雨云相应

550. Suddhikasuttaṃ

Sāvatthinidānaṃ. “Valāhakakāyike vo, bhikkhave, deve desessāmi. Taṃ suṇātha. Katame ca, bhikkhave, valāhakakāyikā devā? Santi, bhikkhave, sītavalāhakā devā; santi uṇhavalāhakā devā; santi abbhavalāhakā devā; santi vātavalāhakā devā; santi vassavalāhakā devā – ime vuccanti, bhikkhave, ‘valāhakakāyikā devā’” ti. Paṭhamaṃ.

551. Sucaritasuttaṃ

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yena midhekacco kāyassa bhedā paraṃ maraṇā valāhakakāyikānaṃ devānaṃ sahabyataṃ upapajjatī” ti? “Idha, bhikkhu, ekacco kāyena sucaritaṃ carati, vācāya sucaritaṃ carati, manasā sucaritaṃ carati. Tassa sutaṃ hoti – ‘valāhakakāyikā devā dīghāyukā vaṇṇavanto sukhabahulā’ ti. Tassa evaṃ hoti – ‘aho vatāhaṃ kāyassa bhedā paraṃ maraṇā valāhakakāyikānaṃ devānaṃ sahabyataṃ upapajjeyyan’ ti. So kāyassa bhedā paraṃ maraṇā valāhakakāyikānaṃ devānaṃ sahabyataṃ upapajjati. Ayaṃ kho, bhikkhu, hetu, ayaṃ paccayo, yena midhekacco kāyassa bhedā paraṃ maraṇā valāhakakāyikānaṃ devānaṃ sahabyataṃ upapajjatī” ti. Dutiyaṃ.

Sītavalāhakadānūpakārasuttadasakaṃ

552-561

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yena midhekacco kāyassa bhedā paraṃ maraṇā sītavalāhakānaṃ devānaṃ sahabyataṃ upapajjatī” ti? “Idha bhikkhu, ekacco kāyena sucaritaṃ carati, vācāya sucaritaṃ carati, manasā sucaritaṃ carati. Tassa sutaṃ hoti – ‘sītavalāhakā devā dīghāyukā vaṇṇavanto sukhabahulā’ ti. Tassa evaṃ hoti – ‘aho vatāhaṃ kāyassa bhedā paraṃ maraṇā sītavalāhakānaṃ devānaṃ sahabyataṃ upapajjeyyan’ ti. So annaṃ deti…pe… padīpeyyaṃ deti. So kāyassa bhedā paraṃ maraṇā sītavalāhakānaṃ devānaṃ sahabyataṃ upapajjati. Ayaṃ kho, bhikkhu, hetu, ayaṃ paccayo, yena midhekacco kāyassa bhedā paraṃ maraṇā sītavalāhakānaṃ devānaṃ sahabyataṃ upapajjatī” ti. Dvādasamaṃ.

Uṇhavalāhakadānūpakārasuttacālīsakaṃ

562-601

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yena midhekacco kāyassa bhedā paraṃ maraṇā uṇhavalāhakānaṃ devānaṃ…pe… abbhavalāhakānaṃ devānaṃ…pe… vātavalāhakānaṃ devānaṃ…pe… vassavalāhakānaṃ devānaṃ sahabyataṃ upapajjatī” ti? “Idha, bhikkhu, ekacco kāyena sucaritaṃ carati, vācāya sucaritaṃ carati, manasā sucaritaṃ carati. Tassa sutaṃ hoti – ‘vassavalāhakā devā dīghāyukā vaṇṇavanto sukhabahulā’ ti. Tassa evaṃ hoti – ‘aho vatāhaṃ kāyassa bhedā paraṃ maraṇā vassavalāhakānaṃ devānaṃ sahabyataṃ upapajjeyyan’ ti. So annaṃ deti…pe… padīpeyyaṃ deti. So kāyassa bhedā paraṃ maraṇā vassavalāhakānaṃ devānaṃ sahabyataṃ upapajjati. Ayaṃ kho, bhikkhu, hetu, ayaṃ paccayo, yena midhekacco kāyassa bhedā paraṃ maraṇā vassavalāhakānaṃ devānaṃ sahabyataṃ upapajjatī” ti. Dvepaññāsamaṃ.

602. Sītavalāhakasuttaṃ

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yenekadā sītaṃ hotī” ti? “Santi, bhikkhu, sītavalāhakā nāma devā. Tesaṃ yadā evaṃ hoti – ‘yaṃnūna mayaṃ sakāya ratiyā vaseyyāmā’ ti, tesaṃ taṃ cetopaṇidhimanvāya sītaṃ hoti. Ayaṃ kho, bhikkhu, hetu, ayaṃ paccayo, yenekadā sītaṃ hotī” ti. Tepaññāsamaṃ.

603. Uṇhavalāhakasuttaṃ

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yenekadā uṇhaṃ hotī” ti? “Santi, bhikkhu, uṇhavalāhakā nāma devā. Tesaṃ yadā evaṃ hoti – ‘yaṃnūna mayaṃ sakāya ratiyā vaseyyāmā’ ti, tesaṃ taṃ cetopaṇidhimanvāya uṇhaṃ hoti. Ayaṃ kho, bhikkhu, hetu, ayaṃ paccayo, yenekadā uṇhaṃ hotī” ti. Catupaññāsamaṃ.

604. Abbhavalāhakasuttaṃ

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yenekadā abbhaṃ hotī” ti? “Santi, bhikkhu, abbhavalāhakā nāma devā. Tesaṃ yadā evaṃ hoti – ‘yaṃnūna mayaṃ sakāya ratiyā vaseyyāmā’ ti, tesaṃ taṃ cetopaṇidhimanvāya abbhaṃ hoti. Ayaṃ kho, bhikkhu, hetu, ayaṃ paccayo, yenekadā abbhaṃ hotī” ti. Pañcapaññāsamaṃ.

605. Vātavalāhakasuttaṃ

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yenekadā vāto hotī” ti? “Santi, bhikkhu, vātavalāhakā nāma devā. Tesaṃ yadā evaṃ hoti – ‘yaṃnūna mayaṃ sakāya ratiyā vaseyyāmā’ ti, tesaṃ taṃ cetopaṇidhimanvāya vāto hoti. Ayaṃ kho, bhikkhu, hetu, ayaṃ paccayo, yenekadā vāto hotī” ti. Chappaññāsamaṃ.

606. Vassavalāhakasuttaṃ

Sāvatthinidānaṃ. Ekamantaṃ nisinno kho so bhikkhu Bhagavantaṃ etad avoca – “ko nu kho, bhante, hetu, ko paccayo, yenekadā devo vassatī” ti? “Santi, bhikkhu, vassavalāhakā nāma devā. Tesaṃ yadā evaṃ hoti – ‘yaṃnūna mayaṃ sakāya ratiyā vaseyyāmā’ ti, tesaṃ taṃ cetopaṇidhimanvāya devo vassati. Ayaṃ kho, bhikkhu, hetu, ayaṃ paccayo, yenekadā devo vassatī” ti. Sattapaññāsamaṃ.

Sattapaññāsasuttantaṃ niṭṭhitaṃ.

Valāhakasaṃyuttaṃ samattaṃ.

Tass’uddānaṃ –

Suddhikaṃ sucaritañca dānūpakārapaññāsaṃ;
Sītaṃ uṇhañca abbhañca vātavassavalāhakāti.