micchāsaṅkappā…pe… Pariggahaṭṭhena sammāvācā micchāvācāya… Samuṭṭhānaṭṭhena sammākammanto… Vodānaṭṭhena sammā-ājīvo… Paggahaṭṭhena sammāvāyāmo… Upaṭṭhānaṭṭhena sammāsati… Avikkhepaṭṭhena sammāsamādhi micchāsamādhito vuṭṭhāti, tadanuvattaka-kilesehi ca khandhehi ca vuṭṭhāti, bahiddhā ca sabbanimittehi vuṭṭhāti, tena vuccati dubhato vuṭṭhāna-vivaṭṭane paññā magge ñāṇan ti.

Sakadāgāmi-maggakkhaṇe dassanaṭṭhena sammādiṭṭhi…pe… Avikkhepaṭṭhena sammāsamādhi oḷārikā kāmarāga-saṃyojanā paṭigha-saṃyojanā, oḷārikā kāmarāgânusayā paṭighânusayā vuṭṭhāti…pe…

Anāgāmi-maggakkhaṇe dassanaṭṭhena sammādiṭṭhi…pe… Avikkhepaṭṭhena sammāsamādhi anusahagatā kāmarāga-saṃyojanā paṭigha-saṃyojanā, anusahagatā kāmarāgânusayā paṭighânusayā vuṭṭhāti…pe…

Arahatta-maggakkhaṇe dassanaṭṭhena sammādiṭṭhi…pe… Avikkhepaṭṭhena sammāsamādhi rūparāgā arūparāgā mānā uddhaccā avijjāya, mānânusayā bhavarāgânusayā avijjânusayā vuṭṭhāti, tadanuvattaka-kilesehi ca khandhehi ca vuṭṭhāti, bahiddhā ca sabbanimittehi vuṭṭhāti, tena vuccati dubhato vuṭṭhāna-vivaṭṭane paññā magge ñāṇan” ti. (paṭi. ma. 1.61)

CST828

46

Lokiyānañ ca aṭṭhannaṃ samāpattīnaṃ bhāvanākāle samathabalaṃ adhikaṃ hoti, aniccânupassanâdīnaṃ bhāvanākāle vipassanābalaṃ, ariyamaggakkhaṇe pana yuganaddhā te dhammā pavattanti aññamaññaṃ anativattanaṭṭhena, tasmā imesu catūsu pi ñāṇesu ubhaya-balasamāyogo hoti. Yath’āha:

“Uddhaccasahagata-kilesehi ca khandhehi ca vuṭṭhahato cittassa ekaggatā avikkhepo samādhi nirodhagocaro, avijjāsahagata-kilesehi ca khandhehi ca vuṭṭhahato anupassanaṭṭhena vipassanā nirodhagocarā. Iti vuṭṭhānaṭṭhena samatha-vipassanā ekarasā honti, yuganaddhā honti, aññamaññaṃ nâtivattantī ti, tena vuccati vuṭṭhānaṭṭhena samatha-vipassanaṃ yuganaddhaṃ bhāvetī” ti. (paṭi. ma. 2.5)

Evam ettha vuṭṭhāna-balasamāyogo veditabbo.

Pahātabbadhammapahānakathā

CST829

47

Ye yena pahātabbā dhammā tesaṃ pahānañ cā ti imesu pana catūsu ñāṇesu ye dhammā yena ñāṇena pahātabbā, tesaṃ pahānañ ca jānitabbaṃ. Etāni hi yathāyogaṃ saṃyojana-kilesa-micchatta-lokadhamma-macchariya-vipallāsa-gantha-agati-āsava-ogha-yoga-nīvaraṇa-parāmāsa-upādāna-anusaya-mala-akusalakammapatha-cittuppāda-saṅkhātānaṃ dhammānaṃ pahānakarāni.

48

Tattha saṃyojanānī ti khandhehi khandhānaṃ, phalena kammassa, dukkhena vā sattānaṃ saṃyojakattā rūparāgâdayo dasa dhammā vuccanti. Yāvañ hi te, tāva etesaṃ anuparamo ti. Tatrâpi rūparāgo arūparāgo māno uddhaccaṃ avijjā ti ime pañca uddhaṃ-nibbattanaka-khandhâdi-saṃyojakattā uddhaṃbhāgiya-saṃyojanāni nāma, sakkāyadiṭṭhi vicikicchā sīlabbataparāmāso kāmarāgo paṭigho ti ime pañca adho-nibbattanaka-khandhâdi-saṃyojakattā adhobhāgiya-saṃyojanāni nāma.

49

Kilesā ti sayaṃ saṃkiliṭṭhattā sampayutta-dhammānañ ca saṃkilesikattā lobho doso moho māno diṭṭhi vicikicchā thinaṃ uddhaccaṃ ahirikaṃ anottappan ti ime dasa dhammā.

50

Micchattā ti micchāpavattanato micchādiṭṭhi micchāsaṅkappo micchāvācā micchākammanto micchā-ājīvo micchāvāyāmo micchāsati micchāsamādhī ti ime aṭṭha dhammā, micchāvimutti-micchāñāṇehi vā saddhiṃ dasa.

51

Lokadhammā ti lokappavattiyā sati anuparama-dhammakattā lābho alābho yaso ayaso sukhaṃ dukkhaṃ nindā pasaṃsā ti ime aṭṭha. Idha pana kāraṇopacārena lābhâdi-vatthukassa anunayassa alābhâdi-vatthukassa paṭighassa c’etaṃ lokadhamma-ggahaṇena gahaṇaṃ katan ti veditabbaṃ.

52

Macchariyānī ti āvāsa-macchariyaṃ kula-macchariyaṃ lābha-macchariyaṃ dhamma-macchariyaṃ vaṇṇa-macchariyan ti imāsu āvāsâdīsu aññesaṃ sādhāraṇabhāvaṃ asahanâkārena pavattāni pañca macchariyāni.

53

Vipallāsā ti anicca-dukkha-anatta-asubhesu yeva vatthūsu “niccaṃ sukhaṃ attā subhan” ti evaṃ pavatto saññā-vipallāso citta-vipallāso diṭṭhi-vipallāso ti ime tayo.

54

Ganthā ti nāmakāyassa c’eva rūpakāyassa ca ganthanato abhijjhâdayo cattāro. Tathā hi te,

“Abhijjhā kāyagantho, byāpādo kāyagantho, sīlabbataparāmāso kāyagantho, idaṃsaccâbhiniveso kāyagantho” (vibha.)

icc eva vuttā.

55

Agatī ti chanda-dosa-moha-bhayehi akattabba-karaṇassa kattabbâkaraṇassa ca adhivacanaṃ. Tañ hi ariyehi agantabbattā agatī ti vuccati.

56

Āsavā ti ārammaṇavasena ā gotrabhuto ā bhavaggato ca savanā, asaṃvutehi vā dvārehi ghaṭachiddehi udakaṃ viya savanato, niccapaggharaṇaṭṭhena saṃsāradukkhassa vā savanato, kāmarāga-bhavarāga-micchādiṭṭhi-avijjānam etaṃ adhivacanaṃ. Bhavasāgare ākaḍḍhanaṭṭhena duruttaraṇaṭṭhena ca oghā ti pi, ārammaṇa-viyogassa c’eva dukkha-viyogassa ca appadānato yogā ti pi tesañ ñeva adhivacanaṃ.

57

Nīvaraṇānī ti cittassa āvaraṇa-nīvaraṇa-paṭicchādanaṭṭhena kāmacchandâdayo pañca.

58

Parāmāso ti tassa tassa dhammassa sabhāvaṃ atikkamma parato abhūtaṃ sabhāvaṃ āmasanâkārena pavattanato micchādiṭṭhiyā etaṃ adhivacanaṃ.

59

Upādānānī ti sabbâkārena Paṭiccasamuppādaniddese vuttāni (XVII.240-41) kāmupādānâdīni cattāri.

60

Anusayā ti thāmagataṭṭhena kāmarāgânusayo, paṭigha-māna-diṭṭhi-vicikicchā-bhavarāga-avijjânusayo ti evaṃ vuttā kāmarāgâdayo satta. Te hi thāmagatattā punappunaṃ kāmarāgâdīnaṃ uppatti-hetu-bhāvena anusenti yevā ti anusayā.

61

Malā ti telañjana-kalalaṃ viya sayañ ca asuddhattā, aññesañ ca asuddhabhāva-karaṇato lobha-dosa-mohā tayo.

62

Akusalakammapathā ti akusalakamma-bhāvena c’eva duggatīnañ ca patha-bhāvena, pāṇâtipāto adinnâdānaṃ kāmesu micchācāro musāvādo pisuṇavācā pharusavācā samphappalāpo abhijjhā byāpādo micchādiṭṭhī ti ime dasa.

63

Akusalacittuppādā ti lobhamūlā aṭṭha dosamūlā dve mohamūlā dve ti ime dvādasa.

CST830

64

Iti etesaṃ saṃyojanâdīnaṃ dhammānaṃ etāni yathāyogaṃ pahānakarāni. Kathaṃ? Saṃyojanesu tāva sakkāyadiṭṭhi vicikicchā sīlabbataparāmāso apāya-gamanīyā ca kāmarāga-paṭighā ti ete pañca dhammā paṭhamañāṇa-vajjhā, sesā kāmarāga-paṭighā oḷārikā dutiyañāṇa-vajjhā, sukhumā tatiyañāṇa-vajjhā, rūparāgâdayo pañca pi catutthañāṇa-vajjhā eva. Parato pi ca yattha yattha eva-saddena niyamaṃ na karissāma, tattha tattha yaṃ yaṃ upariñāṇa-vajjho ti vakkhāma, so so purimañāṇehi hatâpāya-gamanīyâdi-bhāvo va hutvā upariñāṇa-vajjho hotī ti veditabbo.

65

Kilesesu diṭṭhi-vicikicchā paṭhamañāṇa-vajjhā, doso tatiyañāṇa-vajjho, lobha-moha-māna-thina-uddhacca-ahirika-anottappāni catutthañāṇa-vajjhāni.

66

Micchattesu micchādiṭṭhi musāvādo micchākammanto micchā-ājīvo ti ime paṭhamañāṇa-vajjhā, micchāsaṅkappo pisuṇavācā pharusavācā ti ime tatiyañāṇa-vajjhā, — cetanā yeva c’ettha vācā ti veditabbā, — samphappalāpa-micchāvāyāma-sati-samādhi-vimutti-ñāṇāni catutthañāṇa-vajjhāni.

67

Lokadhammesu paṭigho tatiyañāṇa-vajjho, anunayo catutthañāṇa-vajjho. Yase ca pasaṃsāya ca anunayo catutthañāṇa-vajjho ti eke. Macchariyāni paṭhamañāṇa-vajjhān’eva.

68

Vipallāsesu anicce niccaṃ, anattani attā ti ca saññā-citta-diṭṭhi-vipallāsā, dukkhe sukhaṃ, asubhe subhan ti diṭṭhi-vipallāso cā ti ime paṭhamañāṇa-vajjhā, asubhe subhan ti saññā-citta-vipallāsā tatiyañāṇa-vajjhā, dukkhe sukhan ti saññā-citta-vipallāsā catutthañāṇa-vajjhā.

69

Ganthesu sīlabbataparāmasa-idaṃsaccâbhinivesa-kāyaganthā paṭhamañāṇa-vajjhā, byāpāda-kāyagantho tatiyañāṇa-vajjho, itaro catutthañāṇa-vajjho. Agati paṭhamañāṇa-vajjhā va.

70

Āsavesu diṭṭhâsavo paṭhamañāṇa-vajjho, kāmâsavo tatiyañāṇa-vajjho, itare dve catutthañāṇa-vajjhā. Ogha-yogesu pi es’eva nayo.

71

Nīvaraṇesu vicikicchā-nīvaraṇaṃ paṭhamañāṇa-vajjhaṃ, kāmacchando byāpādo kukkuccan ti tīṇi tatiyañāṇa-vajjhāni, thinamiddha-uddhaccāni catutthañāṇa-vajjhāni. Parāmāso paṭhamañāṇa-vajjho va.

72

Upādānesu sabbesam pi lokiyadhammānaṃ vatthukāma-vasena kāmā ti āgatattā rūpârūpa-rāgo pi kāmupādāne patati, tasmā taṃ catutthañāṇa-vajjhaṃ, sesāni paṭhamañāṇa-vajjhāni.

73

Anusayesu diṭṭhi-vicikicchânusayā paṭhamañāṇa-vajjhā va, kāmarāga-paṭighânusayā tatiyañāṇa-vajjhā, māna-bhavarāgâvijjânusayā catutthañāṇa-vajjhā.

74

Malesu dosamalaṃ tatiyañāṇa-vajjhaṃ, itarāni catutthañāṇa-vajjhāni.

75

Akusalakammapathesu pāṇâtipāto adinnâdānaṃ micchācāro musāvādo micchādiṭṭhī ti ime paṭhamañāṇa-vajjhā, pisuṇavācā pharusavācā byāpādo ti tayo tatiyañāṇa-vajjhā, samphappalāpâbhijjhā catutthañāṇa-vajjhā.

76

Akusalacittuppādesu cattāro diṭṭhigata-sampayuttā vicikicchā-sampayutto cā ti pañca paṭhamañāṇa-vajjhā va, dve paṭigha-sampayuttā tatiyañāṇa-vajjhā, sesā catutthañāṇa-vajjhā ti.

77

Yañ ca yena vajjhaṃ, taṃ tena pahātabbaṃ nāma. Tena vuttaṃ:

“Iti etesaṃ saṃyojanâdīnaṃ dhammānaṃ etāni yathāyogaṃ pahānakarānī” ti. (XXII.64)

CST831

78

Kiṃ pan’etāni ete dhamme atītânāgate pajahanti, udāhu paccuppanne ti? Kiṃ pan’ettha? Yadi tāva atītânāgate, aphalo vāyāmo āpajjati. Kasmā? Pahātabbānaṃ natthitāya. Atha paccuppanne, tathā pi aphalo, vāyāmena saddhiṃ pahātabbānaṃ atthitāya, saṃkilesikā ca maggabhāvanā āpajjati, vippayuttatā vā kilesānaṃ, na ca paccuppanna-kileso citta-vippayutto nāma atthī ti.

79

Nâyaṃ āveṇikā codanā. Pāḷiyaṃ yeva hi,

“Svâyaṃ kilese pajahati, atīte kilese pajahati, anāgate kilese pajahati, paccuppanne kilese pajahatī” ti

vatvā, puna

“Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṅgameti, atītaṃ yaṃ natthi, taṃ pajahatī” ti (paṭi. ma. 3.21)

ca vatvā “na atīte kilese pajahatī” ti paṭikkhittaṃ, tathā

“Hañci anāgate kilese pajahati, tena hi ajātaṃ pajahati, anibbattaṃ pajahati, anuppannaṃ pajahati, apātubhūtaṃ pajahati, anāgataṃ yaṃ natthi, taṃ pajahatī” ti

ca vatvā “na anāgate kilese pajahatī” ti paṭikkhittaṃ, tathā

“Hañci paccuppanne kilese pajahati, tena hi ratto rāgaṃ pajahati, duṭṭho dosaṃ… mūḷho mohaṃ… vinibaddho mānaṃ… parāmaṭṭho diṭṭhiṃ… vikkhepagato uddhaccaṃ… aniṭṭhaṅgato vicikicchaṃ… thāmagato anusayaṃ pajahati, kaṇhasukkā dhammā yuganaddhā va vattanti, saṃkilesikā maggabhāvanā hotī” ti

ca vatvā “na atīte kilese pajahati, na anāgate, na paccuppanne kilese pajahatī” ti sabbaṃ paṭikkhipitvā,

“Tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammâbhisamayo” ti

pañhāpariyosāne “na hi natthi maggabhāvanā…pe… natthi dhammâbhisamayo” ti paṭijānitvā “yathā kathaṃ viyā” ti vutte, idaṃ vuttaṃ:

“Seyyathā pi taruṇo rukkho ajātaphalo, tam enaṃ puriso mūle chindeyya, ye tassa rukkhassa ajātaphalā, te ajātā yeva na jāyanti, anibbattā yeva na nibbattanti, anuppannā yeva na uppajjanti, apātubhūtā yeva na pātubhavanti, evam eva uppādo hetu uppādo paccayo kilesānaṃ nibbattiyā ti uppāde ādīnavaṃ disvā anuppāde cittaṃ pakkhandati, anuppāde cittassa pakkhandattā ye āyūhana⁷-paccayā kilesā nibbatteyyuṃ, te ajātā yeva na jāyanti…pe… apātubhūtā yeva na pātubhavanti.

Evaṃ hetunirodhā dukkhanirodho. Pavattaṃ hetu…pe… Nimittaṃ hetu…pe… Āyūhanā hetu…pe… anāyūhane cittassa pakkhandattā ye āyūhana-paccayā kilesā nibbatteyyuṃ, te ajātā yeva…pe… apātubhūtā yeva na pātubhavanti. Evaṃ hetunirodhā dukkhanirodho. Evaṃ atthi maggabhāvanā, atthi phalasacchikiriyā, atthi kilesappahānaṃ, atthi dhammâbhisamayo” ti. (paṭi. ma. 3.21)

CST832

80

Etena kiṃ dīpitaṃ hoti? Bhūmiladdhānaṃ kilesānaṃ pahānaṃ dīpitaṃ hoti. Bhūmiladdhā pana kiṃ atītânāgatā udāhu paccuppannā ti? Bhūmiladdhuppannā eva nāma te.

CST833

81

Uppannaṃ hi vattamāna-bhūtâpagatokāsakata-bhūmiladdha-vasena⁸ aneka-ppabhedaṃ. Tattha sabbam pi uppāda-jarā-bhaṅga-samaṅgi-saṅkhātaṃ vattamānuppannaṃ nāma. Ārammaṇa-rasaṃ anubhavitvā niruddhaṃ anubhūtâpagata-saṅkhātaṃ kusalâkusalaṃ uppādâdi-ttayaṃ anuppatvā niruddhaṃ bhūtâpagata⁹-saṅkhātaṃ sesa-saṅkhatañ ca bhūtâpagatuppannaṃ nāma.

“Yāni’ssa tāni pubbe katāni kammānī” ti (ma. ni. 3.248)

evamādinā nayena vuttaṃ kammaṃ atītam pi samānaṃ aññaṃ vipākaṃ paṭibāhitvā attano vipākass’okāsaṃ katvā ṭhitattā, tathā-katokāsañ ca vipākaṃ anuppannam pi samānaṃ evaṃ kate okāse ekantena uppajjanato okāsakatuppannaṃ nāma. Tāsu tāsu bhūmīsu asamūhataṃ akusalaṃ bhūmiladdhuppannaṃ nāma.

CST834

82

Ettha ca bhūmiyā bhūmiladdhassa ca nānattaṃ veditabbaṃ. Bhūmī ti hi vipassanāya ārammaṇa-bhūtā tebhūmakā pañcakkhandhā. Bhūmiladdhaṃ nāma tesu khandhesu uppatti-rahaṃ kilesajātaṃ. Tena hi sā bhūmi laddhā nāma hotī ti, tasmā bhūmiladdhan ti vuccati, sā ca kho na ārammaṇavasena.

83

Ārammaṇavasena hi sabbe pi atītânāgate pariññāte pi ca khīṇāsavānaṃ khandhe ārabbha kilesā uppajjanti, Mahākaccāna-Uppalavaṇṇâdīnaṃ khandhe ārabbha Soreyyaseṭṭhi-Nandamāṇavakâdīnaṃ viya. Yadi ca taṃ bhūmiladdhaṃ nāma siyā, tassa appaheyyato na koci bhavamūlaṃ pajaheyya. Vatthuvasena pana bhūmiladdhaṃ veditabbaṃ. Yattha yattha hi vipassanāya apariññātā khandhā uppajjanti, tattha tattha uppādato pabhuti tesu vaṭṭamūlaṃ kilesajātaṃ anuseti, taṃ appahīnaṭṭhena bhūmiladdhan ti veditabbaṃ.

CST835

84

Tattha ca yassa yesu khandhesu appahīnaṭṭhena anusayitā kilesā, tassa te eva khandhā tesaṃ kilesānaṃ vatthu, na aññesaṃ santakā khandhā. Atīta-kkhandhesu ca appahīnânusayitānaṃ kilesānaṃ atīta-kkhandhā va vatthu, na itare. Esa nayo anāgatâdīsu. Tathā kāmāvacara-kkhandhesu appahīnânusayitānaṃ kilesānaṃ kāmāvacara-kkhandhā va vatthu, na itare. Esa nayo rūpârūpāvacaresu.

85

Sotāpannâdīsu pana yassa yassa ariyapuggalassa khandhesu taṃ taṃ vaṭṭamūlaṃ kilesajātaṃ tena tena maggena pahīnaṃ, tassa tassa te te khandhā pahīnānaṃ tesaṃ tesaṃ vaṭṭamūla-kilesānaṃ avatthuto bhūmī ti saṅkhaṃ na labhanti. Puthujjanassa sabbaso va vaṭṭamūla-kilesānaṃ appahīnattā yaṃ kiñci kariyamānaṃ kammaṃ kusalaṃ akusalaṃ vā hoti. Icc assa kamma-kilesa-paccayā vaṭṭaṃ vaṭṭati.

86

Tass’etaṃ vaṭṭamūlaṃ rūpakkhandhe yeva na vedanākkhandhâdīsu… viññāṇakkhandhe yeva vā na rūpakkhandhâdīsū ti na vattabbaṃ. Kasmā? Avisesena pañcasu pi khandhesu anusayitattā.

CST836

Kathaṃ? Pathavīrasâdi viya rukkhe.

87

Yathā hi mahārukkhe pathavītalaṃ adhiṭṭhāya pathavīrasañ ca āporasañ ca nissāya tappaccayā mūla-khandha-sākha-pasākha-pallava-palāsa-puppha-phalehi vaḍḍhitvā nabhaṃ pūretvā yāva kappâvasānā bīja-paramparāya rukkha-paveṇiṃ santānayamāne¹⁰ ṭhite “taṃ pathavīrasâdi mūle yeva na khandhâdīsu…pe… phale yeva vā na mūlâdīsū” ti na vattabbaṃ. Kasmā? Avisesena sabbesu mūlâdīsu anugatattā ti.

88

Yathā pana tass’eva rukkhassa pupphaphalâdīsu nibbinno koci puriso catūsu disāsu maṇḍūka-kaṇṭakaṃ nāma visa-kaṇṭakaṃ ākoṭeyya. Atha so rukkho tena visa-samphassena phuṭṭho pathavīrasa-āporasānaṃ pariyādiṇṇattā appasavana-dhammataṃ āgamma puna santānaṃ nibbattetuṃ na sakkuṇeyya.

Evam eva khandha-pavattiyaṃ nibbinno kulaputto tassa purisassa catūsu disāsu rukkhe visa-yojanaṃ viya attano santāne catumagga-bhāvanaṃ ārabhati. Ath’assa so khandha-santāno tena catumagga-visa-samphassena sabbaso vaṭṭamūlaka-kilesānaṃ pariyādiṇṇattā kiriyabhāvamatta-upagatakāyakammâdi-sabbakamma-ppabhedo hutvā āyatiṃ punabbhavânabhinibbattana¹¹-dhammataṃ āgamma bhavantara-santānaṃ nibbattetuṃ na sakkoti, kevalaṃ carima-viññāṇa-nirodhena nirindhano viya jātavedo anupādāno parinibbāyati. Evaṃ bhūmiyā bhūmiladdhassa ca nānattaṃ veditabbaṃ.

CST837

89

Api ca aparam pi samudācāra-ārammaṇâdhiggahita-avikkhambhita-asamūhata-vasena catubbidhaṃ uppannaṃ. Tattha vattamānuppannam eva samudācāruppannaṃ. Cakkhâdīnaṃ pana āpāthagate ārammaṇe pubbabhāge anuppajjamānam pi kilesajātaṃ ārammaṇassa adhiggahitattā eva aparabhāge ekantena uppattito ārammaṇâdhiggahituppannan ti vuccati, Kalyāṇigāme¹² piṇḍāya carato Mahātissattherassa visabhāgarūpa-dassanena uppanna-kilesajātaṃ viya. Samatha-vipassanānaṃ aññataravasena avikkhambhitaṃ kilesajātaṃ cittasantatim anārūḷham pi uppatti-nivārakassa hetuno abhāvā avikkhambhituppannaṃ nāma. Samatha-vipassanāvasena pana vikkhambhitam pi ariyamaggena asamūhatattā uppatti-dhammataṃ anatītatāya asamūhatuppannan ti vuccati, ākāsena gacchantassa aṭṭhasamāpatti-lābhino therassa kusumitarukkhe upavane pupphāni uccinantassa madhurena sarena gāyato mātugāmassa gītasavanena uppanna-kilesajātaṃ viya.

90

Tividham pi c’etaṃ ārammaṇâdhiggahitâvikkhambhita-asamūhatuppannaṃ bhūmiladdhen’eva saṅgahaṃ gacchatī ti veditabbaṃ.

CST838

91

Icc etasmiṃ vuttappabhede uppanne yad etaṃ vattamāna-bhūtâpagatokāsakata-samudācāra-saṅkhātaṃ catubbidhaṃ uppannaṃ, taṃ amagga-vajjhattā kenaci pi ñāṇena pahātabbaṃ na hoti. Yaṃ pan’etaṃ bhūmiladdhârammaṇâdhiggahita-avikkhambhita-asamūhata-saṅkhātaṃ uppannaṃ, tassa taṃ uppanna-bhāvaṃ vināsayamānaṃ yasmā taṃ taṃ lokiya-lokuttara-ñāṇaṃ uppajjati, tasmā taṃ sabbam pi pahātabbaṃ hotī ti. Evam ettha ye yena pahātabbā dhammā tesaṃ pahānañ ca jānitabbaṃ.

Pariññādikiccakathā

CST839

92

Kiccāni pariññâdīni yāni vuttāni abhisamayakāle,
tāni ca yathāsabhāvena jānitabbāni sabbānī ti. (XXII.32)

Saccâbhisamaya-kālaṃ¹³ hi etesu catūsu ñāṇesu ekekassa ekakkhaṇe “pariññā pahānaṃ sacchikiriyā bhāvanā” ti etāni pariññâdīni cattāri kiccāni vuttāni, tāni yathāsabhāvena jānitabbāni. Vuttaṃ h’etaṃ porāṇehi:

“Yathā padīpo apubbaṃ acarimaṃ ekakkhaṇe¹⁴ cattāri kiccāni karoti: vaṭṭiṃ jhāpeti, andhakāraṃ vidhamati, ālokaṃ parividaṃseti, sinehaṃ pariyādiyati, evam eva maggañāṇaṃ apubbaṃ acarimaṃ ekakkhaṇe cattāri saccāni abhisameti: dukkhaṃ pariññâbhisamayena abhisameti, samudayaṃ pahānâbhisamayena abhisameti, maggaṃ bhāvanâbhisamayena abhisameti, nirodhaṃ sacchikiriyâbhisamayena abhisameti. Kiṃ vuttaṃ hoti? Nirodhaṃ ārammaṇaṃ karitvā cattāri pi saccāni pāpuṇāti passati paṭivijjhatī” ti.

93

Vuttam pi c’etaṃ:

“Yo, bhikkhave, dukkhaṃ passati, dukkhasamudayam pi so passati, dukkhanirodham pi passati, dukkhanirodhagāminiṃ paṭipadam pi passatī” ti (saṃ. ni. 5.1100)

sabbaṃ veditabbaṃ. Aparam pi vuttaṃ:

“Maggasamaṅgissa ñāṇaṃ, dukkhe p’etaṃ ñāṇaṃ, dukkhasamudaye p’etaṃ ñāṇaṃ, dukkhanirodhe p’etaṃ ñāṇaṃ, dukkhanirodhagāminiyā paṭipadāya p’etaṃ ñāṇan” ti. (vibha. 794; paṭi. ma. 1.109)

94

Tattha yathā padīpo vaṭṭiṃ jhāpeti, evaṃ maggañāṇaṃ dukkhaṃ parijānāti, yathā andhakāraṃ vidhamati, evaṃ samudayaṃ pajahati, yathā ālokaṃ parividaṃseti, evaṃ sahajātâdi-paccayatāya sammāsaṅkappâdi-dhamma-saṅkhātaṃ maggaṃ bhāveti, yathā sinehaṃ pariyādiyati, evaṃ kilesa-pariyādānaṃ nirodhaṃ sacchikarotī ti evaṃ upamā-saṃsandanaṃ veditabbaṃ.

CST840

95

Aparo nayo. Yathā sūriyo udayanto apubbaṃ acarimaṃ saha pātubhāvā cattāri kiccāni karoti: rūpagatāni obhāseti, andhakāraṃ vidhamati, ālokaṃ dasseti, sītaṃ paṭippassambheti, evam eva maggañāṇaṃ…pe… nirodhaṃ sacchikiriyâbhisamayena abhisameti. Idhâpi yathā sūriyo rūpagatāni obhāseti, evaṃ maggañāṇaṃ dukkhaṃ parijānāti, yathā andhakāraṃ vidhamati, evaṃ samudayaṃ pajahati, yathā ālokaṃ dasseti, evaṃ sahajātâdi-paccayatāya maggaṃ bhāveti, yathā sītaṃ paṭippassambheti, evaṃ kilesa-paṭippassaddhiṃ nirodhaṃ sacchikarotī ti evaṃ upamā-saṃsandanaṃ veditabbaṃ.

CST841

96

Aparo nayo. Yathā nāvā apubbaṃ acarimaṃ ekakkhaṇe cattāri kiccāni karoti: orimatīraṃ pajahati, sotaṃ chindati, bhaṇḍaṃ vahati, pārimatīraṃ appeti, evam eva maggañāṇaṃ…pe… nirodhaṃ sacchikiriyâbhisamayena abhisameti. Etthâpi yathā nāvā orimatīraṃ pajahati, evaṃ maggañāṇaṃ dukkhaṃ parijānāti, yathā sotaṃ chindati, evaṃ samudayaṃ pajahati, yathā bhaṇḍaṃ vahati, evaṃ sahajātâdi-paccayatāya maggaṃ bhāveti, yathā pārimatīraṃ appeti, evaṃ pārimatīra-bhūtaṃ nirodhaṃ sacchikarotī ti evaṃ upamā-saṃsandanaṃ veditabbaṃ.

CST842

97

Evaṃ saccâbhisamaya-kālasmiṃ ekakkhaṇe catunnaṃ kiccānaṃ vasena pavattañāṇassa pan’assa soḷasah’ākārehi tathaṭṭhena cattāri kiccāni¹⁵ eka-paṭivedhāni honti. Yath’āha:

“Kathaṃ tathaṭṭhena cattāri kiccāni eka-paṭivedhāni? Soḷasahi ākārehi tathaṭṭhena cattāri kiccāni eka-paṭivedhāni, dukkhassa pīḷanaṭṭho saṅkhataṭṭho santāpaṭṭho vipariṇāmaṭṭho tathaṭṭho, samudayassa āyūhanaṭṭho nidānaṭṭho saṃyogaṭṭho palibodhaṭṭho tathaṭṭho, nirodhassa nissaraṇaṭṭho vivekaṭṭho asaṅkhataṭṭho amataṭṭho tathaṭṭho, maggassa niyyānaṭṭho hetuṭṭho dassanaṭṭho adhipateyyaṭṭho tathaṭṭho. Imehi soḷasahi ākārehi tathaṭṭhena cattāri saccāni eka-saṅgahitāni, yaṃ eka-saṅgahitaṃ taṃ ekattaṃ, yaṃ ekattaṃ taṃ ekena ñāṇena paṭivijjhatī ti cattāri saccāni eka-paṭivedhānī” ti. (paṭi. ma. 2.11)

CST843

98

Tattha siyā: yadā dukkhâdīnaṃ aññe pi roga-gaṇḍâdayo atthā atthi, atha kasmā cattāro yeva vuttā ti? Ettha vadāma: aññasacca-dassana-vasena āvibhāvato.

“Tattha katamaṃ dukkhe ñāṇaṃ? Dukkhaṃ ārabbha yā uppajjati paññā pajānanā” ti (vibha. 794; paṭi. ma. 1.109)

ādinā hi nayena ekeka-saccârammaṇa-vasenâpi saccañāṇaṃ vuttaṃ.

“Yo, bhikkhave, dukkhaṃ passati, samudayam pi so passatī” ti (saṃ. ni. 5.1100)

ādinā nayena ekaṃ saccaṃ ārammaṇaṃ katvā sesesu pi kicca-nipphatti-vasenâpi vuttaṃ.

99

Tattha yadā ekekaṃ saccaṃ ārammaṇaṃ karoti, tadā samudaya-dassanena tāva sabhāvato pīḷana-lakkhaṇassâpi dukkhassa yasmā taṃ āyūhana-lakkhaṇena samudayena āyūhitaṃ saṅkhataṃ rāsikataṃ, tasmā’ssa so saṅkhataṭṭho āvibhavati. Yasmā pana maggo kilesa-santāpaharo susītalo, tasmā’ssa maggassa dassanena santāpaṭṭho āvibhavati, āyasmato Nandassa accharā-dassanena Sundariyā anabhirūpabhāvo viya. Avipariṇāmadhammassa pana nirodhassa dassanen’assa vipariṇāmaṭṭho āvibhavatī ti vattabbam ev’ettha natthi.

100

Tathā sabhāvato āyūhana-lakkhaṇassâpi samudayassa dukkha-dassanena nidānaṭṭho āvibhavati, asappāya-bhojanato uppanna-byādhi-dassanena bhojanassa byādhi-nidānabhāvo viya. Visaṃyoga-bhūtassa nirodhassa dassanena saṃyogaṭṭho, niyyāna-bhūtassa ca maggassa dassanena palibodhaṭṭho ti.

101

Tathā nissaraṇa-lakkhaṇassâpi nirodhassa aviveka-bhūtassa samudayassa dassanena vivekaṭṭho āvibhavati. Magga-dassanena asaṅkhataṭṭho, iminā hi anamatagga-saṃsāre maggo na diṭṭha-pubbo, so pi ca sappaccayattā saṅkhato yevā ti appaccaya-dhammassa asaṅkhata-bhāvo ativiya pākaṭo hoti. Dukkhadassanena pan’assa amataṭṭho āvibhavati, dukkhaṃ hi visaṃ, amataṃ nibbānan ti.

102

Tathā niyyāna-lakkhaṇassâpi maggassa samudaya-dassanena “nâyaṃ hetu nibbānassa pattiyā, ayaṃ hetū” ti hetuṭṭho āvibhavati. Nirodha-dassanena dassanaṭṭho, parama-sukhumāni rūpāni passato “vippasannaṃ vata me cakkhūn” ti cakkhussa vippasanna-bhāvo viya. Dukkha-dassanena adhipateyyaṭṭho, aneka-rogâtura-kapaṇajana-dassanena issarajanassa uḷārabhāvo viyā ti.

103

Evam ettha salakkhaṇavasena ekekassa, aññasacca-dassanavasena ca itaresaṃ tiṇṇaṃ tiṇṇaṃ āvibhāvato, ekekassa cattāro cattāro atthā vuttā. Maggakkhaṇe pana sabbe c’ete atthā eken’eva dukkhâdīsu catukiccena ñāṇena paṭivedhaṃ gacchantī ti. Ye pana nānâbhisamayaṃ icchanti, tesaṃ uttaraṃ Abhidhamme Kathāvatthusmiṃ vuttam eva.

Pariññādippabhedakathā

CST844

104

Idāni yāni tāni pariññâdīni cattāri kiccāni vuttāni, tesu

Tividhā hoti pariññā, tathā pahānam pi sacchikiriyā pi,
dve bhāvanā abhimatā, vinicchayo tattha ñātabbo.

CST845

105

Tividhā hoti pariññā ti ñātapariññā tīraṇapariññā pahānapariññā ti evaṃ pariññā tividhā hoti.

106

Tattha,

“Abhiññāpaññā ñātaṭṭhena ñāṇan” ti (paṭi. ma. mātikā 1.20)

evaṃ uddisitvā,

“Ye ye dhammā abhiññātā honti, te te dhammā ñātā hontī” ti (paṭi. ma. 1.75)

evaṃ saṅkhepato,

“Sabbaṃ, bhikkhave, abhiññeyyaṃ. Kiñ ca, bhikkhave, sabbaṃ abhiññeyyaṃ? Cakkhuṃ, bhikkhave, abhiññeyyan” ti (paṭi. ma. 1.2)

ādinā nayena vitthārato vuttā ñātapariññā nāma. Tassā sappaccaya-nāmarūpâbhijānanā āveṇikā bhūmi.

CST846

107

“Pariññāpaññā tīraṇaṭṭhena ñāṇan” ti (paṭi. ma. mātikā 1.21)

evaṃ uddisitvā pana,

“Ye ye dhammā pariññātā honti, te te dhammā tīritā hontī” ti (paṭi. ma. 1.75)

evaṃ saṅkhepato,

“Sabbaṃ, bhikkhave, pariññeyyaṃ. Kiñ ca, bhikkhave, sabbaṃ pariññeyyaṃ? Cakkhuṃ, bhikkhave, pariññeyyan” ti (paṭi. ma. 1.21)

ādinā nayena vitthārato vuttā tīraṇapariññā nāma. Tassā kalāpa-sammasanato paṭṭhāya “aniccaṃ dukkham anattā” ti tīraṇavasena pavattamānāya yāva anulomā āveṇikā bhūmi.

CST847

108

“Pahānapaññā pariccāgaṭṭhena ñāṇan” ti (paṭi. ma. mātikā 1.22)

evaṃ pana uddisitvā,

“Ye ye dhammā pahīnā honti, te te dhammā pariccattā hontī” ti (paṭi. ma. 1.75)

evaṃ vitthārato vuttā,

“Aniccânupassanāya niccasaññaṃ pajahatī” ti

ādinayappavattā pahānapariññā. Tassā bhaṅgânupassanato paṭṭhāya yāva maggañāṇā bhūmi. Ayaṃ idha adhippetā.

109

Yasmā vā ñāta-tīraṇa-pariññāyo pi tadatthā yeva, yasmā ca ye dhamme pajahati, te niyamato ñātā c’eva tīritā ca honti, tasmā pariññā-ttayam pi iminā pariyāyena maggañāṇassa kiccan ti veditabbaṃ.

CST848

110

Tathā pahānam pī ti pahānam pi hi vikkhambhanappahānaṃ tadaṅgappahānaṃ samucchedappahānan ti pariññā viya tividham eva hoti.

111

Tattha yaṃ sasevāle udake pakkhittena ghaṭena sevālassa viya tena tena lokiya-samādhinā nīvaraṇâdīnaṃ paccanīkadhammānaṃ vikkhambhanaṃ, idaṃ vikkhambhanappahānaṃ nāma. Pāḷiyaṃ pana,

“Vikkhambhanappahānañ ca nīvaraṇānaṃ paṭhamaṃ jhānaṃ bhāvayato” ti (paṭi. ma. 1.24)

nīvaraṇānañ ñeva vikkhambhanaṃ vuttaṃ, taṃ pākaṭattā vuttan ti veditabbaṃ. Nīvaraṇāni hi jhānassa pubbabhāge pi pacchābhāge pi na sahasā cittaṃ ajjhottharanti, vitakkâdayo appitakkhaṇe yeva, tasmā nīvaraṇānaṃ vikkhambhanaṃ pākaṭaṃ.

CST849

112

Yaṃ pana rattibhāge samujjalitena padīpena andhakārassa viya tena tena vipassanāya avayava-bhūtena ñāṇaṅgena paṭipakkha-vasen’eva tassa tassa pahātabba-dhammassa pahānaṃ, idaṃ tadaṅgappahānaṃ nāma. Seyyathidaṃ:

1. nāmarūpa-paricchedena tāva sakkāyadiṭṭhiyā,
2. paccaya-pariggahena ahetu-visamahetu-diṭṭhiyā c’eva kaṅkhāmalassa ca,
3. kalāpa-sammasanena “ahaṃ mamā” ti samūha-gāhassa,
4. maggâmagga-vavatthānena amagge maggasaññāya,
5. udayadassanena ucchedadiṭṭhiyā,
6. vayadassanena sassatadiṭṭhiyā,
7. bhayatupaṭṭhānena sabhaye abhayasaññāya,
8. ādīnavadassanena assādasaññāya,
9. nibbidânupassanena abhiratisaññāya,
10. muñcitukamyatāya amuñcitukāmabhāvassa,
11. paṭisaṅkhānena appaṭisaṅkhānassa,
12. upekkhāya anupekkhanassa,
13. anulomena sacca-paṭiloma-gāhassa pahānaṃ.

113

Yaṃ vā pana aṭṭhārasasu mahāvipassanāsu (XX.90),

1. aniccânupassanāya niccasaññāya,
2. dukkhânupassanāya sukhasaññāya,
3. anattânupassanāya attasaññāya,
4. nibbidânupassanāya nandiyā,
5. virāgânupassanāya rāgassa,
6. nirodhânupassanāya samudayassa,
7. paṭinissaggânupassanāya ādānassa,
8. khayânupassanāya ghanasaññāya,
9. vayânupassanāya āyūhanassa,
10. vipariṇāmânupassanāya dhuvasaññāya,
11. animittânupassanāya nimittassa,
12. appaṇihitânupassanāya paṇidhiyā,
13. suññatânupassanāya abhinivesassa,
14. adhipaññā-dhamma-vipassanāya sārâdānâbhinivesassa,
15. yathābhūta-ñāṇadassanena sammohâbhinivesassa,
16. ādīnavânupassanāya ālayâbhinivesassa,
17. paṭisaṅkhânupassanāya appaṭisaṅkhāya,
18. vivaṭṭânupassanāya saṃyogâbhinivesassa pahānaṃ,

idam pi tadaṅgappahānam eva.

CST850

114

Tattha yathā aniccânupassanâdīhi sattahi niccasaññâdīnaṃ pahānaṃ hoti, taṃ bhaṅgânupassane vuttam eva (XXI.15-18). Khayânupassanā ti pana “ghana-vinibbhogaṃ katvā aniccaṃ khayaṭṭhenā” ti evaṃ khayaṃ passato ñāṇaṃ. Tena ghanasaññāya pahānaṃ hoti.

115

Vayânupassanā ti,

“Ārammaṇânvayena ubho ekavavatthānā
nirodhe adhimuttatā vayalakkhaṇa-vipassanā” ti. (XXI.11)

evaṃ vuttā paccakkhato c’eva anvayato ca saṅkhārānaṃ bhaṅgaṃ disvā tasmiñ ñeva bhaṅga-saṅkhāte nirodhe adhimuttatā. Tāya āyūhanassa pahānaṃ hoti. Yesaṃ hi “atthāya āyūheyya te evaṃ vayadhammā” ti vipassato āyūhane cittaṃ na namati.

116

Vipariṇāmânupassanā ti rūpasattakâdi-vasena taṃ taṃ paricchedaṃ atikkamma aññathā-pavatti-dassanaṃ, uppannassa vā jarāya c’eva maraṇena ca dvīh’ākārehi vipariṇāma-dassanaṃ. Tāya dhuvasaññāya pahānaṃ hoti.

117

Animittânupassanā ti aniccânupassanā va. Tāya niccanimittassa pahānaṃ hoti. Appaṇihitânupassanā ti dukkhânupassanā va. Tāya sukhapaṇidhi-sukhapatthanā-pahānaṃ hoti. Suññatânupassanā ti anattânupassanā va. Tāya “atthi attā” ti abhinivesassa pahānaṃ hoti.

118

Adhipaññā-dhamma-vipassanā ti,

“Ārammaṇañ ca paṭisaṅkhā bhaṅgañ ca anupassati,
suññato ca upaṭṭhānaṃ, adhipaññā-vipassanā” ti. (XXI.11)

evaṃ vuttā rūpâdi-ārammaṇaṃ jānitvā tassa ca ārammaṇassa tadārammaṇassa ca cittassa bhaṅgaṃ disvā “saṅkhārā va bhijjanti, saṅkhārānaṃ maraṇaṃ, na añño koci atthī” ti bhaṅgavasena suññataṃ gahetvā pavattā vipassanā, sā adhipaññā ca dhammesu ca vipassanā ti katvā adhipaññā-dhamma-vipassanā ti vuccati. Tāya nicca-sārâbhāvassa ca atta-sārâbhāvassa ca suṭṭhu diṭṭhattā sārâdānâbhinivesassa pahānaṃ hoti.

119

Yathābhūta-ñāṇadassanan ti sappaccaya-nāmarūpa-pariggaho. Tena

“Ahosiṃ nu kho ahaṃ atītam addhānan” ti (ma. ni.)

ādivasena c’eva “Issarato loko sambhotī” ti ādivasena ca pavattassa sammohâbhinivesassa pahānaṃ hoti.

120

Ādīnavânupassanā ti bhayatupaṭṭhāna-vasena uppannaṃ sabbabhavâdīsu ādīnava-dassana-ñāṇaṃ. Tena “kiñci allīyitabbaṃ na dissatī” ti ālayâbhinivesassa pahānaṃ hoti. Paṭisaṅkhânupassanā ti muñcanassa upāya-karaṇaṃ paṭisaṅkhāñāṇaṃ. Tena appaṭisaṅkhāya pahānaṃ hoti.

121

Vivaṭṭânupassanā ti saṅkhārupekkhā c’eva anulomañ ca. Tadā hi’ssa cittaṃ,

“Īsakapoṇe padumapalāse udakabindu viya sabbasmā saṅkhāragatā patilīyati patikuṭati pativattatī” ti (cf. XXI.63)

vuttaṃ. Tasmā tāya saṃyogâbhinivesassa pahānaṃ hoti, kāmasaṃyogâdikassa kilesâbhinivesassa kilesappavattiyā pahānaṃ hotī ti attho.

Evaṃ vitthārato tadaṅgappahānaṃ veditabbaṃ. Pāḷiyaṃ pana,

“Tadaṅgappahānañ ca diṭṭhigatānaṃ nibbedhabhāgiyaṃ samādhiṃ bhāvayato” ti (paṭi. ma. 1.24)

saṅkhepen’eva vuttaṃ.

CST851

122

Yaṃ pana asani-vicakkâbhihatassa rukkhassa viya ariyamagga-ñāṇena saṃyojanâdīnaṃ dhammānaṃ yathā na puna pavatti, evaṃ pahānaṃ, idaṃ samucchedappahānaṃ nāma. Yaṃ sandhāya vuttaṃ:

“Samucchedappahānañ ca lokuttaraṃ khayagāmi-maggaṃ bhāvayato” ti. (paṭi. ma. 1.24)

123

Iti imesu tīsu pahānesu samucchedappahānam eva idha adhippetaṃ. Yasmā pana¹⁶ tassa yogino pubbabhāge vikkhambhana-tadaṅgappahānāni pi tadatthān’eva, tasmā pahāna-ttayam pi iminā pariyāyena maggañāṇassa kiccan ti veditabbaṃ. Paṭirājānaṃ vadhitvā rajjaṃ pattena hi yam pi tato pubbe kataṃ, sabbaṃ “idañ c’idañ ca raññā katan” ti yeva vuccati.

CST852

124

Sacchikiriyā pī ti lokiya-sacchikiriyā lokuttara-sacchikiriyā ti dvedhā bhinnā pi lokuttarāya dassana-bhāvanā-vasena bhedato tividhā hoti.

125

Tattha,

“Paṭhamassa jhānassa lābhī’mhi, vasī’mhi, paṭhamajjhānaṃ sacchikataṃ mayā” ti (pārā. 203-204)

ādinā nayena āgatā paṭhamajjhānâdīnaṃ phassanā lokiya-sacchikiriyā nāma. Phassanā ti adhigantvā “idaṃ mayā adhigatan” ti paccakkhato ñāṇaphassena phusanā. Imam eva hi atthaṃ sandhāya,

“Sacchikiriyā-paññā phassanaṭṭhe ñāṇan” ti (paṭi. ma. mātikā 1.24)

uddisitvā,

“Ye ye dhammā sacchikatā honti, te te dhammā phassitā hontī” ti (paṭi. ma. 1.75)

sacchikiriyaniddeso vutto.

126

Api ca attano santāne anuppādetvā pi ye dhammā kevalaṃ aparappaccayena ñāṇena ñātā, te sacchikatā honti. Ten’eva hi,

“Sabbaṃ, bhikkhave, sacchikātabbaṃ. Kiñ ca, bhikkhave, sabbaṃ sacchikātabbaṃ? Cakkhu, bhikkhave, sacchikātabban” ti (paṭi. ma. 1.29)

ādi vuttaṃ. Aparam pi vuttaṃ,

“Rūpaṃ passanto sacchikaroti, vedanaṃ…pe… viññāṇaṃ passanto sacchikaroti. Cakkhuṃ…pe… jarāmaraṇaṃ…pe… amatogadhaṃ nibbānaṃ passanto sacchikarotī ti. Ye ye dhammā sacchikatā honti, te te dhammā phassitā hontī” ti. (paṭi. ma. 1.29)

127

Paṭhamamagga-kkhaṇe pana nibbāna-dassanaṃ dassana-sacchikiriyā, sesamagga-kkhaṇesu bhāvanā-sacchikiriyā ti. Sā duvidhā pi idha adhippetā. Tasmā dassana-bhāvanā-vasena nibbānassa sacchikiriyā imassa ñāṇassa kiccan ti veditabbaṃ.

CST853

128

Dve bhāvanā abhimatā ti bhāvanā pana lokiya-bhāvanā lokuttara-bhāvanā ti dve yeva abhimatā. Tattha lokiyānaṃ sīla-samādhi-paññānaṃ uppādanaṃ, tāhi ca santāna-vāsanaṃ lokiya-bhāvanā, lokuttarānaṃ uppādanaṃ, tāhi ca santāna-vāsanaṃ lokuttara-bhāvanā. Tāsu idha lokuttarā adhippetā. Lokuttarāni hi sīlâdīni catubbidham p’etaṃ ñāṇaṃ uppādeti, tesaṃ sahajāta-paccayâdi-tāya tehi ca santānaṃ vāsetī ti lokuttara-bhāvanā v’assa kiccan ti. Evaṃ

Kiccāni pariññâdīni yāni vuttāni abhisamayakāle,
tāni ca yathāsabhāvena jānitabbāni sabbānī ti.

129

Ettāvatā ca,

“Sīle patiṭṭhāya naro sapañño, cittaṃ paññañ ca bhāvayan” ti

evaṃ sarūpen’eva ābhatāya¹⁷ paññābhāvanāya vidhāna-dassanatthaṃ yaṃ vuttaṃ:

“Mūlabhūtā dve visuddhiyo sampādetvā sarīrabhūtā pañca visuddhiyo sampādentena bhāvetabbā” ti (XIV.32)

taṃ vitthāritaṃ hoti. Kathaṃ bhāvetabbā ti ayañ ca pañho vissajjito ti.